Cori̧tio Ma̧ȩ 2 3

Ma̧ȩ peaja̧ pio ju̧i̧ a̧ra̧ano̧rëremȩde Pablo judi, ji̧dë u̧i̧ ba chiamȩ ma̧ȩ pio ju̧i̧

1Jabo danȩrȩ ca̧ oti̧, a̧ro̧rȩ pio ibë chjiari ja̧di ta̧rëri̧ yo̧a̧ oaiä, ‘jabomo̧ goaeri̧ yo̧ jirodiro̧ibëda’ quëna̧ jo̧rȩtapai̧ da jironȩrȩ pio ibë chjiari. Tjamo̧ davä. A̧ro̧rȩ, “Aja̧, Ütë tjamo̧ pio judi chjadüa̧ oa ja̧beparea̧rȩ” yo̧a̧ oaiä, “Quiricho pio ju̧i̧ ja̧ mu̧i̧tjoi̧ji̧ri̧rȩ a̧ra̧ano̧rea̧rȩ, chëre oa cjo̧dëdëji̧ri̧rȩ” yo̧a̧ oaiä, jabechji̧ oëra̧ jo̧rȩtapai̧ da jironȩrȩ pio ibë chjiari. ‘Jabechji̧ jabomo̧ goaeri̧ yo̧diro̧ibëda, jibëa̧ chji̧rämo̧ jo̧rȩtaji̧ri̧rȩ yo̧diro̧ibëda, a̧ro̧rȩ pio ji̧ri̧iäpȩmo̧ ba chia datä eaji̧ri̧rȩ yo̧ chjao jirodiro̧ibëda’ quëna̧ jo̧rȩtapai̧ da jironȩrȩ ca̧ oti̧. Jabo cjäri̧ marea̧ro̧dibe, ja̧di dari̧ jo̧rȩtadë marea̧rȩ, jabo coëma cjiari̧ jo̧rȩtaji̧ri̧rȩ yo̧rea̧ro̧dibe, pio ibë chjiari goaeri̧ yo̧dëji̧ri̧rȩ. Jabo danȩrȩ ca̧ oti̧, ¿yö̧ta dari̧ japadirȩ o judiro̧? ¿Yö̧ta dari̧ japadirȩ oëra̧ a̧ra̧ano̧ji̧ri̧ judiro̧? Yö̧ta dari̧dë, jabechji̧ pio jibë chjiari go̧ȩ irä goaeri̧ go̧ȩpea̧ duri pio ju̧i̧ irä goë na̧rȩji̧ri̧rȩ go̧düdärädirȩ pio dibëiäpȩ, pio mȩnȩro̧ go̧ȩ ni̧bäpea̧ oa, ado pio jiro go̧ȩ i oa go̧ȩ ni̧bäa̧ oaiä pio jibëiäpȩmo̧ ba chia dapea̧ oa. Ado ja̧dëa ji̧ jënȩro̧ baäbea yaboi̧, pio mȩnȩro̧borë pio jibë chjiari goaeri̧ go̧ȩpe yürütä eaji̧ri̧rȩ cjo̧dëdiro̧dibe, mȩnȩro̧ pio jibë chjiari chjacjiamȩri̧ go̧ȩpapea̧ oa, mȩnȩro̧ go̧ȩpea̧ duri pio ju̧i̧ goë na̧rȩpea̧ oa o ji̧ri̧iäpȩmo̧. Ado peaja̧di dari̧ japatäreji̧ri̧rea̧rȩ a̧ro̧rȩ? ¿Peaja̧di goë na̧rȩno̧täreji̧ri̧rea̧ro̧dibe go̧ȩ i oa, pio ibëiäpȩmo̧ ba chia dapea̧ oa? Ado a̧ro̧rȩ dibë a̧dë baäbea yaboi̧, ¿peaja̧di pio ibë chjiari goaeri̧ go̧ȩpatä cjo̧dëtäräreji̧ri̧rea̧ro̧dibe? “Aja̧, pio yodëro̧je chjadëri̧ ja̧bepadirȩ” yo̧pamȩ go̧ȩ i pio ju̧i̧ ¿cjo̧dëtäreji̧ri̧rearo̧dibe? Aja̧, a̧ro̧rȩ peaja̧di eami̧räpȩ go̧düdäräa̧rä, goaeri̧ go̧ȩpea̧ duri pio ju̧i̧ chjadëri̧ goë na̧rȩno̧pea̧ oa, ¿cjo̧dëtäreji̧ri̧a̧ro̧dibe? Judiro̧ go̧ȩ i oa go̧ȩ ni̧bä oaiä pio ibëiäpȩmo̧ ba chia dapea̧ oa ¿cjo̧dëtäreji̧ri̧a̧ro̧dibe? 2Jabo cjäri̧ marea̧rȩ ca̧ oti̧, ja̧di dari̧ japadëparea̧rȩ. Jabechji̧ dai oa cjiamȩ go̧ȩ i pio ju̧i̧ jo̧rȩtadë marea̧rȩ, jabo pio dibëiäpȩmo̧ jo̧rȩtarea̧ro̧dibe ca̧ oti̧. Jabechji̧ pio mȩnȩro̧ tjamo̧nȩrȩ pio ibë chjiari na̧rȩji̧ri̧ judiro̧. Pio ibë chjiari na̧rȩrea̧ go̧ȩ imi̧ danȩrȩ. Jabechji̧ dibëa̧ chji̧rä go̧ȩpea̧ oa cjiami̧ dari̧ cjiade a̧ro̧rȩ dibë a̧ra̧ano̧rërea̧ ma̧ȩ üdë, a̧ro̧rȩ dibë a̧dorërea̧ üdë. Jabechji̧ chjadë maearä cjiade. Ado eami̧ pumȩ judiro̧ pio ibë chjiari tjamo̧ri̧ dabatämi̧ cjiarä judi, ‘Aja̧ Pablo judi, ¿yö̧ta dari̧ ja̧bepadida, pio ju̧i̧ nö̧ta ja̧bepaji̧ri̧ pio judiro̧ ¿yö̧ta dari̧ ja̧bepaji̧ri̧diro̧da’ quëna̧ jo̧rȩtarä judi, jabechji̧ chjaodëri̧ daba dapai̧ dadirȩ davä pio dibë ütarë daea̧ oaiä, mȩnȩro̧ cjo̧ro̧ji̧ri̧ oa ütarë daea̧ oaiä. 3Tjamo̧ davä. Quiricho judi pio ibëiä go̧ȩpe chjadürërea̧ ma̧ȩ pio judimi̧ danȩrȩ ca̧ oti̧. Ado pio ju̧i̧iä chjadëri̧ na̧rȩnȩrȩ a̧ro̧rȩ dibëa̧ chjarerä ja̧beparërea̧ pio ju̧i̧ chjiari. Jabechji̧ dai chirirä ja̧ go̧ȩparea̧ tura̧ pio ju̧ri̧ra̧ go̧ȩpea̧ oa cjiadëa̧de. Ado peaja̧di ta̧dë pjatërä go̧ȩpea̧ oa cjiadëa̧de. Tjamo̧ davä. Ütë tjamo̧ judi Moicherea̧ pio ju̧i̧ yürürërea̧ ta̧dë pjatëmi̧ darä go̧ȩpa tänȩrërea̧mi̧ go̧ȩpea̧ oa cjiami̧ dari̧ cjiadëde, jabo dibëa̧ chji̧rä go̧ȩpea̧ oa cjiami̧ dari̧ cjiarëremȩde ja̧bodëmȩ Ütë pio ju̧i̧ ja̧ Tjora̧ pio ju̧ri̧ra̧.

4Jabechji̧ Ütë tjamo̧ ja̧ dachoro cjiaji̧ri̧rȩ ja̧di ta̧rëri̧ ni̧bärea̧rȩ idëri̧ cjiadëji̧ri̧rȩ, Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ. Ado pio ju̧i̧iä dae järea̧mi̧ dari̧ a̧ra̧ano̧rëreji̧ri̧rea̧ro̧dibe, mȩnȩro̧ tjamo̧ri̧ dabape järea̧mi̧ dari̧. 5Jabechji̧ tjamo̧ri̧ dabarea̧rȩ pio ibë chjiari ca̧ oti̧. Jabechji̧ ibëa̧ ju chiarea̧ra̧ pio ju̧ri̧ra̧ ja̧beparea̧mi̧dëde, jabo Ütë tjamo̧ judi ju chiarea̧ yürüa̧ oaiämo̧i̧ chjadëri̧ ja̧beparea̧ darea̧rȩ. Jabechji̧ pio judimo̧de chjadëri̧ ja̧beparea̧ yürümȩ judi. 6Ado pio judi chjadëri̧ yürüa̧ oa, jabechji̧ chjadëri̧ ja̧beparea̧ darea̧rȩ yaba̧ ma̧ȩ peaja̧ oa, jënȩ yo̧ë cji̧därërea̧ ma̧ȩ peaja̧ oa. Jabechji̧ pio jiro ma̧ȩ peaja̧ üdë Moicherë go̧ȩparërea̧ ma̧ȩra̧ pio ju̧ri̧ra̧ go̧ȩpadë marëremȩde, jabo Tjo tjamo̧ pio judiri ma̧na̧mȩ ma̧ȩ maeade. Jabechji̧ pearä yürürërea̧ ma̧ȩ üdë bucho ana̧ ja̧borea̧ maea oa yürüdiibe. Bucho ana̧ tutirea̧ maea oa yürüdiibe, jabo ma̧ȩ peaja̧ üdë, cjäri̧ madiibe, cjo̧ro̧rea̧ maea oa yürüdiibe Tjo tjamo̧ pio ju̧i̧iä. Bucho ana̧ cjo̧ro̧rea̧ yürüdiibe. Ado pio ju̧i̧iä pio jiro ma̧ȩ peaja̧ oa a̧ra̧ano̧riä cjo̧ro̧rea̧rȩ ütëbodärä oa a̧ra̧ano̧pea̧ oa. Tjamo̧ davä. Ütërë yürüa̧ ju chiarea̧ra̧ pio ju̧ri̧ra̧ a̧ra̧ano̧rea̧ro̧jo̧ȩ bucho ana̧ cjo̧ro̧rea̧ yürümȩ ma̧ȩ pio ju̧i̧.

Ütërë yo̧ë cji̧däa̧ ma̧ȩ peaja̧ üdë ji̧dë u̧i̧ a̧dë chjäte ba chiade Moicherea̧rë go̧ȩparërea̧ ma̧ȩ pio ju̧i̧iä

7Danȩrȩ, Moicherea̧ judi cjo̧ro̧a̧rä, Ütë tjamo̧ judi ma̧ȩ yürë cji̧därërea̧ ma̧ȩ pio ju̧i̧ yürürëremȩdejȩ, ta̧dë pjatërä go̧ȩpea̧ oa cjiamȩ ma̧ȩ oa, Icharai pio judiri ja̧ji̧ri̧ pio judiro̧ ta̧rëdiäpea̧ ma̧ȩ oa. Jabo pio jiro ma̧ȩ üdë, cjäri̧ madejȩrȩ, bucho ana̧ cjo̧ro̧rea̧ yürüdërëremȩdejȩrȩ, jabo ji̧dëri̧ dabapa tänȩrëremȩdejȩrȩ jënȩro̧ chjai̧dëri̧ japea̧ pio ju̧i̧ chjiari, jënȩro̧ bucho ana̧ ja̧bopea̧ pio ju̧i̧ chjiari. Jabechji̧ Ütë tjamo̧ ja̧ jauëchja üdë ana̧ri̧ na̧rȩrërea̧ oa cjia̧räbo, pio jiro ma̧ȩ oa pearä yürüa̧rä ana̧ri̧ na̧rȩa̧ oa cjia̧räbo, jabechji̧ bucho ana̧ cjo̧ro̧rea̧ yürüdërëremȩde. Danȩrȩ, Ütë tjamo̧ judi Moicherea̧ pio ju̧i̧ pio jiro ma̧ȩ oa yürürërea̧ ji̧, jabechji̧ icharaita judiro̧ jibëa̧ dacho oa dëbë darea̧mi̧dëpe bagari̧ tatari̧ cjiarëremȩde. Jabo Moicherea̧ ja̧ dacho üdë pearä judi ja̧di dari̧ tatari̧ cjiarërea̧ ji̧, cjäri̧ made, goarijämi̧ dari̧ jaerira̧ tatadëpe bagarëremȩde. 8Jabo Ütë tjamo̧ judi ichi chjö̧na̧i̧ ma̧ȩ oa pearä yürürërea̧rä jibëa̧ jauëchja oa ana̧ri̧ na̧rȩa̧ oa cjiarä judi, chia chia, ji̧dë u̧i̧ ana̧ri̧ na̧rȩa̧ oa cjiapade yaba̧ judi ma̧ȩ peaja̧ oa yürë cji̧däa̧ ma̧ȩ pio ju̧i̧iä, Tjo tjamo̧ pio judi cjo̧ro̧rea̧ peaja̧ oa yürüa̧ pio ju̧i̧iä. 9Danȩrȩ, tjamo̧i̧ cjiari̧ yo̧requededibe ca̧ oti̧. Ütë tjamo̧ judi ja̧borea̧ pio ju̧i̧ chjiari dabapa tänȩrërea̧ ma̧ȩ pio ju̧i̧ pearä yürürërea̧rä jibëa̧ jauëchja oa ana̧ri̧ na̧rȩa̧ oa cjia̧rä judi, jabechji̧ ji̧dë u̧i̧ ana̧ri̧ na̧rȩa̧ oa cjiapade jënȩ ma̧ȩ peaja̧ oa yürë cji̧däa̧ ma̧ȩ pio ju̧i̧iä, ibë cjo̧ro̧rea̧ yürümȩ ma̧ȩ pio ju̧i̧iä. Tjamo̧ davä ca̧ oti̧, ji̧dë u̧i̧ ana̧ri̧ na̧rȩa̧ oa cjiapade jënȩ ma̧ȩ peaja̧ oa yürë cji̧däa̧ ma̧ȩ pio ju̧i̧iä, pio ibë jabechji̧parȩmȩ ma̧ȩ pio ju̧i̧iä. 10Ja̧di tara yo̧requededibe ca̧ oti̧. Jabechji̧ pearä na̧rȩrërea̧ üdë nö̧tadë made ji̧dë duri oa na̧rȩpea̧ pio ju̧i̧. Pearä na̧rȩrërea̧ üdë nö̧tadëde ji̧dë duri oa na̧rȩa̧ oa cjiapamȩ pio ju̧i̧. Tjamo̧ davä ca̧ oti̧, pearä judirä jauëchja cjiari̧ na̧rȩrërea̧ pio ju̧i̧iä ji̧dë u̧i̧ chjacjiamȩ tjamo̧de ji̧dë duri oa na̧rȩpea̧ üdë. Jabechji̧ pearä na̧rȩrërea̧ üdë goarijämi̧ dari̧ tatadëpe bagarëremȩde, jabo yaba̧ na̧rȩpea̧ üdë, cjäri̧ madiibe, tatadëpe bagami̧ dari̧ japadëpadiibe. Goarijädëpadiibe. Jabechji̧ ma̧ȩ peaja̧ üdë ji̧dë u̧i̧ ba chia tjamo̧ tara tatadëpe bagami̧ dari̧ japadëpadiibe. 11Jabechji̧ Ütë tjamo̧ judi no̧mȩ ja̧ ma̧ȩ oa yürürërea̧rä jibëa̧ jauëchja üdë ana̧ri̧ na̧rȩa̧ oa cjia̧räbo, jabechji̧ pio jiro ma̧ȩ üdë bucho ana̧dërëremȩde. Jabechji̧ goarijärëremȩde. Cjiadiä tänȩmi̧ dari̧ cjiadiärëremȩde. Jabo danȩrȩ, Ütë tjamo̧ judi ji̧dë duri oa ma̧ȩ peaja̧ oa yürürërea̧ ji̧, jabechji̧ ji̧dë u̧i̧ ana̧ri̧ na̧rȩa̧ cjiade. Jabechji̧ goarijädëmȩ ma̧ȩ tara, cjiadiämi̧ dari̧ cjiadiädëmȩ ma̧ȩ tara, bucho ana̧ cjo̧ro̧rea̧ yürümȩ ma̧ȩ tara, jabechji̧ ji̧dë u̧i̧ ana̧ri̧ na̧rȩa̧ oa cjiapade. Moiche judi jibëa̧ dacho oa ina̧rërea̧mi̧ ina̧ oa cjiami̧ dari̧ cjo̧ro̧dërea̧rȩ, jabo ji̧dë ma na̧rȩriä cjo̧ro̧rea̧rȩ Quiricho pio judiri ma̧na̧mȩ tatarea̧mi̧ da pio ju̧i̧. 12Ado a̧ro̧rȩ pio jiro ma̧ȩ peaja̧ pio ju̧i̧ chjiari tjamo̧ri̧ dabaji̧ri̧pea̧ tara, pio jiro ma̧ȩ üdë tjamo̧ri̧ goarijädëpa tara, jabechji̧ uapadëji̧ri̧rȩ a̧ra̧ano̧rea̧ro̧jo̧ȩ pio jiro ma̧ȩ oa, oëadëji̧ri̧mi̧ dari̧. 13Jabechji̧ Moicherea̧ pio judimi̧ dari̧ japadërea̧ro̧dibe. Ibëa̧ dacho oa ina̧ji̧ri̧rȩ a̧ra̧ano̧dë marea̧ro̧dibe. Danȩrȩ, Moicherea̧ ja̧ chamacho üdë ma̧i̧ dari̧ tatarërea̧ ji̧, goadimȩrȩ ina̧rëremȩdejȩ. Jabechji̧ Icharai pio judiri ja̧ji̧ri̧ pio judiro̧ dachea oa, ma̧i̧ dari̧ tata cjiamȩ pio ju̧i̧ dachea oa, jabechji̧ ina̧rëremȩdejȩ, jaerira̧ tatadëpe baga̧rä yuro. 14Jabo cjäri̧ madirȩ, Icharai pio judiri ja̧ji̧ri̧ judiro̧ na̧e chiatärea̧ ji̧, quëna̧dëri̧ cjiarëreji̧ri̧dirȩ. ‘Ütë tjamo̧ judi ibë pea yürüa̧ ma̧ȩ üdë japamitë chjätä ëte goarijäpea̧dida’ quëna̧tärea̧ ji̧, ‘tatadëpe bagami̧ dari̧ goarijäpea̧dida’ quëna̧tärea̧ ji̧, cjäri̧ madirȩ, quëna̧dëri̧ cjiarëreji̧ri̧dirȩ. Ado pio yaba̧mȩ yoaiä peaja̧di dari̧ jo̧rȩtadirȩ judiro̧. Jabechji̧ judiro̧ pio jiro ma̧ȩ oa go̧ȩ ni̧bärä, cjäri̧ madirȩ, judiro̧ na̧e chiatärea̧ ji̧, ‘Aja̧, no̧mȩ ja̧ ma̧ȩrëremȩ ma̧ȩ üdë goarijäa̧dida yaba̧’ quëna̧tärea̧ ji̧, ja̧di dari̧ jo̧rȩtarea̧ dadë madirȩ, jabo jibëa̧ dacho üdë peaja̧di ina̧ oa cjiami̧ dari̧ cjiade. Jibëa̧ chji̧ üdë cjae ina̧ oa cjiami̧ dari̧ cjiade. Ado jibëa̧ chji̧ üdë ina̧rea̧ra̧ pio ju̧ri̧ra̧ cjae ina̧mi̧ dari̧ cjia oaiä, jabechji̧ dabaparea̧ dadëdirȩ. Jabechji̧ Quiricho pio ju̧i̧iäpȩmo̧ quëna̧rämo̧ aeno̧a̧ oa cjiapade ina̧rea̧mi̧ da üdë. Jabo judiro̧ quëna̧tärea̧ ji̧, quëna̧rea̧ dadëdirȩ. Tjamo̧i̧ cjiari̧ baämȩ ma̧ȩ pio ju̧i̧ jabë quëna̧rea̧ dadëdirȩ. 15Ado pio ji̧ri̧ chjiari tjamo̧ri̧ yo̧requededibe ca̧ oti̧. Danȩrȩ, pio yaba̧mȩbo Icharaita judiro̧ Moicherë go̧ȩparërea̧ ma̧ȩ pio ju̧i̧ go̧ȩ ni̧bärä, cjäri̧ madirȩ, ina̧rea̧ra̧ pio ju̧ri̧ra̧ cjae ina̧ oa cjiami̧ dari̧ cjiade jibëa̧ chji̧ üdë. 16Jabo eami̧ pumȩ üdë quëna̧rä judi, ano̧ mire jo̧rȩtamȩrȩ Ano̧mȩ pio ju̧i̧iäpȩmo̧ quëna̧rä judi, jabechji̧ aeno̧a̧ oa cjiami̧ dari̧ cjiade ina̧rea̧mi̧ da üdë, judi chjadëri̧ dabaparea̧mi̧ dari̧. 17Ado danȩrȩ, pio jiro Ano̧mȩ judi Tjo tjamo̧ pio judide. Ado eami̧ pumȩ üdë quëna̧mȩpea̧rä, jabechji̧ pio judi ju chiarea̧ oa yürüdejȩ. Ado pio jiro ju chiarea̧ oa yürüa̧ oaiä, jabechji̧ quëna̧mȩ pio judi tjamo̧ri̧ jare chjadüa̧ oa cjiami̧ dari̧ cjo̧ro̧rea̧ dapade, tocoi̧mi̧ra̧ pio ju̧ri̧ra̧ tabüa̧ oa cjiami̧ dari̧ cjo̧ro̧rea̧ decjiari̧. 18Ja̧di tara yo̧requededibe ca̧ oti̧. Danȩrȩ, ibëa̧ chji̧ üdë yaba̧, cjae ina̧ oa cjiami̧ dari̧ cjiadë tara, jabechji̧ Moiche pio judi jibëa̧ dacho oa ina̧mi̧ dari̧ cjiadë marea̧rȩ, jabo ji̧dë u̧i̧ ji̧ra̧ri̧ na̧rȩriä cjo̧ro̧rea̧rȩ Quiricho pio ju̧i̧ chjiari chjacjiamȩrea̧ pio ju̧i̧, Quiricho pio judiri ma̧na̧mȩ tatarea̧mi̧ da pio ju̧i̧. Jabechji̧ Ano̧mȩ pio judi Tjo tjamo̧ tara, jabechji̧ pio jënȩmi̧ da cjiape järea̧mi̧ dari̧ ji̧dë u̧i̧ jëdano̧diibe, a̧ro̧rȩ pio jȩaiäpȩmo̧ ji̧dë u̧i̧ cho̧rëdiäpea̧ oa, a̧ro̧rȩ ji̧dë u̧i̧ tjaoë tjamo̧pe jäpea̧ oa.

Currently Selected:

Cori̧tio Ma̧ȩ 2 3: Pume

Highlight

Copy

Compare