Pedro Ma̧ȩ 2 2
2
Oëra̧ a̧ra̧ano̧ji̧ri̧ pio judiro̧, dibë tjamo̧ri̧ u̧i̧patämi̧ cjiaji̧ri̧ pio judiro̧ ana̧ri̧ bape chjaoa̧ oa cjiapadirȩ Ütë tjamo̧ pio ju̧i̧iä.
1Danȩrȩ ca̧ pumȩ, Ütërë ea jana̧ chjadüa̧ oa ni̧bäji̧ri̧ pio judiro̧ chjadëri̧ a̧ra̧ano̧rëreji̧ri̧dirȩ icharaita ja̧ chjarerä. Jabo danȩrȩ, Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧borë a̧ra̧ano̧rëreji̧ri̧dirȩ pio ji̧ri̧ ja̧ charerä. Jabechji̧ Ütërë ea jana̧ chjadüa̧ oa ni̧bäji̧ri̧ pio judiro̧mo̧rȩ a̧ra̧ano̧tärea̧ ji̧, pio judiro̧mo̧rȩ Icharaita pio ji̧ri̧iäpȩmo̧ a̧ra̧ano̧tärea̧ ji̧, teracabari̧ ni̧bäji̧ri̧ pio judiro̧borë a̧ra̧ano̧rëreji̧ri̧dirȩ, jibëa̧ ma̧na̧ri̧ jo̧rȩtaji̧ri̧rȩ. Ado danȩrȩ ca̧ oti̧, peaja̧dimi̧ dari̧ japapai̧ dadirȩ dibëa̧ chjareräji̧ri̧ pio judiro̧ orë. Jabechji̧ chjadëri̧ a̧ra̧ano̧cji quëna̧ japaji̧ri̧rȩ teracaba ma̧ȩ oa a̧ra̧ano̧pai̧ dadiro̧dibe. Goadiji̧ri̧mi̧ dari̧ a̧ra̧ano̧pai̧ dadiro̧dibe. Aja̧, ‘teracaba ma̧ȩ oa ni̧bä chjaodiro̧ibëda’ quëna̧ jo̧rȩtadëji̧ri̧ oa goadiji̧ri̧mi̧ dari̧ a̧ra̧ano̧pai̧ dadiro̧dibe. Jabechji̧ uapai̧ dari̧ a̧ra̧ano̧pai̧ dadiro̧dibe pumȩ no̧i̧dë tjamo̧rȩ ana̧ri̧ oëra̧diärea̧mi̧ dari̧, quëna̧ji̧ri̧ pio judiro̧ cja̧rȩmȩ chji̧ chiami̧ dari̧ jo̧rȩtadëpe bagarea̧mi̧ dari̧. Jabechji̧ Quiricho pio judi pumȩ ütëbodärä ja̧ oa tuti ba ano̧a̧räbo, pumȩ judiro̧ ja̧boa̧ chja̧oeri pio judiri go̧dürea̧mi̧ dari̧ tuti ba ano̧a̧räbo, cjäri̧ madiro̧jo̧ȩ, “Quiricho judi ibëa̧ Ano̧mȩ tjamo̧dëde, ado pio ju̧i̧ ja̧ chja̧oerä cjo̧ro̧dëpea̧de” yo̧pai̧ dadirȩ. Jabo cjäri̧ madejȩrȩ ca̧ oti̧, judiro̧ ja̧di dari̧ japea̧ ba oaiä chjaodëri̧ bape chjaopadejȩrȩ Ütë tjamo̧ judi.
2Jabo quëna̧ji̧ri̧ pio judiro̧ pio jiro pumȩ pio ji̧ri̧ chjuari̧ jiadatärea̧ ji̧, cjäri̧ madiro̧jȩrȩ, no̧i̧dë tjamo̧rȩ ta̧rë ja̧bopadiro̧jȩrȩ. Ado ta̧rë ja̧boji̧ri̧rȩ cho̧rëdiäpai̧ dadiro̧jȩrȩ ji̧dëri̧, ‘Quiricho pio ju̧i̧ ja̧ chja̧oerä cjo̧ro̧pea̧ chiaa̧ro̧da’ quëna̧rea̧ decjiari̧. Tjamo̧ davä. Chjai̧dëri̧ japaji̧ri̧ pio ji̧ri̧ cho̧rëdiäpai̧ dadiro̧jȩrȩ, china̧chja pio ji̧ri̧ idi̧ dari̧ baë ëba mo̧a̧ji̧ri̧ pio ji̧ri̧. Ado quëna̧ji̧ri̧ pio judiro̧ ja̧di dari̧ japea̧ pio ju̧i̧iä, cjäri̧ madirȩ, quëna̧dëji̧ri̧ pio judiro̧ chjai̧dëri̧ ni̧bäpai̧ dadirȩ Ütë tjamo̧ ja̧ ma̧ȩ pio ju̧i̧ chjiari. Tjamo̧ davä. Judiro̧ quëna̧ji̧ri̧ pio ji̧ri̧ daea̧ oaiä, judiro̧ ma̧i̧ dari̧ japaji̧ri̧ oa daea̧ oaiä, cjäri̧ madiro̧jo̧ȩ, Ütë tjamo̧ ja̧ ma̧ȩ oa ba chia jo̧rȩtatärea̧ ji̧, jabechji̧ chjai̧dëri̧ jo̧rȩtapai̧ dadirȩ pio ju̧i̧ chjiari.
3Aja̧ ca̧ oti̧, pio jiro oëra̧ a̧ra̧ano̧ji̧ri̧ pio judiro̧ chëre goaraji̧ri̧rȩ u̧i̧pe u̧i̧pe ni̧bäpai̧ dadiro̧dibe dibëa̧ pio ju̧i̧ baë mitërea̧ dapea̧ oa. Jabechji̧ goaeri̧ ni̧bäji̧ri̧rȩ teracaba ma̧ȩ maea oa ni̧bäpai̧ dadiro̧dibe, jibëa̧ icjarari pio judiri cjitëmȩ chjai̧dë jo̧rȩtarea̧ pio ju̧i̧. Jabo danȩrȩ, Ütë tjamo̧ judi peadëri ja̧ na̧e chiade davä oëra̧ a̧ra̧ano̧ji̧ri̧ pio ji̧ri̧ chjiari. ‘Jabechji̧ bape chjaoa̧ oa cjiapea̧ chiadiro̧da’ quëna̧ jo̧rȩtade davä no̧mȩ tjamo̧ri ja̧. Ado pio ju̧i̧iä, ‘A̧ja̧, Ütë tjamo̧ judi mo̧a̧mi̧ dari̧ cjia jirodida, eami̧ oa japadaemȩ jirodiji̧ri̧da’ quëna̧rea̧mi̧dëde jabo jabechji̧, ütara̧ doro, jënȩ jabërä ütarë jo̧rȩtarërea̧ra̧ pio ju̧ri̧ra̧ uapai̧ da tjamo̧ri̧ bape chjaopadejȩrȩ.
4Aja̧ ca̧ oti̧, pio jiro oëra̧ a̧ra̧ano̧ji̧ri̧ pio ji̧ri̧ ‘tjamo̧ri̧ bape chjaoa̧ oa cjiapadiro̧da’ quëna̧ dabarea̧rȩ. Jabo ¿tjana̧ ju̧i̧iä tjamo̧ri̧ dabarea̧rȩ? Tjana̧ ju̧i̧iädë, jabechji̧ no̧mȩ tjamo̧ri̧ ja̧ jiadarëreji̧ri̧ pio judiro̧ bape chjaoa̧ oa cjiarërea̧ tara. Ado pio judiro̧ cjiarërea̧mi̧ bape chjaoa̧ oa cjiapadirȩ peaja̧di oëra̧ a̧ra̧ano̧ji̧ri̧ judiro̧. Pio ju̧i̧ tjamo̧ri̧ dabarea̧rȩ. Jabechji̧ a̧dëräpȩ cjiarëreji̧ri̧ mu̧i̧tjoi̧ pio judiro̧ pearä judi chjai̧dëri̧ japarërea̧ ji̧, ‘Cjäri̧ maquëda, pio ji̧ri̧ bape chjaodëpaquiji̧ri̧da’ quëna̧ jo̧rȩtamȩrȩ dadërëremȩdejȩrȩ, jabo jabechji̧ ma̧i̧ da bagönȩräpȩ ju̧ri̧ aeno̧rëremȩdejȩrȩ Ütë tjamo̧ judi, puë urëdi tjamo̧räpȩ ju̧ri̧. Aja̧, pio ju̧ri̧pȩ china̧chjari̧ tutirëremȩdejȩrȩ ütara̧ doro ütarë bape chjaopea̧ oa.
5Ado danȩrȩ, no̧mȩ tjamo̧ri ja̧ cjo̧ro̧rëreji̧ri̧ pio judiro̧ Noerea̧ pio ju̧i̧ nö̧ta ëba cjo̧ro̧rërea̧ ji̧, 'jabechji̧ cjiadiäpaquëda, bape chjaodëpaquiji̧ri̧da’ quëna̧ jo̧rȩtamȩrȩ dadërëremȩdejȩrȩ Ütë tjamo̧ judi, jabo ui ana̧ oa chjadümȩrȩ je mu̧i̧ ja̧bo tänȩ marëremȩdejȩrȩ ütëbo oa. Tjamo̧ davä. Ütë tjamo̧ pio ju̧i̧ chjiari jo̧rȩtadëri̧ cjiaji̧ri̧ pio ji̧ri̧ bape chjaomȩrȩ je mu̧i̧ ja̧bo tänȩrëremȩdejȩrȩ. Jabo Noerea̧ pio ju̧i̧ chjadëri̧ chjätä tänȩrëremȩdejȩ. Tjamo̧ davä. Pumȩ judiro̧ jabechji̧parȩa̧ oa cjiapea̧ oa a̧ra̧ano̧tamȩ pio ju̧i̧ chjätä tänȩrëremȩdejȩ Ütë tjamo̧ judi, jibëa̧ pumȩ pio ji̧ri̧bo, 7 oa.#2:5 Taruparea̧ Ma̧ȩ 7:22-24
6Ado danȩrȩ, peaja̧di dari̧ bape chjaorëremȩdejȩrȩ Chodomaräpȩ cjo̧ro̧rëreji̧ri̧ pio ji̧ri̧, Gomoraräpȩ cjo̧ro̧rëreji̧ri̧ pio ji̧ri̧. Jabechji̧ cjo̧dëra̧ pio ju̧ri̧ra̧ bape chjaorëremȩdejȩrȩ achäcä mape bagari̧. Ado pio ju̧i̧iä tjamo̧ri̧ dabarea̧rȩ ca̧ oti̧. Jabechji̧ Ütë tjamo̧ judi ja̧di dari̧ uapai̧ da tjamo̧ri̧ japarërea̧ pio ju̧i̧iä, ‘jabechji̧ tjamo̧ri̧ dabaa̧ro̧da, Ütë tjamo̧ pio ju̧i̧ chjiari tjamo̧ri̧ dabaa̧ro̧da, pio jȩa jiadaji̧ri̧ pio ji̧ri̧ bape chjaopea̧ pio ju̧i̧ chjiari tjamo̧ri̧ dabaa̧ro̧da’ quëna̧ dabaji̧ri̧pea̧rea̧rȩ. Jabechji̧ 'Ütë tjamo̧ judi Chodomaräpȩ cjo̧ro̧rëreji̧ri̧ pio ji̧ri̧ tjamo̧ri̧ bape chjaorërea̧mi̧ bape chjaopadiji̧ri̧da, Ütë tjamo̧ ju̧i̧iäpȩmo̧ chjiari jo̧rȩtadëri̧ cjiaji̧ri̧ pio ji̧ri̧ tjamo̧ri̧ bape chjaopadiji̧ri̧da’ quëna̧ dabaji̧ri̧pea̧rea̧rȩ ca̧ oti̧, tjamo̧ri̧ dabaji̧ri̧rȩ. Tjamo̧ davä. ‘Judi Gomoraräpȩ cjo̧ro̧rëreji̧ri̧ pio ji̧ri̧ tjamo̧ri̧ bape chjaorërea̧mi̧ bape chjaopadiji̧ri̧da, jibëa̧ ma̧ȩ oa jiadaji̧ri̧ pio ji̧ri̧ tjamo̧ri̧ bape chjaopadiji̧ri̧da’ quëna̧ tjamo̧ri̧ dabarea̧rȩ.#2:6 Taruparea̧ Ma̧ȩ 19:24 7Jabo danȩrȩ ca̧ oti̧, Ütë tjamo̧ judi pio jiro pumȩ ütëbodärä oa ja̧bo tänȩrërea̧räbo, jabechji̧ cja̧rȩmȩ oa go̧dü tänȩrëremȩdejȩ. Tjamo̧ davä. Coëma̧ cjiari̧ cjo̧ro̧rëremȩ pio ju̧i̧, Oto quȩmȩrea̧ pio ju̧i̧ chjadëri̧ go̧dü tänȩrëremȩdejȩ. Aja̧, Chodomaräpȩ cjo̧ro̧ji̧ri̧ pio judiro̧ a̧dë chjäte idi̧ dari̧ ëba mo̧a̧ chjaoa̧ pio ju̧i̧iä gito ana̧ri̧ jo̧rȩtarëremȩ pio ju̧i̧ chjadëri̧ go̧dü tänȩrëremȩdejȩ Ütë tjamo̧ judi. 8Jabechji̧ judi pio ji̧ri̧ ja̧ chjarerä cjo̧ro̧a̧ nö̧ta, ji̧dë ma gito ana̧ri̧ jo̧rȩtamȩrȩ cjo̧ro̧rëremȩde jënȩ doti̧mi̧ ta̧rë chjaoa̧ oaiä, jënȩ idi̧ dari̧ jape chjaoji̧ri̧ oa ji̧dë ma dae chjaoa̧ oaiä. Jabechji̧ judi coëma cjiari̧ cjo̧ro̧a̧ pio ju̧i̧iä goae tjamo̧dërëremȩdejȩ davä jënȩ ji̧dë ma daea̧ oaiä, tüdüa̧mi̧ darä cjo̧ro̧dë maea oa dae chjaoa̧ oaiä. Ado pio ju̧i̧iä Ütë tjamo̧ judi go̧dü tänȩrëremȩdejȩ.
9Ado danȩrȩ ca̧ oti̧, Ütë tjamo̧ judi Oto pio ju̧i̧ go̧dü tänȩrërea̧ pio ju̧i̧iä, jabechji̧ tjamo̧ri̧ dabareare Ano̧mȩ pio ju̧i̧ chjiari. ‘Aja̧, ibëa̧ Ano̧mȩ judi dabadida, jibëa̧ ma̧ȩrä cjo̧ro̧ji̧ri̧ pio ji̧ri̧ chjadëri̧ go̧dü tänȩpea̧ ji̧ dabadida, judiro̧ chjai̧dë oa chjätäräbo chjadëri̧ go̧dü tänȩpea̧ ji̧ dabadida’ quëna̧ jo̧rȩtaji̧ri̧rȩ tjamo̧ri̧ dabarea̧rȩ. Jabo danȩrȩ, ibëa̧ Ano̧mȩ judi peaja̧di dabade pio jȩa chjiari jo̧rȩtadëri̧ cjiaji̧ri̧ pio ji̧ri̧ bape chjaopea̧ ji̧. Ado pio ju̧i̧iä china̧chjari̧ tutia̧ oa goami̧ dari̧ goadejȩrȩ ca̧ oti̧. Tjamo̧ davä. Pio jȩa chjiari jo̧rȩtadëri̧ cjiaji̧ri̧ pio ji̧ri̧ china̧chjari̧ tutia̧ oa goami̧ dari̧ goadejȩrȩ ütara̧ doro bape chjaopea̧ oa. 10Ado peaja̧dimi̧ dari̧ tutia̧ oa goami̧ dari̧ goadejȩrȩ oëra̧ a̧ra̧ano̧ji̧ri̧ pio ji̧ri̧. Tjamo̧ davä. Judiro̧ jibëa̧ icjarari ja̧ chjai̧dërë chi̧dëea̧ chja̧oerä cjo̧ro̧a̧ oaiä, jënȩro̧ dae ja̧bo dae ja̧bo daea̧ chja̧oerä cjo̧ro̧a̧ oaiä, judiro̧ china̧chja pio ji̧ri̧ ji̧dë ma idi̧ dari̧ baë ëba mo̧a̧ chjaoa̧ oaiä, jabechji̧ china̧chjari̧ tutia̧ oa goami̧ dari̧ goadejȩrȩ chjadëri̧ bape chjaopea̧ oa, ji̧dë u̧i̧ uapai̧ dari̧ bape chjaopea̧ oa. Jabechji̧ judiro̧ oëadëji̧ri̧rȩ jiade chjaoa̧ oaiä, tjamo̧ yo̧ji̧ri̧ pio ji̧ri̧ ji̧dë ma chjuari̧ jiada̧ oaiä, peaja̧di chjina̧chjari̧ tutia̧ oa goami̧ dari̧ goadejȩrȩ ji̧dë u̧i̧ uapai̧ dari̧ bape chjaopea̧ oa.
Tjamo̧ davä ca̧ oti̧, pio jiro oëra̧ a̧ra̧ano̧ji̧ri̧ pio judiro̧ ju chiadëräbo, ba chiadëräbo, jabechji̧ Ütë tjamo̧ judi pareapea̧ jauëchjaji̧ri̧ pio ji̧ri̧ badë jo̧rȩtadiro̧jȩrȩ, pio ji̧ri̧ chjiari chjai̧dëri̧ ni̧bäji̧ri̧rȩ. Pio ji̧ri̧ ba chia jo̧rȩtatärea̧ ji̧, tjo maearë cjiaji̧ri̧ pio ji̧ri̧ uapaji̧ri̧rȩ jo̧rȩtatärea̧ ji̧, cjäri̧ madiro̧jȩrȩ, ya̧mi̧ dari̧ ni̧bädirȩ pio ji̧ri̧ chjiari, a̧dë chjäte oëadëri̧ cjiaji̧ri̧rȩ, jibëa̧ chji̧rämo̧ jo̧rȩtaji̧ri̧rȩ. 11Jabo ja̧di dari̧ japadë matäreji̧ri̧dirȩ jabo. Jabechji̧ a̧dëräpȩ cjiaji̧ri̧ mu̧i̧tjoi̧ pio judiro̧ oëra̧ a̧ra̧ano̧ji̧ri̧ pio ji̧ri̧iä ji̧dë u̧i̧ ju chiaräbo, Ütë tjamo̧ ja̧ dëbëräpȩ cjiaräbo, jabechji̧ pio jiro jauëchjaji̧ri̧ pio ji̧ri̧ chjiari chjai̧dëri̧ ni̧bädë madirȩ. Pio ji̧ri̧ chjiari ya̧mi̧ ta̧rëri̧ ni̧bädë madirȩ. 12Jabo pio jiro oëra̧ a̧ra̧ano̧ji̧ri̧ pio judiro̧, cjäri̧ madirȩ, chji̧ cotomi̧ dari̧ jo̧rȩtaji̧ri̧rȩ cjo̧ro̧dirȩ. Chirirä cjo̧ro̧ji̧ri̧ pio judiro̧mi̧ dari̧ cjo̧ro̧dirȩ. Ado chirirä cjo̧ro̧ji̧ri̧ pio judiro̧, jabechji̧ urëdi oa jo̧rȩtarea̧mi̧dëdirȩ. Jo̧rȩtarea̧ chji̧ chiadëdirȩ jabo jabechji̧ jo̧rȩtadërea̧ chji̧ra̧ jo̧rȩtadirȩ. Jabechji̧ tjibatora̧ ae ja̧bo tänȩpea̧ maearë ara̧ oa cjiadirȩ. Puërä choë cjatäpea̧ maearë ara̧ oa cjiadirȩ. Ado peaja̧dimi̧ dari̧ cjo̧ro̧dirȩ pio jiro oëra̧ a̧ra̧ano̧ji̧ri̧ judiro̧. Jabechji̧ jo̧rȩtarea̧ chji̧ chiadëji̧ri̧mi̧ dari̧ cjo̧ro̧dirȩ. Danȩrȩ, judiro̧ dabadëa̧ üdë ji̧ra̧de, jabo judiro̧ cjapiri̧ cjiatärea̧ ji̧, judiro̧ dabadëa̧ pio ju̧i̧ chjiari cjapiri̧ cjiatärea̧ ji̧, cjapiri̧ cjiadë madirȩ jabo ya̧mi̧ ta̧rëri̧ ni̧bädirȩ pio ju̧i̧ chjiari, airi̧ cjiaji̧ri̧rȩ. Jabo danȩrȩ ca̧ oti̧, pio jiro oëra̧ a̧ra̧ano̧ji̧ri̧ judiro̧ dai chirirä cjo̧ro̧ji̧ri̧ pio judiro̧mi̧ dari̧ ja̧bo tänȩa̧ oa cjiapadirȩ Ütë tjamo̧ pio judi tänȩa̧ oaiä. Tjamo̧ davä. Pio judiro̧mi̧ da tara, peaja̧di dari̧ ja̧bo tänȩa̧ oa cjiapadirȩ.
13Pio jiro oëra̧ a̧ra̧ano̧ji̧ri̧ judiro̧ chjai̧dëri̧ japea̧ ba oa bape chjaoa̧ oa cjiapadirȩ. Jabechji̧ jibëa̧ icjararä chjai̧dë üdë yo̧a̧ chja̧oerä ji̧dë ma cjo̧ro̧a̧ oaiä, jabechji̧ dorobo idi̧ dari̧ jape chjaodirȩ chjadë maearä, goadidëji̧ri̧rȩ. Ado pumȩ judiro̧ daea̧ oaiä idëri̧ cjiape bagatärea̧ ji̧, judiro̧ chjadë maearä idi̧ dari̧ japea̧ oaiä idëri̧ cjiatärea̧ ji̧, cjäri̧ madirȩ, idëri̧ cjiarea̧ taradë madirȩ jabo a̧dë chjäte oëadëri̧ cjia tjamo̧dirȩ. Jabechji̧ idi̧ da tjamo̧dirȩ.
Ado danȩrȩ ca̧ oti̧, judiro̧ dibëa̧ chjarerä ji̧dë ma chjai̧dëri̧ jape cjia̧ oaiä, jabechji̧ yu̧i̧a̧ oa cjiami̧ dari̧ cjianȩrȩ pio ji̧ri̧ ja̧ chjai̧dëra̧ pio ju̧ri̧ra̧. Tjamo̧ davä. Pio ji̧ri̧ nö̧ta ëba a̧dope chjaoa oaiä, dibëa̧ chjibo chjacjiamȩ tjamo̧mi̧ da üdë yu̧i̧a̧ oa cjiami̧ dari̧ cjiade bureburea mape bagami̧ dari̧. Jabechji̧ mȩnȩro̧ jurapea̧ oa ori̧ bagari̧ ëba cjiapea̧ oa a̧doparä, cjäri̧ madiro̧dibe, pio jiro pumȩ pio judiro̧borë a̧dope cjiadirȩ pio dibë nö̧ta ëba jura chapea̧ oa. Jabo pio dibë ba chia datärea̧ ji̧, jabechji̧ pio dibë u̧i̧parea̧ pio ju̧i̧mo̧i̧ jo̧rȩtaji̧ri̧rȩ jura chadirȩ, a̧dë chjäte mairi̧ juraji̧ri̧rȩ, idi̧ dari̧ japaji̧ri̧rȩ. ‘Aja̧, chjaodëri̧ u̧i̧parea̧mi̧ dadiro̧da’ quëna̧ jo̧rȩtaji̧ri̧rȩ jura chadirȩ, pio dibë eacji̧ quëna̧ japaji̧ri̧rȩ. Jabechji̧ pio dibëiäpȩmo̧ goae tarari̧ u̧i̧papea̧ üdë goae tjamo̧de pio ji̧ri̧iä.
14Tjamo̧ davä, pio jiro oëra̧ a̧ra̧ano̧ji̧ri̧ pio judiro̧ ivi goara tjamo̧dirȩ. Ji̧dë ma baë ëba mo̧a̧tämi̧ cjiadirȩ. Judiro̧ ivi pio ji̧ri̧ chjadëri̧ datärea̧ ji̧, jo̧ȩra̧pe baë ëba mo̧a̧rea̧ pio ju̧i̧mo̧i̧ jo̧rȩtaji̧ri̧rȩ dadiro̧jȩrȩ. Jabechji̧ babui̧ra̧ baë ëba mo̧a̧ chjaoräbo, ji̧dë ma baë ëba mo̧a̧tämi̧ cjiadirȩ ado chjereno̧. Jabechji̧ dami̧ti̧ chjai̧dë oa japea̧ üdë goae tjamo̧dejȩrȩ. Ado pumȩ ji̧ri̧ oëra̧diä tänȩpea̧ üdë peaja̧di goae tjamo̧dejȩrȩ. Ju baebaeami̧ dari̧ quëna̧ji̧ri̧ pio ji̧ri̧ oëra̧diä tänȩpea̧ üdë goae tjamo̧dejȩrȩ. Pio ji̧ri̧iäpȩmo̧ u̧i̧padiro̧jȩrȩ chjai̧dëri̧ japapea̧ oa. Jabechji̧ jibëa̧ pio ju̧i̧ baë mitëpea̧ oa, jibëa̧ chëre oa baë garüpea̧ oa u̧i̧padiro̧jȩrȩ. Jabechji̧ peadë dabapea̧dirȩ davä jënȩro̧ dae ja̧bo dae ja̧bo daea̧ pio ju̧i̧ baë mitërea̧ dapea̧ oa. Tjamo̧ri̧ dabaji̧ri̧pea̧dirȩ judiro̧ dami̧ti̧ chjai̧dë oa ji̧dë ma̧ japapea̧ ji̧. Ado pio ju̧i̧iä Ütë tjamo̧ ja̧ ërecjia̧ üdë pio ji̧ri̧iäpȩmo̧ acji cjatäpadejȩrȩ, pio ji̧ri̧ bape chjaopea̧ oa.
15Aja̧ ca̧ oti̧, pio jiro oëra̧ a̧ra̧ano̧ji̧ri̧ pio judiro̧ tjamo̧i̧ cjiari̧ baämȩ no̧mi̧ da pio ju̧i̧ jiadaji̧ri̧rȩ mitërëreji̧ri̧dirȩ oëra̧ baämȩ no̧mi̧ da pio ju̧i̧. Danȩrȩ, Barama̧ quȩmȩrea̧ pio ju̧i̧ cho̧rëdiädiro̧jo̧ȩ. Bocho quȩmȩrea̧ pio ju̧i̧ ja̧ joja pio ju̧i̧, Barama̧ quȩmȩrea̧ pio ju̧i̧ cho̧rë japaji̧ri̧rȩ oëra̧ baämȩ no̧mi̧ da oa mitëdirȩ. Jabechji̧ Barama̧ quȩmȩrea̧ pio judi chëre goaramȩ tjamo̧ tara, dami̧ti̧ chjai̧dë oa japarëremȩde chëre boarea̧ pio ju̧i̧mo̧i̧ jo̧rȩtamȩrȩ. Tjamo̧ davä. Jënȩ chjai̧dë oa japea̧ ba oa chërera̧ ba ano̧tä earëremȩdejȩrȩ pumȩ ji̧ri̧, chëre ea tjamo̧mȩrȩ. 16Jabo cjäri̧ made, Barama̧ quȩmȩrea̧ pio judi ja̧di dari̧ japea̧ oaiä to̧bari̧ chi̧dëea̧ oa cjiarëremȩde Ütë tjamo̧ pio ju̧i̧iä. Aja̧, Ütërë ea jana̧ chjadüa̧ oa ni̧bämȩ pio ju̧i̧iä to̧bari̧ chi̧dëea̧ oa cjiarëremȩde. Jabechji̧ jibëa̧ buro pio ju̧i̧ ja̧ ya oaiä ira̧diä ni̧bärëremȩdejȩ Ütë tjamo̧ judi, Barama̧ pio judi bapë ta̧rërea̧mi̧ dari̧. Ado judi jibëa̧ buro pio ju̧i̧ ja̧ ya oaiä ta̧rëa̧ oaiä, jabechji̧ chjaodëri̧ cjiadiärëremȩde. Tjamo̧ davä. Judi chji̧ cotomi̧ dari̧ jo̧rȩtamȩrȩ japatärea̧ ji̧, chëre boapea̧ oa chjai̧dëri̧ japatärea̧ ji̧, cjäri̧ made, chjaodëri̧ cjiadiämi̧ tarari̧ jo̧rȩtarëremȩde, chjai̧dëri̧ japadëmȩrȩ. Jabo oëra̧ a̧ra̧ano̧ji̧ri̧ pio judiro̧borë cjiadiämi̧ dari̧ jo̧rȩtärea̧ ji̧, pio judiro̧borë ano̧ mire jo̧rȩtatärea̧ ji̧, cjäri̧ madirȩ ca̧ oti̧, ji̧dë ma chjai̧dëri̧ jape chjaodirȩ, cjiadiädëri̧ cjiaji̧ri̧rȩ.
Bape chjaoa̧ oa cjiapadirȩ oëra̧ a̧ra̧ano̧ji̧ri̧ judiro̧.
17Chjai̧dë tjamo̧dirȩ Ütë tjamo̧ ja̧ ma̧ȩ oa a̧ra̧ano̧cji̧ quëna̧ japaji̧ri̧ pio judiro̧. O ji̧ri̧ a̧dodë madiro̧jȩrȩ. Ui yürüdëmȩ tade puëmi̧ dadirȩ. Ado pio ju̧i̧iä ui ja̧boji̧ri̧mi̧ dari̧ cjiaji̧ri̧ pio ji̧ri̧ chjadëri̧ a̧dotärea̧ ji̧, a̧dorea̧ chiadë madirȩ jabo ma̧diä cjia tänȩdiro̧jȩrȩ ji̧dëri̧. Jabechji̧ a̧dorea̧ chiadë madirȩ. Cjümȩ ui yürüdëmȩ go̧a̧ra̧mi̧ dadirȩ. Jabomo̧ cjüe cjüe boami̧ dari̧ cjiadirȩ. Aja̧, chjadëri̧ cjütärea̧ ji̧, chjadëri̧ a̧dotärea̧ ji̧, jabomo̧ cjüe cjüe boamȩ uimi̧ dari̧ cjiadirȩ, pumȩ ji̧ri̧ ma̧diä ma̧diä cjia tänȩji̧ri̧rȩ. Ado pio ju̧i̧iä yo̧requededibe ca̧ oti̧. A̧dorea̧ chiadë madiro̧dibe. Jabechji̧ bape chjaopea̧ maearë cjo̧ro̧dirȩ. Ado pio ju̧i̧iä jabechji̧, puë urëdi tjamo̧räpȩ üdë, a̧dë chjäte bagönȩräpȩ üdë jëdano̧a̧ oa cjiarëremȩde pio judiro̧ tutia̧ oa cjiapea̧ oa. 18Jabechji̧ ji̧dë ma goaeri̧ ni̧bäji̧ri̧rȩ a̧ra̧ano̧ chjaodirȩ, teracaba ma̧ȩ maea oa ni̧bäji̧ri̧rȩ. “Aja̧, ibëa̧ icjararä chjai̧dërë yo̧a̧ chja̧oerä cjo̧ro̧pea̧ üdë chjadë tjamo̧de” yo̧ji̧ri̧rȩ a̧ra̧ano̧dirȩ. Ado judiro̧ ja̧di ta̧rëri̧ yo̧a̧ oaiä, cjäri̧ madiro̧jȩrȩ, chjaodëri̧ u̧i̧padiro̧jȩrȩ pea quëna̧ji̧ri̧pea̧ pio ji̧ri̧, jibëa̧ icjarari chjai̧dërë yo̧a̧ chja̧oeri pio judiri pea a̧dë go̧düa̧ji̧ri̧ pio ji̧ri̧. Tjamo̧ davä. Chjaodëri̧ oëra̧diä tänȩrea̧mi̧ dari̧ u̧i̧pe u̧i̧pe ni̧bädiro̧jȩrȩ na̧e chiadëji̧ri̧ pio ji̧ri̧, chjai̧dë ja̧ chja̧oeri pea a̧dë go̧düa̧ji̧ri̧ pio ji̧ri̧. 19“Aja̧, chjadëri̧ go̧dürea̧ dapanȩrȩ” yo̧dirȩ. “Jare chjadümi̧ dari̧ go̧dürea̧ dapanȩrȩ a̧ro̧rȩ a̧ra̧ano̧a̧ ma̧ȩrä cjo̧ro̧rä judi” yo̧dirȩ. Jabo cjäri̧ madirȩ ca̧ oti̧, teracabari̧ a̧ra̧ano̧dirȩ oëra̧ a̧ra̧ano̧ji̧ri̧ judiro̧. Jabechji̧ tabüa̧ oa cjiami̧ dari̧ cjiaji̧ri̧borë jare chjadümi̧ dari̧ go̧düpea̧ pio ju̧i̧ chjiari a̧ra̧ano̧dirȩ. Ado pio yoa ma̧ȩbo a̧de yo̧dirȩ ji̧dëri̧. “Aja̧, mȩnȩro̧ ibëa̧ ma̧ȩrä cjo̧ro̧rä judi, jabechji̧ dibëa̧ icjararä chjai̧dërë yo̧a̧ chja̧oerä goaeri̧ cjo̧ro̧rea̧ dapanȩrȩ, tüdüa̧mi̧ darä cjo̧ro̧rea̧ decjiari̧” yo̧dirȩ. Jabo cjäri̧ madirȩ ca̧ oti̧, chjai̧dë pio judi boadäräa̧ oa cjiami̧ dari̧ cjo̧ro̧mȩ judi, chjai̧dë pio ju̧i̧ ja̧ mu̧i̧tjoi̧mi̧ dade. Ado chjai̧dë pio ju̧i̧ ja̧ mu̧i̧tjoi̧mi̧ da maeadirȩ pio jiro pumȩ judiro̧.
20Danȩrȩ ca̧ oti̧, o judiro̧, dëdë, ta̧rërëreji̧ri̧dirȩ ibëa̧ Ano̧mȩ Jechu Quiricho pio ju̧i̧ chjiari. Aja̧, ibë Chjätä Tänȩmȩ pio ju̧i̧ chjiari ta̧rëa̧dirȩ. Ado pio ju̧i̧iä chjai̧dë pio ju̧i̧ japë ano̧rëreji̧ri̧diro̧jo̧ȩ, dai chirirä ja̧ chjai̧dë pio ju̧i̧. Aja̧, chjai̧dë pio ju̧i̧ japariä cjo̧ro̧rërea̧ ji̧, jabechji̧ japë ano̧a̧diro̧jo̧ȩ. Jabo danȩrȩ, judiro̧ ado chjereno̧ chjai̧dëri̧ japariä cjo̧ro̧rä judi, judiro̧ japë ano̧rërea̧ pio ju̧i̧ ado chjereno̧ japariä cjo̧ro̧rä judi, cjäri̧ madirȩ, jënȩro̧ pearä cjo̧ro̧rërea̧ pio ju̧i̧ u̧i̧ chjai̧dëri̧ cjo̧ro̧padirȩ. Tjamo̧ davä. Judiro̧ pearä chjai̧dëri̧ japarërea̧ra̧ pio ju̧ri̧ra̧ ado chjereno̧ taria̧ oa cjiami̧ dari̧ cjiarä judi, judiro̧ pearä quëna̧rërea̧ oaiä ado chjereno̧ boadäräa̧ oa cjiarä judi, jabechji̧ jënȩro̧ pearä cjo̧ro̧rërea̧ pio ju̧i̧ u̧i̧ chjai̧dëri̧ cjo̧ro̧padirȩ. 21Ado pio ju̧i̧iä yo̧requededibe ca̧ oti̧. Jabechji̧ ji̧dë u̧i̧ chjadëtäremȩde pio jiro oëra̧ a̧ra̧ano̧ji̧ri̧ pio judiro̧ ma̧ȩ chjadëi̧ pio ju̧i̧ cja̧rȩmȩ co ta̧rëdëa̧rä judi. Ji̧dë u̧i̧ chjadëtäremȩde judiro̧ coëma cjiari̧ baämȩ no̧mi̧ da pio ju̧i̧ chjiari dabadëa̧rä judi. Jabo cjäri̧ madirȩ, ta̧rëreji̧ri̧dirȩ. Coëma cjiari̧ baämȩ ma̧ȩ pio ju̧i̧ ta̧rërëreji̧ri̧dirȩ. Ado pio ju̧i̧ ta̧rë ëte, cjäri̧ madiro̧jo̧ȩ, jiada̧diro̧jo̧ȩ. Putu jura̧ a̧dë chami̧ dari̧ japarëreji̧ri̧diro̧jo̧ȩ. Ado pio ju̧i̧iä yo̧requededibe ado chjereno̧. Ji̧dë u̧i̧ chjadëtäremȩde judiro̧ cja̧rȩmȩ co ta̧rëdëa̧rä judi. Jabechji̧ ta̧rëji̧ri̧borë jiada̧ tara, ji̧dë u̧i̧ bape chjaoa̧ oa cjiapadirȩ judiro̧.
22Jabechji̧ pio jiro oëra̧ a̧ra̧ano̧ji̧ri̧ pio judiro̧ auremi̧ dadirȩ. Aboeami̧ dadirȩ. Danȩrȩ, aure üdë ägo̧düchäa̧ duri oa ado chjereno̧ jädejȩ jurapea̧ oa, jënȩ ägo̧düchäa̧ duri pio ju̧i̧. Ado aboea üdë ¿tjana̧ japade? Tjana̧ japadë, jabechji̧ aboea ana̧ji̧ri̧ pio judiro̧ cjara decjiari̧ joa̧räbo, jabechji̧ ado chjereno̧ jädiäde cjararäpȩ ju̧ri̧ choë china̧däräpea̧ oa. Ado danȩrȩ ca̧ oti̧, peaja̧dimi̧ dari̧ japadirȩ pio jiro pumȩ judiro̧, oëra̧ a̧ra̧ano̧ji̧ri̧ pio judiro̧. Jabechji̧ judiro̧ pearä chjai̧dëri̧ japarërea̧ pio ju̧i̧ ado chjereno̧ japadirȩ, cjara jiräpȩ jädiäji̧ri̧mi̧ dari̧. Tjamo̧ davä. Judiro̧ pearä chjai̧dëri̧ japarërea̧ pio ju̧i̧ ado chjereno̧ japea̧ oaiä, jabechji̧ ägo̧düchäa̧ durimi̧ daräpȩ jädiäji̧ri̧mi̧ dari̧ japadirȩ ado chjereno̧ jurami̧ dari̧ japapea̧ oa. Ado pio ju̧i̧iä jabechji̧ ji̧dë u̧i̧ bape chjaoa̧ oa cjiapadirȩ. Danȩrȩ, judiro̧ Ütë tjamo̧ ja̧ ma̧ȩ oa chjadëri̧ ta̧rëa̧räbo, judiro̧ coëma cjiari̧ cjo̧ro̧pea̧ ma̧ȩ pio ju̧i̧ chjiari dabapea̧räbo, jiadadirȩ. Ado pio ju̧i̧iä ji̧dë u̧i̧ bape chjaoa̧ oa cjiapadirȩ judiro̧.
©2021 Global Partners, All Rights Reserved