Cori̧tio Ma̧ȩ 2 5

A̧ro̧rȩ ja̧boa̧rä, icjara peaja̧ra̧ cjo̧ro̧parea̧rȩ a̧dëräpȩ

1Danȩrȩ ca̧ oti̧, ibëa̧ icjara üdë ibëa̧ bëmi̧ dade. Ado a̧ro̧rȩ pio yoa chirirä cjo̧ro̧a̧ nö̧ta, jabechji̧ cjo̧ro̧rea̧rȩ ibëa̧ bëmi̧ darä. Jabo ibëa̧ icjara pio ju̧i̧ chjiari tjamo̧ri̧ dabadë ma ja̧didë, jabo tjamo̧ri̧ dabarea̧rȩ. Jabechji̧ bucho ana̧ cjo̧ro̧rea̧ chiadëmȩde, jabo ja̧borea̧ chiade. Jabechji̧ ja̧bopade. Goarijäpade. Jabo jabechji̧de jabo. Jabechji̧ ado cja̧rȩmo̧ bëmi̧ da oa mitërea̧ daparea̧rȩ a̧dëräpȩ ju̧ri̧, ja̧borea̧ chiadëmȩ icjara pio ju̧i̧. Jabechji̧ Ütë tjamo̧ pio judi jëdanȩ yürüa̧ oa ano̧ mire cjo̧ro̧parea̧rȩ ado cja̧rȩmo̧ bëmi̧ darä, ado cja̧rȩmo̧ icjara peaja̧rä. Jabechji̧ pumȩrȩ jëdano̧a̧ oa cjiamȩ oa ano̧ mire cjo̧ro̧dëparea̧rȩ, jabo Ütë tjamo̧ pio judi jëdano̧a̧ oa ano̧ mire cjo̧ro̧parea̧rȩ pio ju̧ri̧pȩ. 2Ado dëdë, ibëa̧ icjara peaja̧ pio ju̧i̧ mitëpea̧ oa jidatarea̧ro̧jo̧ȩ jëreea tjamo̧ji̧ri̧rȩ. Jabechji̧ a̧ro̧rȩ pio yoa chirirä chjai̧dë oa chjätäa̧ oaiä, a̧ro̧rȩ ja̧borea̧ chia̧ oaiä, jabechji̧ ejaro cjiami̧ tarari̧ jidata tjamo̧rea̧rȩ ibëa̧ bë peaja̧mi̧ darä ano̧ mire cjo̧ro̧pea̧ oa. Tjamo̧ davä ca̧ oti̧, chjibo peaja̧ra̧ pio ju̧ri̧ra̧ ano̧ mire ina̧mi̧ dari̧ cjo̧ro̧pea̧ ji̧ jidatarea̧ro̧jo̧ȩ. 3Jabechji̧ a̧ro̧rȩ ja̧boa̧ duri oa, tjo maearë cjiadiädëparea̧rȩ. Chäteji̧ri̧mi̧ dari̧ cjiadiädëparea̧rȩ, jabo a̧dëräpȩ cjiamȩ icjara peaja̧ra̧ pio ju̧ri̧ra̧ ano̧ mire ina̧mi̧ dari̧ cjo̧ro̧parea̧rȩ. Jabechji̧ chjibo ütama̧i̧mi̧ da oa aeno̧parea̧ro̧jo̧ȩ ibëa̧ icjararemȩ pio ju̧i̧, ado chjibo peaja̧ra̧ pio ju̧ri̧ra̧ ano̧ mire ina̧mi̧ dari̧ cjo̧ro̧parea̧rȩ, ibëa̧ icjara peaja̧ra̧ pio ju̧ri̧ra̧. 4Jabo jabërea̧rȩ ca̧ oti̧. Aro̧rȩ dai chirirä ja̧ icjararä cjo̧ro̧a̧ nö̧ta, dëdë, jo̧rȩ mire jo̧rȩ mire cjiami̧ tarari̧ jidatarea̧ro̧jo̧ȩ a̧ro̧rȩ ibëa̧ icjara peaja̧ oa chiapea̧ oa. Jabechji̧ a̧ro̧rȩ dami̧ti̧ chjai̧dë oa chjätäa̧ oaiä, a̧ro̧rȩ chacha oa araji̧ri̧mi̧ dari̧ cjo̧ro̧a̧ oaiä, dëdë, jo̧rȩ mire jo̧rȩ mire cjiami̧ tarari̧ jidatarea̧ro̧jo̧ȩ. Jabo danȩrȩ ca̧ oti̧, a̧ro̧rȩ jo̧ȩra̧pe ja̧botämi̧ cjia ju̧i̧dë. A̧ro̧rȩ pio ibëa̧ icjara oa jo̧ȩra̧pe aeno̧tämi̧ cjia ju̧i̧dë, jabo jabechji̧ ibëa̧ icjara peaja̧ra̧ pio ju̧ri̧ra̧ ano̧ mire ina̧ oa cjiami̧ dari̧ cjo̧ro̧tämi̧ cjiarea̧rȩ, ibëa̧ icjararemȩ pio judi goarijäpea̧ oa, a̧ro̧rȩ peaja̧ maeara̧ ano̧ mire cjo̧ro̧pea̧ oa. 5Jabechji̧ Ütë tjamo̧ pio judide ibë chjadëri̧ jëdano̧rëremȩ judi, a̧ro̧rȩ icjara peaja̧ oa mitëpea̧ oa. Ado pio ju̧i̧iä Tjo tjamo̧ pio ju̧i̧ yabo ba ano̧ë cji̧dämi̧ dari̧ yürürëremȩdiibe, a̧ro̧rȩ cjiadiäa̧mȩ oa chjö̧na̧i̧ oa ji̧dë duri oa chjadëri̧ a̧de mitërea̧ dapea̧ oa, icjara peaja̧bo tjamo̧ri̧ a̧de mitërea̧ dapea̧ oa.

6Ja̧di tara järidëpe bagadërea̧rȩ, jabo ji̧dë ma järiji̧ri̧rȩ cjo̧ro̧rea̧rȩ, uapadëji̧ri̧rȩ. Jabechji̧ a̧ro̧rȩ pio yoa icjararä jabë cjo̧ro̧räbo, a̧ro̧rȩ ibëa̧ Ano̧mȩrȩ cjo̧ro̧mȩräpȩ ju̧ri̧ jabë go̧düdärädëa̧räbo, jabechji̧ ji̧dë ma järiji̧ri̧rȩ cjo̧ro̧rea̧rȩ Tjo tjamo̧ pio ju̧i̧ chia tara, Ütë tjamo̧ pio judi yabo ba ano̧e cji̧dämi̧ dari̧ yürüa̧ tara. 7Jabechji̧ a̧ro̧rȩ chjö̧na̧i̧ oa daji̧ri̧rȩ cjo̧ro̧dë marea̧rȩ, jabo Ütë tjamo̧ pio ju̧i̧ chjuari̧ quëna̧ji̧ri̧rȩ cjo̧ro̧rea̧rȩ. 8Ado pio ju̧i̧iä chjuari̧ quëna̧rea̧ro̧jo̧ȩ Ütë tjamo̧ pio ju̧i̧, uapadëji̧ri̧rȩ. Jabo dëdë, a̧ro̧rȩ ibëa̧ icjara pio yoa a̧dë ja̧borea̧ daea̧rä judi, jidë u̧i̧ goaetäremȩde pio ibëiä. A̧ro̧rȩ ibëa̧ Ano̧mȩ pio ju̧i̧iäpȩ baärea̧ daea̧rä judi, ibëa̧ bë tjamo̧räpȩ ano̧ mire cjo̧ro̧pea̧ oa tjamo̧ri̧ baärea̧ daea̧rä judi, jabechji̧ ji̧dë u̧i̧ chjadëtäremȩde. 9Jabechji̧ a̧ro̧rȩ pio yoa chirirä jabë cjo̧ro̧a̧ nö̧ta, ji̧dë ma ma̧ chiadëri̧ cjiaparȩtämi̧ cjiarea̧ro̧jo̧ȩ ibëa̧ Ano̧mȩ pio ju̧i̧. Ado a̧ro̧rȩ a̧dëräpȩ ano̧ mire cjo̧ro̧ji̧ri̧pea̧rä, peaja̧di dari̧ jo̧rȩtaparea̧rȩ. Jabechji̧ pio ju̧i̧iäpȩmo̧ ji̧dë ma ma̧ chiadëri̧ cjiaparȩpea̧ pio jiro jo̧rȩtarea̧ üdë tjamo̧ri̧ chade ibëa̧ chji̧rä. 10Jabechji̧ a̧ro̧rȩ a̧dëräpȩ go̧düdäräa̧rä, jabechji̧ quëna̧ji̧ri̧ pio judiro̧ ütëborë Quiricho pio ju̧i̧ ja̧ dëbëräpȩ cjiadiäpea̧ chiarea̧rȩ pio judi ibë ütarapea̧ oa. Jabechji̧ a̧ro̧rȩ pio yoa chirirä cjo̧ro̧a̧ nö̧ta japea̧ pio ju̧i̧ ütarapadejȩ chjö̧na̧i̧ oa. Tjamo̧ davä. A̧ro̧rȩ chjadëri̧ japea̧ pio ju̧i̧ ütarapadejȩ, a̧ro̧rȩ chjai̧dëri̧ japea̧ pio ju̧i̧bo. Ado a̧ro̧rȩ japea̧ ba oa yürüpadiibe. Ado pio ju̧i̧iä järi tjamo̧täreji̧ri̧rea̧rȩ ca̧ oti̧ pio ju̧i̧ ji̧dë ma ma̧ chiadëri̧ cjiaparȩpea̧ oa, a̧ro̧rȩ pio yoa chirirä jabë cjo̧ro̧a̧ nö̧ta.

Pumȩ judiro̧ jachi tjamo̧räpȩ cjiami̧ dari̧ cjiarërea̧ ji̧, jachidai̧parȩa̧ oa cjiami̧ dari̧ ano̧ mire cjiadiärëreji̧ri̧dirȩ Quiricho pio ju̧i̧iä

11Ja̧di tara ca̧ oti̧, ibëa̧ Ano̧mȩ Jechu pio judi ibë ütëbo oa ütarapa tara, jabechji̧ ana̧ri̧ ja̧beparea̧rȩ pio ju̧i̧ ja̧ oa. Tjamo̧ davä. Pio ju̧i̧iäpȩmo̧ uapaji̧ri̧mi̧ dari̧ ba chia jo̧rȩtaji̧ri̧rȩ ana̧ri̧ ja̧beparea̧rȩ pumȩ pio ji̧ri̧ chjadëri̧ chi̧dëeapea̧ oa, pio judiro̧ Jechu pio ju̧i̧ chjiari chjadëri̧ ano̧ mire jo̧rȩtapea̧ oa. Jabechji̧ chjaocjiami̧ dari̧ a̧ra̧ano̧dë marea̧rȩ, jabo tjamo̧ri̧ ja̧beparea̧rȩ ibëa̧ Ano̧mȩ ja̧ oa, pio ju̧i̧ ja̧ dachoro ja̧bepaji̧ri̧rȩ. Jabechji̧ chjadëri̧ dabade pio ibë chjiari, ado pio mȩnȩro̧borë chjadëri̧ dabanȩrȩ a̧ro̧rȩ tjamo̧ri̧ ja̧bepea̧ pio ju̧i̧ chjiari. 12Jabo a̧ro̧rȩ pio ibë chjiari ja̧di dari̧ go̧ȩpe chjadüa̧ oaiä, ‘cjäri̧ madiro̧diro̧da, ado chjereno̧ pio jibë chjiari chjacjiamȩri̧ ni̧bädiro̧da, a̧ro̧rȩ pio ji̧ri̧iäpȩmo̧ ji̧dë u̧i̧ ba chia jo̧rȩtapea̧ oa go̧ȩpe chjadü jirodiro̧ibëda’ quëna̧ jo̧rȩtadëchji̧va ca̧ oti̧. Ja̧di dari̧ japadë marea̧rȩ. Jabechji̧ a̧ro̧rȩ dibëa̧ chjarerä coëma cjiari̧ cjo̧ro̧a̧räbo, a̧ro̧rȩ pio dibëiäpȩmo̧ ji̧dë ma na̧rȩriä cjo̧ro̧a̧räbo, cjäri̧ marea̧ro̧dibe ca̧ oti̧, pio ibë chjiari goaeri̧ ni̧bäpea̧ oa go̧ȩpadë marea̧ro̧dibe, jabo pio mȩnȩro̧ dibë oëra̧ a̧ra̧ano̧ji̧ri̧ pio ji̧ri̧ chjadëri̧ dëbë ni̧bä chjaopea̧ oa go̧ȩparea̧ro̧dibe. Tjamo̧ davä ca̧ oti̧. Mȩnȩro̧ pio ibë chjiari idëri̧ cjiachea oa, mȩnȩro̧ pio dibëiäpȩmo̧ oëra̧ a̧ra̧ano̧ji̧ri̧ pio ji̧ri̧iäpȩmo̧ ba dëbë ni̧bä chjaorea̧ dadëchea oa go̧ȩpe chjadürea̧ro̧dibe. Tjamo̧ri̧ yo̧requededibe ca̧ oti̧. Tjoro ja̧dë maea oa jabo dai oa cjia maea oa jo̧rȩtaji̧ri̧ pio ji̧ri̧ ba dëbë ni̧bä chjaopea̧ oa, pio jibë chjiari ji̧dë ma goaeri̧ yo̧ji̧ri̧ pio ji̧ri̧iäpȩmo̧ goae tarari̧ ba dëbë ni̧bä chjaopea̧ oa go̧ȩpe chjadürea̧ro̧dibe ca̧ oti̧. 13Aja̧, a̧ro̧rȩ a̧ra̧ano̧rä, jabechji̧ o judiro̧ cjarari̧ cjiaji̧ri̧rȩ a̧ra̧ano̧rämi̧ cjiadiro̧ibe. Ado o judiro̧, ‘Aja̧, urëdi tjamo̧ oa jo̧rȩtaji̧ri̧rȩ a̧ra̧ano̧diro̧da’ quëna̧ jo̧rȩtadiro̧ibe. Jabo danȩrȩ ca̧ oti̧, pumȩ judiro̧ pio ibë chjiari yo̧a̧ pio ju̧i̧ ana̧ri̧ jo̧rȩtadë marea̧rȩ, jabo Ütë tjamo̧ pio judi chjacjiamȩri̧ ni̧bäa̧ oa cjiapea̧ pio ju̧i̧mo̧i̧ tjamo̧ri̧ jo̧rȩtarea̧rȩ. Ado pio ju̧i̧iä ana̧ri̧ ja̧beparea̧rȩ, pio dibë a̧dorea̧ pio ju̧i̧mo̧i̧ jo̧rȩtaji̧ri̧rȩ. 14Jabechji̧ Quiricho pio judi ea̧ chja̧oerä cjo̧ro̧rea̧rȩ. Ado pio judiri ma̧na̧mȩ earea̧ pio judi boadärämi̧ dari̧ japadiibe. Ado pio ju̧i̧iä jabechji̧, pio judiri ma̧na̧mȩ earea̧ra̧ pio ju̧ri̧ra̧ tüdüa̧ oa cjiami̧ dari̧ ja̧beparea̧rȩ. Jabechji̧ pio judi ibë ea tjamo̧mȩrȩ ano̧ mire ja̧borëremȩdiibe. Tjamo̧ davä. Chia ja̧borëremȩdiibe. Ado cja̧rȩmȩrȩ chia ja̧borërea̧ oaiä, ütëborë ja̧boa̧ maearea̧rȩ. 15Tjamo̧ davä. Ibë ütëbo oa chia ja̧borëremȩdiibe a̧ro̧rȩ cjo̧ro̧rea̧ peaja̧ra̧ pio ju̧ri̧ra̧ ano̧ mire cjo̧ro̧pea̧ oa, a̧ro̧rȩ ibëa̧ chja̧oerä cjo̧ro̧chea oa. Ado pio ju̧i̧iä yo̧requededibe ca̧ oti̧. Danȩrȩ, a̧ro̧rȩ ibëa̧ chja̧oerämo̧ cjo̧ro̧rërea̧ ji̧, jabechji̧ pio ibë chjiari ano̧ mire ja̧borëremȩ pio ju̧i̧ ja̧ chja̧oerämo̧ ano̧ mire cjo̧ro̧täreji̧ri̧rea̧rȩ yaba̧, pio ibë chjiari bëdüa̧ oa cjiarëremȩ pio ju̧i̧ ja̧ chja̧oerämo̧.

16Ja̧di tara Quiricho judi pio ibë chia ja̧borërea̧ oaiä, jabechji̧ a̧ro̧rȩ eami̧ pumȩ oa darä, jabechji̧ tjaoëpai̧ dari̧ jo̧rȩtaji̧ri̧rȩ darea̧ro̧jo̧ȩ yaba̧. Tjamo̧ davä. A̧ro̧rȩ pearä judi dai chirirä ja̧ jo̧rȩtarea̧ra̧ jo̧rȩtaji̧ri̧rȩ ütarë darërea̧ ji̧, tjaoëpai̧ dari̧ jo̧rȩtaji̧ri̧rȩ darea̧ro̧jo̧ȩ yaba̧. Jabechji̧ jibëa̧ i maea oa jo̧rȩtaji̧ri̧rȩ dadërea̧ro̧jo̧ȩ. Dai oa cjiamȩ maea oa jo̧rȩtaji̧ri̧rȩ dadërea̧ro̧jo̧ȩ. Jabo dëdë, pearä judi peaja̧dimi̧ dari̧ ütarë jo̧rȩta marëreji̧ri̧rea̧ro̧jȩrȩ pumȩ ji̧ri̧. Ado Quiricho pio ju̧i̧bo ja̧di dari̧ ütarë jo̧rȩtarëreji̧ri̧rea̧ro̧jo̧ȩ pearä judi. Tjamo̧ davä. Dai oa cjiamȩ pio ju̧i̧mo̧ jo̧rȩtaji̧ri̧rȩ darëreji̧ri̧rea̧ro̧jo̧ȩ, ‘Ütë tjamo̧ ja̧ Joja pio judida’ quëna̧ jo̧rȩtadëji̧ri̧rȩ. Jabo cjäri̧ marea̧ro̧jo̧ȩ yaba̧, ja̧di dari̧ jo̧rȩtadë marea̧ro̧jo̧ȩ jabo tjaoëpai̧ dari̧ jo̧rȩtaji̧ri̧pea̧rea̧ro̧jo̧ȩ. 17Jabechji̧ eami̧ pumȩ judi Quiricho pio judiri ja̧pe baga̧rä judi, jabechji̧ pea chjari̧ pareapea̧ oa cjiade, pumȩ peaja̧ mape bagarea̧mi̧ dari̧. Jabechji̧ no̧mȩ ja̧ jo̧rȩtarërea̧ üdë, no̧mȩ ja̧ cjo̧ro̧rërea̧ üdë goarijäa̧ oa cjiade. Ado cjo̧ro̧rea̧ peaja̧ra̧ pio ju̧ri̧ra̧ tarupade Quiricho pio ju̧i̧iä. Tjamo̧ davä. Tjaoëpai̧ dari̧ cjo̧ro̧rea̧mi̧ dari̧, tjaoëpai̧ dari̧ jo̧rȩtarea̧mi̧ dari̧ tarupade Quiricho pio ju̧i̧iä ado cja̧rȩmo̧ cjo̧ro̧rea̧ peaja̧ra̧ pio ju̧ri̧ra̧. Ado pio ju̧i̧iä yaba̧, a̧ro̧rȩ eami̧ pumȩ oa darä, quëna̧mȩ pio ju̧i̧ darä, jabechji̧ tjaoëpai̧ dari̧ jo̧rȩtaji̧ri̧rȩ darea̧ro̧jo̧ȩ, pumȩ peaja̧ maea oa. 18Aja̧ ca̧ oti̧, tjaoëpai̧ dari̧ cjo̧ro̧rea̧ yürürëremȩdiibe Ütë tjamo̧ judi, pio judirimȩ maearë. Jabechji̧ a̧ro̧rȩ jachi cjiami̧ dari̧ cjiarërea̧ ji̧, jachidai̧parȩa̧ cjiami̧ dari̧ japarëremȩdiibe Quiricho pio ju̧i̧iä, a̧ro̧rȩ pio ju̧i̧ ja̧ pumȩpe järea̧mi̧ dari̧, pio ju̧i̧ ja̧ queri̧räpȩ cjiarea̧mi̧ dari̧. Ado yaba̧ ca̧ oti̧, pio jiro ja̧beparea̧ bachia oa yürürëremȩdiibe Ütë tjamo̧ judi. Jabechji̧ dabadëji̧ri̧ pio ji̧ri̧iäpȩmo̧ dabapa tänȩpea̧ oa, jachi cjiami̧ dari̧ cjiaji̧ri̧ pio judiro̧ jachidai̧parȩa̧ oa cjiami̧ dari̧ cjiapea̧ oa, yürürëremȩdiibe Ütë tjamo̧ judi pio jiro ja̧beparea̧ oa. 19Jabechji̧ Ütë tjamo̧ pio judi chjadürëremȩdejȩ Quiricho pio ju̧i̧, jachi cjiami̧ dari̧ cjiaji̧ri̧ pio judiro̧ ütëbodärärë Jechu pio ju̧i̧ quëna̧ oaiä, pio jȩa nö̧ta ori̧ bagari̧ ëba cjiarea̧ dapea̧ oa. Tjamo̧ davä. Tuti chjadürëremȩdejȩ pio ibë chjiari ano̧ mire ja̧bopea̧ oa, a̧ro̧rȩ chjai̧dëri̧ japea̧ üdë duridëparȩa̧ oa cjiapea̧ oa, judi pio ibëiä ado chjereno̧ ba eachea oa. Aja̧ ca̧ oti̧, ja̧di ta̧rëri̧ a̧ra̧ano̧tä eadiibe Ütë tjamo̧ judi dabadëji̧ri̧ pio ji̧ri̧iäpȩmo̧. Jabechji̧ pio ju̧i̧ ja̧ pumȩpea̧rea̧rȩ yaba̧, ado pio ibë china̧chjari̧ tutirëremȩdiibe, a̧ro̧rȩ jachidai̧parȩrea̧ ma̧ȩ pio ju̧i̧ a̧ra̧ano̧pea̧ oa.

20Jabechji̧ Quiricho pio judi chjadüa̧ oa cjiarërea̧ ji̧, pio ibë ano̧ mire chjadürëremȩdiibe a̧ro̧rȩ pio ju̧i̧ ja̧ ma̧ȩ oa a̧ra̧ano̧pea̧ oa. Jabo a̧ro̧rȩ ibëa̧ ma̧na̧ri̧ jo̧rȩtaji̧ri̧rȩ a̧ra̧ano̧dë marea̧rȩ, jabo pio judi a̧ra̧ano̧tä ea̧ pio ju̧i̧mo̧i̧ a̧ra̧ano̧rea̧ro̧dibe, pio judi yo̧a̧ duri pio ju̧i̧mo̧i̧. Ado a̧ro̧rȩ pumȩ pio ji̧ri̧ a̧ra̧ano̧rä, jabechji̧ Ütë tjamo̧ pio judi ëna̧diämi̧ dari̧ ëna̧diädejȩrȩ ibëa̧ ya pio oaiä, pumȩ pio judiro̧ jibëa̧ pumȩpe bagatä, jachidai̧parȩa̧ oa cjiami̧ dari̧ cjiatä. Jabechji̧ Quiricho pio judi pumȩ pio ji̧ri̧iäpȩmo̧ irä ni̧bätärea̧ ji̧, pio a̧ro̧rȩ ano̧ mire ni̧bärea̧ro̧jȩrȩ, pio judi tänȩa̧ oa. Tjamo̧ davä. Pumȩ judiro̧ jachidai̧parȩa̧ oa cjiaji̧ri̧mi̧ dari̧ cjiapea̧ oa, Ütë tjamo̧ ja̧ pumȩpe bagapea̧ oa, ni̧bärea̧ro̧jȩrȩ Jechu ja̧ ma̧ȩ maeara̧. 21Jabechji̧ Quiricho judi cja̧rȩmȩ co chjai̧dëri̧ japadëa̧räbo, jabechji̧ Ütë tjamo̧ pio judi tuti yürürëremȩdejȩ pio ibë chjiari ano̧ mire ja̧bopea̧ oa, a̧ro̧rȩ chjai̧dëri̧ japea̧ üdë pio ju̧i̧iäpȩmo̧ ma ano̧ mire cjiadiäpea̧ oa, a̧ro̧rȩ jabechji̧parȩa̧ oa cjiapea̧ oa. Ado yaba̧ a̧ro̧rȩ Quiricho pio judiri ja̧ji̧ri̧pea̧ oaiä, jabechji̧ pio ibëiäpȩmo̧ ma ano̧ mire cjiadiäa̧de Quiricho pio ju̧i̧ ja̧ chjadë üdë. Tjamo̧ davä. Ibëa̧ chjadëdë üdë Quiricho pio ju̧i̧iäpȩmo̧ cjiadiäa̧de, ado pio ju̧i̧ ja̧ chjadë üdë pio ibëiäpȩmo̧ ano̧ mire cjiadiäa̧de, a̧ro̧rȩ jabechji̧parȩa̧ oa cjiarea̧mi̧ dari̧. Ado pio jiro ma̧ȩ pio ju̧i̧ järi tjamo̧ji̧ri̧rȩ a̧ra̧ano̧rea̧ro̧jo̧ȩ.

Currently Selected:

Cori̧tio Ma̧ȩ 2 5: Pume

Highlight

Copy

Compare