Timoteo Ma̧ȩ 2 3
3
Cjiadiäa̧ japamitërä, ja̧di dari̧ cjo̧ro̧padirȩ pumȩ judiro̧
1Danȩ, cjiadiäa̧ japamitë üdë ma̧na̧na̧ra̧rä, jabechji̧ a̧dë chjäte chjai̧dë oa chjätäji̧ri̧rȩ cjo̧ro̧padirȩ pumȩ judiro̧. Pio ju̧i̧ tjamo̧ri̧ dabatä earequedemȩ Timoteo. Jabechji̧ pio jiro japamitërä chjao tjamo̧pade Ütë tjamo̧ ja̧ ma̧ȩrä cjo̧ro̧pea̧ üdë. 2Jabechji̧ pio jiro japamitërä pumȩ judiro̧ a̧dë chjäte chjai̧dëri̧ jape chjaoji̧ri̧rȩ cjo̧ro̧padirȩ. Jibëa̧ maea oa jo̧rȩtariä cjo̧ro̧padirȩ, cjodocjodoari̧ jo̧rȩtarea̧ decjiari̧. Ado chëre goara tjamo̧ji̧ri̧rȩ cjo̧ro̧padirȩ. Ado pio jibë chjiari ji̧dë ma goaeri̧ yo̧padirȩ. Jabechji̧ jibëa̧ chji̧rämo̧ quëna̧tapadirȩ, ‘o ji̧ri̧ u̧i̧ ba chiaquëda, o judiro̧ nö̧tadëdiro̧coada’ quëna̧ jo̧rȩtaji̧ri̧rȩ. Ado chjadëri̧ ni̧bätärea̧ ji̧, jibëa̧ jadü pio ji̧ri̧iäpȩmo̧ chjadëri̧ ni̧bätärea̧ ji̧, jabechji̧ ya̧e chjaoji̧ri̧rȩ cjo̧ro̧padirȩ. Ado jäjäa pio ji̧ri̧ ta̧rëdiätärea̧ ji̧, ba chia datärea̧ ji̧, cjäri̧ madiro̧jȩrȩ, ta̧rëdiädëpadiro̧jȩrȩ. Ado pio jibëiäpȩmo̧ chjadëri̧ japamȩ pio ju̧i̧ chjadëri̧ yo̧tärea̧ ji̧, “Aja̧, chjadëri̧ japea̧renȩque” yo̧tärea̧ ji̧, yo̧dëpadiro̧jo̧ȩ. Jabechji̧ ‘chjadëri̧ japea̧dicoada’ quëna̧ dadëpadiro̧jo̧ȩ. Ado Ütë tjamo̧ ju̧i̧ uapatärea̧ ji̧, pio ju̧i̧ ba chia jo̧rȩtatärea̧ ji̧, badë jo̧rȩtapadiro̧jo̧ȩ. 3Ado jibëa̧ pumȩ pio ji̧ri̧ ba chia datärea̧ ji̧, peaja̧di badë dapadiro̧jȩrȩ, cjäri̧ri̧ cjia dadëji̧ri̧rȩ. Chjadëri̧ ëba cjo̧ro̧tärea̧ ji̧, duridëparȩmi̧ dari̧ cjatäcjie jo̧rȩtatärea̧ ji̧, ji̧dë ma ërecjiaji̧ri̧rȩ cjo̧ro̧padirȩ, ori̧ bagari̧ ëba cjiarea̧mi̧dëri̧. Jabechji̧ chji̧ cotomi̧ dari̧ cjo̧ro̧padirȩ. Ji̧dë ma goadi ya̧padiro̧jȩrȩ o ji̧ri̧iäpȩmo̧. Ado judiro̧ tüdüa̧mi̧ darä cjo̧ro̧tärea̧ ji̧, pumȩ chjuaji̧ri̧rȩ gaipara̧ jäririä cjo̧ro̧padirȩ uapai̧ dari̧. Ado chjadë pio ju̧i̧ ma̧ chiadëri̧ cjiaji̧ri̧rȩ datärea̧ ji̧, jabechji̧ goëdëri̧ cjiaji̧ri̧rȩ dapadiro̧jo̧ȩ. 4Ado jibëa̧ pumȩ pio ji̧ri̧ chjadëri̧ ëba cjo̧ro̧tärea̧ ji̧, chjadëri̧ jidatärea̧ ji̧, cjäri̧ madiro̧jȩrȩ, ja̧di dari̧ japadëpadiro̧jȩrȩ. Jabechji̧, eacji̧ quëna̧ eaji̧ri̧rȩ u̧i̧pajadiro̧jȩrȩ. Jabechji̧ jibëa̧ pumȩ pio ji̧ri̧iäpȩmo̧ chjai̧dëri̧ japatämi̧ cjiaji̧ri̧ pio ji̧ri̧ a̧dopadiro̧jȩrȩ pio ji̧ri̧iäpȩmo̧ chjai̧dëri̧ japapea̧ ji̧. Jabechji̧ chji̧ cotoji̧ri̧mi̧ dari̧ jëreeapadirȩ chjai̧dë pio ju̧i̧ japapea̧ ji̧, a̧dë chjäte oëadëji̧ri̧rȩ. Jabo judiro̧ ma̧i̧ da oa jape chjaoji̧ri̧borë, ‘jabechji̧ pumȩ chjadë tjamo̧a̧ro̧da’ quëna̧ jo̧rȩtaji̧ri̧rȩ cjo̧ro̧padirȩ. Ado Ütë tjamo̧ pio ju̧i̧ chjadëri̧ jo̧rȩtatärea̧ ji̧, pio ju̧i̧ eaji̧ri̧rȩ jo̧rȩtatärea̧ ji̧, cjäri̧ madirȩ, jabomo̧ goaeri̧ cjo̧ro̧ji̧ri̧mi̧ dari̧ cjo̧ro̧padirȩ, airi̧ cjia airi̧ cjia chjaocjiarea̧ pio ju̧i̧mo̧i̧ jo̧rȩtaji̧ri̧rȩ. Aja̧, ja̧di dari̧ cjo̧ro̧padirȩ pumȩ judiro̧ cjiadiäa̧ japamitërä. 5Jabo ma̧i̧ dari̧ japaji̧ri̧borë, Ütë tjamo̧ pio ju̧i̧ eacji̧ quëna̧ji̧ri̧rȩ ni̧bäpadirȩ. Pio ju̧i̧ quëna̧ji̧ri̧mi̧ dari̧ cjo̧ro̧padirȩ. Jabo cjäri̧ madirȩ, tjamo̧ri̧ quëna̧dëpadiro̧jo̧ȩ. Quëna̧ji̧ri̧mi̧ dari̧ ni̧bäpadirȩ, jabo tjamo̧ri̧ ta̧rëdiädëpadiro̧jo̧ȩ. Jabechji̧ judiro̧ ma̧ȩ coëmarä cjo̧ro̧tärea̧ ji̧, cjäri̧ madirȩ, pio jibë ano̧ mire pumȩpe baga tänȩrea̧ chiamȩ pio ju̧i̧ jiadapadiro̧jo̧ȩ, Ütë tjamo̧ pio ju̧i̧. Ado pio ju̧i̧iä yo̧requedemȩ Timoteo, pio jiro pumȩ pio ji̧ri̧ a̧dë jachipadärämi̧ dari̧ cjiajȩrȩ. Ëba cjiadë majȩrȩ. 6Jabechji̧ pio jiro pumȩ judiro̧ orë jädiädirȩ ado cja̧rȩmo̧ ja̧ bëräpȩ, ivi pio ji̧ri̧ gari̧pe gari̧pe yo̧pea̧ oa. Jabechji̧ pumȩ pio ji̧ri̧ eacji̧ quëna̧ u̧i̧padiro̧jȩrȩ ivi ji̧ri̧, na̧ȩdëdiämi̧ dari̧ cjo̧ro̧ji̧ri̧ pio ji̧ri̧. Tjamo̧ davä. Ji̧dë ma oëra̧diä chjaoji̧ri̧ ivi pio ji̧ri̧, dami̧ti̧ chjai̧dërë boa̧ oa cjiaji̧ri̧ ivi pio ji̧ri̧, chjaodëri̧ u̧i̧padiro̧jȩrȩ. 7Ado pio jiro ivi jini̧ro̧ ji̧dë ma dabapatämi̧ cjiaji̧ri̧borë, tjamo̧ri̧ dabaparea̧ dadë mani̧rȩ. Jabechji̧ eami̧ti̧ a̧ra̧ano̧mȩ oa chjaodëri̧ ta̧rë ja̧boni̧ro̧jo̧ȩ, jabo cjäri̧ mani̧rȩ, tjamo̧ri̧ na̧e chiape bagarea̧ dadë mani̧rȩ. Ütë tjamo̧ ja̧ ma̧ȩ oa chjadëri̧ dabapatärea̧ ji̧, dabaparea̧ dadëni̧rȩ. 8Ado pio jiro ivi ji̧ri̧ u̧i̧pë u̧i̧pë a̧ra̧ano̧ji̧ri̧ pio judiro̧ ji̧dë ma dëbëpe chjaodiro̧jo̧ȩ tjamo̧i̧ cjiari̧ baämȩ ma̧ȩ oa. Jabechji̧ eadë madiro̧jo̧ȩ. No̧mȩ cjo̧ro̧rëreji̧ri̧ pio judiro̧ japarërea̧mi̧ japadirȩ. Tjamo̧ davä. Yane quȩmȩrea̧ judi, ado Ya̧bere quȩmȩrea̧ judi Moiche pio ju̧i̧ dëbëpe chjaorëreji̧ri̧diro̧jo̧ȩ.#3:8 Yane quȩmȩ judi, ado Ya̧bere quȩmȩ judi ana̧ri̧ dëbëpe chjaorëreji̧ri̧diro̧jo̧ȩ Moiche pio ju̧i̧. Jabechji̧ pjarao̧ pio ju̧i̧ ja̧ oa ja̧beparëreji̧ri̧dirȩ. Jënȩro̧ daba̧ jauëchjara̧ pio ju̧ri̧ra̧ ja̧beparëreji̧ri̧dirȩ Ejitoräpȩ cjo̧ro̧mȩ ütë pio ju̧i̧ ja̧ oa. Ado Moiche judi jauëchja cjiari̧ na̧rȩrërea̧ ji̧, daedae japaji̧ri̧mi̧ dari̧ cho̧rë japarëreji̧ri̧diro̧jo̧ȩ Moicherë na̧rȩrërea̧ pio ju̧i̧. Dëdë, o oa cho̧rë japarea̧ darëreji̧ri̧dirȩ, jabo o oa cho̧rë japarea̧ dadëa̧dirȩ. Jabo jibëa̧ quȩ üdë yabo yürüa̧ pënȩrä go̧ȩpea̧ oa cjiatärea̧ ji̧, cjäri̧ made, go̧ȩpea̧ oa cjiadë made. Go̧dürea̧ quȩmȩ ma̧ȩrä go̧ȩpea̧ oa cjiadë made. Jabo judio judiro̧ orë go̧ȩparërea̧ ma̧ȩrä go̧ȩpea̧ oa cjiade, Ütë tjamo̧ ja̧ ma̧ȩdërä. Ado pio jiro oari judiro̧ Moiche pio ju̧i̧ tjamo̧ri̧ dëbëpe chjaorërea̧ oaiä, jabechji̧ Tjo tjamo̧ judi pio ji̧ri̧ chjiari go̧ȩpa tänȩrëremȩdejȩ Paboro ju̧i̧, pio a̧ro̧rȩ pio ji̧ri̧ chjiari dabadëchea oa. Ado peaja̧dimi̧ dari̧ japadirȩ pio jiro oari judiro̧. Ütë tjamo̧ ja̧ ma̧ȩ pio ju̧i̧ ji̧dë ma dëbëpe chjaodiro̧jo̧ȩ. Ütararea̧ chji̧ cotomi̧ dari̧ cjiaji̧ri̧rȩ teracaba maea oa jo̧rȩtadirȩ. Jibëa̧ chji̧ra̧ Ütë tjamo̧ ju̧i̧ tjamo̧ri̧ quëna̧dëdiro̧jo̧ȩ. 9Ado pio jiro oari judiro̧, jabechji̧ dae järea̧ dadëpadirȩ. Jabechji̧ pumȩ judiro̧ ütëborë na̧e chiaji̧ri̧rȩ dapadiro̧jȩrȩ. ‘Aja̧, pio jiro oari judiro̧ japëtaraji̧ri̧ pio judiro̧diro̧da, ütararea̧ chji̧ cotomi̧ dari̧ cjiaji̧ri̧ pio judiro̧diro̧da’ quëna̧ jo̧rȩtaji̧ri̧rȩ da mapadiro̧jȩrȩ. Danȩ, icharaita judiro̧ Moiche pio ju̧i̧ dëbëpe chjaoa̧ji̧ri̧ pio ji̧ri̧ chjiari chjaodëri̧ na̧ȩ chiape bagarërea̧mi̧ na̧e chiape bagapadirȩ pumȩ judiro̧ peaja̧di pio jiro oari pio ji̧ri̧ chjiari.
Ja̧di dari̧ ja̧bepapea̧de
10Jabo mȩnȩ Timoteo, chjadëri̧ dabarenȩ pio coa chjiari. Jabechji̧ na̧ dachoro cjo̧ro̧rëremȩrequede. Ado pio ju̧i̧iä tjamo̧ri̧ dabarenȩ. Jabechji̧ pio coa irä daea̧ ji̧, ‘Aja̧, Pablo judi ja̧di dari̧ cjo̧ro̧dida, ja̧di dari̧ japamȩrȩ cjo̧ro̧dida, ja̧di dari̧ a̧ra̧ano̧dida, pio jiro ma̧ȩ oa a̧ra̧ano̧dida, teracabari̧ a̧ra̧ano̧dëdida jabo chjadëri̧ ütara̧mi̧ a̧ra̧ano̧dida' quëna̧ dabarenȩ. ‘Aja̧, ja̧di dari̧ ja̧bepadida, jabërä chjadëri̧ ütarë jo̧rȩta̧rämo̧ ja̧bepamȩdida, jibëa̧ ja̧beparea̧ pio ju̧i̧ tjamo̧ri̧ jo̧rȩtamȩrȩ cjo̧ro̧dida, pio ju̧i̧ ja̧ chji̧rä tjamo̧ri̧ chamȩ jo̧rȩtarea̧ pio judidida, ado Quiricho pio ju̧i̧iäpȩmo̧ chjua tjamo̧ri̧ quëna̧mȩrȩ cjo̧ro̧diji̧da, ado pio ju̧i̧iä pumȩ ji̧ri̧ ma̧ chjua ëba cjo̧ro̧diji̧ri̧da, jabechji̧ pio ji̧ri̧ ea tjamo̧diji̧ri̧da, jënȩ quëna̧ pio ju̧i̧ na̧rȩriä cjo̧ro̧dida, jabechji̧ goaedë oa chjätäräbo ma̧ chjua jo̧rȩtamȩrȩ cjo̧ro̧dida’ quëna̧ dabarenȩ omȩ pio coa chjiari. 11Ado pio ju̧i̧iä pumȩ judiro̧ pio coa ma̧i̧ dari̧ japea̧ pio ju̧i̧ chjiaribo dabarenȩ. Aja̧, judiro̧ conȩdarërea̧ ji̧, judiro̧ gitoi̧ dari̧ japarërea̧ ji̧ chjadëri̧ dabarenȩ. Tjamo̧ davä. A̧tioquia quȩmȩ bë ma̧ri̧räpȩ ma̧i̧ dari̧ japea̧diro̧coe, Iconio quȩmȩräpȩbo, Irichara quȩmȩräpȩbo. Pio ju̧i̧ chjö̧na̧i̧ dabarenȩ. Aja̧ omȩ, a̧dë chjäte goaedëti̧ oa chjätärëremȩrequede. Jabo ma̧i̧ da chjai̧dë oa chjätäa̧räbo, jabechji̧ Ano̧mȩ pio judi chjadëri̧ chjätärea̧ yürürëremȩdique. Chjadëri̧ a̧dorea̧ yürürëremȩdique. 12Jabo danȩ, tjamo̧ri̧ yo̧requedemȩ. Eami̧ pumȩ üdë, Jechu Quiricho pio judirimȩ cjo̧ro̧rea̧ra̧ cjo̧ro̧tämi̧ cjiamȩ pio judi, jabechji̧ conȩda̧ oa cjiapade. Tjamo̧ davä. Quiricho pio ju̧i̧ ja̧ cjo̧ro̧rea̧ra̧ cjo̧ro̧tämi̧ cjiamȩ pio judi, Quiricho pio ju̧i̧ ja̧ ma̧ȩrä cjo̧ro̧tämi̧ cjiamȩ pio judi, jabechji̧ conȩda̧ oa cjo̧ro̧pade. Tjamo̧ri̧ yo̧requedemȩ. Conȩda̧ oa cjo̧ro̧pade. 13Jabo chjai̧dëri̧ japaji̧ri̧ judiro̧, u̧i̧pe u̧i̧pe ni̧bäji̧ri̧ pio judiro̧, cjäri̧ madirȩ, pio a̧ro̧rȩ conȩda̧ oa cjiami̧ dari̧ conȩda̧ oa cjiadëpadirȩ jabo ji̧dë u̧i̧ chjai̧dëpe bagurapadirȩ. Jabechji̧ judiro̧ ma̧i̧ da chjai̧dë oa jape chjaorërea̧ ji̧, a̧dë chjäte ma̧i̧ da oa ano̧ mire japapadirȩ, ji̧dë u̧i̧ a̧dë chjäte chjai̧dë oa japaji̧ri̧rȩ. Aja̧, u̧i̧pea̧ oa cjiaji̧ri̧ pio judiro̧ o ji̧ri̧iäpȩmo̧ u̧i̧papadiro̧jȩrȩ o ji̧ri̧. 14Jabo mȩnȩ Timoteo, jabechji̧ mȩnȩ dabapea̧ ma̧ȩrä ji̧dë ma jo̧rȩtariä cjo̧ro̧vä, mȩnȩ chjuari̧ quëna̧mȩpea̧ ma̧ȩrä. 'Jabechji̧ coa dabapa tänȩrëreji̧ri̧ pio judiro̧diro̧da, coëma cjiari̧ dabapa tänȩa̧diro̧coada’ quëna̧ dabarenȩ. 15Jabechji̧ mȩnȩ boi̧chji̧ri ja̧ go̧ȩparërea̧ ma̧ȩ pio ju̧i̧ a̧ra̧ano̧rëreji̧ri̧diro̧mȩ, mȩnȩ chjadëri̧ dabaparea̧mi̧ dari̧. Tjamo̧ davä, Ütë tjamo̧ ja̧ ma̧ȩ pio ju̧i̧ dabaparëremȩrenȩ mȩnȩ boi̧chji̧ri ja̧. Ado pio jiro ma̧ȩ üdë urëdi tjamo̧ oa jo̧rȩta tänȩrëremȩdimȩ mȩnȩ Jechu Quiricho pio ju̧i̧iäpȩmo̧ quëna̧rea̧mi̧ dari̧, mȩnȩ chjätärea̧mi̧ dari̧. 16Jabechji̧ Ütërë go̧ȩpa tänȩrërea̧ ma̧ȩ üdë chjö̧na̧i̧rȩ ea jana̧ chjadüa̧ oa cjiarëremȩde Tjo tjamo̧ pio ju̧i̧iä. Pumȩ judiro̧ orë coëma cjiari̧ go̧ȩparea̧mi̧ dari̧ ea jana̧ chjadürëremȩdejȩrȩ, oëra̧ cjiadë maea oa. Ado ja̧di tara pio jiro ma̧ȩ üdë chjadëde a̧ra̧ano̧pea̧ oa. Chjadëde oëra̧ quëna̧mȩ pio ju̧i̧ a̧dopea̧ oa. Chjadëde oëra̧diäa̧mȩ pio ju̧i̧ chi̧dëeapea̧ oa. Chjadëde tüdüa̧mi̧ darä cjo̧ro̧ tänȩpea̧ oa, coëma cjiari̧ cjo̧ro̧pea̧ oa. 17Ado pio jiro ma̧ȩ oa chjadëri̧ dabamȩ pio judi, jabechji̧ dami̧ti̧ ja̧beparea̧ chjadë oa japapea̧ ji̧ nö̧tade. Jabechji̧ Ütë tjamo̧ ja̧ ma̧ȩ oa dabapea̧ oaiä, chjadëri̧ jëdano̧a̧ oa cjiade eami̧ti̧ ja̧beparea̧ chjadë oa ja̧bepapea̧ ji̧.
©2021 Global Partners, All Rights Reserved