Cori̧tio Ma̧ȩ 2 2

1Jabo dëdë, pio dibëiäpȩ jätämi̧ cjiamȩborë jädëa̧requede dibë ado chjereno̧ ana̧ tjamo̧ri̧ jo̧rȩta tänȩchea oa. 2Jabechji̧ pio mȩnȩro̧ gitori̧ jo̧rȩtarä judi, peaja̧di gitori̧ jo̧rȩtarequede cüdë. Ado pio ju̧i̧iä yo̧requededibe ca̧ oti̧. Jabechji̧ cüdë pio dibë gitori̧ jo̧rȩta tänȩa̧rä judi, pio cüdëborë gito ana̧ri̧ jo̧rȩta̧täremȩrequede. Ado cüdë gitori̧ jo̧rȩtarä judi, ¿chjia ju̧i̧iä cjätäcjie jo̧rȩtarea̧ daea̧täremȩrequede cüdë? Pio dibëiädë. Jabechji̧ cüdë dibë gitori̧ jo̧rȩta tänȩa̧rä judi, pio dibëiä cjatäcjie jo̧rȩtarea̧ dadëa̧täremȩrequede. 3Ado pio ju̧i̧iä chjaodëri̧ goëde jädëa̧requededibe jabomo̧ go̧ȩpe chjadürëremȩrequededibe ca̧ oti̧. Jabechji̧ cüdë jabërä jäa̧rä judi, mȩnȩro̧ jabë jëdano̧dëa̧rä jäa̧rä judi, mȩnȩro̧ jabë ano̧ mire jo̧rȩtadëa̧rä jäa̧rä judi, cjäri̧ marequededibe, pio dibë ma̧ chiadëri̧ cjia tjamo̧mȩrȩ datärea̧ ji̧, gito ana̧ri̧ jo̧rȩtamȩrȩ daea̧täremȩrequededibe. Jabechji̧ pio mȩnȩro̧ tjamo̧täreji̧ri̧nȩrȩ pio coa ma̧ chiadëri̧ cjia tänȩji̧ri̧ judiro̧. Ado pio ju̧i̧iä jabechji̧, jädëa̧requede jabomo̧ go̧ȩpe chjadürëremȩrequededibe ma̧ȩ oa. 4Jabo danȩrȩ, goae tjamo̧dërëremȩdique pio jiro ma̧ȩ oa pio dibëiäpȩmo̧ go̧ȩpe chjadüpea̧ üdë. Jabechji̧ a̧dë chjäte gitori̧ jo̧rȩtamȩrȩ go̧ȩpe chjadürëremȩrequededibe, ana̧ri̧ ejaro cjiamȩrȩ. Jabechji̧ to̧bari̧ chi̧dëearea̧ ma̧ȩra̧ pio ju̧ri̧ra̧ go̧ȩpe chjadüa̧mȩborë, jabechji̧ gito ana̧ri̧ jo̧rȩta tänȩdëri̧ cjiarëremȩrequededibe. Jabo jabechji̧ cüdë pio dibëiäpȩmo̧ tjamo̧ri̧ ea̧ pio ju̧i̧ chjiari dabatä eamȩrȩ go̧ȩpe chjadürëremȩrequededibe.

Ma̧i̧ da chjai̧dë oa japarëremȩ pio ju̧i̧ duridëparȩrëreji̧ri̧diro̧jo̧ȩ, Ichiae judi jibëiäpȩmo̧ u̧i̧parea̧ dachea oa

5Ado yaba̧ ano̧ mi̧rȩ go̧ȩpatämi̧ cjiarequededibe pio dibë nö̧ta a̧doparëremȩ pio ju̧i̧ chjiari, dibëa̧ charerä cjo̧ro̧mȩ pio ju̧i̧ chjiari, ana̧ri̧ oëra̧diäa̧mȩ pio ju̧i̧ chjiari. Dëdë, gito ana̧ri̧ jo̧rȩta tänȩrëremȩdique, jabo ji̧dë u̧i̧ ana̧ri̧ jo̧rȩta tänȩrëremȩdidibe pio dibë, pio dibë ana̧ri̧ tja̧reparȩmi̧ dari̧. Jabo mȩnȩro̧ ana̧ri̧ jo̧rȩtachea oa, jabechji̧ ji̧dë ma go̧ȩpe chjadüdëri̧ cjiarequededibe pio ju̧i̧ chjiari, judi dibëiäpȩmo̧ chjai̧dëri̧ japea̧ pio ju̧i̧ chjiari. 6Jabechji̧ mȩnȩro̧ noi̧dërë pio jiro oëra̧diäa̧mȩ pio ju̧i̧ bape chjaomi̧ dari̧ tutia̧ oaiä, judi ano̧ mire jo̧rȩtapea̧ oa dairäpȩmo̧ chjadüa̧ oaiä, jabechji̧de yaba̧. Tjamo̧ davä ca̧ oti̧. Judi ano̧ mire jo̧rȩta̧ tara, jabechji̧ nö̧tade yaba̧ mȩnȩro̧ pio ju̧i̧iäpȩmo̧ japea̧ üdë. 7Ado pio ju̧i̧iä yo̧requededibe. Jabechji̧ duridëparȩmi̧ dari̧ japachji̧jo̧ȩ. Ori̧ bagari̧ ëba chachji̧jo̧ȩ, judi cjatäcjie jo̧rȩtarea̧mi̧ dari̧. Jabechji̧ mȩnȩro̧ ju̧i̧ ado chjereno̧ ori̧ bagari̧ ëba cjiadërä judi, a̧dë chjäte gitori̧ jo̧rȩtamȩrȩ cjiadiäpai̧ dade, järi tjamo̧dëpe bagamȩrȩ bucho ana̧. 8Pio ju̧i̧iä jabechji̧ chjadëri̧ na̧rȩchji̧jo̧ȩ mȩnȩro̧ ea̧ pio ju̧i̧. ‘A̧ja̧ ca̧ pumȩ judiro̧ tjamo̧ri̧ eadiro̧coada, ba chia dadiro̧coada’ quëna̧rea̧mi̧ dari̧, chjadëri̧ na̧rȩchji̧jo̧ȩ.

9Jabo cüdë dibë pearä go̧ȩpe chjadürërea̧ ji̧, ma̧i̧ dari̧ oëra̧diäa̧mȩ pio ju̧i̧ chjiari pearä go̧ȩpe chjadürërea̧ ji̧, ‘jabechji̧ chjadëri̧ ta̧rëdiäpadiro̧coada’ quëna̧ jo̧rȩtamȩrȩ go̧ȩpe chjadürëremȩrequededibe ca̧ oti̧. Tjamo̧ davä. Cüdë dibë go̧ȩpe chjadüa̧ ji̧, ütarami̧ dari̧ japapea̧ oa go̧ȩpe chjadüa̧ ji̧, ‘Aja̧, napai̧rä yuro ta̧rëdiäpadiro̧coada’ quëna̧ jo̧rȩtamȩrȩ go̧ȩpe chjadüa̧ ji̧, jabechji̧ 'nö̧tadäräri̧ ta̧rëdiäpadiro̧coada, ma̧i̧ dari̧ oëra̧diäa̧mȩ pio ju̧i̧ dairäpȩ tutimi̧ dari̧ chjadüpadiro̧ju̧i̧da’ quëna̧ jo̧rȩtamȩrȩ go̧ȩpe chjadürëremȩrequededibe ca̧ oti̧. 10Ado mȩnȩro̧ ta̧rëdiärërea̧ oaiä, cüdë pearä go̧ȩpe chjadürërea̧ ma̧ȩ pio ju̧i̧ chjadëri̧ ta̧rëdiärërea̧ oaiä, jabechji̧ 'pio yoa ma̧ȩbo ta̧rëdiäpadiro̧da’ quëna̧ jo̧rȩtarequededibe ca̧ oti̧. Ado cüdë go̧ȩpe chjadürërea̧mi̧ chjadëri̧ japea̧nȩrȩ. Ado pio ju̧i̧iä chjadëri̧ a̧doa̧ oa cjiadiärëremȩde oëra̧diäa̧mȩ üi̧ pio judi. Ado jabechji̧ pio mȩnȩro̧ duridëparȩmi̧ dari̧ japareconȩ peaja̧di. Tjamo̧ davä. Duridëparȩmi̧ dari̧ japareconȩ Jechu Quiricho pio ju̧i̧ ja̧ dachoro, a̧ro̧rȩ ütëborë cja̧rȩmȩ chji̧ chiami̧ dari̧ cjo̧ro̧pea̧ oa, a̧ro̧rȩ ütëborë chjadëri̧ a̧doa̧ oa cjiapea̧ oa. 11Jabechji̧ Ichiae judi pio ibë boadärämi̧ dari̧ japarea̧ dachea oa, jabechji̧ chjaodëri̧ duridëparȩmi̧ dari̧ japatäreji̧ri̧rea̧ro̧jo̧ȩ chjai̧dëri̧ japamȩ pio ju̧i̧, ibëa̧ oti̧ pio ji̧ri̧bo, pio ibëiäpȩmo̧ chjai̧dëri̧ japea̧ji̧ri̧ pio ji̧ri̧bo. Jabechji̧ Ichiae judi ibë u̧i̧parea̧ dachea oa, a̧ro̧rȩ ji̧dë ma goadi ërecjiaji̧ri̧rȩ cjo̧ro̧chea oa, a̧ro̧rȩ chji̧ goae tjamo̧dëra̧ jo̧rȩtaji̧ri̧rȩ cjo̧ro̧chea oa, jabechji̧ ja̧di dari̧ japa matäreji̧ri̧rea̧rȩ chjaodëri̧, nae chia tjamo̧ji̧ri̧rȩ cjo̧ro̧pea̧ oa. Jabechji̧ Ichiae judi japapea̧ pio ju̧i̧ chjiari na̧e chiadëji̧ri̧rȩ cjo̧ro̧ ma ja̧didë. Daba.

Toroa quȩmȩräpȩ cjiamȩrȩ bücjüri̧ cjiarëremȩde Pablo judi Tito pio ju̧i̧ chjiari.

12,13Danȩrȩ ca̧ oti̧, cüdë pio dibë goëde jätärea̧ ji̧ jädëa̧requede, jabo ano̧ mire chjadüa̧reconȩ Tito pio ju̧i̧, cüdë pio ju̧i̧iä goë ta̧rëpea̧ oa pio dibë chjiari. Aja̧, pio dibëiäpȩ jätä yo̧a̧reconȩ, judi pio dibë nö̧ta ni̧bä chjaopea̧ oa, judi pio dibëiä ta̧rëpea̧ oa. Ado pio dibëiä chjadëri̧ ta̧rë ëte, jabechji̧ ano̧ mire jätä yo̧a̧reconȩ Toroa quȩmȩ bë ma̧ri̧räpȩ, cüdë pio ju̧i̧ dëbëdiäpea̧räpȩ. Ja̧di tara japamitë chjätä ëte, ja̧dira̧ järëremȩrequede Tito pio ju̧i̧ dëbëdiäpea̧ oa, pio dibë chjiari chjadëri̧ ta̧rëpea̧ oa. Jabo cüdë Toroa quȩmȩräpȩ go̧düdäräa̧rä Tito pio ju̧i̧ dadëa̧ oaiä, jabechji̧ Tito pio ju̧i̧ jidata nö̧ta, Quiricho pio ju̧i̧ chjiari ma̧ȩ oa a̧ra̧ano̧rëremȩrequedejȩrȩ pio idëpȩ cjo̧ro̧ji̧ri̧ pio ji̧ri̧. Ado ja̧beparea̧ ji̧ra̧ tjamo̧ oa darëremȩrequede, Ano̧mȩ Jechu pio judi yürüa̧ oaiä. Jabo cjäri̧ marequede jabo, cüdë ca̧ chji̧ goaera̧ jo̧rȩtatärea̧ ji̧, chji̧ goaera̧ jo̧rȩtarea̧ dadëa̧requede. Jabechji̧ ca̧ omȩ Tito pio ju̧i̧ chjiari bücjüri̧ cjia̧ oaiä, chji̧ goaera̧ jo̧rȩtarea̧ dadëa̧requede. Jabechji̧ cüdë tjamo̧ri̧ ea̧ üdë jabë ma̧na̧dëa̧ oaiä, pio dibë chjiari ma̧ȩ oa jabë goa ma̧na̧dëa̧ oaiä, jabechji̧ ana̧ri̧ jo̧rȩtarëremȩrequede. Ado pio ju̧i̧iä, ca̧ oti̧ pio ji̧ri̧ jea ëte, järëremȩrequede Machedonia quȩmȩräpȩ Tito pio ju̧i̧ dadäräpea̧ oa.

14Jabo cüdë Tito pio ju̧i̧ chjiari ji̧dë u̧i̧ go̧ȩpabea yaboi̧, jabechji̧ ma̧ chiadëri̧ cjiamȩrȩ jo̧rȩtatämi̧ cjiarequede Ütë tjamo̧ pio ju̧i̧iäpȩmo̧, ‘chjadë tjamo̧diibëda’ quëna̧ jo̧rȩtamȩrȩ. Tjamo̧ davä ca̧ oti̧, a̧ro̧rȩ, Jechurë chjadüa̧ pio judiro̧ ma̧ chiadëri̧ cjia tjamo̧ji̧ri̧rȩ jo̧rȩtarearo̧jo̧e judi ibë chjadëri̧ japea̧ tara. Jabechji̧ a̧ro̧rȩ Quiricho pio ju̧i̧ nö̧ta cja̧rȩmȩpe baga̧ji̧ri̧ oa, ji̧dë ma chjadëri̧ yabo ëba baämi̧ dari̧ japadiibe a̧ro̧rȩ pio ju̧i̧iä chjadëri̧ boadärärea̧mi̧ dari̧ cjo̧ro̧pea̧ oa. Tjamo̧ davä. Pio ju̧i̧ ja̧ chja̧oerä cjiaji̧ri̧ oa boadärärea̧mi̧ daräpȩ yuro yabo ëba baämi̧ dari̧ japa maeadiibe Ütë tjamo̧ judi, a̧ro̧rȩ pio ju̧i̧iä chjö̧na̧i̧därä oa boadärärea̧mi̧ dari̧, eami̧rȩ dëbëparea̧mi̧dëri̧. Ado judi pio ibëiä ana̧ri̧ ja̧bepea̧ oaiä, jabechji̧ oëra̧ti̧ oa baäde ma̧ȩ chjadëi̧ üdë, goaeri̧ pjȩa̧ cjitëmi̧ dari̧ baämȩ ma̧ȩ üdë, Quiricho pio ju̧i̧ chjiari dabarea̧ ma̧ȩ üdë. 15Jabechji̧ a̧ro̧rȩ Ütë tjamo̧ pio ju̧i̧iäpȩmo̧ goaeri̧ pjȩa̧ cjitëmi̧ dari̧ cjo̧ro̧rea̧rȩ Quiricho pio ju̧i̧iä, pio ju̧i̧ ja̧ goaeri̧ pjȩa̧rea̧ pio ju̧i̧iä. Jabo a̧ro̧rȩ ja̧di dari̧ cjo̧ro̧ji̧ri̧ oa tjaoëpai̧ dari̧ dadiro̧ibe pumȩ judiro̧ orë. Jabechji̧ aeno̧a̧ oa cjiapaji̧ri̧ pio judiro̧ tjaoëpai̧ dari̧ dadiro̧ibe. Jabechji̧ chjätärea̧ dapaji̧ri̧ pio judiro̧mi̧ dari̧ dadëdiro̧ibe. 16Jabechji̧ aeno̧a̧ cjiapaji̧ri̧ pio ji̧ri̧iä goaeri̧ pjȩa̧ cjitëmi̧ dari̧ cjiadë marea̧rȩ, jabo goae tjamo̧dëmi̧ dari̧ cjia maearea̧rȩ. Jabechji̧ pio judiro̧ goae tjamo̧dëri̧ ta̧rëdiro̧ibe ma̧ȩ a̧ra̧ano̧a̧ oaiä. Jabechji̧ a̧ro̧rȩ pio ji̧ri̧iäpȩmo̧ ni̧bä chjaoa̧ üdë bucho ana̧ aeno̧pea̧ pio ju̧i̧ chjiari a̧ra̧ano̧a̧ oaiä, goae tjamo̧dëri̧ ta̧rëdiro̧ibe. Ado pio ju̧i̧iä goae tjamo̧dëri̧ cjiami̧ dari̧ cjiarea̧rȩ pio ji̧ri̧iä. Jabo chjätärea̧ dapaji̧ri̧ pio ji̧ri̧iä, jabechji̧ goaeri̧ pjȩa̧ oa cjitëmi̧ dari̧ cjiarea̧rȩ. Jabechji̧ a̧ro̧rȩ bucho ana̧ cjo̧ro̧pea̧ pio ju̧i̧ chjiari a̧ra̧ano̧a̧ oaiä, goaeri̧ pjȩa̧ cjitëmi̧ dari̧ cjiarea̧rȩ pio ji̧ri̧iä.

Jabo danȩrȩ ca̧ oti̧, a̧ro̧rȩ, Quiricho pio ju̧i̧ ja̧ mu̧i̧tjoi̧ tjamo̧ pio judiro̧, ibëa̧ ju chiarea̧ra̧ pio ju̧ri̧ra̧ ja̧di dari̧ ja̧beparea̧mi̧dë marea̧rȩ, jabo Ütë tjamo̧ pio ju̧i̧iämo̧i̧ ja̧di dari̧ ja̧beparea̧mi̧ dade. 17Ado ja̧di tara Ütë tjamo̧ pio ju̧i̧iämo̧i̧ ja̧ȩ cjiami̧ dari̧ ja̧beparea̧rȩ. Jabechji̧ o judiro̧ ja̧bepami̧ dari̧ ja̧bepadë marea̧rȩ. Pio judiro̧ chëre boarea̧ pio ju̧i̧mo̧i̧ jo̧rȩtaji̧ri̧rȩ ja̧bepaji̧ri̧mi̧ dari̧ ja̧bepadërea̧rȩ. Jabo jabechji̧, Quiricho pio ju̧i̧ ja̧ mu̧i̧tjoi̧ji̧ri̧rȩ a̧ra̧ano̧rea̧ro̧dibe, Ütë tjamo̧ pio judi chjadüa̧ oa. 'Jabechji̧ Ütë tjamo̧ ja̧ dachoro ja̧bepaa̧ro̧da, pio judi ütarë dadiibëda’ quëna̧ jo̧rȩtaji̧ri̧rȩ chjaocjiami̧ dari̧ a̧ra̧ano̧dë marea̧ro̧dibe, jabo dibë tjamo̧ri̧ a̧dotämi̧ cjiaji̧ri̧rȩ a̧ra̧ano̧rea̧ro̧dibe, dibëa̧ chëre oa tjamo̧ri̧ jo̧rȩtadëji̧ri̧rȩ.

Currently Selected:

Cori̧tio Ma̧ȩ 2 2: Pume

Highlight

Copy

Compare