Cori̧tio Ma̧ȩ 2 6

1Tjamo̧ davä ca̧ pumȩ. Ütë tjamo̧ pio judi jachidai̧parȩrea̧ ma̧ȩ pio ju̧i̧ a̧ra̧ano̧ tänȩrëremȩdiibe. Ado pio ju̧i̧iä Ütë tjamo̧ pio ju̧i̧ ja̧ jadümi̧ dari̧ ja̧beparea̧rȩ. Ado pio ju̧i̧ ja̧ jädümi̧ dari̧ ja̧bepa tara, jabechji̧ yo̧tarea̧ro̧dibe ütëbo oa mȩnȩro̧ jiadachea oa, Ütë tjamo̧ judi pio dibëiäpȩmo̧ cjäri̧ri̧ cjia da̧ pio ju̧i̧ putu jura̧ a̧dë chami̧ dari̧ jiadachea oa. 2Danȩrȩ ca̧ oti̧, mȩnȩro̧ ütëbodärärë chjadëri̧ jo̧rȩtatäreji̧ri̧nȩrȩ Ütë tjamo̧ judi pio dibëiäpȩmo̧ jabërä yo̧rërea̧ ma̧ȩ pio ju̧i̧. Danȩrȩ, ja̧di ta̧rëri̧ yo̧rëremȩde:

“Mȩnȩro̧ ca̧ ma̧ȩ oa tjamo̧ri̧ ta̧rë ja̧botämi̧ cjiarä, cüdë dibë a̧dotä eaji̧ri̧rȩ cjo̧dërä, jabechji̧ a̧doparequededibe. Ado pio jiro japamitërä, jabechji̧ Chjätä Tänȩmȩ pio ju̧i̧ chjadüpareconȩ.”

Aja̧, ja̧di ta̧rëri̧ jabërä go̧ȩpea̧ oa cjiarëremȩde ma̧ȩ üdë tjamo̧ri̧ quëna̧dëji̧ri̧ pio ji̧ri̧ chjiari. Ado pio ju̧i̧iä yo̧requededibe ca̧ oti̧. Danȩrȩ, Ütë tjamo̧ judi Chjätä Tänȩmȩ pio ju̧i̧ chjadëri̧ chjadüa̧ tara, jabechji̧ järichji̧vä dabadëji̧ri̧ pio ji̧ri̧iäpȩmo̧ a̧ra̧ano̧pea̧ ji̧. Jabechji̧ pio yaba̧ domȩ oa chjätä tänȩtämi̧ cjiadejȩrȩ Ütë tjamo̧ judi. Pio yaba̧ domȩ oa cjäri̧ri̧ cjiamȩrȩ chjätä tänȩtämi̧ cjiadejȩrȩ jabë dabadëji̧ri̧ pio ji̧ri̧, pio judiro̧ chjai̧dëri̧ japea̧ ba oa aeno̧a̧ oa cjiachea oa. Ado pio ju̧i̧iä yo̧requededibe järiji̧ri̧rȩ a̧ra̧ano̧tä.

Ütë tjamo̧ ja̧ mu̧i̧tjoi̧ judiro̧ chjai̧dë oa chjätäa̧räbo, ji̧dë ma chjuari̧ quëna̧rëreji̧ri̧diro̧jo̧ȩ Ütë tjamo̧ ju̧i̧, ji̧dë ma na̧rȩji̧ri̧rȩ

3Danȩrȩ ca̧ oti̧, a̧ro̧rȩ ja̧beparä, pio cüdë ca̧ jadü pio ji̧ri̧ nö̧ta ja̧beparä, jabechji̧ järi tjamo̧rea̧rȩ coëma cjiari̧ cjo̧ro̧pea̧ ji̧, oëra̧ japadëpea̧ ji̧. Jabechji̧ pumȩ pio ji̧ri̧ ana̧ri̧ jo̧rȩta tänȩchea oa, pumȩ pio ji̧ri̧ ta ano̧eno̧mi̧ dari̧ japa tänȩchea oa, jabechji̧ järi tjamo̧rea̧rȩ tüdüa̧mi̧ darä cjo̧ro̧pea̧ ji̧. Tjamo̧ davä ca̧ oti̧, ja̧di dari̧ cjo̧ro̧rea̧rȩ. Jabechji̧ Quiricho ja̧ oa ja̧bepea̧ üdë tja̧rȩparȩa̧ oa cjiachea oa, a̧ro̧rȩ a̧ra̧ano̧a̧ üdë ade cjiami̧ dari̧ cjiachea oa, järi tjamo̧rea̧rȩ coëma cjiari̧ cjo̧ro̧pea̧ ji̧. 4Ado pio ju̧i̧iä a̧ro̧rȩ eami̧ oa japarä, jabechji̧ chjadëri̧ na̧rȩji̧ri̧rȩ japarea̧ro̧jo̧ȩ, pumȩ judiro̧ pio ibë chjiari chjadëri̧ jo̧rȩtarea̧mi̧ dari̧, ‘Aja̧, Ütë tjamo̧ pio ju̧i̧ ja̧ mu̧i̧tjoi̧ tjamo̧diro̧da’ quëna̧ jo̧rȩtarea̧mi̧ dari̧. Aja̧ ca̧ oti̧, ji̧dë ma chjadëri̧ na̧rȩtämi̧ cjiarea̧rȩ. Ado pio ju̧i̧iä a̧ro̧rȩ eami̧ chjai̧dë oa chjätärä, a̧ro̧rȩ conȩda̧ oa cjiarä, jabechji̧ na̧rȩrea̧mi̧ dari̧ ma̧ chjua jo̧rȩtaji̧ri̧rȩ chjuari̧ quëna̧rea̧ro̧jo̧ȩ Ütë tjamo̧ pio ju̧i̧, jaepeparea̧ decjiari̧. 5Jabechji̧ ma̧i̧ dari̧ bide cjaea̧ oa tararëreji̧ri̧rea̧rȩ ca̧ oti̧. Ado chaärea̧ bëräpȩ chaäa̧ oa cjiarëreji̧ri̧rea̧rȩ peaja̧di. Ado a̧dë chjäte cjarari̧ cjiape baga̧ji̧ri̧ pio ji̧ri̧ ja̧ ërecjiarea̧ üdë pio ibëiäpȩmo̧ acji cjatäa̧ pio ju̧i̧bo tararëreji̧ri̧rea̧rȩ, pumȩ buba ja̧ ërecjia̧ pio ju̧i̧. Ado ju̧i̧ uëri a̧ro̧rȩ ja̧beparä, jabechji̧ a̧rȩdäräpai̧ tarari̧ taraji̧ri̧rȩ ja̧beparea̧rȩ, ju chia tjamo̧dëji̧ri̧rȩ. Jabechji̧ mo̧a̧rea̧ dadëräbo, jurarea̧ oa dadëräbo, jabechji̧ ja̧beparea̧rȩ, ta̧mȩcho̧ ja̧bo tjamo̧ji̧ri̧rȩ cjo̧ro̧räbo. 6Aja̧ ca̧ oti̧, a̧ro̧rȩ ja̧di dari̧ cjo̧ro̧ji̧ri̧borë, jabechji̧ pumȩ ji̧ri̧ aeno̧dërea̧ro̧jȩrȩ. Tjamo̧ davä. Pumȩ judiro̧ ibë ma̧i̧ dari̧ japea̧räbo, aeno̧dërea̧ro̧jȩrȩ. jabo jabechji̧ pumȩ judiro̧ pio ibë chjiari chjadëri̧ dabarea̧mi̧ dari̧ na̧rȩji̧ri̧rȩ cjo̧ro̧rea̧rȩ, Tjo tjamo̧ pio judi ju chiarea̧ yürüa̧ oaiä. Jabechji̧ o judiro̧ pio ibëiäpȩmo̧ ma̧i̧ dari̧ japea̧ ba oa bape chjaotärea̧ ji̧, cjäri̧ marea̧ro̧jȩrȩ ca̧ oti̧, chjai̧dë pio ju̧i̧ ba dëbë japadërea̧rȩ jabo jabechji̧, chjadë pio ju̧i̧mo̧i̧ mitëji̧ri̧rȩ cjo̧ro̧rea̧rȩ. Tjamo̧ davä. Ütë tjamo̧ judi ibë dabarea̧ yürüa̧ra̧ pio ju̧ri̧ra̧ chjadë pio ju̧i̧mo̧i̧ mitëji̧ri̧rȩ cjo̧ro̧rea̧rȩ, jibëa̧ ma̧ȩ pio ju̧i̧ chjadëri̧ dabaji̧ri̧rȩ. Jabechji̧ pumȩ judiro̧ ibë ji̧dë ma chjai̧dëri̧ japea̧räbo, ba dëbë ërecjiape bagadërea̧ro̧jȩrȩ, jabo pio ji̧ri̧ ea tjamo̧ji̧ri̧rȩ chjadëri̧ japarea̧ro̧jȩrȩ, jabomo̧ eacji̧ quëna̧ japadëji̧ri̧rȩ. Jabechji̧ ma̧i̧ dari̧ chjätäji̧ri̧borë ma̧ chjua jo̧rȩtaji̧ri̧rȩ cjo̧ro̧rea̧rȩ, Ütë tjamo̧ pio ju̧i̧iämo̧i̧ ja̧ȩ cjiami̧ dari̧ quëna̧ji̧ri̧rȩ. 7Ado ji̧dë ma coëma cjiari̧ a̧ra̧ano̧rea̧ro̧jo̧ȩ Ütë tjamo̧ ja̧ ma̧ȩ oa. Jabechji̧ pio ibëiä ana̧ri̧ ja̧bepade Ütë tjamo̧ ja̧ jauëchjarea̧ üdë. Ana̧ri̧ na̧rȩde. Ado a̧ro̧rȩ coëma cjiari̧ cjo̧ro̧rea̧ üdë, jabechji̧ chjadëri̧ a̧dodiibe ca̧ oti̧. Jabechji̧ a̧ro̧rȩ coëma cjiari̧ cjo̧ro̧rea̧ra̧ pio ju̧ri̧ra̧ acji tai̧ji̧ri̧mi̧ dari̧ ja̧beparea̧ darea̧rȩ, dëbëribo jo̧dë chiamȩ tjapërȩ jujuai̧mi̧ dara̧ pio ju̧ra̧. Tjamo̧ davä ca̧ oti̧. A̧ro̧rȩ coëma cjiari̧ cjo̧ro̧rea̧ üdë a̧dodiibe a̧ro̧rȩ boadärämi̧ dari̧ ja̧bepapea̧ oa, acji tai̧ji̧ri̧mi̧ dari̧ ja̧bepapea̧ oa, dae jämi̧ dari̧ ja̧bepapea̧ oa. Ado danȩrȩ, a̧ro̧rȩ coëma cjiari̧ cjo̧ro̧a̧ oaiä, peaja̧di chjadëri̧ jida̧ oa cjiami̧ dari̧ cjiarea̧rȩ. Tjamo̧ davä. A̧ro̧rȩ coëma cjiari̧ cjo̧ro̧rea̧ra̧ pio ju̧ri̧ra̧ chjadëri̧ jida̧ oa cjiami̧ dari̧ ja̧beparea̧ darea̧rȩ, ibë jidamȩ chjiparari pjatëmi̧ dara̧ pio ju̧ri̧ra̧. Jabechji̧ a̧ro̧rȩ ibë dëbëpe chjaoji̧ri̧ pio ji̧ri̧ chjadëri̧ boadärärea̧ dapea̧ oa, a̧ro̧rȩ peaja̧di chjadëri̧ jida̧ oa cjiapea̧ oa, jabechji̧ chjadëri̧ a̧dodiibe davä, coëma cjiari̧ cjo̧ro̧rea̧ üdë. 8Ado aro̧rȩ ja̧di dari̧ cjo̧ro̧ tara, a̧ro̧rȩ coëma cjiari̧ cjo̧ro̧ji̧ri̧rȩ a̧ra̧ano̧ tara, jabechji̧ ji̧dë ma ni̧bä chjaodirȩ pumȩ judiro̧ pio ibë chjiari, a̧ro̧rȩ Ütë tjamo̧ ja̧ oa ja̧bepa tara. Jabechji̧ tjaoërä, ba chia dadiro̧ibe. Jabo tjaoërä, ado cja̧rȩmo̧räpȩ cjo̧ro̧ji̧ri̧ pio judiro̧, cjäri̧ madiro̧ibe, badë dadiro̧ibe. Ado tjaoërä, cja̧rȩmo̧räpȩji̧ri̧ pio judiro̧, jabechji̧ chjacjiamȩri̧ ni̧bädiro̧ibe pio ibë chjiari. Jabo tjaoërä, cja̧rȩmo̧räpȩji̧ri̧ judiro̧, cjäri̧ madiro̧ibe, goaedëti̧ri̧ ni̧bädiro̧ibe. “Aja̧, ma̧ȩ chjádë yürüji̧ri̧ pio judiro̧ tjamo̧dirȩ” yo̧dirȩ pio ibë chjiari. Jabo cjäri̧ ma ca̧ oti̧, a̧ro̧rȩ ma̧ȩ chjádë yürüdë marea̧rȩ, jabo a̧ro̧rȩ ni̧bä chjaoa̧ üdë, jabechji̧ tjamo̧i̧ cjiari̧ baä maeade. 9Jabo dëdë ca̧ oti̧, o judiro̧, “Aja̧, pio jiro pumȩ judiro̧ ba chia tjamo̧dirȩ“ yo̧dirȩ pio ibë chjiari. “Ba chia maea oa ja̧bepadirȩ” yo̧dirȩ. Jabo o judiro̧, cjäri̧ madiro̧ibe, “¿Chjiacjivadirȩ? Teracaba maeadirȩ. Jabomo̧ badë maea oa chjaocjiami̧ dari̧ ja̧bepadirȩ” yo̧dirȩ pio ibë chjiari. Jabo jabërea̧rȩ ca̧ oti̧. Jabë ja̧bo tänȩdëa̧diro̧ibe. Jabechji̧ ibë chjaodëri̧ ja̧bo tänȩpai̧ daräbo, jabë cjo̧ro̧ cjiarea̧rȩ ca̧ oti̧. Ado o judiro̧ ibë goae tarari̧ bide cjaeäa̧räbo, peaja̧di jabë ja̧bo tänȩrea̧ dadë madiro̧ibe. 10Jabo danȩrȩ ca̧ oti̧, a̧ro̧rȩ Ütë tjamo̧ ja̧ oa ja̧bepea̧ oaiä, dëdë, gito ana̧ri̧ jo̧rȩtapai̧ darea̧rȩ. Jabo gitori̧ jo̧rȩtaräbo, ma̧ chiadëri̧ cjiari̧ jo̧rȩtaji̧ri̧rȩ cjo̧ro̧rea̧rȩ pumȩ no̧i̧dërë quëna̧ji̧ri̧pea̧ tara, a̧ro̧rȩ a̧ra̧ano̧a̧ pio ju̧i̧ ta̧rëa̧ oaiä quëna̧ji̧ri̧pea̧ tara. Jabechji̧ a̧ro̧rȩ mö̧na̧ maearë cjo̧ro̧ji̧ri̧borë a̧dë chjäte ba chiati̧ oa goaji̧ri̧mi̧ dari̧ cjo̧ro̧rea̧rȩ, pumȩ ja̧ tjo pio ju̧i̧ a̧dorea̧ ba chia oa goaji̧ri̧rȩ. Tjamo̧ davä. Jabechji̧ dami̧ti̧ ba chia oa goaji̧ri̧mi̧ dari̧ cjo̧ro̧rea̧rȩ. Ado pio ju̧i̧iä na̧e chia tjamo̧täreji̧ri̧nȩrȩ ca̧ oti̧ pio coa chjiari. ‘Aja̧, Jechurë chjadüa̧ oa cjia tjamo̧dida’ quëna̧ jo̧rȩtatäreji̧ri̧nȩrȩ. Jabechji̧ Jechu pio judi coa tjamo̧ri̧ chjadüa̧ tara, ‘jabechji̧ Pablo judi ibë a̧ra̧ano̧a̧ üdë coëma cjia maeadida, oëra̧ baädë madida’ quëna̧ jo̧rȩta matäreji̧ri̧nȩrȩ pio coa chjiari.

11Danȩrȩ ca̧ oti̧, pio dibë, Cori̧tio quȩmȩ bë ma̧ri̧räpȩ quëna̧ji̧ri̧ pio ji̧ri̧ ea tjamo̧rea̧ro̧dibe. Ado pio ju̧i̧iä ibëa̧ chji̧rä chamȩ jo̧rȩtarea̧ chjö̧na̧i̧ oa ni̧bä chjaoa̧rea̧ro̧dibe goadirea̧ decjiari̧. 12Jabechji̧ a̧ro̧rȩ dibë ea tjamo̧rea̧ro̧dibe jabëdiärea̧ decjiari̧. Ji̧dë ma earea̧ro̧dibe. Jabo mȩnȩro̧ pio ibëiäpȩmo̧ ea tjamo̧rërea̧ ji̧, ea tjamo̧dëji̧ri̧pea̧renȩro̧ibe yaba̧. Jabechji̧ jabëdiämi̧ dari̧ cjiade mȩnȩro̧ pio ibëiäpȩmo̧ ea̧ üdë. Jabë pjärämȩ tjamo̧de. 13Ado pio ju̧i̧iä yo̧requededibe oti̧. Ea tjamo̧chji̧ibe a̧ro̧rȩ pio dibë eami̧. Jabechji̧ ca̧ u̧ri̧mi̧ daji̧ri̧ oa yo̧requededibe. Jabechji̧ jabëdiädëtädiibe mȩnȩro̧ pio ibëiäpȩmo̧ ea̧ üdë.

Quëna̧ji̧ri̧ judiro̧ Ichiae ja̧ pumȩ ja̧ chja̧oerä cjo̧ro̧rea̧mi̧dëdirȩ

14Danȩrȩ ca̧ oti̧, mȩnȩro̧ Ütë tjamo̧ ja̧ pumȩpea̧ tara, jabechji̧ ji̧mo̧ yura̧ oa cjiami̧ dari̧ cjiadë machji̧vä Ichiae ja̧ pumȩ pio ji̧ri̧ nö̧ta, Jechu ja̧ ma̧ȩrä cjo̧ro̧dëji̧ri̧ pio ji̧ri̧ nö̧ta. Aja̧, quëna̧dëji̧ri̧ pio ji̧ri̧ ja̧ chja̧oerä cjo̧ro̧dëtäreji̧ri̧nȩrȩ. Jabechji̧ coëma cjiari̧ cjo̧ro̧ji̧ri̧ pio judiro̧ ori̧ bagari̧ ëba cjiarea̧mi̧dëdirȩ chjai̧dë ja̧ chja̧oerä cjo̧ro̧ji̧ri̧ pio ji̧ri̧ nö̧ta. Jabechji̧ coëma cjiari̧ jo̧rȩtarea̧ üdë a̧de mirerea̧mi̧dëde chjai̧dëri̧ jo̧rȩtarea̧ pio ju̧i̧ nö̧ta. Tatarea̧ üdë a̧de mirerea̧mi̧dëde bagönȩrea̧ pio ju̧i̧ nö̧ta. 15Jabechji̧ Quiricho judi Ichiae pio ju̧i̧ nö̧ta cja̧rȩmȩ chji̧ chiami̧ dari̧ a̧de jo̧rȩtarea̧mi̧dëde. Ado pio ju̧i̧iä a̧ro̧rȩ, Quiricho pio ju̧i̧ ja̧ pumȩ pio judiro̧, jabechji̧ jadüpe bagari̧ ëba cjiadë matäreji̧ri̧rea̧ro̧jȩrȩ Ichiae ja̧ pumȩ pio ji̧ri̧ nö̧ta. Jabechji̧ pio ji̧ri̧ nö̧ta cja̧rȩmȩ chji̧ chiami̧ dari̧ jo̧rȩtarea̧mi̧dëde. 16Danȩrȩ ca̧ oti̧, ¿jabechji̧de Ütë tjamo̧ ja̧ bëräpȩ ju̧ri̧ teracaba ütë oa cji̧däpea̧ üdë? Ado Ütë tjamo̧ ja̧ bëräpȩ ju̧ri̧ teracaba ütë pio ju̧i̧iiäpȩmo̧ chjacjiamȩri̧ jo̧rȩtapea̧ üdë ¿jabechji̧? Cjäri̧ made, jabechji̧dëde. Ado peaja̧di jabechji̧dëde pio ibëiä. Jabechji̧ a̧ro̧rȩ Ütë tjamo̧ ja̧ bëmi̧ dapea̧ tara, a̧ro̧rȩ ja̧bodëmȩ Ütë pio ju̧i̧ ja̧ bëmi̧ dapea̧ tara, jabechji̧ Ichiae ja̧ pumȩ pio ji̧ri̧ nö̧ta ëba cjiarea̧mi̧dëpea̧rea̧rȩ. Jabechji̧ ta̧rëchji̧vä Ütë tjamo̧ judi pio ibë chjiari jabërä yo̧rërea̧ ma̧ȩ pio ju̧i̧:

“Jabechji̧ cjo̧ro̧parequede ca̧ pumȩ ja̧ icjararä. Ado pio ji̧ri̧ ja̧ chjarerä tai̧parequede. Jabechji̧ pio ji̧ri̧ ja̧ Ütëmȩrȩ cjo̧ro̧parequede, ado pio judiro̧ ca̧ pumȩ mapadiro̧coe.”

Aja̧ ca̧ oti̧, ja̧di ta̧rëri̧ jabërä ni̧bärëremȩde Ütë tjamo̧ judi pio ibë chjiari, ibëa̧ icjararä bëpapea̧ pio ju̧i̧ chjiari. 17Ado pio ju̧i̧iä ja̧di ta̧rëri̧ a̧de yo̧rëremȩde Ütë tjamo̧ judi. Ta̧rëchji̧vä.

“Ja̧di tara a̧dë go̧düchji̧jȩrȩ pio coaiäpȩmo̧ quëna̧dëji̧ri̧ pio ji̧ri̧. Jabechji̧ pio ji̧ri̧ a̧dë tutia̧ oa cjiami̧ dari̧ cjiachji̧vä china̧chjari̧. Jabechji̧ pio ji̧ri̧ nö̧ta eami̧ chjai̧dë oa, eami̧ china̧chja oa japadë machji̧vä. Jabechji̧ mȩnȩro̧ ja̧di dari̧ cjo̧ro̧a̧ oaiä, mȩnȩro̧ ca̧ ma̧ȩrä chjadëri̧ cjo̧ro̧a̧ oaiä, jabechji̧ pio dibë cjäri̧ri̧ cjiamȩrȩ chjadëri̧ yu̧a̧rea̧ yürüparequededibe, ori̧ bagari̧ ëba cjiarea̧mi̧ dari̧. 18Ado dibëa̧ Ama̧i̧parequede. Ado pio mȩnȩro̧ ca̧ u̧ri̧ maparenȩrȩ. Aja̧, ca̧ ja maearë, ca̧ jabi maearë cjo̧ro̧panȩrȩ.”

Aja̧, ja̧di ta̧rëri̧ yo̧mȩrȩ yo̧rëremȩde ibëa̧ Ano̧mȩ judi, a̧dë chjäte jauëchjamȩ pio judi. Tjamo̧ davä. Judi ibëa̧ icjararä jabë bëpadëa̧rä, ja̧di ta̧rëri̧ yo̧rëremȩde jabërä pio ibë chjiari jo̧rȩtamȩrȩ.

Currently Selected:

Cori̧tio Ma̧ȩ 2 6: Pume

Highlight

Copy

Compare