Go̧dürea̧ Ma̧ȩ 15

Moiche judi icharaitaborë go̧a̧rërejri̧ri̧diro̧jo̧ȩ Ütë tjamo̧ ju̧i̧

1Ja̧dëa ji̧ Moiche judi, icharaita pio judiro̧borë go̧a̧ji̧ri̧pea̧diro̧jo̧ȩ Jeova pio ju̧i̧iäpȩmo̧. Ja̧di ta̧rëri̧ go̧a̧ji̧ri̧rȩ go̧a̧diro̧jo̧ȩ:

“'Jeova pio ju̧i̧ go̧a̧coni̧da,

goae tarari̧ boadäräa̧mȩ oa go̧a̧cuni̧da,

ana̧ri̧ na̧rȩmȩrȩ boadäräa̧diji̧ri̧da,

jibëa̧ jauëchjara̧ na̧rȩa̧diji̧ri̧da,

uiräpȩ jemu̧i̧ ja̧bo tänȩa̧diji̧ri̧da,

yaerä buë chaji̧ri̧bo jemu̧i̧ ja̧bo tänȩa̧diji̧ri̧da,

ui coëcoëaräpȩ jemu̧i̧ ja̧bo tänȩa̧diji̧ri̧da'

quëna̧mȩrȩ go̧a̧coni̧da.

2'Ibëa̧ Ano̧mȩ pio ju̧i̧ go̧a̧quëda,

coa ju chiarea̧ yürümȩ pio judidida,

coa chjadëri̧ jidamȩ pio judidida,

coa chjätärea̧ yürüa̧mȩ pio judidida,

ca̧ Ütë pio judidida,

chjacjiamȩri̧ ni̧bäriä go̧a̧cuni̧da,

ca̧ ama̧i̧ ja̧ Ütë pio ju̧i̧ go̧a̧coni̧da,

ju chia tjamo̧mȩ pio judidida,

a̧dë chjäte jauëchjamȩ pio judidida'

quëna̧mȩrȩ go̧a̧coni̧da.

3'Goae tarari̧ dëbëpe chjaomȩdida,

dëbëpe chjaoa̧diji̧ri̧da,

acji tai̧mȩmi̧ dari̧ japamȩdida,

Jeova quȩmȩ pio judidida'

quëna̧mȩrȩ go̧a̧coni̧da.

4'Pjarao̧ ja̧ guadia oa ja̧bo tänȩa̧diji̧ri̧da,

ui ana̧räpȩ jemu̧i̧ ja̧bo tänȩa̧diji̧ri̧da,

yae chara pio ju̧i̧ aeno̧a̧diji̧da,

guadia tjamo̧ yo̧ji̧ri̧ pio ji̧ri̧bo aeno̧a̧diji̧ri̧da,

pjarao̧ üdë tjamo̧ ba chia daea̧ guadia pio ji̧ri̧bo aeno̧a̧diji̧ri̧da,

ui coëcoëaräpȩ jemu̧i̧ ja̧bo tänȩa̧diji̧ri̧da'

quëna̧mȩrȩ go̧a̧coni̧da.

5'Cjücjürü tjamo̧räpȩ chami̧a̧diro̧da,

ta̧dëmi̧ darë chami̧ birë baäa̧diro̧da,

ui ëteräpȩ cjiadiäa̧diro̧da'

quëna̧mȩrȩ go̧a̧coni̧da.

6'Jeova pio judida,

a̧dë chjäte ju chiamȩ pio judidida,

dëbëparea̧ decjiari̧ boadärämȩdida,

jȩa eadëji̧ri̧ pio ji̧ri̧ boadäräa̧diji̧ri̧da,

jȩa eadëji̧ri̧ pio ji̧ri̧ yarëa̧mi̧ dari̧ japea̧diji̧ri̧da,

jabechji̧ uapai̧ da tjamo̧dida'

quëna̧mȩrȩ go̧a̧coni̧da.

7'A̧dë chjäte ju chiamȩdida,

jȩa dëbëpe chjaoji̧ri̧ pio ji̧ri̧ chjaodëri̧ jabo tänȩa̧diji̧ri̧da,

cjo̧dërë gärimȩmi̧ dari̧ ërecjiape baga̧diji̧ri̧da,

cärä ga oa tüe baämi̧ dari̧ ja̧bo tänȩa̧diji̧ri̧da'

quëna̧mȩrȩ go̧a̧coni̧da,

Jeova pio ju̧i̧ go̧a̧coni̧da.

8'Ui ana̧ pio ju̧i̧ japea̧diji̧da,

jibëa̧ yara̧ pio ju̧ri̧ra̧ pjura̧mi̧ dari̧ japea̧diji̧da,

ui ana̧ pio ju̧i̧ pjurami̧ dari̧ japea̧diji̧da,

tüdüa̧ oa cjiarea̧mi̧ dari̧ japea̧diji̧da,

uë tjamo̧ oa cjiari̧ tutia̧ oa cjiadiä tänȩa̧diji̧da,

do ui cjücjürü tjamo̧remȩ oa chjuapa tänȩa̧diji̧da,

pumȩrȩ boë cjaeärea̧mi̧ dari̧ chjuapa tänȩa̧diji̧da'

quëna̧mȩrȩ go̧a̧coni̧da.

9'Jabo icharaita ji̧ri̧ eadëji̧ri̧ pio judiro̧ yo̧a̧diro̧da,

acji jäpaquiji̧ri̧da,

icharaita pio ji̧ri̧ acji jädäräpaquiji̧ri̧da,

jibëa̧remȩ pio ju̧i̧ bae mitëpaquëda,

cüdë dae ja̧boa̧mi̧ bae mitëpaquëda,

ca̧ tjapënȩra̧ pio ju̧ri̧ra̧ ja̧bo tänȩpaquiji̧ri̧da,

dëbëribo jo̧dë chiamȩra̧ ja̧bo tänȩpaquiji̧ri̧da,

chjaodëri̧ boadäräpaquiji̧ri̧da,

icharaita ji̧ri̧ eadëji̧ri̧ judiro̧ ja̧di dari̧ yo̧a̧diro̧da,'

quëna̧mȩrȩ go̧a̧coni̧da,

Jeova pio ju̧i̧ go̧a̧coni̧da.

10'Jabo Jeova pio judimo̧dida,

cja̧rȩmȩ co pjura̧ oaiä acji choa tänȩa̧diji̧ri̧da,

jemu̧i̧ ja̧bo tänȩa̧diji̧ri̧da,

chjiparari chacha tjamo̧mi̧ darë chami̧därä tänȩa̧diji̧ri̧da,

ui ana̧ gö̧ma̧ üdë boi̧dë tjamo̧dida,

ui ana̧ pio judi tjürüa̧mi̧ dari̧ japa tänȩa̧diji̧ri̧da,

chami̧därä tänȩa̧diji̧ri̧da'

quëna̧mȩrȩ go̧a̧coni̧da.

11'Jeova pio ju̧i̧ go̧a̧coni̧da,

ado cja̧rȩmo̧ ütë üdë nötadë madiji̧da,

a̧dë chjäte chjacjiamȩ tjamo̧dida,

chjai̧dë oa miredëmȩdida,

tatachja tjamo̧dida,

jibëa̧ jauëchjara̧ uapai̧ dari̧ na̧rȩmȩdida,

japadai̧ damȩ pio ju̧i̧ japamȩdida,

ado cja̧rȩmo̧ ütë üdë nötadë madiji̧da'

quëna̧mȩrȩ go̧a̧coni̧da.

12'Jeova judi a̧dë chjäte ju chiamȩdida,

daburo na̧ra̧ oa cjiami̧ dari̧ cjiadiä tänȩa̧diji̧ri̧da,

Jeova pio judi tänȩa̧ oaiä ja̧boa̧diro̧da,

ibë eadëji̧ri̧ pio judiro̧ tjürüa̧ oa cjiami̧ dari̧ cjiadiäa̧ madiro̧da'

quëna̧mȩrȩ go̧a̧coni̧da,

Jeova pio ju̧i̧ go̧a̧coni̧da.

13'Icharaita pio ji̧ri̧ ea tjamo̧diibëda,

jibëa̧ pumȩ pio ji̧ri̧ ea tjamo̧diibëda,

eadëpe bagarea̧ decjiari̧ eadiibëda,

judi ea̧ chja̧oerä cjiaji̧ri̧ oa japea̧diibëda,

yabo ëba baäa̧mȩmi̧ dari̧ japea̧diibëda,

Ejito chiriri judiri chjadëri̧ go̧dü tänȩa̧diibëda,

ado go̧düa̧ oa cjiaji̧ri̧ oa chjadëri̧ ëba tai̧mȩmi̧ dari̧ japea̧diibëda,

judi yo̧rërea̧ chiriräpȩ yuro chjadëri̧ ëba baäpadiibëda,

jibëa̧ ju chiarea̧ra̧ pio ju̧ri̧ra̧ chjadëri̧ ëba baäpadiibëda'

quëna̧mȩrȩ go̧a̧coni̧da,

Jeova pio ju̧i̧ go̧a̧coni̧da.

14'Jeova judi japea̧ pio ju̧i̧ chjiari ta̧rëpadiro̧da,

oëra̧ti̧ oa cjo̧ro̧ji̧ri̧ judiro̧ goë goë ta̧rëpadiro̧da,

ado cja̧rȩmo̧ ma̧ȩ oa ni̧bäji̧ri̧ judiro̧ goë goë ta̧rëpadiro̧da,

uapa tjamo̧ji̧ri̧rȩ goë goë ta̧rëpadiro̧da,

i ma̧na̧gura cjiaji̧ri̧rȩ goë goë ta̧rëpadiro̧da,

pjiriteo judiro̧ jibëa̧ chji̧ oa bücjü ma cjiari̧ jo̧rȩtapadiro̧da,

uapea̧ üdë jibëa̧ chji̧ oa boa̧ oa cjia mapadiro̧da,

15ado Edomo̧räpȩ tjamo̧ cjo̧ro̧ji̧ri̧ judiro̧ peaja̧di uapaji̧ri̧rȩ ta̧rëpadiro̧da,

uapea̧ üdë chjadëri̧ jȩoarea̧mi̧dëri̧ japapadiji̧ri̧da,

ado moabita judiro̧, chiri ji̧ra̧ri̧ goaji̧ri̧ judiro̧, i ma̧na̧gura järi̧ cjiapadiro̧da,

cananeo judiro̧borë uapa tjamo̧padiro̧da,

järi tjamo̧dëpe bagapadiro̧da,

goë goë ta̧rëa̧ oaiä uapa mapadiro̧da,

16uapea̧ üdë boadäräpadiji̧ri̧da,

ju chiadëpe bagari̧ boadäräpadiji̧ri̧da,

Jeova ja̧ jauëchja pio ju̧i̧ chjiari ta̧rëa̧ oaiä jabomo̧ dae cjiapadiro̧ibëda,

acji tai̧tärea̧ ji̧, jabomo̧ dae cjiapadiro̧ibëda,

a̧ro̧rȩ ji̧ri̧ ja̧ chirirä chjätäji̧ri̧ oa jabomo̧ dae cjiapadiro̧ibëda,

Jeova judi Ejito chiriri go̧dü tänȩrërea̧ pumȩ pio ji̧ri̧ jabomo̧ dae cjiapadiro̧ibëda,

mu̧i̧tjoi̧ maearë cjo̧ro̧rërea̧ pumȩ pio ji̧ri̧ dae cjia mapadiro̧ibëda,

jare chjadüa̧ oa cjiami̧ dari̧ cjiaji̧ri̧ pumȩ pio ji̧ri̧ jabomo̧ dae cjiapadiro̧ibëda,

acji jana̧tärea̧ ji̧ japadëpadiro̧ibëda'

quëna̧mȩrȩ go̧a̧coni̧da,

Jeova pio ju̧i̧ go̧a̧coni̧da.

17'Jeova judi tänȩpadiibëda,

jibëa̧ ya̧mi̧räpȩ ju̧ri̧ go̧düdärä tänȩpadiibëda,

jibëa̧ ya̧mi̧räpȩ ju̧ri̧ cjo̧ro̧ tänȩpadiibëda,

judi mitëa̧ ya̧mi̧ pio ju̧ri̧ cjo̧ro̧ tänȩpadiibëda,

jibëa̧ bëmi̧ da oa mitëa̧diji̧da,

jënȩ bëpapea̧ oa mitëa̧diji̧da,

jibëa̧ jauëchjara̧ japea̧diji̧da,

pio ju̧ri̧ cjo̧ro̧ tänȩpadiibëda'

quëna̧mȩrȩ go̧a̧coni̧da, quëna̧mȩrȩ go̧a̧coni̧da.

18'Jeova pio judidida,

pio judimo̧diibëda,

Ütëdëpe bagarea̧ decjiari̧ Ütëdida,

bucho ana̧ Ütëdida,

pio ju̧i̧ ja̧ chja̧oerämo̧ cjo̧ro̧quëda'

quëna̧mȩrȩ go̧a̧coni̧da,

Jeova quȩmȩ ju̧i̧ go̧a̧coni̧da."

Moiche ja̧ oyi̧ jini̧ peaja̧di go̧a̧nȩjȩ Ütë ju̧i̧iäpȩmo̧

19Icharaita judiro̧, jabechji̧, dabu ga marä chjadëri̧ chjätäa̧dirȩ ui coëcoëa oa. Ui tjoro cjiaji̧ri̧rȩ chjätäa̧dirȩ oëräpȩ yuro. Jabo ejichio judiro̧ chjadëri̧ chjätädëa̧dirȩ. Yae charara̧ tai̧ji̧ri̧ judiro̧, yaerä buë chaji̧ri̧ judiro̧ ja̧boa̧ maeadirȩ. Guadia ütëborë ja̧boa̧ maeadirȩ. Jeova pio judi tänȩa̧ oaiä acji choa̧dejȩrȩ tüdüa̧ oa cjiaremȩ ui pio judi jemu̧i̧ ja̧borea̧mi̧ dari̧. 20Ado pio ju̧i̧iä Aro̧ pio ju̧i̧ ja̧ jo̧ȩra̧mi̧ jini̧, Maria quȩyi̧ jini̧ tarupea̧nȩ go̧a̧pea̧ ji̧. Ütërë ea jana̧ chjadüa̧ oa ni̧bäyi̧ pio jini̧, jibëa̧ chji̧ yocodëmi̧ da oa mitëyi̧rȩ tarupea̧nȩ go̧a̧pea̧ ji̧. Goa goa cürë go̧a̧nȩjȩ Jeova pio ju̧i̧iäpȩmo̧. Paeroyi̧rȩ go̧a̧rëreyi̧nȩjȩ. Ado ivi jini̧ro̧ ütëborë peaja̧di mitëa̧ni̧ro̧jȩrȩ jibëa̧ chji̧ yocodëmi̧ da oa. Ado cho̧rë paeroa̧ni̧ro̧jȩ Maria pio ji̧. Bochegua bochegua cjiaji̧ri̧rȩ cho̧rë paeroa̧ni̧ro̧jȩ jibëa̧ chji̧ yocodëmi̧ da oa goa goa cürëji̧ri̧rȩ.

21Ado Maria jini̧, ja̧di ta̧rëri̧ go̧a̧rëreyi̧nȩjȩ Jeova ju̧i̧iäpȩmo̧:

“Jeova pio ju̧i̧ go̧a̧cuni̧da,

a̧ro̧rȩ ütëborë go̧a̧täreji̧ri̧a̧ro̧ju̧i̧da,

goae tarari̧ boadäräa̧mȩ pio ju̧i̧ go̧a̧cuni̧da,

chjacjiamȩri̧ boadäräa̧mȩ oa go̧a̧cuni̧da,

yae ütëbo oa ui ana̧räpȩmo̧ aeno̧a̧diji̧ri̧da,

yaerä buë chaji̧ri̧bo aeno̧a̧diji̧ri̧da,

pio ju̧i̧mo̧i̧ oa go̧a̧cuni̧da,

Jeova pio ju̧i̧ go̧a̧cuni̧da.”

Aja̧, Jeova judi Icharaita pio ji̧ri̧ ui coëacoëa oa chjadëri̧ chjätä tänȩa̧ duri oa, ja̧di ta̧rëri̧ jo̧rȩtaji̧ri̧rȩ go̧a̧rëreji̧ri̧diro̧jo̧ȩ pio ju̧i̧iäpȩmo̧.

Ui üdë Mara quȩmȩräpȩ ju̧ri̧, jabechji̧ ëcararëremȩde

22Ja̧dëa ji̧ Moiche judi ëba baärëremȩdejȩrȩ icharaita ji̧ri̧. Ui coëcoëa oa a̧dë baämȩrȩ ëba baärëremȩdejȩrȩ Chu quȩmȩ chiri maearäpȩmo̧. Ado judiro̧ chiri maearäpȩ tjarari̧ do nöta tai̧a̧ ji̧, jabechji̧ ui oa datärea̧ ji̧ dadëa̧diro̧jo̧ȩ. 23Ja̧dëa ji̧ Mara quȩmȩräpȩ go̧düdäräa̧rä daea̧dirȩ ui oa. Jabo cjäri̧ made, ma̧i̧ da ëcararëremȩde. Jararea̧mi̧dërëremȩde. Pio ju̧i̧iä Mara quȩmȩra̧ pio ju̧ri̧ra̧ quȩpea̧ oa cjiarëremȩde pio jiro tjo to jimi̧ daräpȩ. Aja̧, 'ëcara' yo̧mȩ quȩra̧ pio ju̧ri̧ra̧ quȩpea̧ oa cjiarëremȩde. 24Ado ui chjadë oa dadëa̧ oaiä, icharaita judiro̧ ma̧ȩ goaedëra̧ ni̧bärëreji̧ri̧diro̧jo̧ȩ Moiche ju̧i̧. Ado iëno̧ë ta̧rëa̧diro̧jo̧ȩ: "¿Tjana̧ oa jaraparea̧rȩ?"

25Ado judiro̧ iëno̧ë ta̧rëa̧ oaiä, Moiche judi goë cjo̧dërëremȩde Jeova pio ju̧i̧iä pio jibë a̧dotä. Ado Jeova judi na̧rȩa̧dejȩ Moiche ju̧i̧ to a̧ oa. Ado Ütërë yo̧a̧ oa, Moiche judi aeno̧a̧dejȩ uiräpȩmo̧. Ado pio ju̧i̧iä chjaodëri̧ ui chjadëpea̧de. Jararea̧mi̧ dapea̧de.

Ado Mara quȩmȩräpȩ ju̧ri̧ Jeova judi jibëa̧ ma̧ȩ oa yürürëremȩdejȩrȩ icharaita ji̧ri̧ judiro̧ tüdüa̧mi̧ darä cjo̧ro̧pea̧ oa. Aja̧, pio jiro ma̧ȩ oa yürüa̧dejȩrȩ pio ji̧ri̧ chjadëri̧ ütarë dapea̧ oa. 'Aja̧, cüdë yo̧a̧mi̧ ta̧rëdiädiro̧da, cüdë yo̧a̧mi̧ ta̧rë japadëdiro̧da' quëna̧ ütarë dapea̧ oa pio jiro ma̧ȩ oa yürürëremȩdejȩrȩ. 26Ja̧di ta̧rëri̧ yo̧mȩrȩ yo̧a̧dejȩrȩ: "Danȩrȩ, dibëa̧ Ütërërequede cüdë. Jeova pio judirequede. Ado mȩnȩro̧ pio coa nötadäräri̧ ta̧rë ta̧rë japarä judi, cüdë yo̧a̧ ma̧ȩ pio ju̧i̧ ji̧dë ma ta̧rëdiäji̧ri̧rȩ cjo̧ro̧rä judi, mȩnȩro̧ ca̧ ma̧ȩrä coëma cjiari̧ cjo̧ro̧rä judi, jabechji̧ bape chjaodëparequededibe. Tjamo̧ davä, mȩnȩro̧ ca̧ ma̧ȩrä cjo̧ro̧rä judi, cüdë Ejitoräpȩ cjo̧ro̧ji̧ri̧ ji̧ri̧ gitora̧ pio ju̧ri̧ra̧ bape chjaorërea̧mi̧ bape chjaodëparequededibe, jabo chjadëri̧ cjo̧ro̧rea̧ yürüparequededibe. Jabechji̧ Jeova pio judirequede cüdë. Dibë chjaparȩmȩ pio judirequede." Aja̧, ja̧di ta̧rëri̧ yo̧mȩrȩ yo̧rëremȩdejȩrȩ icharaita ji̧ri̧ Ütë tjamo̧ judi.

27Ja̧dëa ji̧ japamitë chjätä ëte, go̧düdärärëreji̧ri̧dirȩ Eri̧ quȩmȩräpȩ, tjo to jimi̧ daräpȩ, 70 torë cjiamȩräpȩ. Ado dabu ëteri pio judiri cjitëmȩ ui üdë, jabechji̧ cjitë chjaorëremȩde. 12 puëri judiri cjitërëremȩde ui üdë. Ado pio jiro ui yuroropȩ ju̧ri̧ jo̧ bori̧ oa cji̧deno̧rëreji̧ri̧dirȩ japamitë boi̧chji̧ cjo̧ro̧pea̧ oa.

Currently Selected:

Go̧dürea̧ Ma̧ȩ 15: Pume

Highlight

Compare

Copy