Go̧dürea̧ Ma̧ȩ 16

Icharaita judiro̧ goaedëri̧ yo̧ chjaorëreji̧ri̧diro̧jo̧ȩ Jeova pio ju̧i̧iäpȩmo̧

1Ja̧dëa ji̧ icharaita judiro̧ ütëborë Eri̧ quȩmȩ chiriri pio judiri go̧düji̧ri̧rȩ baärëreji̧ri̧dirȩ Chi̧ quȩmȩ chiri maearäpȩmo̧. Ado Chi̧ quȩmȩ chiri üdë, jabechji̧ Chinai quȩmȩ ya̧mi̧ jauëräpȩ a̧rȩde, jabo Eri̧ quȩmȩ chiri oëräpȩde. Aja̧, tjoro a̧rȩde. Ado ja̧dira̧ baärëreji̧ri̧dirȩ icharaita judiro̧. Ado japamitë chjätä ëte go̧düdäräa̧dirȩ. Judiro̧ Ejito chiriri pio judiri go̧düa̧ri ja̧ cja̧rȩmȩ gupënȩ tjomo̧ra̧ a̧de goaji̧ri̧rȩ go̧düdärärëreji̧ri̧dirȩ. Ado pio jiro doro go̧düdäräa̧dirȩ Chi̧ quȩmȩ chiri maearäpȩ. 2Ado pio ju̧ri̧pȩ peaja̧di icharaita judiro̧ ütëborë goaedëri̧ ni̧bärërejri̧i̧diro̧jo̧ȩ Moiche ju̧i̧iäpȩmo̧, Aro̧ ju̧i̧iäpȩmo̧. 3Ja̧di ta̧rëri̧ yo̧a̧diro̧jȩrȩ:

—'Chja jabechji̧ ja̧bo tänȩa̧täremȩdiibëda, Jeova judi Ejitoräpȩ cjo̧ro̧ji̧ri̧ oa ja̧bo tänȩa̧täremȩdiibëda' quëna̧ jo̧rȩtarea̧rȩ. Danȩrȩ, pio idëpȩ chjadëri̧ jurareji̧ri̧rea̧rȩ go̧a̧ oa. Ado dami̧ti̧ a̧de jurarea̧ oa jura̧rea̧rȩ ma̧i̧ri̧. Jabëdiärea̧ decjiari̧ cjo̧ro̧rëreji̧ri̧rea̧rȩ. Jabo pio yoaiäpȩrea̧rȩ yaba̧, chiri maearäpȩ, chiri chjadëdëräpȩ. Ado pio mȩnȩro̧ jauëräpȩmo̧ ëba ma̧na̧renȩro̧ibe a̧ro̧rȩ ta̧mȩcho̧ ja̧boji̧ri̧rȩ ja̧bopea̧ oa bucho ana̧. Jabo cjäri̧ marenȩro̧ibe, ma̧i̧ dari̧ japea̧renȩro̧ibe —yo̧ji̧ri̧rȩ ma̧ȩ goaedë oa yo̧rëreji̧ri̧diro̧jȩrȩ.

4-5Ja̧dëa ji̧ Jeova judi yo̧a̧dejȩ Moiche ju̧i̧:

—Danȩ, a̧dëri pio judiri gu̧ro tänȩparequede jurarea̧ oa. Cjümi̧ dari̧ gu̧ropade. Ado icharaita judiro̧, jabechji̧ doti̧mi̧ jäpadiro̧jo̧ȩ jibëa̧ jurarea̧ oa boapea̧ oa. Cja̧rȩmȩ do maea oa jurapea̧ oa boapadiro̧jo̧ȩ. Jabo cja̧ȩta̧ra̧ ichiri do chjätä ëte dopea̧rä, jabechji̧ cja̧rȩmȩ doi̧ maea jurapea̧ oa boadëpadirȩ jabo yo̧a̧ri̧ do jurapea̧ oa boapadirȩ. Aja̧, ja̧di dari̧ japatä earequedejȩrȩ cüdë ji̧ri̧ chjadëri̧ ütarapea̧ oa. 'Aja̧, cüdë yo̧a̧mi̧ japadiro̧da, ca̧ ma̧ȩrä boadiro̧da, ca̧ ma̧ȩrä boadëdiro̧da jabo jiadadiro̧coada' quëna̧ daba dapea̧ oa ütaraparequedejȩrȩ —yo̧mȩrȩ yo̧rëremȩdejȩ Moiche ju̧i̧ Jeova judi.

6Ja̧dëa̧ ji̧ Moiche judi, Aro̧borë a̧dopa tänȩrëreji̧ri̧diro̧jȩrȩ icharaita ji̧ri̧. Ado ja̧di ta̧rëri̧ yo̧ji̧ri̧rȩ yo̧a̧diro̧jȩrȩ:

—Danȩrȩ, pio yaba̧ ji̧tämȩräpȩmo̧ chjadëri̧ dabapanȩrȩ Jeova pio ju̧i̧ chjiari. 'Aja̧, pio judidida, ibë Ejito chiriri pio judiri go̧dü tänȩrëremȩ pio judidida' quëna̧ dabapanȩrȩ. 7Ado pio yaba̧ dopea̧rä uapai̧ dari̧ daparenȩro̧jo̧ȩ jibëa̧ jauëchja oa, a̧dë chjäte ma̧i̧ dari̧ tatamȩ oa. Aja̧, jibëa̧ jauëchja oa daparenȩro̧jo̧ȩ judi dibë ta̧rëa̧ tara, mȩnȩro̧ goaedëri̧ yo̧a̧ pio ju̧i̧ ta̧rëa̧ tara. Danȩrȩ, mȩnȩro̧ pio ibëiäpȩmo̧ goaedëri̧ yo̧a̧ ji̧, pio ibëiäpȩmo̧ tjamo̧ri̧ goaedëri̧ yo̧dëa̧renȩro̧ibe, jabo pio ju̧i̧iäpȩmo̧ yo̧a̧renȩro̧jo̧ȩ. Tjamo̧ davä. Pio ju̧i̧iäpȩmo̧ ma chjai̧dëri̧ ni̧bäa̧renȩro̧jo̧ȩ. Jabechji̧ a̧ro̧rȩ ma ja̧didë jabo Jeova pio judi. Aja̧, pio judirëremȩde ibë yo̧a̧mȩ judi. Ado pio judi yo̧a̧ oaiä, dëdë, ëba ma̧na̧ea̧ro̧dibe pio jauëräpȩmo̧. Ja̧di tara mȩnȩro̧ pio ibëiäpȩmo̧ ma̧ȩ goaedëri̧ yo̧a̧ ji̧, jabechji̧ Jeova pio ju̧i̧iäpȩmo̧ yo̧a̧renȩro̧jo̧ȩ, pio ibëiäpȩmo̧dë —yo̧ji̧ri̧rȩ yo̧a̧diro̧jȩrȩ.

8Ado Moiche judi ji̧dë u̧i̧ yo̧mȩrȩ a̧de yo̧rëremȩdejȩrȩ ja̧di ta̧rëri̧ yo̧mȩrȩ:

—Danȩrȩ, pio yaba̧ ji̧tärä Jeova judi yürüpadidibe go̧a̧ oa jurapea̧ oa. Ado dopea̧rä, chja̧pe ji̧ra̧ oa yürüpadidibe peaja̧di mȩnȩro̧ goae tarari̧ jurapea̧ oa. Ja̧di dari̧ japamȩrȩ yürüpadidibe doti̧mi̧. Mȩnȩro̧ pio ju̧i̧iäpȩmo̧ goaedëri̧ yo̧a̧ pio ju̧i̧ ta̧rëa̧didibe. Pio ju̧i̧iä yürüpadidibe. Jabo danȩrȩ ca̧ oti̧, mȩnȩro̧ pio ibëiäpȩmo̧ goaedëri̧ yo̧a̧ ji̧, pio ibëiäpȩmo̧ tjamo̧ri̧ goaedëri̧ yo̧dërenȩro̧ibe, jabo Jeova pio ju̧i̧iäpȩmo̧ goaedëri̧ yo̧renȩrȩ —yo̧a̧dejȩrȩ.

9Ja̧dëa ji̧ Moiche judi yo̧a̧dejȩ Aro̧ ju̧i̧:

—Danȩ, yo̧jȩrȩ icharaita ji̧ri̧ judiro̧ a̧dopë cjiatä Jeova ja̧ dachoro. Judiro̧ pio ju̧i̧iäpȩmo̧ goaedëri̧ yo̧a̧ pio oaiä a̧dopatä eadejȩrȩ. Yo̧jȩrȩ —yo̧mȩrȩ yo̧rëremȩdejȩ Aro̧ ju̧i̧ Moiche judi.

10Pio Aro̧ judi yo̧a̧ pio ju̧i̧iä a̧doparëreji̧ri̧dirȩ icharaita judiro̧. Ado Aro̧ judi ni̧bä chjaoa̧dejȩrȩ. Ado judi pio ji̧ri̧iäpȩmo̧ ni̧bä chjaoa̧ nöta chjaodëri̧ darëreji̧ri̧diro̧jo̧ȩ go̧a̧ra̧ ë oa chiri maearäpȩmo̧. Ado Jeova judi uapai̧ dari̧ na̧rȩa̧dejȩrȩ jibëa̧ jauëchja oa, a̧dë chjäte ma̧i̧ dari̧ tatamȩ oa. Go̧a̧ra̧ ë tjori judiri na̧rȩa̧dejȩrȩ. 11Ado Jeova judi yo̧a̧dejȩ Moiche ju̧i̧:

12—Danȩ, icharaita judiro̧ pio coaiäpȩmo̧ goaedëri̧ yo̧a̧ pio ju̧i̧ ta̧rëa̧requede. Ado pio yaba̧ dorë bira̧ marä yürüparequedejȩrȩ go̧a̧ oa. Ado dopea̧rä, ma̧i̧ri̧ jurarea̧ dapadirȩ chja̧pe oa. Ja̧di dari̧ yürüparequedejȩrȩ judiro̧ pio coa chjiari chjadëri̧ dabapea̧ oa. 'Aja̧, Jeova pio judidida, Ütë tjamo̧ pio judimo̧dida' quëna̧ dabapea̧ oa chjadëri̧ yürüparequedejȩrȩ. Aja̧, ja̧di ta̧rëri̧ yo̧jȩrȩ icharaita ji̧ri̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Jurarea̧ Ano̧mȩ judi tuti yürürëremȩdejȩrȩ

13Ja̧dëa ji̧ gȩnȩpea̧rä, cui̧chi̧ri̧ pua bubati̧rȩ pjo̧a̧na̧ra̧ji̧ri̧rȩ gu̧rona̧ra̧rëreji̧ri̧dirȩ icharaitarë cjo̧ro̧mȩräpȩ. Pumȩ judiro̧ chjaodëri̧ mitërea̧mi̧ dari̧ gu̧rona̧ra̧dirȩ. Ado ja̧dëa ji̧ dopea̧rä, jënȩro̧ cjo̧ro̧mȩ yuro nötai̧ oa a̧rȩmȩ chiri üdë uchja marëremȩde jurucjü üdë gu̧roa̧ oaiä. 14Ja̧dëa ji̧ jurucjüremȩ üdë gapea̧rä, pio jiro maearë cjiadiäa̧de daburo. Aja̧, guidimi̧ darë, pjo̧pa̧i̧rȩ, bërë bërearë cjiadiäa̧de. 15Ado icharaita judiro̧ pio ju̧i̧ daea̧ ji̧, '¿tjana̧cjivadi?, ¿tjana̧ japapȩa̧cjioadi?' quëna̧ jo̧rȩtaji̧ri̧rȩ dëbë ni̧bä chjaorëreji̧ri̧dirȩ jibëa̧ dëbëti̧ra̧ chia. Ja̧dëa ji̧ Moiche judi yo̧a̧dejȩrȩ:

—Danȩrȩ, Jeova judi dibë yürüa̧ chja̧pe pio judide. 16Jeova pio judi yo̧a̧ oa chjadëri̧ boapanȩrȩ ütëbo ja̧ oa, dibëa̧ bëräpȩ cjo̧ro̧ji̧ri̧ ja̧ oa. Ütëborë ma̧i̧ri̧ jurarea̧mi̧ dari̧ boapanȩrȩ. Cja̧rȩmȩ pumȩ ja̧ oa cja̧rȩmȩ tjae ana̧ tjomo̧mi̧ boapea̧de. Ja̧di dari̧ ütaraji̧ri̧rȩ boaparenȩrȩ nötadäräri̧ boapea̧ oa —yo̧mȩrȩ yo̧rëremȩdejȩrȩ Moiche judi.

17Ado pio ju̧i̧ ta̧rëa̧ oaiä icharaita judiro̧ pio jiro jurarea̧ oa boa̧diro̧jo̧ȩ. O judiro̧ ji̧ra̧ oa boa̧dirȩ. Ado o judiro̧ ji̧ra̧ tjamo̧dë oa boa̧dirȩ. 18Jabo judiro̧ boa̧ pio ju̧i̧ ütara̧ ji̧ ji̧mo̧ baäa̧de. Ji̧ra̧ oa boaji̧ri̧ judiro̧ ma̧i̧ri̧ jura̧diro̧jo̧ȩ jurarea̧ cjiadiädëri̧. Ado ji̧ra̧ tjamo̧ oa boadëji̧ri̧borë ma̧i̧ri̧ jura̧dirȩ 'nötadëdida' quëna̧rea̧ decjiari̧. Jabechji̧ jënȩro̧ ea̧mi̧ boa̧dirȩ ütëborë chjadëri̧ jurarea̧mi̧ dari̧.

19Ado ja̧dëa ji̧ yo̧a̧dejȩrȩ Moiche judi:

—Pio jiro jurarea̧ üdë boeadëpea̧de. 'Pio yaba̧ dopea̧rä jurapacuni̧da' quëna̧dëpea̧de.

20Jabo o judiro̧ Moiche pio ju̧i̧ ta̧rë ja̧bodëa̧diro̧jo̧ȩ. Jabechji̧ ma̧ȩ ta̧rëji̧ri̧borë boea̧diro̧jo̧ȩ o oa jaco jurapea̧ oa. Jabo cjäri̧ made, pio jiro jurarea̧remȩ üdë pö̧rö̧ mapea̧de ma̧i̧ da pjȩa̧pe bagari̧. Ado judiro̧ jiade ta̧rëa̧ oaiä ërecjiapea̧dejȩrȩ Moiche judi. 21Jabo ja̧di dari̧ japea̧ duri oa, jabechji̧ do nöta, dorë pea cjitëa̧rä icharaita judiro̧ ütëborë boadiärëreji̧ri̧dirȩ jurarea̧ oa, jënȩro̧ ea̧mi̧. Ütërë yürüa̧ pio ju̧i̧ boarëreji̧ri̧diro̧jo̧ȩ. Jabo jënȩro̧ boa̧ o üdë, daburo cjiadiäa̧mȩ üdë, jabechji̧ mo̧ë üdë cjüëtüpe baga̧ oaiä, jiro decjiapea̧de. Ui mapea̧de.

22Ado cja̧ȩta̧ra̧ ichimo̧ do chjätä ëte dopea̧rä, jënȩro̧ boa̧mi̧ boadëa̧dirȩ, jabo ji̧dë u̧i̧ boa̧dirȩ. Cja̧rȩmȩ pumȩ ja̧ oa tjae ana̧ tjomo̧mi̧ boarërea̧ ji̧, tjae ana̧ tjuriri̧ cjia oa ano̧ mire boa̧diro̧jo̧ȩ. Ado icharaita judiro̧ ji̧dë u̧i̧ boa̧ oaiä, tjamo̧ cjo̧ro̧ji̧ri̧ judiro̧ jäeno̧a̧diro̧jo̧ȩ Moiche ju̧i̧. 23Jabo Moiche judi yo̧a̧dejȩrȩ:

—Danȩrȩ, Jeova pio judi yo̧a̧ oa china̧chjari̧ tutipea̧de yaba̧ dopea̧ do üdë, cjiadiärea̧ do üdë. Jabechji̧ järätä chjaparea̧ dode. Jeova pio ju̧i̧iäpȩmo̧ jo̧rȩtarea̧ dode. Ado pio ju̧i̧iä jurarea̧ boadërea̧ dode. Ja̧di tara yo̧requededibe. Jabechji̧ mȩnȩro̧ eami̧ jëdano̧chji̧vä pio yaba̧ domȩ oa. Mȩnȩro̧ jo̧rȩta̧mi̧ tja̧rechji̧vä, chuma̧chji̧vä. Jabo jaco ja̧di dari̧ japadëpea̧de. Ado yaba̧ cjiadiäa̧mȩ jurarea̧ üdë, jabechji̧ boeapea̧de jaco jurapea̧ oa —yo̧mȩrȩ yo̧rëremȩdejȩrȩ Moiche judi.

24Ado Moiche judi yo̧a̧mi̧ japarëreji̧ri̧dirȩ. Cjiadiäa̧mȩ jurarea̧ pio ju̧i̧ boea̧diro̧jo̧ȩ dopea̧rä jurapea̧ oa. Ado pö̧rö̧ chiape bagadëa̧de. Pjȩa̧pe bagadëa̧de. 25Ado ja̧dëa ji̧ dopea̧rä Moiche judi yo̧a̧dejȩrȩ:

—Danȩrȩ, mȩnȩro̧ pedi boea̧ jurarea̧ pio ju̧i̧ jurachji̧vä. Jabechji̧ yaba̧ domȩ üdë Jeova pio ju̧i̧ jo̧rȩtarea̧ dode. Järätä chjaparea̧ dode. Ja̧di tara china̧chjari̧ tutipea̧de pio yoa do üdë. Ado jurarea̧ oa boarea̧mi̧dëde yaba̧. Jabechji̧ daburo china̧mȩ oa dadëpanȩrȩ. 26Danȩrȩ ca̧ oti̧, ja̧di dari̧ japaji̧ri̧rȩ cjo̧ro̧panȩrȩ. 6 do nöta jurarea̧ boapanȩrȩ jabo cjiadiärea̧ doro, jabechji̧ boadëpanȩrȩ. Cjiadiärea̧ doro jurarea̧ oa dadëpanȩrȩ järätä chjaparea̧ do tara —yo̧mȩrȩ yo̧rëremȩdejȩrȩ Moiche judi.

27Jabo o judiro̧ ta̧rë japadëa̧diro̧jo̧ȩ Moiche ju̧i̧. Jabechji̧ 6 do chjätä ëte jibëa̧ bëräpȩ cjiadiätärea̧ ji̧, cjiadiärea̧ doro jibëa̧ bëräpȩ cjiadiätärea̧ ji̧, jabechji̧ jätea̧dirȩ jurarea̧ oa boapea̧ oa. Jabo cjäri̧ madirȩ, dadëa̧dirȩ.

28Ja̧dëa ji̧ Jeova judi icharaita ütëbo oa yo̧mi̧ dari̧ yo̧rëremȩdejȩ Moiche ju̧i̧:

—¿Na̧pai̧ japamitë ta̧rë ja̧bodëparenȩro̧coe? ¿Na̧pai̧ japamitë jiadaparenȩro̧jo̧ȩ ca̧ ma̧ȩ oa? 29Danȩrȩ, Jeova pio judirequede. Ado chjadëri̧ japamȩrȩ järätä chjaparea̧ do oa yürüa̧requededibe mȩnȩro̧ chjadëri̧ järätä chjapapea̧ oa. Ja̧di tara cja̧rȩichimo̧ do chjätä ëte dopea̧rä, jabechji̧ yo̧a̧ri̧ do jurapea̧ oa yürüparequededibe jurarea̧ oa. Ado ja̧dëa ji̧ järätä chjaparea̧ dopea̧rä, cjiadiärea̧ dopea̧rä, jabechji̧ dibëa̧ bëräpȩ cjiadiächji̧vä. Jurarea̧ oa boapea̧ ji̧ jo̧rȩtadëchji̧vä —yo̧mȩrȩ yo̧a̧dejȩ Moiche ju̧i̧ Ütë tjamo̧ judi, ütëbo oa yo̧mi̧ dari̧.

30Ado pio ju̧i̧iä ja̧bepadërëreji̧ri̧dirȩ icharaita judiro̧ cjiadiärea̧ doro. Jabechji̧ järätä chjapea̧ do tara ja̧bepadëa̧dirȩ.

31Ado icharaita judiro̧ a̧dëri pio judiri gu̧romȩ jurarea̧ pio ju̧i̧ yo̧a̧ ji̧, jabechji̧ 'ma̧na̧' quȩra̧ yo̧a̧diro̧jo̧ȩ. Chira̧to quȩmȩ cho bëre bëreami̧ darëremȩde. Chja̧pe pjatë oa, ȩra̧ mire ëte jurami̧ tarari̧ jurarëreji̧ri̧diro̧jo̧ȩ.

32Ja̧dëa ji̧ Jeova pio judi yo̧a̧ oa yo̧rëremȩdejȩrȩ Moiche judi icharaita pio ji̧ri̧iäpȩmo̧:

—Danȩrȩ, ma̧na̧ quȩmȩ jurarea̧ pio ju̧i̧ mitëchji̧vä china̧chjari̧ boeapea̧ oa, ibëa̧ duri oa ano̧ mire cjo̧ro̧paji̧ri̧ pio judiro̧ irä dapea̧ oa. 'Aja̧, ibëa̧ tarurea̧ judiro̧ pio jiro jurarea̧ oa jurarëreji̧ri̧diro̧da, Jeova pio judi yürüa̧ oa jurarëreji̧ri̧diro̧da, Ejito chiriri pio judiri go̧dürërea̧ ji̧, chiri maearäpȩ chjätäti̧ cjiarërea̧ ji̧, pio jiro jurarea̧ oa yürürëremȩdiji̧ri̧da' quëna̧ jo̧rȩtapea̧ oa chjadëri̧ boeachji̧vä jabëtari̧mi̧ oa —yo̧a̧dejȩrȩ yo̧a̧dejȩrȩ Moiche judi Jeova pio judi yo̧a̧ oa. 33Ado pio ju̧i̧iä Moiche judi yo̧a̧dejȩ Aro̧ ju̧i̧:

—Danȩ, tjae ana̧ tjomo̧mi̧ boavä ma̧na̧ oa. Chjadëri̧ boeapea̧ oa mitëvä. Ibëa̧ri ja̧ji̧ri̧ pio judiro̧ irä dapea̧ oa chjadëri̧ boeajo̧ȩ Jeova pio ju̧i̧ ja̧ dëbëräpȩ ju̧ri̧ —yo̧a̧dejȩ.

34Ja̧dëa ji̧ Jeova judi Moiche pio ju̧i̧ yo̧a̧mi̧ japarëremȩde Aro̧ judi. Tjaerä boa ëte china̧chjari̧ tutirëremȩdejȩ chjadëri̧ boeapea̧ oa. Ichi chjö̧na̧i̧ ma̧ȩ chiapamȩ to cjararë a̧rȩmȩ dëbëräpȩ ju̧ri̧ boeapea̧ oa china̧chjari̧ tutia̧dejȩ. 35Ado Ütë tjamo̧ judi chjadëri̧ yürüa̧ oaiä, ji̧dë ma yürüa̧ oaiä, jabechji̧ icharaita judiro̧ ma̧na̧ quȩmȩ jurarea̧ oa jurarëreji̧ri̧diro̧jo̧ȩ japamitë ana̧ tjamo̧ nö̧ta. Aja̧, 40 ui nöta jurarëreji̧ri̧diro̧jo̧ȩ. Jurarëreji̧ri̧diro̧jo̧ȩ jënȩro̧ Canaa̧ quȩmȩ chiriräpȩ go̧düdäräa̧rä yuro. Ado judiri juradëji̧ri̧pea̧diro̧jo̧ȩ.

Currently Selected:

Go̧dürea̧ Ma̧ȩ 16: Pume

Highlight

Compare

Copy