Go̧dürea̧ Ma̧ȩ 14
14
Ütë tjamo̧ judi ma̧ȩ yürürëremȩdejȩ Moiche ju̧i̧
1Ja̧dëa ji̧ Jeova judi yo̧rëremȩdejȩ Moiche ju̧i̧:
2"Danȩ, Icharaita judiro̧ ma̧na̧ durimo̧ baätä earequedejȩrȩ jabo jachi tjamo̧dë oa jabo. Pirarote quȩmȩ dëbëräpȩ ju̧ri̧ jo̧ oa japatä earequedejȩrȩ Bachepjo̧ quȩmȩ quȩri̧räpȩ. Do ji̧ra̧dë cjo̧ro̧pea̧ jo̧ oa japatä earequedejȩrȩ. Pio ju̧ri̧pȩ, ui coëcoëa yuroropȩ cjiadiätä earequedejȩrȩ Migodo quȩmȩ dëbëräpȩ. 3Ado pjarao̧ judi, 'pio ju̧ri̧pȩdiro̧da' quëna̧ dabapea̧rä, 'Aja̧, icharaita judiro̧ dabadëpea̧ jirodiro̧da, baärea̧ no̧ oa dabadëdiro̧da, chiri maea oaiä tutia̧ oa cjiami̧ dari̧ cjiadiro̧da' quëna̧ jo̧rȩtapade pio dibë chjiari. 4Ado danȩrȩ, ja̧di dari̧ jo̧rȩtamȩrȩ acji jana̧padidibe jibëa̧ guadia pio ji̧ri̧ nöta. Pio cüdë chjuari̧ jiada tänȩa̧ oa acji jana̧padiro̧dibe cüdë goae tarari̧ boadärärea̧mi̧ dari̧. Danȩ, cüdë ütara̧mi̧ japaparequedejȩrȩ. Ejitoräpȩ cjo̧ro̧ji̧ri̧ ütëborë, 'Aja̧, Jeova pio judidida, ba chia tjamo̧dida, pjarao̧ ja̧ guadia oa chjaodëri̧ boadäräa̧diji̧ri̧da' quëna̧ dabarea̧mi̧ dari̧ na̧rȩparequedejȩrȩ ca̧ jauëchja oa." Aja̧, ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi. Ado Jeova judi yo̧a̧mi̧ japarëreji̧ri̧dirȩ icharaita judiro̧. Jënȩro̧ ma̧na̧ durimo̧ baäeno̧a̧dirȩ jachidai̧ oa.
Ejitoriji̧ri̧ guadia judiro̧ cho̧rë järëreji̧ri̧diro̧jȩrȩ icharaita ji̧ri̧
5Ado Pjarao̧ judi, ado jȩa a̧doji̧ri̧ judiro̧ icharaita pio ji̧ri̧ chjiari ta̧rëa̧rä, 'Aja̧, baäa̧mi̧ baäa̧dirȩ' yo̧a̧ oa ta̧rëa̧rä, ano̧ mire jo̧rȩtaji̧ri̧pea̧dirȩ. 'Chia chia, icharaita pio ji̧ri̧ go̧dü tänȩa̧a̧ro̧ji̧ri̧da, go̧dürea̧ yürüdëa̧täreji̧ri̧a̧ro̧ji̧ri̧da, ibëa̧ mu̧i̧tjoi̧ goadëji̧ri̧pea̧a̧ro̧da yaba̧' quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ. 6Ado pio ju̧i̧iä pjarao̧ judi chjaodëri̧ jëdano̧rëremȩdejȩ jibëa̧ yae chara oa, acji järea̧ yae chara oa. Ado jibëa̧ guadia pio ji̧ri̧ ëna̧diärëremȩdejȩrȩ icharaita pio ji̧ri̧ cho̧rë jäpea̧ oa. 7Aja̧, jibëa̧ yae chara chjadë tjamo̧ oa mitërëremȩde, acji järea̧ yae chara chjadë oa, 600 oa. Ado o oa, ütëbo oa, yae chara chjadë tjamo̧dë oa peaja̧di mitërëremȩde. Ado jibëa̧ yae chararä cjia marëreji̧ri̧dirȩ tjamo̧ acji tai̧ji̧ri̧ pio judiro̧. 8Ado Jeova judi tänȩa̧ oaiä, jabechji̧ chjuari̧ jiadamȩrȩ cho̧rë jäa̧rëremȩdejȩrȩ icharaita ji̧ri̧ pjarao̧ judi. Aja̧, uapadëji̧ri̧rȩ go̧düreji̧ri̧ oa, 'pjarao̧ pio ju̧i̧ boadärärea̧ daea̧a̧ro̧ju̧i̧da' quëna̧ji̧ri̧ oa cho̧rë järëremedejȩrȩ icharaita ji̧ri̧ jibëa̧ guadia pio ji̧ri̧ nöta. 9Aja̧, cho̧rë järëreji̧ri̧diro̧jȩrȩ Ejitoriji̧ri̧ guadia judiro̧ ütëbodärärë. O judiro̧ jäa̧dirȩ yae charara̧. Ado o judiro̧ jäa̧dirȩ yae oa buë chaji̧ri̧rȩ. Ado japamitë chjätä ëte, jabë jachiri darëreji̧ri̧diro̧jȩrȩ icharaita ji̧ri̧. Ui coëcoëa yuroräpȩ cjiaji̧ri̧ oa daea̧diro̧jȩrȩ Pirarote quȩmȩ queri̧räpȩji̧ri̧ oa, Bachepjo̧ quȩmȩ quȩri̧räpȩji̧ri̧ oa.
10Ado icharaita judiro̧ Ejitoräpȩ cjo̧ro̧mȩ ütë pio ju̧i̧ daea̧ oaiä, guadia buba oa acji jana̧ji̧ri̧ oa daea̧ oaiä, uapa tjamo̧pe bagarëreji̧ri̧dirȩ. Ado chjaodëri̧ goë cjo̧dëno̧a̧diro̧jo̧ȩ Jeova pio ju̧i̧iä jibë a̧dotä. 11Ado yo̧a̧diro̧jo̧ȩ Moiche ju̧i̧:
—¿Yö̧ta jo̧rȩtacjiavarenȩ? ¿Tjana̧pea̧ oa ëba jana̧cjiavarenȩibe pio yoaiäpȩ? 'Cjäri̧ madida, Ejito chiriräpȩ ju̧ri̧ na̧ra̧rea̧ decjiadida, ado pio ju̧i̧iä chiri maearäpȩ baäpea̧dida, ju̧ri̧pȩ na̧ra̧rea̧ ji̧ra̧dida' ¿quëna̧ jo̧rȩtadënȩ? Chjai̧dëri̧ japea̧renȩibe. Ejito chiriri pio judiri go̧dü tänȩa̧ oaiä chjai̧dëri̧ japea̧renȩibe. 12Peaja̧di yo̧tea̧rea̧ro̧mȩ a̧ro̧rȩ jabë Ejito chiriri pio go̧düdëa̧rä. "Chja jabechji̧ jabo cjiavä" yo̧tea̧rea̧ro̧mȩ. "Chja jabechji̧ Ejitoräpȩ cjo̧ro̧ji̧ri̧ pio ji̧ri̧ ja̧ mu̧i̧tjoi̧ maearë cjo̧ro̧rea̧rȩ" yo̧tea̧rea̧ro̧mȩ. "Chiri maearäpȩ ja̧bopea̧ ju̧i̧ u̧i̧ chjadëde davä, mu̧i̧tjoi̧ maearë cjo̧ro̧pea̧ üdë" yo̧ji̧ri̧rȩ yo̧tea̧rea̧ro̧mȩ. Jabo cjäri̧ marenȩ, ta̧rë ja̧bodëa̧renȩibe —yo̧ji̧ri̧rȩ ya̧rëreji̧ri̧diro̧jo̧ȩ Moiche ju̧i̧iäpȩmo̧ goëdëri̧ cjiaji̧ri̧rȩ.
13Jabo Moiche judi dëbë yo̧mȩrȩ yo̧a̧dejȩrȩ:
—Uapadëchji̧vä jabo jabechji̧, cjiadiächji̧vä mȩnȩro̧ cjiamȩräpȩ. Dae cjiachji̧vä. Pio yaba̧ chjadëri̧ daparenȩrȩ Jeova judi pio dibë chjiari tuti japapea̧ pio ju̧i̧, dibë chjadëri̧ chjätä tänȩpea̧ pio ju̧i̧. Pio jiro pumȩ ji̧ri̧, Ejito chiriri pio judiri acji jana̧ji̧ri̧ pio ji̧ri̧ ado judiri dadëparenȩro̧jȩrȩ bucho ana̧. 14Jabechji̧ bücjüri̧ cjiadëchji̧vä. Jeova pio judi pio dibë chjiari ano̧ mire acji tai̧mȩmi̧ dari̧ japapade dibë chjadëri̧ chjätä tänȩpea̧ oa. Jama̧i̧ri̧ cjiadëchji̧vä —yo̧mȩrȩ dëbë yo̧rëremȩdejȩrȩ Moiche judi.
Icharaita judiro̧ chjätärëreji̧ri̧dirȩ ui coëcoëa oa
15Ja̧dëa ji̧ Jeova judi yo̧rëremȩdejȩ Moiche ju̧i̧, pio jȩaiä goë tuti cjo̧dëmȩ oa:
—¿Jabo tjana̧ ju̧i̧iä pio coaiä goë tuti cjo̧dërenȩque? Jabechji̧ yo̧jȩrȩ icharaita ji̧ri̧ jënȩro̧ baäpea̧ ji̧ jëdano̧tä. 16Danȩ, na̧ tai̧rea̧ to oa uëräpȩmo̧ cjiari̧ arë gatëvä ui coëcoëa oa. Ja̧di dari̧ japea̧ oaiä, jabechji̧ tutia̧ oa cjiapade ui üdë icharaita judiro̧ ui oëräpȩ yuro chjadëri̧ chjätäpea̧ oa, dabu ga marä chjätäpea̧ oa. 17-18Ado ejichio judiro̧, dëdë, icharaita ji̧ri̧ cho̧rë jäpadiro̧jȩrȩ ui coëcoëaräpȩ. Jabechji̧ pio cüdë tänȩa̧ oa chjuari̧ jiadaji̧ri̧rȩ cho̧rë jäpadiro̧jȩrȩ. Aja̧, ano̧ mire jo̧rȩtarea̧mi̧dëri̧ cho̧rë jäpadiro̧jȩrȩ ui coëacoëaräpȩ. Ado goae tarari̧ boadäräparequedejȩrȩ. Ado cüdë pio ji̧ri̧ boadäräa̧ oaiä, pjarao̧ pio ju̧i̧ boadäräa̧ oaiä, jibëa̧ guadia buba oa boadäräa̧ oaiä, jabechji̧ ba chia jo̧rȩta mapadiro̧coe. Tjamo̧ davä. Ji̧ri̧ ja̧ yae chara oa boadäräa̧ oaiä, jibëa̧ yae chara oa tjamo̧ tai̧ji̧ri̧ pio ji̧ri̧bo boadäräa̧ oaiä, jabechji̧ ba chia jo̧rȩta mapadiro̧coe. Cüdë ji̧ri̧ boadäräa̧ oaiä, jabechji̧ ejichio judiro̧ ütëborë, 'Aja̧, Jeova pio judidida, a̧dë chjäte ju chiamȩ pio judidida' quëna̧ daba mapadirȩ pio coa chjiari —yo̧mȩrȩ yo̧rëremȩdejȩ Moiche ju̧i̧ Jeova judi.
19Ado Ütërë chjadüa̧ pio mu̧i̧tjoi̧ pio judi icharaita ja̧ yaboräpȩ cjiarërea̧ ji̧, ano̧ mire cjiadiärëremȩde ji̧ri̧ ja̧ duriräpȩ. Ado go̧a̧ra̧ ë üdë peaja̧di dari̧ ano̧ mire baramȩpea̧de. 20Aja̧, icharaita ja̧ duriräpȩ bararëremȩde, ejichio ja̧ yaboi̧räpȩ pio ju̧ri̧. Ado go̧a̧ra̧ ë üdë bara̧ oaiä, Ejitoriji̧ri̧ guadia ja̧ yaboi̧räpȩ bara̧ oaiä, jabechji̧ tutia̧ oa cjiami̧ dari̧ cjiarëreji̧ri̧di̧rȩ icharaita judiro̧ guadiarë pio ji̧ri̧iäpȩmo̧ darea̧mi̧dëri̧. Ado go̧a̧ra̧ ë oaiä bagönȩ mapea̧dejȩrȩ ejichio pio ji̧ri̧iäpȩmo̧, jabo cja̧ȩta̧ra̧räpȩmo̧ chjadë marëremȩdejȩrȩ. Ado pio ju̧i̧iä guadia üdë icharaita ji̧ri̧ acji jädärätärea̧ ji̧, järea̧ dadëa̧dirȩ go̧a̧ra̧ ë pio oaiä. Jabechji̧ gȩnȩ yoa tuti cjiami̧ dari̧ japarëremȩdejȩrȩ.
21Ja̧dëa ji̧ Moiche judi uëräpȩmo̧ arë gatërëremȩdejȩ jibëa̧ ichi oa ui coëcoëaräpȩmo̧. Ado Jeova judi tänȩa̧ oaiä ma̧i̧ dari̧ pjaeparëremȩde ui oa gȩnȩ yoa. Dorë cjitëmȩri pio judiri pjaeparëremȩde ui üdë tutia̧ oa cjiape bagari̧, no̧ ga mape bagari̧. 22Ado Ütë tjamo̧ judi ja̧di dari̧ tuti japea̧ oaiä tüdüa̧ oa cjiadiäa̧de ui üdë dëbëribo. Ado icharaita judiro̧, jabechji̧ chjadë maeari̧ chjätärëreji̧ri̧dirȩ ui coëcoëa oëräpȩ. Tüdüa̧ oa cjiamȩ ui chjarerä, uë tjamo̧ cjiamȩ ui chjarerä chjätärëreji̧ri̧dirȩ, dabu garä baäji̧ri̧rȩ.
23Ado ja̧dëa ji̧, Ejitoriji̧ri̧ guadia judiro̧ icharaita pio ji̧ri̧ daea̧ oaiä, ui tjoro chjätäji̧ri̧ oa daea̧ oaiä, jabechji̧ cho̧rë järëreji̧ri̧diro̧jȩrȩ ui chjareräji̧ri̧ pio ji̧ri̧. Aja̧, yae chara tjamo̧ tai̧ji̧ri̧ pio judiro̧ ütëborë cho̧rë järëreji̧ri̧diro̧jȩrȩ pjarao̧ ja̧ yae chjö̧na̧i̧ra̧, ju̧i̧ ja̧ yae chara chjö̧na̧i̧ra̧. Ui chjarerä baämȩ no̧ oa goae tarari̧ cho̧rë jäa̧diro̧jȩrȩ. 24Jabo dorë jabë cjitëdëa̧rä, jabë tatadërä, Jeova pio judi ma̧i̧ dari̧ oë ja̧bo tänȩrëremȩdejȩrȩ ejichio pio ji̧ri̧. Aja̧, judiro̧ chjadëri̧ jo̧rȩtarea̧mi̧dëri̧ oë ja̧bo tänȩa̧dejȩrȩ. Tjamo̧ davä. Jeova judi cjo̧dë gärimȩräpȩ cjiamȩrȩ, go̧a̧ra̧ ëräpȩ cjiamȩrȩ uapa tjamo̧ tänȩrëremȩdejȩrȩ guadia ji̧ri̧ judiro̧ chjadëri̧ ütarë jo̧rȩtarea̧mi̧dëri̧. 25Pio judi tänȩa̧ oaiä yae chara ta üdë chjaodëri̧ yu̧a̧därärëremȩde icharaita pio ji̧ri̧ cho̧rë järea̧mi̧dëri̧. Ja̧dëa ji̧ ëna̧diäji̧ri̧pea̧dirȩ guadia judiro̧:
—Jabo cjäri̧ madiibe, Jeova pio judi acji tai̧mȩmi̧ dari̧ dëbëpe chjaodiibe icharaita pio ji̧ri̧ chjiari. Jo̧ȩra̧pe baätärȩ. Icharaita pio ji̧ri̧ a̧dë jachipadäräeno̧tärȩ —yo̧rëreji̧ri̧dirȩ, goae tarari̧ ëna̧diäji̧ri̧rȩ.
26Ado icharaita judiro̧ ütëborë ui coëcoëa oëräpȩ chjadëri̧ chjätäa̧rä, Jeova judi yo̧rëremȩdejȩ Moiche ju̧i̧:
—Danȩ, ui coëcoëaräpȩmo̧ ichipë cjiavä ui üdë tüdüa̧ oa cjiachea oa, ejichio guadia pio judiro̧ jemu̧i̧ ja̧bopea̧ oa. Yaerä buë chaji̧ri̧ judiro̧, yae charara̧ tai̧ji̧ri̧ judiro̧ jemu̧i̧ ja̧bo mapea̧ oa ichipë cjiavä —yo̧a̧dejȩ.
27Ado Jeova judi yo̧a̧mi̧ japarëremȩde Moiche judi. Dorë pea tarupë cjitëa̧rä jibëa̧ ichi oa ichipë cjia̧dejȩ uiräpȩmo̧. Ado tüdüa̧ oa cjiaremȩ ui üdë ui decjiaräpȩmo̧ ca̧mȩpea̧de no̧ gadë mape bagari̧. Ado ejichio judiro̧ baätaji̧ri̧rȩ baärea̧ dadëa̧dirȩ. Ui üdë acji choa̧ oaiä, chjaodëri̧ cjücjürüpe baga̧ oaiä, ma̧i̧ dari̧ jä mire järi̧ acji choa̧ oaiä baärea̧ dadëa̧dirȩ guadia judiro̧. Jeova pio judi ji̧ri̧ dëbëpe chjaoa̧ oaiä baärea̧ dadëa̧dirȩ. 28Jabechji̧ tüdüa̧ oa cjiaremȩ ui üdë acji choa̧dejȩrȩ yaerä buë chareji̧ri̧ pio ji̧ri̧, yae charara̧ tai̧reji̧ri̧ pio ji̧ri̧, guadia ütëbo oa. Jabechji̧ cjücjürü tjamo̧räpȩ na̧ra̧ oa cjiami̧ dari̧ cjiadiä maeadirȩ. Icharaita ji̧ri̧ cho̧rë järeji̧ri̧ guadia ütëborë jemu̧i̧ ja̧boa̧ maeadirȩ cja̧rȩmȩrȩ chjätärea̧ decjiari̧. 29Jabo icharaita judiro̧, jabechji̧ dëbëribo tüdüa̧ oa cjiamȩ ui chjarerä chjätärëreji̧ri̧diro̧jo̧ȩ ui coëcoëa oa, dabu garä chjätäji̧ri̧rȩ.
30Pio jiro domȩ ju̧i̧iä Jeova judi chjadëri̧ chjätä tänȩrëremȩdejȩrȩ icharaita ji̧ri̧. Ejichio judiro̧ boadärätärea̧ ji̧, chjadëri̧ tuti japarëremȩde. Ado ui yuroropȩ a̧rȩji̧ri̧ oa dae chjaoa̧diro̧jȩrȩ davä ejichio pio ji̧ri̧ ja̧ icjararemȩ oa, ja̧boa̧ji̧ri̧ oa. 31Ado Jeova judi ejichio pio ji̧ri̧ dëbëpe chjaoa̧ oaiä, jibëa̧ jauëchjara̧ pio ju̧ri̧ra̧ ana̧ri̧ na̧rȩa̧ oaiä Icharai ja̧ pumȩ judiro̧ uapaji̧ri̧pea̧diro̧jo̧ȩ. Ji̧dë u̧i̧ chjuari̧ quëna̧ji̧ri̧pea̧diro̧jo̧ȩ. Ado ji̧dë u̧i̧ chjuari̧ quëna̧ji̧ri̧pea̧diro̧jo̧ȩ Moiche ju̧i̧ peaja̧di, Jeova ja̧ mu̧i̧tjoi̧ pio ju̧i̧.
Currently Selected:
Go̧dürea̧ Ma̧ȩ 14: Pume
Highlight
Share
Compare
Copy
Want to have your highlights saved across all your devices? Sign up or sign in
©2021 Global Partners, All Rights Reserved
