Pedro Ma̧ȩ 2 3
3
Jechu Quiricho judi ma̧na̧pea̧ do üdë querediä tjamo̧diibe.
1Danȩrȩ, go̧ȩpe chjadürequededibe ca̧ oti̧, cüdë tjamo̧ri̧ ea̧ pio ji̧ri̧. Pio dibë no̧mȩ tjamo̧ri ja̧ go̧ȩpe chjadürërea̧ ji̧, jabechji̧ ado chjereno̧ go̧ȩpe chjadürequededibe pio yoa ma̧ȩ oa. Ado cüdë dibë go̧ȩpea̧mi̧ nö̧ta, jabechji̧ bëdü jämi̧ dari̧ jo̧rȩta tänȩtämi̧ cjiarequededibe ca̧ oti̧, mȩnȩro̧ dabaparërea̧ pio ju̧i̧ ji̧dë ma jo̧rȩtatä, mȩnȩro̧ coëma cjiari̧ jo̧rȩtatä chjaocjiadëmȩ chji̧ra̧. 2Jabechji̧ chjadëri̧ jo̧rȩtatä earequededibe Ütë tjamo̧ ja̧ ma̧ȩ oa, Ütërë ea jana̧ chjadüa̧ oa ni̧bärëreji̧ri̧ pio judiro̧ no̧mȩ tjamo̧ri ja̧ yo̧rërea̧ ma̧ȩ pio ju̧i̧. Ado pio ju̧i̧ uëri peaja̧di chjadëri̧ jo̧rȩtatä earequededibe a̧ro̧rȩ yo̧rërea̧ ma̧ȩ pio ju̧i̧. Tjamo̧ davä ca̧ oti̧, a̧ro̧rȩ yo̧rërea̧ ma̧ȩ pio ju̧i̧, Ano̧mȩ Jechurë chjadüa̧ pio judiro̧ yo̧rërea̧ ma̧ȩ pio ju̧i̧ chjadëri̧ jo̧rȩtatä earequededibe peaja̧di. Jabechji̧ ibë Chjätä Tänȩmȩ pio ju̧i̧ ja̧ ma̧ȩ üdë ta̧rëdiäpea̧de. Ado pio ju̧i̧iä pio yoa ma̧ȩ oa go̧ȩpe chjadürequededibe ca̧ pumȩ.
3Aja̧ ca̧ oti̧, pio yoa ma̧ȩ oa tjamo̧ri̧ dabapea̧ chianȩrȩ. Jabechji̧ cjiadiäa̧ japamitërä pumȩ no̧i̧dërë dami̧ti̧ chjai̧dë oa jape chjaoji̧ri̧rȩ cjo̧ro̧padirȩ, jibëa̧ icjarari cjitëmȩ chjai̧dërë chi̧dëea̧ chja̧oerä cjo̧ro̧ji̧ri̧rȩ. Ado airi̧ cjia airi̧ cjia goae tarari̧ ya̧padiro̧dibe. Aja̧, mȩnȩro̧ Jechu pio ju̧i̧ chjiari quëna̧ oaiä, judi ado chjereno̧ ma̧na̧pea̧ pio ju̧i̧ chjiari quëna̧ oaiä, jabechji̧ ya̧padiro̧dibe. 4“Aja̧, ¿tjana̧räpȩde Quiricho judi?” iëno̧ë ta̧rëpadiro̧dibe. “¿Tjana̧räpȩde ibë bape chjaopamȩ judi? Cjäri̧ made, judi ado ma̧na̧pea̧ pio ju̧i̧ chjiari yo̧ë cji̧därërea̧mi̧ ma̧na̧dëpade. Jabechji̧ bape chjaodëpadiibe. Jabechji̧ ibëa̧ ütëti̧rea̧ pio judiro̧ no̧mȩ tjamo̧ri ja̧ ji̧dë ma goëje ano̧ mire cjo̧ro̧rëreji̧ri̧rȩ ano̧ mire cjo̧ro̧ baärëreji̧ri̧dirȩ. Ado ji̧dë ma ja̧bo ga̧re baärëreji̧ri̧dirȩ japamitë ana̧ tjamo̧ chjätä ëte, jabo Jechu judi pio jibë bape chjaopea̧ ji̧ ma̧na̧tärea̧ ji̧, cjäri̧ made, ma̧na̧dëa̧de. Japadëa̧dejȩrȩ. Ado pio ju̧i̧iä uaparea̧mi̧dëde. Jabechji̧ bape chjaodëpadiibe. Jabechji̧ chiri üdë pearä judirä pareapea̧ oa cjia̧ pio judiri yurori cjo̧ro̧ baä marea̧rȩ a̧ro̧rȩ pearä cjo̧ro̧rërea̧mi̧. Jabechji̧ Jechu judi ma̧na̧dëa̧de, ado peaja̧di ma̧na̧dëpade” yo̧ji̧ri̧rȩ ya̧padirȩ, airi̧ cjia chjaoji̧ri̧rȩ. “Jabechji̧ teracabari̧ quëna̧nȩrȩ mȩnȩro̧” yo̧padiro̧dibe to̧bari̧.
5-6Jabo cjäri̧ madirȩ, Ütë tjamo̧ ja̧ ma̧ȩ pio ju̧i̧ chjiari airi̧ cjia airi̧ cjia ni̧bäji̧ri̧ pio judiro̧, “Jechu judi ado chjereno̧ ma̧na̧dëpade” yo̧ji̧ri̧ pio judiro̧ tjamo̧ri̧ jo̧rȩtadëri̧ cjiadirȩ Ütë tjamo̧ pio ju̧i̧ chjiari. Judi pearä judirä jibëa̧ ma̧ȩ jauëchjara̧ chjö̧na̧i̧ oa pareaparërea̧ pio ju̧i̧ chjiari tjamo̧ri̧ jo̧rȩtadëri̧ cjiadirȩ. Jabo a̧ro̧rȩ daba marea̧rȩ jabo. ‘Aja̧, a̧dë üdë pareapea̧ oa cjiadida, Ütë tjamo̧ ja̧ ma̧ȩ jauëchja pio ju̧i̧iä pareapea̧ oa cjiarëremȩdida, pearä judirä pareapea̧ oa cjiarëremȩdida, dabu üdë peaja̧di pareapea̧ oa cjiarëremȩdida’ quëna̧ daba maearea̧rȩ. Jabechji̧ dabu pio ju̧i̧ go̧dü tänȩrëremȩdejȩ Ütë tjamo̧ judi ui ëteri pio judiri. Ado uira̧ pio ju̧ri̧ra̧ chjadëri̧ jëdano̧rëremȩdejȩ dabu oa. Ado Ütë tjamo̧ judi jënȩ pearä pareapea̧ pio ju̧i̧ chjadëri̧ jida oaiä, jabechji̧ chjadëri̧ a̧rȩ maeade, jënȩ pearä judirä pareaparërea̧ pio judiri yurori. Jibëa̧ no̧rämo̧ jämi̧ dari̧ baäde oëra̧ baärea̧ decjiari̧. Dëdë, chjö̧na̧i̧rȩ chjadëri̧ jida̧ oa cjiarëremȩde. Jabo ja̧dëa ji̧ ütara̧ japa mitë chjätä ëte, ¿tjana̧ japarëremȩde Ütë tjamo̧ judi? Tjana̧ japadëa̧, jabechji̧ jënȩ pearä pareaparërea̧ dabu pio ju̧i̧ goarijä tänȩrëremȩdejȩ uira̧ pio ju̧ri̧ra̧ pumȩ judiro̧ chjai̧dëri̧ jape chjaorërea̧ pio ju̧i̧iä. Jabechji̧ jibëa̧ ma̧ȩ jauëchjara̧ pio ju̧ri̧ra̧ goarijä tänȩrëremȩdejȩ pearärëremi̧dëpe bagarea̧mi̧ dari̧. Jabo cjäri̧ madirȩ ca̧ oti̧, coëma cjiari̧ jo̧rȩtatärea̧ ji̧, Ütë tjamo̧ ja̧ ma̧ȩ pio ju̧i̧ chjiari airi̧ cjia airi̧ cjia ya̧ji̧ri̧ pio judiro̧ coëma cjiari̧ jo̧rȩtatärea̧ ji̧, cjäri̧ madirȩ, jo̧rȩtadëpe bagatämi̧ cjiadirȩ Ütë tjamo̧ judi japarërea̧ pio ju̧i̧ chjiari, jȩnȩ dabu oa pearä ma̧i̧ dari̧ goarijä tänȩrea̧ pio ju̧i̧ chjiari. 7Ado danȩrȩ, Ütë tjamo̧ judi jibëa̧ ma̧ȩ jauëchjara̧ dabu oa goarijä tänȩrërea̧ ji̧, ui ana̧ra̧ pio ju̧ri̧ra̧ goarijä tänȩrërea̧ ji̧, jabechji̧ ado chjereno̧ goarijä tänȩpadejȩ pio jiro ma̧ȩ jauëchjara̧. Tjamo̧ davä. Jibëa̧ ma̧ȩ jauëchjara̧ pio ju̧ri̧ra̧ ado chjereno̧ japapade Ütë tjamo̧ judi. Jabechji̧ judi yo̧ë cji̧därërea̧mi̧ ado chjereno̧ japapade dabu oa, a̧dëbo. Jabechji̧ judi pareapea̧ pio ju̧i̧ chjadëri̧ jidarërea̧ ji̧, cjäri̧ madejȩ, ütara̧ doro jënȩ ütarë jo̧rȩta̧mi̧ ma̧i̧ dari̧ japamȩrȩ goarijä tänȩpadejȩ. Jabechji̧ judi pearä judi ui maeara̧ japarërea̧ ji̧, jabechji̧ cjo̧dë maeara̧ ano̧ mire japapadejȩ yaba̧. Jabechji̧ a̧dëräpȩ baramȩ üdë chjö̧na̧i̧rȩ tja mape bagari̧ tüea̧ oa cjiapade, dabubo, chiri nö̧tai̧därä oa. Tjamo̧ davä. Do üdë, gupënȩ üdë, buë üdë, chiri nö̧tai̧därä üdë tja mape bagari̧ tüea̧ oa cjiapade yuroparea̧mi̧ dari̧. Jabechji̧ peadëri ja̧ china̧chjari̧ tutia̧ oa cjiarëremȩde tüe baäa̧ oa cjiapea̧ oa, yuropea̧ oa cjiapea̧ oa. Ado Ütë tjamo̧ judi ja̧di dari̧ japarä, peaja̧di bucho ana̧ aeno̧a̧ oa cjiapea̧ oa bape chjaopadejȩrȩ pio jȩa chjiari jo̧rȩtadëri̧ cjiaji̧ri̧ pio ji̧ri̧. Jabo cjäri̧ madirȩ, airi̧ cjia airi̧ cjia ya̧ji̧ri̧ pio judiro̧ pio ju̧i̧ chjiari jo̧rȩtadëri̧ cjiadirȩ.
8Jabo danȩrȩ ca̧ oti̧, pio dibë ea tjamo̧mȩrȩ pio yoa ma̧ȩ oa yürütämi̧ cjiarequededibe ibëa̧ Ano̧mȩ pio ju̧i̧ chjiari, judi bape chjaopea̧ üdë ja̧bë ma̧na̧dëa̧ pio ju̧i̧ chjiari. Jabechji̧ judi yo̧ë cji̧därërea̧ ma̧ȩ üdë, “Aja̧, ado chjereno̧ ma̧na̧parequede pumȩ ütëbodärä oa bape chjaopea̧ oa” yo̧mȩrȩ yo̧ë cji̧därërea̧ ma̧ȩ üdë, jabechji̧ peadë yo̧dërëremȩde, jabo no̧mȩ tjamo̧ri ja̧ yo̧rëremȩde. Jabo danȩrȩ ca̧ oti̧, pio yoa ma̧ȩ oa chjadëri̧ jo̧rȩtatä earequededibe jo̧rȩtadëpe bagarea̧ decjiari̧. Jabechji̧ pio a̧ro̧rȩ ütarami̧ ütaradëmȩde Ano̧mȩ judi. A̧ro̧rȩ japamitë pio ju̧i̧ chjiari ütarami̧ ütaradëmȩde. Jabechji̧ pio ibëiä japamitë ana̧ tjamo̧ üdë, japamitë ana̧ tjamo̧dëde Ütë tjamo̧ pio ju̧i̧iä jabo japamitë boi̧chji̧mi̧ dade. Ado pio ibëiä japamitë boi̧chji̧ üdë, jabechji̧ japamitë ana̧mi̧ dade Ütë tjamo̧ pio ju̧i̧iä. Jabechji̧ cja̧rȩmȩ do üdë mil uimi̧ dade Ano̧mȩ pio ju̧i̧iä, ütararea̧mi̧dë uimi̧ dade pio ju̧i̧iä. Ado mil ui üdë cja̧rȩmȩ domi̧ dade Ano̧mȩ pio ju̧i̧iä. Pio ju̧i̧iä yo̧requededibe. A̧ro̧rȩ ütara̧mi̧ ütaradëmȩde ibëa̧ Ano̧mȩ judi. A̧ro̧rȩ japamitë pio ju̧i̧ chjiari ütarami̧ ütaradëmȩde. 9Pio ju̧i̧iä oëra̧ jo̧rȩtadëtäreji̧ri̧nȩrȩ. 'Jabechji̧ Ano̧mȩ judi jabë ma̧na̧dëa̧dida, judi yo̧ë cji̧därërea̧mi̧ ma̧na̧dëa̧dida, ado japamitë ana̧diäa̧ oaiä, jabechji̧ ma̧na̧daemȩ jirodida' quëna̧ jo̧rȩtadëtäreji̧ri̧nȩrȩ. Jabo danȩrȩ, jëreeadëmȩrȩ ma̧ chjua jidatadejȩrȩ pumȩ ütëbo oa. Jabechji̧ pumȩ cja̧rȩmȩrȩ aeno̧a̧ oa cjiatä eadëdejȩrȩ, jabo ütëbodärä oa ano̧ mire jo̧rȩtarea̧ datä eamȩrȩ dadejȩrȩ. Ado pio ju̧i̧iä jabë ma̧na̧dëa̧de pumȩ ji̧ri̧ bape chjaopea̧ oa. Pio ju̧i̧iä ma̧ chjua jo̧rȩtamȩrȩ jidatadejȩrȩ pumȩ ji̧ri̧ quëna̧pea̧ ji̧.
10Jabo ibëa̧ Ano̧mȩ judi jo̧ȩra̧pe ma̧na̧dëräbo, jabechji̧ judi ma̧na̧pea̧ do üdë acji ma̧na̧padejȩrȩ. Garümȩmi̧ dari̧ acji ma̧na̧pade pumȩ judiro̧ daba quëna̧dërä. Ado cjo̧dë oaiä chjaodëri̧ yuropea̧ oa cjiapade a̧dë üdë, do üdë, gupënȩ üdë, a̧dëräpȩ chamȩ boë üdë chjö̧na̧i̧rȩ. Jabechji̧ ma̧i̧ dari̧ järä ea cjiari̧ tüe baäa̧ oa cjiapade yuroparea̧mi̧ dari̧. Do decjiape bagari̧, gupënȩ decjiape bagari̧, büë decjiape bagari̧ tüea̧ oa cjiapade, cjiadiärea̧ decjiari̧. Ado dabu üdë, chiri nö̧tadäräti̧rȩ tüe baäa̧ oa cjia mapade peaja̧di jiro decjiape bagari̧, chiriräremȩ üdë cjiadiärea̧ decjiari̧. Tjamo̧ davä ca̧ oti̧. Ütë tjamo̧ ja̧ ma̧ȩ pio ju̧i̧ chjiari airi̧ cjia airi̧ cjia ya̧ji̧ri̧ pio judiro̧ yo̧a̧räbo, “Cjäri̧ made, ado ma̧na̧dëpade” yo̧a̧räbo, jabechji̧ ibëa̧ Ano̧mȩ pio judi tjamo̧ri̧ ma̧na̧pade, jënȩ yo̧rërea̧mi̧.
11Ado pio ju̧i̧iä iëno̧ë ta̧rërequededibe ca̧ oti̧. Danȩrȩ, Ütë tjamo̧ judi cjo̧dëra̧ pio ju̧ri̧ra̧ uapai̧ da tjamo̧ri̧ japapa tara, ¿yö̧ta dari̧ jo̧rȩtaji̧ri̧rȩ cjo̧ro̧täreji̧ri̧nȩrȩ? Judi cjo̧dëra̧ pio ju̧ri̧ra̧ chjö̧na̧i̧ oa goarijä tänȩpa tara, ¿yö̧ta dari̧ japaji̧ri̧rȩ cjo̧ro̧täreji̧ri̧nȩrȩ? Yö̧ta dari̧dë, jabechji̧ pio yoaiä cjo̧ro̧pea̧ üdë chjaodëri̧ goarijäpai̧ dadiibëda’ quëna̧ jo̧rȩtaji̧ri̧rȩ tatachjami̧ dari̧ cjo̧ro̧täreji̧ri̧nȩrȩ, Ütë tjamo̧ ja̧ ma̧ȩrämo̧ cjo̧ro̧pea̧ ji̧ järiji̧ri̧rȩ. 12Aja̧, Jechu judi tjamo̧ri̧ ma̧na̧pa tara, ja̧di dari̧ cjo̧ro̧chji̧vä. Jabechji̧ jidatachji̧jo̧ȩ. Judi ma̧na̧pea̧ ji̧ jo̧rȩtariä cjo̧ro̧chji̧vä. Judi jo̧ȩra̧pe ma̧na̧tä eaji̧ri̧rȩ jo̧rȩtachji̧jo̧ȩ. Jabechji̧ a̧dë üdë tüea̧ oa cjiapade, chiribo. A̧dë chjäte cjüëtü oaiä, ma̧i̧ dari̧ gärimȩ oaiä, uiuia mape bagari̧ yuropapade a̧dë üdë. Tjamo̧ davä. Do üdë, gupënȩ üdë, a̧dëräpȩ cjiamȩ buë üdë chjö̧na̧i̧rȩ uiuia mape bagari̧ yuropapade. 13Jabo danȩrȩ, Ütë tjamo̧ judi ja̧di dari̧ japaparäbo, judi pearä judirä pareapea̧ chjö̧na̧i̧ti̧ oa yuropaparäbo, jabechji̧ judi pareapapea̧ pio ju̧i̧ jidataji̧ri̧rȩ cjo̧ro̧rea̧rȩ ca̧ oti̧. Jabechji̧ judi chjö̧na̧i̧ oa ado chjereno̧ pareapapea̧rä, jabechji̧ a̧dë peaja̧ pio ju̧i̧ daparea̧ro̧jo̧ȩ, dabu peaja̧bo. Aja̧, peaja̧ maea oa daparea̧ro̧jo̧ȩ ca̧ oti̧. Ado ju̧ri̧pȩ cjo̧ro̧paji̧ri̧ pio judiro̧ ütëbodärärë, jabechji̧ coëma cjiari̧ cjo̧ro̧ mapadirȩ chjai̧dë oa japarea̧ decjiari̧. Ado pio ju̧i̧iä jabechji̧ Ütë tjamo̧ judi jabërä yo̧ë cji̧därërea̧ pio ju̧i̧ jidataji̧ri̧rȩ cjo̧ro̧rea̧rȩ, tatachami̧ dari̧ cjo̧ro̧ji̧ri̧rȩ.
14Ado pio ju̧i̧iä chidëearequededibe ca̧ oti̧, cüdë tjamo̧ri̧ ea̧ pumȩ pio ji̧ri̧. Danȩrȩ, mȩnȩro̧ chiri peaja̧ oa jidataji̧ri̧rȩ cjo̧ro̧a̧ nö̧ta, jabechji̧ järi tjamo̧chji̧vä coëma cjiari̧ cjo̧ro̧pea̧ oa, ji̧dë ma co chjami̧ dari̧ cjo̧ro̧pea̧ oa. Jabechji̧ mȩnȩro̧ ja̧di dari̧ cjo̧ro̧a̧ oaiä ma̧ chjupi̧ cjiari̧ jo̧rȩtarea̧ dapanȩrȩ, chji̧ goaera̧ jo̧rȩtaji̧ri̧rȩ. Ado ja̧dëa ji̧ Ütë tjamo̧ pio judi ma̧na̧rä, peaja̧dimi̧ dari̧ cjo̧ro̧ji̧ri̧ oa dana̧ra̧tädidibe.
15Ado danȩrȩ ca̧ oti̧, ibëa̧ Ano̧mȩ judi ado chjereno̧ ma̧na̧pea̧ ji̧ a̧dë jo̧rȩtadëchji̧vä. Jabechji̧ tjamo̧ri̧ ma̧na̧pade. Jabo judi jo̧ȩra̧pe ma̧na̧tärea̧ ji̧, ma̧ chjua jidatamȩrȩ dadejȩrȩ pumȩ ji̧ri̧, chjätärea̧ datä ea tjamo̧mȩrȩ. Peaja̧di ta̧rëri̧ go̧ȩparëremȩdidibe ibëa̧ omȩ Paboro pio judi, a̧ro̧rȩ tjamo̧ri̧ ea̧ pio judi. Jabechji̧ Ütë tjamo̧ judi urëdi oa jo̧rȩtarea̧ yürüa̧ oa peaja̧di ta̧rëri̧ go̧ȩpe chjadürëremȩdidibe ibëa̧ Ano̧mȩ judi ado chjereno̧ ma̧na̧pea̧ pio ju̧i̧ chjiari. 16Aja̧, Pablo judi quëna̧ji̧ri̧ pio ji̧ri̧ go̧ȩpea̧mi̧ nö̧ta, jabechji̧ pio jiro ma̧ȩ pio ju̧i̧ chjiari go̧ȩparëremȩde. Jabo judi go̧ȩparërea̧ ma̧ȩ üdë orë, dëdë jamȩpai̧ dade. Chjaode dabapapea̧ ji̧. Jabo jamȩpai̧daräbo, jabechji̧ coëma cjiari̧ baäde. Jabo Ütë tjamo̧ ja̧ ma̧ȩ oa chjadëri̧ dabapadëji̧ri̧ pio judiro̧ pio jiro ma̧ȩ oa go̧ȩ ni̧bäa̧ oaiä, jabomo̧ uëmo̧ uëmo̧ jo̧rȩtaji̧ri̧ pio judiro̧ pio jiro ma̧ȩ oa go̧ȩ ni̧bäa̧ oaiä, cjäri̧ madirȩ, chjaodëri̧ oëra̧ jo̧rȩtadirȩ. Paboro judi go̧ȩpea̧ pio ju̧i̧ chjadëri̧ dabapatärea̧ ji̧, ado cja̧rȩmo̧ ma̧ȩpe järea̧mi̧ dari̧ japadiro̧jo̧ȩ, pirua̧ oa cjiami̧ dari̧. Ado Paboro judi go̧ȩpea̧ pio ju̧i̧mo̧i̧ pirua̧ oa cjiami̧ dari̧ japadëdiro̧jo̧ȩ, jabo Ütë tjamo̧ ja̧ ma̧ȩ codë oa japadiro̧jo̧ȩ ji̧dëri̧. Aja̧, teracaba jo̧rȩtarea̧ra̧ pio ju̧ri̧ra̧ mirea̧ oa goami̧ dari̧ goadiro̧jo̧ȩ Ütë tjamo̧ ja̧ ma̧ȩdëpe bagami̧ dari̧, taria̧ oa cjiape bagami̧ dari̧. Jabo judiro̧ ja̧di dari̧ japea̧ oaiä, jabechji̧ bucho ana̧ bape chjaoa̧ oa cjiapadirȩ. 17Ja̧di tara chi̧dëearequededibe ca̧ oti̧, cüdë tjamo̧ri̧ ea̧ pumȩ pio ji̧ri̧. Jabechji̧ mȩnȩro̧ pio jiro oëra̧ a̧ra̧ano̧ji̧ri̧ pio ji̧ri̧ chjiari dabadëchea oa, jabërä na̧e chiatä eamȩrȩ go̧ȩpe chjadürequededibe mȩnȩro̧ pio ji̧ri̧iä u̧i̧pea̧ oa cjiachea oa. Jabechji̧ chjai̧dë tjamo̧dirȩ. Tüdüa̧mi̧ darä cjo̧ro̧dëji̧ri̧rȩ a̧ra̧ano̧dirȩ teracaba oa. Ado mȩnȩro̧ pio ji̧ri̧iä u̧i̧pea̧ cjiachea oa, jabërä yo̧requededibe ca̧ oti̧, mȩnȩro̧ ji̧dë ma chjuari̧ cjiami̧ dari̧ cjiapea̧ oa, mȩnȩro̧ pio ji̧ri̧iä coere a̧rȩdäräji̧ri̧mi̧ dari̧ cjiachea oa.
18Aja̧ ca̧ oti̧, judiro̧ oëra̧ a̧ra̧ano̧a̧ oaiä u̧i̧pea̧ oa cjiadëchji̧vä, jabo ji̧dëri̧ Ütërë cjäri̧ri̧ cjiamȩrȩ a̧doa̧ oaiä cjo̧ro̧chji̧vä tëchjape bagami̧ dari̧, üi̧padärärea̧mi̧ dari̧. Jabechji̧ ibëa̧ Ano̧mȩ Jechu Quiricho pio ju̧i̧ chjiari dabapea̧ oaiä joechjape bagami̧ dari̧ cjiachji̧vä ibë Chjätä Tänȩmȩ pio ju̧i̧ chjiari ji̧dë u̧i̧ urëdi oa jo̧rȩtape bagarea̧mi̧ dari̧.
Jabechji̧ pio ju̧i̧iäpȩmo̧ chjacjiamȩ tjamo̧ri̧ jo̧rȩtapea̧de yaba̧. Pio ju̧i̧iäpȩmo̧ chjacjiamȩri̧ jo̧rȩtapea̧de bucho ana̧. Tjamo̧ davä. Ja̧di dari̧ japapea̧de.
Pio ju̧i̧mo̧ ma̧ȩ oa go̧ȩpe chjadürequededibe ca̧ oti̧. Cjo̧ro̧ibe.
Dibëa̧ omȩ, Pedro
©2021 Global Partners, All Rights Reserved