Cori̧tio Ma̧ȩ 1 7

Ma̧ȩ yürürëremȩde Pablo judi iei̧ ëbapea̧ pio ju̧i̧ chjiari.

1Ado yaba̧ bapë go̧ȩpe chjadütämi̧ cjiarequededibe mȩnȩro̧ pio coaiäpȩmo̧ go̧ȩpe chjadürërea̧ pio ju̧i̧ chjiari, üi̧ üdë ëbadëpea̧ pio ju̧i̧ chjiari. Danȩrȩ, jabechji̧ chjadëde ëbadëpea̧ ji̧. Tjamo̧ davä. Eami̧ üi̧ üdë jibëa̧ iei̧ pio ji̧ ëbadëri̧ cjiamȩrȩ cjo̧ro̧rä judi, jënȩ cjo̧ro̧a̧ nö̧ta iei̧ ëbadëmȩrȩ cjo̧ro̧tämi̧ cjiarärä judi, jabechji̧ chjadëde. Chjadëdë ma ja̧didë. 2Jabo pumȩ judiro̧ chjaodëri̧ baë ëba mo̧a̧chea oa, judiro̧ chjai̧dë oa chjaodëri̧ aja̧pachea oa, jabechji̧ oari judiro̧ nö̧tarë jibëa̧ iei̧ pio ji̧ chjadëri̧ ëbaji̧ri̧rȩ cjo̧ro̧täreji̧ri̧dirȩ. Ado ivi jini̧ro̧ nö̧tarë jibëa̧ üi̧ pio ju̧i̧ chjadëri̧ ëbaji̧ri̧rȩ cjo̧ro̧täreji̧ri̧ni̧rȩ peaja̧di.

3Ado üi̧ üdë, ado jibëa̧ iei̧ jini̧, jabechji̧ chjadëri̧ ëba mo̧a̧täreji̧ri̧dirȩ nȩmȩparea̧ decjiari̧. Jabechji̧ iei̧ pio jini̧ ëba mo̧a̧rea̧ tararä judi nȩmȩpadëtäremȩdejȩ üi̧ üdë, jabo chjadëri̧ yürütäremȩdejȩ. Ado üi̧ üdë jibëa̧ iei̧ pio ji̧ nö̧ta ëba mo̧a̧tämi̧ cjiarä judi, peaja̧di nȩmȩpadëtäreyi̧nȩjȩ jabo chjadëri̧ yürütäreyi̧nȩjȩ. Aja̧, ja̧di dari̧ japaji̧ri̧rȩ chjadëri̧ yürütäreji̧ri̧dirȩ jibëa̧ dëbëti̧ra̧ chia. 4Jabechji̧ jibëa̧ icjara ana̧ji̧ri̧ pio judiro̧dëdirȩ. Tjamo̧ davä. Iei̧ jini̧ jibëa̧ icjara ana̧yi̧ pio jini̧dënȩ jabo üi̧ pio judide. Ja̧di tara chjadëri̧ yürüpea̧ chianȩjȩ jibëa̧ icjara oa üi̧ pio ju̧i̧iäpȩmo̧ nȩmȩparea̧ decjiari̧. Ado üi̧ judi peaja̧di jibëa̧ icjara ana̧mȩ pio judidëde jabo jibëa̧ iei̧ pio jini̧nȩ. Ja̧di tara chjadëri̧ yürütäremȩdejȩ jibëa̧ icjara oa nȩmȩparea̧ decjiari̧.

5Aja̧, ja̧di dari̧ yürütäreji̧ri̧nȩrȩ mȩnȩro̧ dibëa̧ dëbëti̧ra̧ chia nȩmȩpadëji̧ri̧rȩ. Jabechji̧ ja̧di dari̧ yürütä eadidibe Ütë tjamo̧ judi. Jabo danȩrȩ, mȩnȩro̧ dibëa̧ iei̧ pio ji̧ nö̧ta cja̧rȩmȩ chji̧ chiaji̧ri̧mi̧ dari̧ jo̧rȩtaji̧ri̧rȩ Ütë tjamo̧ pio ju̧i̧iä ana̧ri̧ goë cjo̧dëtämi̧ cjiarä judi, Ütë tjamo̧ pio ju̧i̧mo̧i̧ jo̧rȩtaji̧ri̧rȩ goë cjo̧dëtämi̧ cjiarä judi, ado ëba mo̧a̧ pio ju̧i̧iä tja̧reparȩa̧ oa cjiadëri̧ cjiarä judi, jabechji̧ ëba mo̧a̧dëji̧ri̧rȩ cjo̧ro̧pai̧ danȩrȩ mȩnȩro̧ ütara̧ do pio ju̧i̧. Jabo ja̧dëa ji̧ ütara̧ do üdë chjätäa̧ duri oa, jabechji̧ ado chjereno̧ chjadëri̧ ëba mo̧a̧pea̧de. Jabechji̧ japamitë ana̧ tjamo̧ri̧ ëba mo̧a̧dëji̧ri̧rȩ cjiadiädë matäreji̧ri̧nȩrȩ. Mȩnȩro̧ Ichiae pio ju̧i̧iä u̧i̧pea̧ oa cjiadiächea oa, mȩnȩro̧ ado cja̧rȩmo̧ ja̧ iei̧ ji̧ baë ëba mo̧a̧chea oa, mȩnȩro̧ chjai̧dëri̧ japea̧ oaiä puëräpȩ choë cjatäa̧ oa cjiami̧ dari̧ cjiachea oa, jabechji̧ ado chjereno̧ chjadëri̧ yürütäreji̧ri̧nȩrȩ dibëa̧ dëbëti̧ra̧ chia jabërä, japamitë ana̧ tjamo̧ri̧ jabë chjätädëa̧rä. 6Ja̧di ta̧rëri̧ yo̧mȩrȩ go̧ȩpe chjadürequededibe ca̧ oti̧ mȩnȩro̧ dabadëchea oa, 'Aja̧, ibëa̧ jadü oa ëbapea̧ üdë jabechji̧ chjadëdida’ quëna̧ dabapea̧ oa. Jabechji̧ üi̧ üdë puëräpȩ choë cjatäa̧ oa cjiami̧ dari̧ cjiachea oa, jibëa̧ iei̧ pio ji̧ ëbatäremȩdejȩ jënȩ tara̧mi̧. Ado iei̧ pio jini̧borë puëräpȩ choë cjatäa̧ oa cjiami̧ dari̧ cjiachea oa, jibëa̧ üi̧ ëbatäreyi̧nȩjȩ peaja̧di jënȩ tara̧mi̧. Jabechji̧ ëbapea̧ üdë chjai̧dë ma ja̧didë, jabo chjadëde. Jabo eami̧ pumȩ üdë jibëa̧ jadü oa ëbadëri̧ cjiarä judi, peaja̧di jabechji̧de. 7Peaja̧di dari̧ cjiarequede cüdë. Jabechji̧ iei̧ ëbadëmȩrȩ cjo̧ro̧requede. Ado oari judiro̧ ütëborë pio cüdëmi̧ dari̧ cjiadiäa̧rä judi, ji̧dë u̧i̧ chjadëtäremȩde coaiä judiro̧ iei̧ ëbadëji̧ri̧rȩ cjo̧ro̧a̧rä judi. Jabo cjäri̧ madejȩrȩ, o ji̧ri̧iäpȩmo̧ ëbadërea̧ yürüdërëremȩdejȩrȩ Ütë tjamo̧ judi jabo ëbarea̧ yürürëremȩdejȩrȩ. Ado pio ju̧i̧iä ëbadëji̧ri̧rȩ cjo̧ro̧rea̧mi̧dëdirȩ.

8Ado yaba̧ ano̧ mire go̧ȩpe chjadütämi̧ cjiarequededibe jibëa̧ iei̧ ëbadëji̧ri̧ oari pio ji̧ri̧, jabë jibëa̧ üi̧ ëbadëji̧ri̧ ivi pio ji̧ri̧, ado oari chiarëreji̧ri̧ ivi pio ji̧ri̧. Danȩrȩ, mȩnȩro̧ pio cüdëmi̧ dari̧ cjo̧ro̧rä judi, jadü ëbadëji̧ri̧rȩ cjo̧ro̧rä judi, jabechji̧ chjadëde. 9Jabo cjäri̧ manȩrȩ, mȩnȩro̧ dibëa̧ icjara oa chjadëri̧ boadäräa̧ oa goadërä judi, jabechji̧ ji̧dë u̧i̧ chjadëtäremȩde dibëa̧ jadü pio ju̧i̧ chjadëri̧ ëbapea̧ üdë, mȩnȩro̧ ji̧dë ma ana̧ri̧ jo̧rȩtachea oa, ëba mo̧a̧pea̧ pio ju̧i̧ chjiari ana̧ri̧ cjitëchea oa.

10Ado yaba̧ ano̧ mire go̧ȩpe chjadüquëdibë dibëa̧ oari pio ji̧ri̧ ëbaji̧ri̧ pio ji̧ri̧. Jabechji̧ ano̧dëchji̧ji̧ri̧. Ca̧ea̧ ma̧na̧ri̧ jo̧rȩtamȩrȩ yo̧dëquëdibë, jabo Ano̧mȩ pio ju̧i̧ ja̧ ma̧ȩ duri maea oa yo̧quëdibë. Jabechji̧ ano̧dëchji̧ji̧ri̧. 11Jabo danȩro̧, mȩnȩro̧ dibëa̧ üi̧ pio ju̧i̧ a̧dë baärä judi, jabechji̧ ado chjereno̧ ano̧ mire ëbadëtäreji̧ri̧nȩro̧ ado cja̧rȩmo̧ üi̧ oa. China̧chjadi. Tjamo̧ davä. Ado cja̧rȩmo̧ üi̧ oa ano̧ mire ëbarea̧ jo̧rȩtadë matäreji̧ri̧nȩro̧ jabo jabechji̧, ado chjereno̧ chjadëri̧ ëba cjo̧ro̧rea̧mi̧ dari̧ jëdano̧täreji̧ri̧nȩro̧ dibëa̧ üi̧ pio ju̧i̧ nö̧ta. Ado oari pio ji̧ri̧ ano̧ mire jo̧rȩtamȩrȩ peaja̧di ta̧rëri̧ yo̧requededibe, dibëa̧ ivi pio ji̧ri̧ ëbaji̧ri̧ pio ji̧ri̧. Jabechji̧ ano̧dë machji̧jȩrȩ. Baä tänȩdë machji̧jȩrȩ.

12Ado o ji̧ri̧iäpȩmo̧bo jo̧rȩtamȩrȩ ano̧ mire go̧ȩpe chjadürequededibe yaba̧. Jabechji̧ Ano̧mȩ pio judi yo̧a̧ duri pio ju̧i̧ yo̧dërequededibe, jabo ca̧ea̧ ma̧na̧ri̧ jo̧rȩtamȩrȩ chi̧dëearequededibe ca̧ pumȩ, ibëa̧ Ano̧mȩ pio judi coa chjadëri̧ dabarea̧ yürüa̧ tara. Danȩrȩ, üi̧ üdë, quëna̧mȩ üi̧ pio judi jibëa̧ iei̧ ëbarä judi, quëna̧dëyi̧ pio ji̧ ëbarä judi, jabechji̧ ano̧dëtäremȩdejȩ. Jabechji̧ jibëa̧ iei̧ jini̧ pio jȩa nö̧ta chjadëri̧ ëba cjo̧ro̧tämi̧ cjiarä judi, pio jȩa ano̧dëri̧ cjiarä judi, jabechji̧ ano̧dëtäremȩdejȩ. 13Ado eami̧ iei̧ jini̧, quëna̧yi̧ iei̧ pio jini̧ jibëa̧ üi̧ ëbarä judi, quëna̧dëmȩ pio ju̧i̧ ëbarä judi, jabechji̧ ano̧dëtäreyi̧nȩjȩ. Tjamo̧ davä. Judi pio jȩa nö̧ta chjadëri̧ ëba cjo̧ro̧tämi̧ cjiarä judi, pio jȩa ano̧dëri̧ cjiarä judi, jabechji̧ chjadëri̧ ëbatäreyi̧nȩjȩ. 14Jabechji̧ quëna̧dëmȩ üi̧ pio judi china̧chjari̧ tutia̧ oa cjiami̧ dari̧ cjiade Ütë tjamo̧ ja̧ oa quëna̧yi̧ iei̧ pio ji̧ ëba̧ oaiä, jini̧ pio ju̧i̧ chjiari goë cjo̧dëa̧ oaiä. Ado quëna̧dëyi̧ iei̧ pio jini̧borë china̧chjari̧ tutia̧ oa cjiami̧ dari̧ cjianȩ Ütë tjamo̧ ja̧ oa quëna̧mȩ üi̧ pio ju̧i̧ ëba̧ oaiä, judi pio ji̧ chjiari goë cjo̧dëa̧ oaiä. Ado judiro̧ nö̧ria̧ pio judiro̧borë china̧chjari̧ tutia̧ oa cjiami̧ dari̧ cjiadirȩ Ütë tjamo̧ ja̧ oa, nö̧rimȩ üdë cja̧rȩmȩrȩ quëna̧mȩpea̧ oaiä. Tjamo̧ davä. Bori̧ judiro̧ jibë nö̧rimȩ pio judi quëna̧mȩrä judi, jabechji̧ pio judiro̧borë china̧chjari̧ tutia̧ oa cjiami̧ dari̧ cjiapadirȩ jäja pio ju̧i̧iä. Ado joji̧ni̧ pio jini̧ quëna̧yi̧rä judi, pio ji̧iä china̧chjari̧ tutia̧ oa cjiami̧ dari̧ cjiapadirȩ peaja̧di. Jabechji̧ chjadëri̧ cjiadiäpea̧ oa tutia̧ oa cjiami̧ dari̧ cjiadëtärea̧ ji̧, jabechji̧ chjadëri̧ cjiadiäpea̧ oa china̧chjari̧ tutia̧ oa cjiami̧ dari̧ cjiadirȩ quëna̧mȩ pio ju̧i̧iä, jënȩ pio ji̧ri̧ chjiari Ütë tjamo̧ pio ju̧i̧iä goë cjo̧dëa̧ oaiä. Jabo danȩrȩ ca̧ oti̧, nö̧riji̧ri̧ pio judiro̧ cja̧rȩmȩrȩ quëna̧mȩdërä judi, jabechji̧ Ütë tjamo̧ ja̧ oa china̧chjari̧ tutia̧ oa cjiami̧ dari̧ cjiadiädë matäreji̧ri̧dirȩ.

15Danȩrȩ, mȩnȩro̧ chjadëri̧ ëba cjo̧ro̧rea̧ dapea̧ oa ëna̧diärëremȩdidibe Ütë tjamo̧ judi, mȩnȩro̧ dibëa̧ jadü pio ji̧ nö̧ta cja̧rȩmȩ chji̧ chiami̧ dari̧ jo̧rȩtarea̧ dapea̧ oa. Jabo danȩrȩ, quëna̧dëyi̧ iei̧ pio jini̧ jibëa̧ üi̧ pio ju̧i̧ tjamo̧ri̧ ano̧tämi̧ cjiarä judi, jabechji̧ ano̧täreyi̧nȩjȩ. Ado quëna̧dëmȩ üi̧ pio judi jibëa̧ iei̧ pio ji̧ tjamo̧ri̧ ano̧tämi̧ cjiarä judi, jabechji̧ ano̧täremȩdejȩ. Jabechji̧ quëna̧dëmȩ üi̧ pio judi ja̧di dari̧ japea̧ oaiä, yura̧ oa cjiami̧ dari̧ cjiadënȩ quëna̧yi̧ iei̧ pio jini̧, jabo jare chjadüa̧ oa cjiami̧ dari̧ cjianȩ. Ado quëna̧dëyi̧ iei̧ pio jini̧ jibëa̧ jadü pio ju̧i̧ ano̧a̧ oaiä, peaja̧di yura̧ oa cjiami̧ dari̧ cjiadëde quëna̧mȩ üi̧ pio judi, jabo jare chjadüa̧ oa cjiami̧ dari̧ cjiade. 16Jabo dëdë, quëna̧dëmȩ üi̧ pio judi quëna̧mȩpe bagapai̧ dade jibëa̧ iei̧ pio ji̧iä, quëna̧yi̧ iei̧ pio ji̧iä. Ado quëna̧dëyi̧ iei̧ pio jini̧ peaja̧di quëna̧yi̧pe bagapai̧ danȩ jibëa̧ üi̧ pio ju̧i̧iä, quëna̧mȩ üi̧ pio ju̧i̧iä. Ado pio ju̧i̧iä ji̧dë u̧i̧ chjadëde ano̧dëpea̧ üdë.

Jabechji̧ Ütë tjamo̧ judi dibë ena̧diäa̧mi̧ cjo̧ro̧chji̧vä cjiadiämi̧ tarari̧ jo̧rȩtaji̧ri̧rȩ.

17Ano̧mȩ judi dibë pearä ëna̧diäa̧rä, mȩnȩro̧ quëna̧pea̧ oa pearä ëna̧diäa̧rä, jabechji̧ mȩnȩro̧ jo̧rȩta̧ chja̧oerä cjo̧ro̧ji̧ri̧ oa ëna̧diärëremȩdidibe, mȩnȩro̧ cjo̧ro̧a̧ chja̧oerä cjo̧ro̧ji̧ri̧ oa. Ado jabechji̧, Ano̧mȩ judi dibë ena̧diärërea̧mi̧ cjo̧ro̧chji̧vä cjiadiämi̧ tarari̧ jo̧rȩtaji̧ri̧rȩ. Peaja̧di ta̧rëri̧ yo̧ marequedejȩrȩ oëra̧ti̧ oa a̧dopaji̧ri̧ pio ji̧ri̧iäpȩmo̧. 18Jabo danȩrȩ ca̧ oti̧, ‘Pablo judi tjana̧ yo̧cjivadiibë’ quëna̧chea oa, jabechji̧ na̧rȩrea̧ ma̧ȩmi̧ dara̧ pio ju̧ri̧ra̧ chjadëri̧ ni̧bätämi̧ cjiarequededibe. Danȩrȩ, budoa̧ oa cjiaji̧ri̧ oa ëna̧diäa̧ oa cjiaji̧ri̧ pio judiro̧, jabechji̧ cjiadiämi̧ tarari̧ jo̧rȩtatäreji̧ri̧dirȩ, ‘budoa̧ oa cjiadëmȩmi̧ dari̧ ano̧ mire cjiadiäpea̧ chiaquëda’ quëna̧rea̧ decjiari̧. Ado budoa̧ oa cjiadëji̧ri̧ oa ëna̧diäa̧ oa cjo̧ro̧ji̧ri̧ pio judiro̧, jabechji̧ cjiadiämi̧ tarari̧ jo̧rȩtatäreji̧ri̧dirȩ peaja̧di, ‘budoa̧ oa cjiapea̧ chiaquëda’ quëna̧rea̧ decjiari̧. 19Jabechji̧ budoa̧ üdë ba chiadëde. Ado budodëa̧ üdë, peaja̧di ba chiadëde. Jabo Ütë tjamo̧ judi yo̧a̧ pio ju̧i̧ ta̧rëdiäpea̧ üdë, dëdë, ba chia tjamo̧de.

20Ado pio ju̧i̧iä yo̧requededibe ado, jabechji̧ Ano̧mȩ judi dibë ëna̧diärërea̧mi̧ cjo̧ro̧chji̧vä cjiadiämi̧ tarari̧ jo̧rȩtaji̧ri̧rȩ. 21Ado pio ju̧i̧iä mȩnȩro̧ pumȩrȩ gatëa̧ mu̧i̧tjoi̧ji̧ri̧ oa ëna̧diäa̧ oa cjia̧rä judi, jabechji̧ ana̧ri̧ jo̧rȩtadëtäreji̧ri̧nȩrȩ mȩnȩro̧ gatëa̧ mu̧i̧tjoi̧ji̧ri̧rȩ cjo̧ro̧pea̧ pio ju̧i̧ chjiari. Jabo dëdë, mȩnȩro̧ mu̧i̧tjoi̧dëpe bagarea̧ darä judi, goë jaechji̧vä. Mu̧i̧tjoi̧dëpe bagarea̧mi̧ dari̧ japachji̧vä ma̧ chiadëri̧ cjia tjamo̧pe jäji̧ri̧rȩ. 22Jabo danȩrȩ, dibë gatëa̧mȩ judi dibë baä tänȩrea̧ yürüdëräbo, jabechji̧ coëma cjiari̧ jo̧rȩtachji̧vä ca̧ oti̧. Jabechji̧ a̧dëräpȩ cjiamȩ Ano̧mȩ pio judi ëna̧diäa̧ oa cjiaji̧ri̧ mu̧i̧tjoi̧ pio judiro̧, jabechji̧ jare chjadüa̧ oa cjiaji̧ri̧mi̧ dari̧ cjo̧ro̧dirȩ Ano̧mȩ pio ju̧i̧iä. Tjamo̧ davä. Jabechji̧ chjai̧dë ja̧ chja̧oerä cjo̧ro̧rërea̧ ji̧, chjai̧dërë tabüa̧ oa cjiami̧ dari̧ cjo̧ro̧rërea̧ ji̧, jare chjadüa̧ oa cjiami̧ dari̧ cjo̧ro̧ji̧ri̧pea̧dirȩ yaba̧ Quiricho pio ju̧i̧iä. Ado pio ju̧i̧iä mȩnȩro̧ pumȩrȩ gatëa̧ oa mu̧i̧tjoi̧ji̧ri̧rȩ cjo̧ro̧ji̧ri̧borë, jabechji̧ tjamo̧ri̧ jare chjadüa̧ oa cjiami̧ dari̧ cjo̧ro̧nȩrȩ. Ado danȩrȩ, gatëa̧ mu̧i̧tjoi̧dëreji̧ri̧ oa ëna̧diäa̧ oa cjiaji̧ri̧ pio judiro̧, jabechji̧ gatëa̧ mu̧i̧tjoi̧dëji̧ri̧borë, jabechji̧ Quiricho pio ju̧i̧ ja̧ mu̧i̧tjoi̧pe baga̧dirȩ jënȩro̧ pio ju̧i̧ quëna̧ oaiä. 23Ado pio ju̧i̧ ja̧ mu̧i̧tjoi̧pe bagapea̧ oa a̧dë chjäte ba chiara̧ pio ju̧ri̧ra̧ gatëa̧ oa cjiarëreji̧ri̧nȩrȩ. Jabechji̧ Jechu pio ju̧i̧ ja̧ goera̧ pio ju̧ri̧ra̧ gatëa̧ oa cjiarëreji̧ri̧nȩrȩ ca̧ oti̧. Ado pio ju̧i̧iä jabechji̧ pio judide dibëa̧ Ano̧mȩ judi. Tjamo̧ davä. Dibë gatëa̧mȩ pio judide. Pio ju̧i̧ ja̧ mu̧i̧tjoi̧ tjamo̧pea̧nȩrȩ ca̧ oti̧. Ado pio ju̧i̧iä yo̧requededibe. Danȩrȩ, dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧ ja̧ chja̧oerä cjo̧ro̧dë matäreji̧ri̧nȩrȩ, jabo dibëa̧ Ano̧mȩ Jechu pio ju̧i̧ ja̧ chja̧oerämo̧ cjo̧ro̧täreji̧ri̧nȩrȩ. 24Ado pio ju̧i̧iä yo̧requededibe ado chjereno̧ ca̧ oti̧. Jabechji̧ ibëa̧ Ano̧mȩ pio judi dibë pearä ëna̧diärërea̧mi̧ cjo̧ro̧chji̧vä, cjiadiämi̧ tarari̧ jo̧rȩtaji̧ri̧rȩ. Jabechji̧ mȩnȩro̧ pearä quëna̧rërea̧ ji̧ dami̧ti̧ oa goadëji̧ri̧rȩ cjo̧ro̧a̧rä judi, mȩnȩro̧ gatëa̧ mu̧i̧tjoi̧ji̧ri̧rȩ cjo̧ro̧a̧rä judi, mȩnȩro̧ budoa̧ oa cjiaji̧ri̧rȩ cjo̧ro̧a̧rä judi, jabechji̧ cjiadiämi̧ tarari̧ jo̧rȩtariä cjo̧ro̧chji̧vä, Ano̧mȩ pio judi dibë ëna̧diärërea̧mi̧. Jabechji̧ dibëa̧ chirirä cjo̧ro̧rërea̧mi̧, Ano̧mȩ pio judi dibë ëna̧diärërea̧mi̧ cjo̧ro̧chji̧vä cjiadiämi̧ tarari̧ jo̧rȩtaji̧ri̧rȩ.

Ma̧ȩ yürürëremȩde jibëa̧ iei̧ ëbaji̧ri̧ pio ji̧ri̧ chjiari, jibëa̧ iei̧ ëbadëji̧ri̧ pio ji̧ri̧ chjiaribo.

25Ado yaba̧ chi̧dëeatämi̧ cjiarequededibe dibëa̧ jadü jabë ëbadëji̧ri̧ pio ji̧ri̧, dibëa̧ jadü ëbarëreji̧ri̧ pio ji̧ri̧bo. Ibëa̧ Ano̧mȩ pio judi pio yoa ma̧ȩ oa yo̧dëa̧dique, jabo jabechji̧ pio judi coa tjamo̧ yo̧rea̧ yürüa̧ oaiä, pio coaiäpȩmo̧ cjäri̧ri̧ cjiamȩrȩ urëdi oa jo̧rȩtarea̧ yürüa̧ oaiä, jabechji̧ dibë tjamo̧ri̧ a̧dorea̧ chiamȩ ma̧ȩra̧ pio ju̧ri̧ra̧ chi̧dëeatämi̧ cjiarequededibe. 26Danȩrȩ ca̧ oti̧, ji̧dë u̧i̧ chjadëtäremȩde mȩnȩro̧ dibëa̧ jadü oa ëbadëpea̧ ji̧. Jabechji̧ a̧ro̧rȩ pio yoa japamitërä ma̧i̧ da chjai̧dë oa chjätäji̧ri̧rȩ cjo̧ro̧a̧ oaiä chi̧dëeatämi̧ cjiarequededibe dibëa̧ jadü jabë ëbadëpea̧ pio ju̧i̧ chjiari, ado dibëa̧ jadü ëbarërea̧ pio ju̧i̧ chjiari. Jabechji̧ mȩnȩro̧ dibëa̧ iei̧ pio ji̧ chjiari bücjüri̧ cjiaji̧ri̧rȩ jo̧rȩtachea oa, dibëa̧ bori̧ pio ji̧ri̧ chjiari bücjüri̧ cjiaji̧ri̧rȩ jo̧rȩtachea oa, ado ivi jini̧ro̧ jibëa̧ üi̧ pio ju̧i̧ chjiari bücjüri̧ cjiaji̧ri̧rȩ jo̧rȩtachea oa, jabechji̧ ji̧dë u̧i̧ chjadëtäremȩde mȩnȩro̧ dibëa̧ jadü oa ëbadëpea̧ ji̧. 27Jabo eami̧ pumȩ üdë jibëa̧ jadü i̧a ëba̧ oa cjiarä judi, jibëa̧ jadü i̧a yura̧ oa cjiami̧ dari̧ cjiarä judi, jabechji̧ chjadëdë ma ja̧didë. Chjadëde. Ado chjadë tara, jabechji̧ ano̧dëchji̧vä dibëa̧ jadü pio ji̧. Jabo mȩnȩro̧ jabë dibëa̧ jadü i̧a ëbadërä judi, jabechji̧ ‘ëbarea̧ jo̧rȩtadëtäreji̧ri̧diro̧da’ quëna̧ jo̧rȩtamȩrȩ chi̧dëearequededibe jabërä. 28Jabo mȩnȩro̧ dibëa̧ jadü i̧a ëbatämi̧ cjiarä judi, jabechji̧ chjai̧dëri̧ japadënȩrȩ. Jabechji̧ jibëa̧ jadü i̧a ëbamȩ judi chjai̧dëri̧ japa ma ja̧didë. Ado ivi pëi̧ chja pio jini̧ro̧, nö̧riji̧ri̧pea̧ji̧ri̧ pio jini̧ro̧ ëbatämi̧ cjiarä judi, peaja̧di chjai̧dëri̧ japadëni̧rȩ. Jabo danȩrȩ, mȩnȩro̧ dabadëchea oa, chjadëri̧ daba tänȩtämi̧ cjiarequededibe jabërä. Jabechji̧ a̧ro̧rȩ pio yoa japamitërä ma̧i̧ da chjai̧dë oa chjätäji̧ri̧rȩ cjo̧ro̧a̧ oaiä, o judiro̧ chjai̧dëri̧ japapai̧ dadiro̧ibe pio ibë, quëna̧ji̧ri̧ pio ji̧ri̧. Ja̧bo tänȩpai̧ dadiro̧ibe ji̧dëri̧. Ado ja̧di dari̧ chjätäpai̧ da oaiä, jabechji̧ goae tjamo̧dëpade ëbaji̧ri̧ pio ji̧ri̧iä. Jabechji̧ ji̧dë u̧i̧ gito ana̧ri̧ jo̧rȩtapai̧ dadirȩ chjai̧dë oa chjätäa̧ oaiä ji̧bëa̧ jadü pio ji̧ri̧iä. Jabechji̧ jibëa̧ jadü i̧a ëbadëji̧ri̧ pio judiro̧ jo̧rȩtami̧ dari̧ jo̧rȩtadëpanȩrȩ, jabo ji̧dë u̧i̧ gito ana̧ri̧ jo̧rȩtapai̧ danȩrȩ dibëa̧ jadü pio ji̧ri̧iä. Ado mȩnȩro̧ dibëa̧ jadü oaiä goaedë oa chjätächea oa, jabechji̧ jäbërä chi̧dëearequededibe mȩnȩro̧ ëbachea oa, mȩnȩro̧ gito ana̧ri̧ jo̧rȩtachea oa. 29Danȩrȩ ca̧ oti̧, a̧ro̧rȩ ibëa̧ Ano̧mȩ ja̧ oa pio yoa chirirä ja̧bepapea̧ japamitë üdë chjaodëri̧ goarijädiibe. Ado pio ju̧i̧iä jibëa̧ jadü oa ëbaji̧ri̧ pio judiro̧, jabechji̧ ëbadëji̧ri̧ pio judiro̧mi̧ dari̧ jo̧rȩtatäreji̧ri̧dirȩ, Ano̧mȩ tjamo̧ pio ju̧i̧ ja̧ oa ana̧ tjamo̧ri̧ ja̧bepapea̧ oa. 30Tjamo̧ davä ca̧ oti̧. A̧ro̧rȩ ibëa̧ Ano̧mȩ ja̧ oa pio yoa chirirä ja̧bepapea̧ japamitë üdë chjaodëri̧ goarijäpa tara, jabechji̧ ji̧dë ma ja̧bepatäreji̧ri̧rea̧rȩ pio ju̧i̧ ja̧ oa, a̧ro̧rȩ chjai̧dë oa chjätäa̧ pio ju̧i̧ chjiari gito ana̧ri̧ jo̧rȩtaräbo. Tjamo̧ davä. A̧ro̧rȩ eami̧ chjai̧dë oa chjätäräbo, jabechji̧ pio ju̧i̧iä tja̧reparȩa̧ oa cjiadë matäreji̧ri̧rea̧rȩ jabo ji̧dë ma ja̧bepatäreji̧ri̧rea̧rȩ ibëa̧ Ano̧mȩ ja̧ oa. Ado peaja̧dimi̧ dari̧ jo̧rȩtatäreji̧ri̧rea̧rȩ a̧ro̧rȩ a̧dë chjäte chjadë oa chjätäräbo. Tjamo̧ davä. A̧ro̧rȩ a̧dë chjäte chjadë oa chjätärä judi, a̧ro̧rȩ eami̧ oa chjätäa̧ oaiä a̧dë chjäte ma̧ chiadëri̧ cjiape bagarä judi, jabechji̧ pio ju̧i̧iäbo tja̧reparȩa̧ oa cjiadë matäreji̧ri̧rea̧rȩ, jabo ji̧dë ma ja̧bepatäreji̧ri̧rea̧rȩ ibëa̧ Ano̧mȩ ja̧ oa. Ado a̧ro̧rȩ eami̧ oa pea gatëa̧ oa goarä judi, peaja̧di oëra̧diämi̧ dari̧ jo̧rȩtadëtäreji̧ri̧rea̧rȩ jabo jabechji̧, goadëji̧ri̧mi̧ dari̧ jo̧rȩtatäreji̧ri̧rea̧rȩ ji̧dëri̧, ba chia tjamo̧mȩ pio ju̧i̧ tjamo̧ri̧ ja̧bepaji̧ri̧rȩ.

31Jabechji̧ a̧ro̧rȩ, quëna̧ji̧ri̧ pio judiro̧ pio yoa chirirä ja̧ pio ju̧i̧iä tabüa̧ oa cjiami̧ dari̧ cjo̧ro̧dë matäreji̧ri̧rea̧rȩ. A̧ro̧rȩ goa̧ pio ju̧i̧iä, a̧ro̧rȩ eami̧ oa chjätäa̧ pio ju̧i̧iä tabüa̧ oa cjiami̧ dari̧ cjo̧ro̧dë matäreji̧ri̧rea̧rȩ jabo jabechji̧, ji̧dë ma järitäreji̧ri̧rea̧rȩ ibëa̧ Ano̧mȩ ja̧ ma̧ȩrä cjo̧ro̧pea̧ oa. Jabechji̧ pio yoa chiri üdë japamitë boi̧chji̧ chjätä ëte, yuropapade. Tjamo̧ davä, yuropapade. Ado pio yoa chirirä ja̧bo yuropapade. Ado pio ju̧i̧iä järiji̧ri̧rȩ ja̧bepatäreji̧ri̧rea̧rȩ ibëa̧ Ano̧mȩ ja̧ oa.

32Jabechji̧ mȩnȩro̧ Ütë tjamo̧ pio ju̧i̧ ja̧ oa pio yoa chirirä ja̧bepea̧ nö̧ta, eami̧ üdë pio dibë tja̧reparȩtä ea tjamo̧dërequededibe. Ado iei̧ ëbadëmȩ pio judi, jabechji̧ bücjüri̧ cjiadëde jibëa̧ iei̧ pio ji̧ chjiari, jabo Ütë tjamo̧ ja̧ oa chjadëri̧ ja̧bepapea̧ pio ju̧i̧mo̧i̧ jo̧rȩtade. Jabechji̧ jibëa̧ iei̧ pio ji̧iä oëra̧diädëmȩde jabo jibëa̧ Ano̧mȩ pio ju̧i̧mo̧i̧ jo̧rȩtamȩrȩ cjo̧ro̧de, pio ju̧i̧mo̧i̧ ma̧ chiadëri̧ cjiaparȩtämi̧ cjiamȩrȩ. 33Jabo iei̧ ëbamȩ pio judi, cjäri̧ made, jibëa̧ iei̧ jini̧ pio jȩaiäpȩmo̧ ma̧ chiadëri̧ cjiari̧ dapea̧ oa, jabechji̧ chjadëri̧ ja̧bepapea̧ chiade pio ji̧ chjiari. Jabechji̧ pio yoa chirirä ja̧ oa jo̧rȩtamȩrȩ cjo̧ro̧pea̧ chiade, jibëa̧ iei̧ pio ji̧ chjiari bücjüri̧ cjia tjamo̧mȩrȩ. 34Ado pio ju̧i̧iä chjara chia jo̧rȩtade cja̧rȩmȩ jo̧rȩtarea̧ maeara̧ jo̧rȩtatärea̧ ji̧. Ado peaja̧dide ivi pio ji̧ri̧iä. Danȩrȩ, üi̧ ëbadëyi̧ pio jini̧, ado üi̧ chiarëreyi̧ pio jini̧ peaja̧di tjaoëpai̧ dari̧ jo̧rȩtani̧rȩ. Jabechji̧ üi̧ ëbayi̧ pio jini̧mi̧ dari̧ jo̧rȩtadënirȩ jabo ana̧ri̧ jo̧rȩtani̧rȩ Ütë tjamo̧ pio ju̧i̧iäpȩmo̧ ma̧ chiadëri̧ cjiaparȩpea̧ oa. Jabechji̧ jibëa̧ chji̧ üdë, jibëa̧ icjara üdë china̧chjari̧ tutia̧ oa cjiade jibëa̧ Ano̧mȩ pio ju̧i̧ ja̧ maea oa. Jabo üi̧ ëbayi̧ pio jini̧, cjäri̧ manȩ, pio yoa chirirä ja̧ pio ju̧i̧ chjiari jo̧rȩtapea̧ chianȩ jibëa̧ üi̧ pio ju̧i̧ ma̧ chiadëri̧ cjiaparȩpea̧ oa. 35Danȩrȩ ca̧ oti̧, dibë tjamo̧ri̧ a̧dotämi̧ cjiamȩrȩ ni̧bä chjaorequededibe, dibë tja̧reparȩdëri̧ cjiamȩrȩ. Jabechji̧ coëma cjiari̧ japatä earequededibe mȩnȩro̧ ibëa̧ Ano̧mȩ pio ju̧i̧ ja̧ oa chji̧ chjara chia jo̧rȩtadëji̧ri̧rȩ ja̧bepapea̧ oa.

36Danȩrȩ, eami̧ pumȩ üdë jibëa̧ iei̧payi̧ pio ji̧ dae cji̧däa̧ oa goarä judi, nö̧riji̧ri̧ pio ji̧ri̧iä chjadëri̧ ta̧rë ëte dae cji̧däa̧ oa goarä judi, jabo jabë ëbadëa̧rä ëba mo̧a̧pea̧ pio ji̧ ana̧ri̧ jo̧rȩtarä judi, jibëa̧ icjarari pio judiri cjitëmȩ jo̧rȩtarea̧ üdë ana̧ri̧ cjitërä judi, jibëa̧ icjara üdë chjaodëri̧ boadärämi̧ dari̧ japarä judi, cjäri̧ made, jënȩ dae cji̧däa̧ pio ji̧ chjaodëri̧ ëbatäremȩdejȩ jidatarea̧ decjiari̧. Jabechji̧ judi ja̧di dari̧ japarä judi chjai̧dëri̧ japadëde. 37Jabo ado cja̧rȩmo̧ pumȩ üdë jibëa̧ iei̧payi̧ pio ji̧ ëbadëri̧ cjiarä judi, jënȩ dae cji̧däa̧ oa goaräbo ëbadëri̧ cjiarä judi, ado jibëa̧ icjara oa chjadëri̧ boadäräa̧ oa goarä judi, jibëa̧ icjarari pio judiri cjitëmȩ jo̧rȩtarea̧ oa chjadëri̧ boadäräa̧ oa goarä judi, jabechji̧ chjadëri̧ japade judi jibëa̧ iei̧täreyi̧ pio ji̧ ëbadëa̧ oaiä. 38Ado pio ju̧i̧iä yo̧requededibe ca̧ oti̧. Pumȩ üdë, jënȩ dae cji̧däa̧ oa goa̧ pio ji̧ ëbarä judi, jabechji̧ chjadëri̧ japade. Jabo iei̧ ëbadëri̧ cjiamȩrȩ cjo̧ro̧mȩ pio judi, jabechji̧ ji̧dë u̧i̧ chjadëri̧ japade. Tjamo̧ davä. Jibëa̧ iei̧täreyi̧ pio ji̧ ëbadëräbo jibëa̧ icjarari pio judiri cjitëmȩ jo̧rȩtarea̧ oa chjadëri̧ boadäräa̧ oa goarä judi, jabechji̧ ji̧dë u̧i̧ chjadëri̧ japade.

39Ado iei̧ jini̧, jibëa̧ üi̧ oa ëbayi̧ pio jini̧, jabechji̧ yura̧ oa cjiami̧ dari̧ cjianȩ jibëa̧ üi̧ üdë cjo̧ro̧a̧ nö̧ta. Jabo jibëa̧ üi̧ judi a̧dë ja̧borä judi, jabechji̧ jare chjadüa̧ cjiami̧ dari̧ cjianȩ ado cja̧rȩmo̧ üi̧ oa ano̧ mire ëbarea̧mi̧ dari̧. Tjamo̧ davä. Jibëa̧ üi̧ judi ja̧borä judi, jabechji̧ ado cja̧rȩmo̧ oa ano̧ mire ëbarea̧mi̧ dari̧ jare chjadüa̧ oa cjiami̧ dari̧ cjianȩ, Ano̧mȩ ja̧ ma̧ȩrä cjo̧ro̧mȩ pio ju̧i̧mo̧ ano̧ mire ëbarea̧mi̧ dari̧. 40Jabo danȩrȩ, jini̧ ado chjereno̧ ëbadërä judi, jini̧ ado cja̧rȩmo̧ üi̧ oa ado chjereno̧ ëbadërä judi, jabechji̧ ji̧dë u̧i̧ goaeri̧ cjo̧ro̧panȩ. Aja̧ ca̧ oti̧, ja̧di dari̧ jo̧rȩtamȩrȩ chi̧dëearequededibe, ado pio cüdëborë pio yoa ma̧ȩ oa chjuari̧ quëna̧reconȩ. Jabechji̧ Ütë tjamo̧ ja̧ Tjo pio judi ca̧ chji̧ oa tatami̧ darä jo̧rȩta tänȩa̧ oaiä, jabechji̧ pio jiro ma̧ȩra̧ chi̧dëearequededibe ca̧ oti̧, cüdë chjuari̧ quëna̧ ma̧ȩra̧.

Currently Selected:

Cori̧tio Ma̧ȩ 1 7: Pume

Highlight

Copy

Compare