Timoteo Ma̧ȩ 2 2
2
Jechu ja̧ guadia chjadëmi̧ dari̧ cjiapea̧ chiarea̧rȩ
1Ado yaba̧ yo̧requedemȩ Timoteo. Ca̧ jami̧ da oa yo̧requedemȩ. Danȩ, to̧bari̧ cjiami̧ dari̧ cjiatä earequedemȩ Jechu pio ju̧i̧iä. Jabechji̧ mȩnȩ Jechu Quiricho pio judiri ja̧pea̧mȩ oa, cjäri̧ri̧ cjiamȩrȩ yürüdimȩ ju̧i̧ ja̧ ju chiarea̧ oa mȩnȩ to̧bari̧ cjiami̧ dari̧ cjiapea̧ oa, mȩnȩ uapadëmȩrȩ cjo̧ro̧pea̧ oa. 2Ado pio ju̧i̧iä a̧ra̧ano̧tä earequedemȩ pio mȩa. Danȩ, cüdë Ano̧mȩ ja̧ oa ja̧bepea̧mi̧ nö̧ta, pumȩ no̧i̧dë tjamo̧ oa a̧ra̧ano̧ chjaorëremȩrequedejȩrȩ. Ado pumȩ judiro̧ a̧ra̧ano̧a̧ ma̧ȩ oa ta̧rëa̧ ji̧, pio coaiä ta̧rëa̧ ji̧, jabechji̧ pio mȩnȩborë ta̧rërëremȩrenȩ. Ja̧di tara yo̧requedemȩ. Mȩnȩ pio coaiä ta̧rëa̧ ma̧ȩ chjö̧na̧i̧ oa chjadëri̧ a̧ra̧ano̧tä earequedemȩ pio mȩa. Jabechji̧ o ji̧ri̧ ja̧ tjo oa a̧dotämi̧ cjiaji̧ri̧ pio ji̧ri̧iäpȩmo̧ a̧ra̧ano̧tä earequedemȩ, pio judiro̧ o ji̧ri̧iäpȩmo̧ ano̧ mire goëje a̧ra̧ano̧pea̧ oa peaja̧di.
3Jabo danȩ Timoteo, oëra̧ jo̧rȩtadëvä. ‘Ca̧ icjara oa conȩda̧ oa cjiapea̧ oa yürüdëpacuni̧da’ quëna̧rea̧mi̧dëde. Jabechji̧ yürüjo̧ȩ. Nȩmȩparea̧ decjiari̧ chjadëri̧ yürüjo̧ȩ, pio cüdëmi̧ dari̧. Jabechji̧ Jechu Quiricho pio ju̧i̧ ja̧ guadia chjadërë cjiami̧ dari̧ cjiapea̧ oa yürüjo̧ȩ. 4Danȩ, ¿yö̧ta dari̧ cjo̧ro̧de guadia chjadërë? Yö̧ta dari̧dë, jabechji̧ guadia ütë pio ju̧i̧ ja̧ ma̧ȩrämo̧ ja̧bepatämi̧ cjiade, pio ju̧i̧iäpȩmo̧ ma̧ chiadëri̧ cjiaparȩpea̧ oa. Ado pio ju̧i̧iä o judiro̧ japami̧ japadëde. Guadiadë pio judiro̧ japami̧ japadëde. Jabechji̧ judiro̧ japea̧ pio ju̧i̧iä oëra̧diädëde, jabo jibëa̧ ütë pio judi yo̧a̧ pio ju̧i̧mo̧ jo̧rȩtamȩrȩ ja̧bepade. Ado peaja̧dimi̧ dari̧ ja̧bepatäremȩrenȩ ibëa̧ Ano̧mȩ ja̧ oa. 5Ado danȩ, yö̧ta dari̧ japadirȩ goae tarari̧ baguraji̧ri̧ judiro̧, boarea̧ ba chia tjamo̧ oa boatämi̧ cjiaji̧ri̧ pio judiro̧? Yö̧ta dari̧dë, jabechji̧ jënȩro̧ nö̧tarä yuro goae tarari̧ tjätjäpë baguradirȩ ja̧bojü tjamo̧pe baguraji̧ri̧rȩ, ba chia tjamo̧ pio ju̧i̧ boapea̧ oa. Aja̧, ja̧di dari̧ japadirȩ. Ado eami̧ baguramȩ judi, jabechji̧ pio jȩa nö̧ta ëba baguraji̧ri̧ pio ji̧ri̧ boadäräpea̧ oa a̧dë chjäte goae tarari̧ bagurapea̧ chiade. Jabo danȩ Timoteo, baguramȩ judi jibëa̧ ma̧na̧ri̧ jo̧rȩtamȩrȩ bagurarea̧mi̧dëde jabo. Jabechji̧ tjamo̧ bagura tänȩmȩ pio ju̧i̧ ja̧ ma̧ȩrämo̧ bagurapea̧ chiade tüdüa̧rämo̧ cjiami̧ dari̧. Aja̧, ütara̧mi̧ bagurapea̧ chiade. Ado jibëa̧ no̧romo̧ bagurapea̧ chiade peaja̧di, a̧dë bagurarea̧ decjiari. Jabechji̧ judi tüdüa̧mi̧ darä bagura̧rämo̧ boarea̧ dapade ba chia pio ju̧i̧. Ado peaja̧dimi̧ dari̧ cjo̧ro̧täremȩrenȩ Timoteo. Jabechji̧ oëra̧ bagurami̧ dari̧ ja̧bepadëtäremȩrenȩ, jabo Jechu ja̧ ma̧ȩrämo̧ goae tarari̧ baguramȩmi̧ dari̧ ja̧bepatäremȩrenȩ judi mȩa ba ano̧pea̧ pio ju̧i̧ chjadëri̧ mitërea̧ dapea̧ oa.
6Ado cja̧rȩmo̧ jo̧rȩtarea̧ ma̧ȩra̧ jo̧rȩta tänȩtämi̧ cjiarequedemȩ peaja̧di. Danȩ, tjado ana̧mȩ judi, to̧bari̧ ja̧bepamȩ pio judi, jabechji̧ o ji̧ri̧ ja̧ yaboi̧ mitërea̧ dapade joechjapea̧mȩ jurarea̧ pio ju̧i̧. Ado peaja̧dimi̧ dari̧ ja̧bepatäremȩrenȩ ibëa̧ Ano̧mȩ ja̧ oa. Aja̧, to̧bari̧ cjiami̧ dari̧ ja̧bepatäremȩrenȩ. Ado mȩnȩ ja̧di dari̧ ja̧bepea̧ oaiä, peaja̧di chjadëri̧ ba ano̧a̧ oa cjiaparenȩ. 7Aja̧ Timoteo, urëdi oa jo̧rȩtavä cüdë mȩa yo̧a̧ pio ju̧i̧ chjiari. Jabechji̧ Ano̧mȩ pio judi chjadëri̧ a̧dopadimȩ mȩnȩ chjö̧na̧i̧ oa chjadëri̧ dabapea̧ oa.
8Danȩ, ji̧dë ma jo̧rȩte chjaojo̧ȩ Jechu Quiricho pio ju̧i̧, ja̧boa̧remȩrȩ bëdüa̧mȩ pio ju̧i̧. Jabechji̧ Davirea̧ pio judiri ja̧mȩde. Ado pio ju̧i̧ chjiari ji̧dë ma a̧ra̧ano̧ chjaorequede ma̧ȩ chjadëi̧ pio ju̧i̧. 9Ado ma̧ȩ chjadëi̧ pio ju̧i̧ a̧ra̧ano̧a̧ oaiä conȩda̧ oa cjiarequede pio yi chaärea̧ bëräpȩ. Ado ji̧dëri̧ chatu chiamȩ chjipararira̧ yura̧ oa cjiarequede, ma̧i̧ da chjai̧dë oa japamȩmi̧ dari̧. Jabo cüdë pio yi chaärea̧ bëräpȩ chatu chiamȩ chjipararira̧ yura̧ oa cjiaräbo, jabechji̧ ja̧dimi̧ dari̧ cjiadëde Ütë tjamo̧ ja̧ ma̧ȩ üdë. Chaäa̧ oa cjiami̧ dari̧ cjiadëde. Chatu chiamȩ chjipararira̧ pio ju̧ri̧ra̧ yura̧ oa cjiami̧ dari̧ cjiadëde jabo ana̧ri̧ ja̧bepade. Jabechji̧ oëra̧ti̧ oa chjuchjupechädärärea̧mi̧ dari̧ ja̧bepade. 10Ado pio ju̧i̧iä cüdë eami̧ti̧ chjai̧dë oa chjätärä judi, jabechji̧de coaiä. Chja jabechji̧de. Tjamo̧ davä. Ütërë mitëa̧ pumȩ pio judiro̧ Jechu Quiricho pio ju̧i̧iä chjätärea̧ darä judi, judiro̧ Ütërë tatari̧ cjiamȩräpȩ bucho ana̧ cjo̧ro̧rea̧ darä judi, jabechji̧de davä cüdë eami̧ti̧ chjai̧dë oa chjätärä judi.
11Ado yaba̧ Timoteo, pio yoa ma̧ȩ oa, tjamo̧i̧ cjiari̧ baämȩ ma̧ȩ oa ta̧rëvä:
Aja̧, Quiricho pio judi ëba ja̧borëremȩdiibe. Ado pio ju̧i̧iä ëba cjo̧ro̧padiibe peaja̧di. 12Ado pio judi ibë nö̧ta ëba cjo̧ro̧pa tara, jabechji̧ a̧ro̧rȩ chjai̧dë oa chjätärä, ma̧ chjua jo̧rȩtaji̧ri̧rȩ cjo̧ro̧täreji̧ri̧rea̧rȩ. Aja̧, Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ cjo̧ro̧täreji̧ri̧rea̧rȩ goaedë oa chjätäräbo. Ado ja̧di dari̧ cjo̧ro̧a̧ oaiä, pio ju̧i̧ nö̧ta tjamo̧ yo̧ji̧ri̧rȩ cjo̧ro̧parea̧rȩ. Jabo danȩ Timoteo, eami̧ pumȩ judi, “Aja̧, Quiricho judi ca̧ Ano̧mȩdëde” yo̧rä judi, peaja̧dimi̧ dari̧ yo̧pade Ütë tjamo̧ judi pio ju̧i̧ chjiari. Tjamo̧ davä. “Pio yüdëje ca̧ jadëde” yo̧pade pio ju̧i̧ chjiari. 13Jabo danȩ, a̧ro̧rȩ oëra̧diärä judi, jabechji̧ eadëpe baguradëpadiibe. Jabechji̧ pio judiri ja̧ji̧ri̧ pio ji̧ri̧ eadëpe bagurarea̧mi̧dëdiibe. Jabechji̧ jënȩ yo̧a̧mi̧ japamȩde Ütë tjamo̧ judi, tjaoëpai̧ dape bagarea̧ decjiari̧.
Aja̧, pio jiro ma̧ȩ üdë tjamo̧i̧ cjiari̧ baäde Timoteo.
Ja̧di dari̧ cjo̧ro̧täremȩde Ütë tjamo̧ ja̧ oa chjadëri̧ ja̧bepamȩ judi
14Aja̧ Timoteo, pio jiro a̧ra̧ano̧rea̧ ma̧ȩ oa ji̧dë ma jo̧rȩta tänȩjȩrȩ quëna̧ji̧ri̧ pio ji̧ri̧. Jabechji̧ Ano̧mȩ pio ju̧i̧ ja̧ dachoro uapai̧ ta̧rëri̧ chi̧dëeajȩrȩ, judiro̧ teracaba ma̧ȩra̧ dëbë ni̧bätachea oa, judiro̧ goë ta̧rëa̧ ma̧ȩ pio ju̧i̧ chjiari ni̧bä chjaochea oa. Ado ütëti̧rea̧ judiro̧ yo̧rërea̧ ma̧ȩ pio ju̧i̧ ji̧dë ma jo̧rȩtachea oa peaja̧di chi̧dëeajȩrȩ. Jabechji̧ judiro̧ yo̧rërea̧ pio ju̧i̧ chjiari ni̧bä chjaopea̧ üdë a̧dodë madejȩrȩ. Goaedëdejȩrȩ. Ado ana̧ri̧ oëra̧diä tänȩpai̧ dadejȩrȩ davä ta̧rë chaji̧ri̧ pio ji̧ri̧. Pio ju̧i̧iä japadëtädirȩ. 15Ado danȩ Timoteo, mȩnȩ ja̧bepea̧ üdë goae tjamo̧täremȩdejȩ Ütë tjamo̧ pio ju̧i̧iäpȩmo̧. ‘Aja̧ Timoteo judi ja̧bepamȩ chjadë tjamo̧dida’ quëna̧rea̧mi̧ dari̧ ja̧bepatäremȩrenȩ. Ado pio ju̧i̧iä yo̧requedemȩ. Jabechji̧ mȩnȩ nö̧tarä yuro coëma cjiari̧ cjo̧ro̧vä pio ju̧i̧ ja̧ dachoro, a̧dë chjäte chjadë pio ju̧i̧mo̧i̧ mitëmȩrȩ. Ado ji̧dë ma chjadëri̧ ja̧bepavä. Jabechji̧ chjadëri̧ jëdano̧a̧ oa ütara̧mi̧ a̧ra̧ano̧vä Ütë tjamo̧ ja̧ ma̧ȩ oa, coëma cjiari̧ a̧ra̧ano̧mȩrȩ. Jabechji̧ mȩnȩ oëra̧ ja̧bepea̧ oaiä idëri̧ cjiape bagurachea oa, chjadëri̧ ja̧bepavä. 16Ado dai chirirä ja̧ jo̧rȩtarea̧ oa ta̧rë ja̧bodëvä. Ütëti̧rȩ yo̧rërea̧ duri pio ju̧i̧ ta̧rë ja̧bodëvä. Jabechji̧ ba chiadë maeade. A̧dodë madejȩrȩ pumȩ ji̧ri̧. Jabechji̧ judiro̧ Ütë tjamo̧ pio ju̧i̧iäpȩmo̧ ji̧dë u̧i̧ chjuari̧ quëna̧pea̧ ji̧ a̧dodë madejȩrȩ, jabo oëra̧diä tänȩpai̧ dadejȩrȩ ji̧dëri̧. Pio ju̧i̧iä ta̧rë ja̧bodëpea̧de. 17Jabechji̧ pio jiro a̧ra̧ano̧rea̧ ma̧ȩ üdë ma̧i̧ da co ana̧mi̧ dade. Icjara nö̧tai̧ oa cope jäpamȩ comi̧ dade. Ado ta̧rë ja̧boji̧ri̧ pio ji̧ri̧ ja̧ ya oaiä oëra̧ti̧ oa co chiape jämi̧ dari̧ baäpai̧ dade quëna̧ji̧ri̧ pio judiro̧ oëra̧diäpe järea̧mi̧ dari̧. Dëdë, chjai̧dëri̧ cjiadiäpai̧ dadirȩ. Peaja̧di dari̧ cjiadiärëreji̧ri̧dirȩ Imeneo judi, ado Pjireto judi. 18Pio jiro ma̧ȩ teracaba oa ta̧rë ja̧boa̧ oaiä, ana̧ri̧ oëra̧diäa̧dirȩ. Ado jënȩro̧ ta̧rë ja̧boa̧ ma̧ȩ pio ju̧i̧ ano̧ mire a̧ra̧ano̧ji̧ri̧pea̧diro̧jo̧ȩ ji̧dëri̧. Jabechji̧ coëma cjiari̧ baämȩ no̧mi̧ da pio ju̧i̧ a̧dë baäa̧mi̧ dari̧ cjo̧ro̧ji̧ri̧pea̧dirȩ yaba̧. Ado oëra̧ a̧ra̧ano̧ji̧ri̧rȩ oëra̧ jo̧rȩta tänȩdiro̧jȩrȩ quëna̧ji̧ri̧ pio ji̧ri̧ o oa. “Aja̧, a̧ro̧rȩ ji̧dë duri oa ja̧boa̧rä, jabechji̧ bëdüdëpade ibëa̧ icjara üdë” yo̧dirȩ. Jabo cjäri̧ madirȩ, oëra̧ a̧ra̧ano̧dirȩ.
19Jabo judiro̧ oëra̧ a̧ra̧ano̧a̧räbo, ado o judiro̧ pio ji̧ri̧iä ta̧rë ëte oëra̧diäa̧räbo, jabechji̧ chjuari̧ cjiami̧ dari̧ cjiade Ütë tjamo̧ ja̧ ma̧ȩ üdë, ibë a̧domȩ ma̧ȩ pio judi. Jabechji̧ chjuari̧ cjiami̧ dari̧ cjiade. Danȩrȩ, ma̧i̧ da jo̧ taru yuimi̧ dade. Coëma cjiade. Chjuari̧ cjiade. Oëra̧ cjiadë made. Yuroparea̧mi̧dëde. Ado ja̧di dari̧ cjiade Ütë tjamo̧ ja̧ ma̧ȩ üdë. Jabechji̧ a̧ro̧rȩ quëna̧ ma̧ȩ üdë goarijärea̧mi̧dëde. Ado go̧ȩpea̧ oa cjiade. Ja̧di ta̧rëri̧ go̧ȩpea̧ oa cjiade:
"'Aja̧, ca̧ pumȩ judiro̧ pio judiro̧ tjamo̧diro̧da’ quëna̧ daba dadejȩrȩ Ütë tjamo̧ judi."
Aja̧, ja̧di ta̧rëri̧ go̧ȩpea̧ oa cjiade. Ado pio yoa ma̧ȩra̧ a̧de go̧ȩpea̧ oa cjiade:
“'Ano̧mȩ pio ju̧i̧ ja̧mȩrȩ doparequede' yo̧mȩ pio judi, jabechji̧ chjai̧dë pio ju̧i̧ putu jura̧ a̧dë chami̧ dari̧ cjo̧ro̧pea̧ chiade.”
Aja̧, ja̧di ta̧rëri̧ go̧ȩpea̧ oa cjiade.
20Danȩ Timoteo, chëre ji̧ra̧ri̧ goamȩ pio ju̧i̧ ja̧ bërä, jabechji̧ ji̧ra̧de. Maude. Jëdërea̧de. Tachjade. Cana̧ri̧de. Dabu yocodëde. Ji̧ra̧ tjamo̧de. Ado orë, jabechji̧ ba chiara̧ japea̧ oa cjiade. Aja̧, parata quȩmȩ chjipararira̧ japea̧ oa cjiade, oro quȩmȩ chjipararira̧bo. Ado ba chia üdë, jabechji̧ chjacjiamȩ tjamo̧de. Ado china̧chjari̧ tutia̧ oa cjiade a̧dopea̧ ba chia doromo̧ mitëpea̧ oa. Jabo orë, jabechji̧ ba chiara̧ japea̧ oa cjiadë maeade. Jabechji̧ tora̧ japea̧ oa cjiade. Dabura̧ japea̧ oa cjiade. Ba chiadëde. Jabechji̧ doti̧mi̧ mitëpea̧de. Aja̧, babui̧ra̧ mitëdiro̧jo̧ȩ jurapea̧ oa, ja̧bepapea̧ oa. Jabo ba chia üdë, tjaoërämo̧ mitëpea̧de. Ado ba chia üdë, chjacjiamȩ tjamo̧ üdë, jabechji̧ goae tjamo̧dejȩ bë ano̧mȩ pio ju̧i̧iä. 21Ado peaja̧dimi̧ dari̧ cjiapai̧ darea̧rȩ Ütë tjamo̧ pio ju̧i̧iä. Jabechji̧ a̧ro̧rȩ chjai̧dë pio ju̧i̧ putu jura̧ a̧dë chami̧ dari̧ cjo̧ro̧rä judi, jabechji̧ jëdërea̧ ba chia tjamo̧mi̧ dari̧ cjiadiäparea̧rȩ Ütë tjamo̧ pio ju̧i̧iä. Aja̧, goae tjamo̧mi̧ dari̧ cjiadiäparea̧rȩ bë ano̧mȩmi̧ da pio ju̧i̧iä. 'Jabechji̧ chjai̧dë pio ju̧i̧ putu jura̧ a̧dë chami̧ dari̧ cjo̧ro̧dida, ado pio ju̧i̧iä eami̧ti̧ ja̧beparea̧ oa ja̧bepapai̧ dadida, ca̧ea̧ pio ju̧i̧ ja̧bepapea̧ oa china̧chjari̧ tutia̧ oa cjiadida’ quëna̧ jo̧rȩtamȩrȩ dapadiibe ibëa̧ Ano̧mȩ judi. 22Pio ju̧i̧iä goae tarari̧ a̧dë bagureno̧mi̧ dari̧ jiadavä chjai̧dë pio ju̧i̧. Aja̧, pëi̧ chja judiro̧ dae ja̧bo dae ja̧bo da ëte chjai̧dëri̧ japarea̧ pio ju̧i̧ a̧dë bagurëno̧mi̧ dari̧ japavä. Jabechji̧, oëadëri̧ cjiaji̧ri̧ pio ji̧ri̧ cho̧rëdiädëjȩrȩ, jabo ji̧dë ma järivä coëma cjiari̧ cjo̧ro̧pea̧ ji̧. Jabechji̧ quëna̧ ano̧dëjo̧ȩ Ütë tjamo̧ ju̧i̧, jabo ji̧dë ma chjuari̧ quëna̧jo̧ȩ. Ado ji̧dë ma ea tjamo̧jȩrȩ pumȩ ji̧ri̧, chjadëri̧ na̧rȩmȩrȩ. Ado ori̧ bagari̧ ëba cjiarea̧mi̧ dari̧ ëba cjo̧ro̧jȩrȩ Ütë tjamo̧ ja̧ pumȩ ji̧ri̧. Danȩ, pio judiro̧dirȩ Ano̧mȩ pio ju̧i̧iä chji̧ chjadëra̧ goë cjo̧dëji̧ri̧ judiro̧. Ado pio ji̧ri̧ nö̧ta ori̧ bagari̧ ëba cjiarea̧mi̧ dari̧ ëba cjo̧ro̧tä ea tjamo̧requedemȩ chjadëri̧. 23Ado pumȩ judiro̧ badë maea oa ni̧bätaji̧ri̧ oa, ëba ni̧bätadë majȩrȩ. Japëtaramȩ ja̧ chji̧ri pio judiri cjitëmȩ jo̧rȩtarea̧ maeara̧ ni̧bä chjaodirȩ, teracaba maea oa. Ado judiro̧ ja̧di dari̧ ni̧bä chjaoa̧ oaiä, chjaodëri̧ goëdëri̧ cjiape bagurapai̧ dadirȩ jibëa̧ dëbëti̧ra̧ chia. Chjaodëri̧ ma̧ȩ goaedëti̧ra̧ dëbë ni̧bätaji̧ri̧pe bagapai̧ dadirȩ. 24Jabo a̧ro̧rȩ, Ano̧mȩ pio ju̧i̧ ja̧ mu̧i̧tjoi̧ pio judiro̧, jabechji̧ ibëa̧ pumȩ pio ji̧ri̧ nö̧ta ni̧bätadë matäreji̧ri̧rea̧ro̧jȩrȩ, jabo jabechji̧ chjaji̧ri̧rȩ datäreji̧ri̧rea̧ro̧jȩrȩ. Ado a̧ra̧ano̧täreji̧ri̧rea̧ro̧jȩrȩ judiro̧ chjadëri̧ dabaparea̧mi̧ dari̧. Jabechji̧ ütara̧mi̧ a̧ra̧ano̧täreji̧ri̧rea̧ro̧jȩrȩ, ma̧ chjua a̧ra̧ano̧ji̧ri̧rȩ. 25Ado a̧ro̧rȩ ma̧ȩ oa a̧ra̧ano̧ro, pumȩ judiro̧ ma̧ȩ oa jiade ta̧rëji̧ri̧rȩ dëbë ni̧bärä judi, chjadëri̧ dëbë ni̧bätäreji̧ri̧rea̧ro̧jȩrȩ. Jabechji̧ ma̧ȩ bücjüi̧ra̧ chi̧dëeatäreji̧ri̧rȩaro̧jȩrȩ chjadëri̧. Ado a̧ro̧rȩ ja̧di dari̧ a̧doa̧ oaiä, jabechji̧ no̧räpȩmo̧diämi̧ dari̧ japarea̧ yürüpai̧ dadejȩrȩ Ütë tjamo̧ judi. Ado chjereno̧ ano̧ mire jo̧rȩtape bagarea̧ yürüpai̧ dadejȩrȩ, judiro̧ ado chjereno̧ ma̧ȩ coëma oa quëna̧pea̧ oa. 26Tjamo̧ davä. Ichiae judi jëdano̧a̧ puërä choë cjatäa̧ oa cjiami̧ dari̧ cjiarërea̧ ji̧, pio ju̧i̧ ja̧ ma̧ȩrä cjo̧ro̧pea̧ oa tutia̧ oa cjiami̧ dari̧ cjiarërea̧ ji̧, jabechji̧ go̧dürea̧ daea̧mi̧ dari̧ cjiapai̧ dadirȩ, puëmi̧ daräpȩ cjo̧ro̧rea̧mi̧dëri̧.
©2021 Global Partners, All Rights Reserved