Cori̧tio Ma̧ȩ 1 6

Quëna̧ji̧ri̧ judiro̧ quëna̧dëji̧ri̧ pio ji̧ri̧iä chi̧dëeatä cjo̧dëdëpea̧de

1Ado danȩrȩ ca̧ oti̧, pio yoa ma̧ȩbo yürütämi̧ cjiarequededibe dibë chjadëri̧ a̧dopea̧ oa. Danȩrȩ, ¿tjana̧ ju̧i̧iä oëra̧ japanȩrȩ? Pio ju̧i̧ chjiari iëno̧ë ta̧rëtämi̧ cjiarequededibe. Danȩrȩ, mȩnȩro̧ dibëa̧ omȩ pio ju̧i̧ goëdëri̧ cjiarä judi, quëna̧mȩ pio ju̧i̧ ba dëbë goëdëri̧ cjiarä judi, ¿tjana̧ ju̧i̧iä chjaodëri̧ jänȩrȩ quëna̧dëji̧ri̧ ji̧ri̧iäpȩ pio judiro̧ dibë ütarë ta̧rëpea̧ oa? ¿Tjana̧ ju̧i̧iä idëri̧ cjiadënȩrȩ pio ji̧ri̧iäpȩ jädiäpea̧ ji̧ pio judiro̧ dibë tuti chi̧dëeapea̧ oa? Cjäri̧ manȩrȩ ca̧ oti̧, a̧dë chjäte ma̧i̧ dari̧ japanȩrȩ. Pio ju̧ri̧pȩ jädiärea̧mi̧dënȩrȩ. Jabechji̧ Ichiae ja̧ pumȩ pio judiro̧ Ütë tjamo̧ ja̧ pumȩ pio ji̧ri̧ ütararea̧mi̧dëdirȩ. Danȩrȩ, mȩnȩro̧ ba dëbë goëdëri̧ cjiarä judi, quëna̧ji̧ri̧ pio ji̧ri̧iäpȩmo̧ ma ano̧ mire jädiätäreji̧ri̧nȩrȩ pio judiro̧ ano̧ mire tuti chi̧dëeapea̧ oa, mȩnȩro̧ ado chjereno̧ ope ni̧bärea̧ dapea̧ oa. Tjamo̧ davä. Ütë tjamo̧ ja̧ oa tutia̧ oa cjiaji̧ri̧ pumȩ pio ji̧ri̧iämo̧i̧ ano̧ mire ta̧rëtäreji̧ri̧nȩrȩ. 2Danȩrȩ, Quiricho judi a̧dëri pio judiri ado ma̧na̧rä, jabechji̧ pio a̧ro̧rȩ, Ütë tjamo̧ ja̧ oa china̧chjari̧ tutia̧ oa cjiaji̧ri̧ pumȩ pio judiro̧ Jechu pio ju̧i̧ nö̧ta tjamo̧ yo̧ji̧ri̧rȩ cjo̧ro̧parea̧rȩ pio yoa chirirä. Ado Quiricho pio judi tänȩa̧ oaiä, jabechji̧ pio a̧ro̧rȩ ütarë yo̧parea̧ro̧jȩrȩ chiri oëra̧ti̧ oa cjo̧ro̧ji̧ri̧ pumȩ pio ji̧ri̧, pio ji̧ri̧ bape chjaopea̧ pio ju̧i̧ chjiari. Tjamo̧ davä. Pio a̧ro̧rȩ pumȩ pio judiro̧ bape chjaoa̧ oa cjiapea̧ oa, mö̧reda̧rea̧ra̧ ütarami̧ dari̧ ütarë yo̧parea̧ro̧jȩrȩ. Ado danȩrȩ ca̧ oti̧, iëno̧ë ta̧rërequededibe. A̧ro̧rȩ cjiadiäa̧ japamitërä pumȩ no̧i̧dë tjamo̧ oa ja̧di dari̧ ütarë yo̧parä judi, ¿dibëa̧ oti̧ pio ji̧ri̧ tuti chi̧dëeapea̧ ji̧ nö̧tadënȩrȩ? Pio yaba̧mȩ oa dibëa̧ oti̧ yo̧a̧ri̧mo̧i̧ oa, jibëa̧ dëbëti̧ra̧ chia goëdëri̧ cjiaji̧ri̧ pio ji̧ri̧ chjadëri̧ a̧dopea̧ ji̧ ¿nö̧tadënȩrȩ? Dëdë ca̧ oti̧, nö̧tanȩrȩ. 3Danȩrȩ, a̧dëräpȩ cjiarëreji̧ri̧ mu̧i̧tjoi̧ pio ji̧ri̧bo mö̧rȩda̧mi̧ dari̧ ütarë yo̧parea̧ro̧jȩrȩ, icjara decjiaji̧ri̧ pio ji̧ri̧. Tjamo̧ davä, Ütërë ütara̧ doro, pio ji̧ri̧bo ütarë yo̧parea̧ro̧jȩrȩ pio ji̧ri̧ bape chjaopea̧ pio ju̧i̧ chjiari. Ja̧di tara ado iëno̧ë ta̧rërequededibe ca̧ oti̧. Danȩrȩ, a̧ro̧rȩ pio ji̧ri̧ ütarë yo̧parä judi, a̧dëräpȩ cjiarëreji̧ri̧ mu̧i̧tjoi̧ pio ji̧ri̧bo ütarë yo̧parä judi, ¿ibëa̧ oti̧ pio ji̧ri̧ chi̧dëeapea̧ ji̧, ¿nö̧tadënȩrȩ mȩnȩro̧? A̧ro̧rȩ a̧dëräpȩ cjiarëreji̧ri̧ mu̧i̧tjoi̧ pio ji̧ri̧bo ütarë yo̧parä judi, ¿ibëa̧ oti̧ pio ji̧ri̧ pio yoa chiri oa cjo̧ro̧pea̧ pio ju̧i̧ chjiari chi̧dëeapea̧ ji̧, ¿nö̧tadënȩrȩ mȩnȩro̧? 4Dëdë ca̧ oti̧, nö̧tanȩrȩ. Jabo danȩrȩ, mȩnȩro̧ pio ji̧ri̧ a̧dopea̧ ji̧ tjamo̧ri̧ nö̧tarä judi, pio ji̧ri̧ chjadëri̧ chi̧dëearea̧ chiarä judi, ¿tjana̧ ju̧i̧iä jädiärenȩrȩ quëna̧dëji̧ri̧ pio ji̧ri̧iä a̧dorea̧ dapea̧ oa, pio judiro̧ dibë ütarë ta̧rë ëte tuti chi̧dëeapea̧ oa? Quëna̧ji̧ri̧ judiro̧ jibëa̧ dëbëti̧ra̧ chia goëdëri̧ cjiapea̧rä judi, ¿pio mȩnȩro̧ tuti chi̧dëearea̧ chiadënȩrȩ? ¿Tjana̧ ju̧i̧iä jädiärenȩrȩ quëna̧dëji̧ri̧ pio ji̧ri̧iäpȩ, Quiricho ja̧ a̧doparea̧ oa ba chia dadëji̧ri̧ pio ji̧ri̧iäpȩ? 5Idëri̧ cjia tjamo̧täreji̧ri̧nȩrȩ davä mȩnȩro̧ ja̧di dari̧ japea̧ pio ju̧i̧iä. Jabechji̧ chjere jo̧rȩtachji̧vä. Jabechji̧ quëna̧dëji̧ri̧ pio ji̧ri̧iäpȩ jädiärërea̧ ji̧, jabechji̧ quëna̧mȩ pio ju̧i̧ ano̧ mire tuti chi̧dëea tänȩtäreji̧ri̧renȩro̧jo̧ȩ. Danȩrȩ, dibëa̧ chjarerämȩ judi, urëdi oa jo̧rȩtamȩ pio üdë, dibë chjadëri̧ tuti chi̧dëeapamȩ üdë ¿cjo̧ro̧dëde? Dëdë, cjo̧ro̧pamȩ jirode. Ado pio ju̧i̧ ano̧ mire mitëtäreji̧ri̧renȩro̧jo̧ȩ. Pio ju̧i̧iäpȩ ano̧ mire jätäreji̧ri̧renȩrȩ. Tjamo̧ davä. Jibëa̧ dëbëti̧ra̧ chia goëdëri̧ cjiaji̧ri̧ pio ji̧ri̧ chjadëri̧ chi̧dëeapea̧ oa, pio ji̧ri̧ ütarë ta̧rë ëte chjadëri̧ tuti chi̧dëeapea̧ oa, jabechji̧ pio ju̧i̧iäpȩ ano̧ mire jätäreji̧ri̧renȩro̧jo̧ȩ. 6Jaboti̧ri̧ japanȩrȩ jabo. ‘Ca̧ omȩ judi chjai̧dëri̧ japea̧dicoada’ quëna̧ jo̧rȩta̧ oaiä, chjaodëri̧ jädiänȩrȩ quëna̧dëji̧ri̧ pio ji̧ri̧iäpȩ. Ado ja̧dëa ji̧ pio ji̧ri̧iäpȩ go̧düdäräa̧rä, cjäri̧ manȩrȩ, pio ji̧ri̧ ja̧ dëbëräpȩ cjiaji̧ri̧rȩ dibëa̧ omȩ pio ju̧i̧iäpȩmo̧ aechide yo̧renȩro̧jo̧ȩ, pio judiro̧ ütarë ta̧rë ëte tuti chi̧dëeapea̧ oa, pio judiro̧ tuti ütarë yo̧pea̧ oa. A̧ni̧ cjäri̧ chja.

7Jabo cjäri̧ manȩrȩ ca̧ oti̧, mȩnȩro̧ ma̧i̧ dari̧ japea̧ oaiä, chjaodëri̧ boadäräa̧ oa cjiami̧ dari̧ cjianȩrȩ. Puëräpȩ choë cjätaa̧ oa cjiami̧ dari̧ cjianȩrȩ. Ado pio ju̧i̧iä yo̧requededibe. Danȩrȩ, dibëa̧ omȩ üdë pio dibëiäpȩmo̧ chjai̧dëri̧ japarä judi, pio dibëiä eami̧ chjai̧dë oa japarä judi, chja jabechji̧ ma̧ chjua jo̧rȩtachji̧vä. Ba dëbë japadë machji̧vä jabo chja jabechji̧, pio dibëiäpȩmo̧ chjai̧dëri̧ japea̧räbo, cjiadiämi̧ dari̧ jo̧rȩtachji̧vä. Ja̧bechji̧ ja̧di dari̧ japea̧ üdë ji̧dë u̧i̧ chjadëde quëna̧dëji̧ri̧ pio ji̧ri̧iäpȩ jäa̧ pio ju̧i̧iä, Ütë tjamo̧ pio ju̧i̧ ba chiadëparȩa̧ pio ju̧i̧iä. 8Jabo cjäri̧ manȩrȩ ca̧ oti̧, mȩnȩro̧ ja̧di dari̧ japatärea̧ ji̧, mȩnȩro̧ cjiadiämi̧ tarari̧ jo̧rȩtatärea̧ ji̧, jabechji̧ dibëa̧ oti̧ pio ji̧ri̧iäpȩmo̧ chjai̧dëri̧ jape chjaorenȩro̧jȩrȩ tjamo̧ yo̧ji̧ri̧ pio ji̧ri̧iäpȩ ëba jäa̧ pio ju̧i̧iä, dibë ütarë ta̧rë ëte tuti chi̧dëeaji̧ri̧ pio ji̧ri̧iäpȩ ëba jäa̧ pio ju̧i̧iä. Jabechji̧ mȩnȩro̧ ütëborë cja̧rȩmȩ pumȩpea̧ji̧ri̧borë dibëa̧ omȩ pio ju̧i̧iä baë garürenȩro̧jo̧ȩ. Jabechji̧ pio ju̧i̧ ma̧ chjua jo̧rȩtatärea̧ ji̧, pio ju̧i̧ ma̧ chjua datärea̧ ji̧, cjäri̧ marenȩro̧jo̧ȩ, pio ju̧i̧iä baë mitërenȩro̧jo̧ȩ tjamo̧ yo̧ji̧ri̧ pio ji̧ri̧iäpȩ ëba jäa̧ oaiä, quëna̧dëji̧ri̧ pio ji̧ri̧iä ta̧rëpea̧ oa ëba jäa̧ pio ju̧i̧iä. Danȩrȩ, mȩnȩro̧ quëna̧dëji̧ri̧ pio ji̧ri̧iäpȩ ëba järä, jabechji̧ dibëa̧ omȩ pio judi pio dibëiäpȩmo̧ chjai̧dëri̧ japea̧ ba oa ba ano̧tä yo̧padiro̧jo̧ȩ pio dibëiäpȩmo̧. Ado judi ja̧di dari̧ ba ano̧tä yo̧a̧ oaiä, jabechji̧ pio mȩnȩro̧ baë mitëpanȩrȩ dibëa̧ omȩ pio ju̧i̧iä. Jabechji̧ quëna̧ji̧ri̧ pio ji̧ri̧iä chjadëri̧ a̧doa̧ oa cjiatärea̧ ji̧, quëna̧ji̧ri̧ pio ji̧ri̧iä chjadëri̧ jëdano̧a̧ oa cjiatärea̧ ji̧, cjäri̧ marenȩro̧jo̧ȩ, pio ju̧i̧iä baë mitëparenȩro̧jo̧ȩ.

9Danȩrȩ ca̧ oti̧, ¿jabë tjamo̧ri̧ dabadënȩrȩ? Dibëa̧ omȩ pio ju̧i̧ quëna̧dëji̧ri̧ pio ji̧ri̧iäpȩ ütara̧ oa cjiapea̧ oa ëba jäpea̧ üdë jabechji̧ chjai̧dëdida’ jabë quëna̧ dabadënȩrȩ? Danȩrȩ ca̧ oti̧, chjai̧dëri̧ jape chjaoji̧ri̧ pio judiro ‘Ütërë yo̧a̧ chja̧oerä yu̧a̧rea̧ dadëpadiro̧da’ ¿quëna̧ dabadënȩrȩ? Aja̧, pio judiro̧ tjamo̧ri̧ yu̧a̧rea̧ dadëpadirȩ. Ja̧di tara u̧i̧pea̧ oa cjiadëchji̧vä ca̧ oti̧, jabo coëma cjiari̧ jo̧rȩtariä cjo̧ro̧chji̧vä. Jabechji̧ a̧dë chjäte oëadëri̧ cjiaji̧ri̧ pio judiro̧, baë ëba mo̧a̧ji̧ri̧ pio judiro̧, ivimi̧ dari̧ cjo̧ro̧tämi̧ cjiaji̧ri̧ pio judiro̧, jibëa̧ io goaraji̧ri̧ pio judiro̧, ‘quȩ maearë ütëdida’ quëna̧ji̧ri̧ pio judiro̧, jabechji̧ Ütërë yo̧a̧ chja̧oeräpȩ yu̧a̧rea̧ dadëpadirȩ. 10Tjamo̧ davä. Garüji̧ri̧ pio judiro̧, o ji̧ri̧ ja̧ oa dae ja̧bo dae ja̧bo dae chjaoji̧ri̧ pio judiro̧, a̧dë chjäte jara ëte yu̧i̧ji̧ri̧ pio judiro̧, jibëa̧ pumȩ pio ji̧ri̧ chjiari ma̧ȩ chjádë yürüji̧ri̧ pio judiro̧, conȩda ëte baë mitëji̧ri̧ pio judiro̧, jabechji̧ Ütërë yo̧a̧ chja̧oeräpȩ yu̧a̧rea̧ dadëpadirȩ. 11Ado pio mȩnȩro̧ orë peaja̧dimi̧ dari̧ jape chjaorëreji̧ri̧nȩrȩ pearä judi, jabo yaba̧ tjaoëpai̧ dari̧ cjo̧ro̧ji̧ri̧pea̧nȩrȩ. Quiricho pio ju̧i̧ ja̧ quȩ ba chia oaiä, pio ju̧i̧ ja̧ ma̧ȩ oaiä ado cja̧rȩmo̧ pumȩpea̧nȩrȩ. Jabechji̧ chjai̧dë gȩrȩ chiadëji̧ri̧mi̧ dari̧ joa̧ oa cjiami̧ dari̧ cjiaji̧ri̧pea̧nȩrȩ. Ütë tjamo̧ ja̧ pumȩpe bagarea̧mi̧ dari̧ china̧chjari̧ tutia̧ oa cjiaji̧ri̧pea̧nȩrȩ. Chjai̧dë chiadëpe bagarea̧mi̧ dari̧ jabechji̧parȩa̧ oa cjiaji̧ri̧pea̧nȩrȩ. Tjamo̧ davä ca̧ oti̧, ibëa̧ Ano̧mȩ Jechu Quiricho pio judi tuti japea̧ oaiä, ibëa̧ Ütë ja̧ Tjo pio ju̧i̧ ja̧ jauëchja oaiä chjai̧dë chiadëpe bagarea̧mi̧ dari̧ jabechji̧parȩa̧ oa cjiaji̧ri̧pea̧nȩrȩ. Aja̧ ca̧ oti̧, ado cja̧rȩmo̧ pumȩ tjamo̧pea̧nȩrȩ. Ado pio ju̧i̧iä quëna̧dëji̧ri̧ pio judiro̧ japami̧ dari̧ japarea̧mi̧dëpea̧nȩrȩ yaba̧. Ado pio ju̧i̧iä jabechji̧, dibëa̧ omȩ pio ju̧i̧ tjamo̧ yo̧ji̧ri̧ pio ji̧ri̧iäpȩ ëba jädë matäreji̧ri̧renȩro̧jo̧ȩ. Tjamo̧ davä. A̧dë chjäte ma̧i̧ dari̧ japaji̧ri̧ pio ji̧ri̧iä, cüdë pio yabo ütarë yo̧a̧ji̧ri̧ pio ji̧ri̧iä tuti chi̧dëeapea̧ oa ëba jädë matäreji̧ri̧renȩro̧jo̧ȩ dibëa̧ omȩ oa. Jabechji̧ a̧dë chjäte ma̧i̧ dari̧ japaji̧ri̧ pio judiro̧ dibë chi̧dëearea̧mi̧dë madiro̧dibe.

Ütë tjamo̧ pio ju̧i̧iä goaedë pio ju̧i̧ japadë matäreji̧ri̧rea̧rȩ ibëa̧ icjarara̧.

12Ado yaba̧ ni̧bä chjaotämi̧ cjiarequededibe dibëa̧ icjara pio ju̧i̧ chjiari. Danȩrȩ, Ütë tjamo̧ judi china̧chjaparȩdëa̧ pio ju̧i̧ japapai̧ dareconȩ jabo coa a̧dodëmȩ pio ju̧i̧, jabechji̧ japadëpareconȩ. Tjamo̧ davä. Ütë tjamo̧ judi china̧chjaparȩdëa̧ pio ju̧i̧ japapai̧ dareconȩ, jabo ja̧di dari̧ japarea̧ daräbo na̧e chiarequede jabo. Jabechji̧ coa boadäräa̧ oa cjiapai̧ damȩ pio ju̧i̧, coa mu̧i̧tjoi̧mi̧ dari̧ japapai̧ damȩ pio ju̧i̧ japadëpareconȩ. 13Ado eami̧ pumȩ üdë ja̧di ta̧rëri̧ yo̧pai̧ dade: "Aja̧, jurarea̧ üdë, jabechji̧ ibëa̧ acä ja̧de. Ado ibëa̧ acä üdë, jabechji̧ jurarea̧ oa maipea̧ maeade." Aja̧, ja̧di ta̧rëri̧ yo̧pai̧ dade. Tjamo̧ davä ca̧ oti̧. Ja̧dide. Ado pio ju̧i̧iä a̧ro̧rȩ ta̧mȩcho̧ ja̧borä, jabechji̧ jurarea̧ oa jurarea̧rȩ. Jabo danȩrȩ ca̧ oti̧, ütara̧ doro, Ütë tjamo̧ judi jurarea̧ pio ju̧i̧ yuropapadejȩ, ibëa̧ acä pio ju̧i̧bo. Ado pio ju̧i̧iä jabechji̧, oëra̧ jo̧ra̧tadëtäreji̧ri̧rea̧rȩ ibëa̧ icjara pio ju̧i̧ chjiari. Jabechji̧ bucho ana̧dëmȩde. Ado pio ju̧i̧iä ‘Aja̧, ca̧ icjara üdë coa jo̧rȩta tänȩa̧mi̧ yürüpea̧ chiacuni̧da’ quëna̧ jo̧rȩtadë matäreji̧ri̧rea̧rȩ. Dëdë, a̧ro̧rȩ jurapea̧ oa yürürëremȩdiibe ibëa̧ acä pio ju̧i̧, jabo danȩrȩ, ibëa̧ iei̧dë i̧a baë ëba mo̧a̧pea̧ ji̧ yürüdërëremȩdiibe ibëa̧ icjara oa. Tjamo̧ davä. Chjai̧dëri̧ japapea̧ oa yürüdëa̧diibe Ano̧mȩ judi, jabo pio ju̧i̧ ja̧ oa china̧chjari̧ tutia̧ oa cjiapea̧ oa yürürëremȩdiibe, ibëa̧ icjara üdë chjadëri̧ boadäräa̧ oa cjiami̧ dari̧ cjiapea̧ oa. Jabechji̧ ibëa̧ icjarara̧ pio ju̧ri̧ra̧ Ano̧mȩ pio ju̧i̧ ja̧ oa ja̧bepapea̧de. Ado pio judi chjadëri̧ jidapadejȩ. 14Jabechji̧ ibëa̧ Ano̧mȩ Jechu pio ju̧i̧ ja̧ icjara oa bëdü tänȩrërea̧mi̧ bëdü tänȩpadiibe ibëa̧ icjara oa peaja̧di jibëa̧ jauëchja pio oaiä.

15¿Dibëa̧ icjara pio ju̧i̧ chjiari tjamo̧ri̧ dabadënȩrȩ? Danȩrȩ, dibëa̧ icjara üdë Quiricho pio ju̧i̧ ja̧ icjarami̧ dade. Dibëa̧ icjara üdë pio ju̧i̧ ja̧ icjararimȩde. Tjamo̧ davä. Pio ju̧i̧ ja̧ icjararimȩde. Ja̧di tara iëno̧ë ta̧rërequededibe ca̧ oti̧. ¿Yö̧ta dari̧ japapea̧de? Üi̧ goarayi̧ pio ji̧ nö̧ta ëba mo̧a̧pea̧ oa ¿yürüpea̧de ibëa̧ icjara üdë? Quiricho pio judiri ja̧ icjarami̧ dara̧ pio ju̧ri̧ra̧ üi̧ goarayi̧ pio ji̧ nö̧ta ¿ëba mo̧a̧pea̧de? A̧ni̧ cjäri̧ chja. 16Danȩrȩ ca̧ oti̧, üi̧ judi üi̧ goarayi̧ pio ji̧ nö̧ta ëba mo̧a̧pea̧ ji̧ yürürä judi, jabechji̧ cja̧rȩmȩ icjarami̧ dari̧ cjiadiädirȩ. Peaja̧di ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë. Ta̧rëchji̧vä: "Aja̧, cja̧rȩmȩ icjarami̧ dari̧ cjiadiädirȩ" yo̧diibe ma̧ȩ üdë. 17Jabo eami̧ pumȩ üdë Ano̧mȩ pio judiri ja̧pe baga̧rä judi, peaja̧di cja̧rȩmȩpe baga̧de Quiricho pio ju̧i̧ nö̧ta. Tjamo̧ davä. Eami̧ pumȩ üdë Ano̧mȩ pio judiri ja̧pe bagarä judi, Quiricho pio ju̧i̧ nö̧ta cja̧rȩmȩpe bagari̧ cara̧ oa cjiami̧ dari̧ cjiade Tjo tjamo̧ pio ju̧i̧iä. Ado pio ju̧i̧iä jabechji̧, Quiricho ja̧ icjarami̧ dara̧ pio ju̧ri̧ra̧ jibëa̧ jadüdë oa baë ëba mo̧a̧dëpea̧de. 18Ado pio ju̧i̧iä yo̧requededibe. Jabechji̧ baë ëba mo̧a̧dë machji̧vä dibëa̧ iei̧dë i̧a, jabo ji̧dë ma putu jura̧ a̧dë chami̧ dari̧ jiadachji̧vä chjai̧dë pio ju̧i̧ goae tarari̧ a̧dë bagurami̧ dari̧. Jabechji̧ pumȩ judiro̧ chjai̧dëri̧ japea̧ üdë ji̧ra̧ tjamo̧de. Jabo danȩrȩ, dibëa̧ iei̧dë pio ji̧ baë ëba mo̧a̧pea̧ üdë tjaoëde. Ado cja̧rȩmo̧ chjai̧dëde. Ado ja̧di dari̧ japamȩ pio judi conȩdami̧ dari̧ japadejȩ jibëa̧ icjara oa. 19¿Jabo jabë dabadënȩrȩ ca̧ oti̧? ¿Jabë tjamo̧ri̧ dabadënȩrȩ dibëa̧ icjara pio ju̧i̧ chjiari? Danȩrȩ, Ütë tjamo̧ judi yürürëremȩdidibe jibëa̧ Tjo oa. Ado pio ju̧i̧iä dibëa̧ icjara üdë Tjo tjamo̧ pio ju̧i̧ ja̧ bë tjamo̧de. Tjamo̧ davä. Ütë tjamo̧ judi yürürërea̧ pio judi bëpera̧pea̧de dibëa̧ icjararä. Ado pio ju̧i̧iä jabechji̧, ‘ca̧ icjara üdë ca̧ea̧dida’ quëna̧rea̧mi̧dëde. Jabechji̧ Ütë tjamo̧ pio ju̧i̧ ja̧de. Ütë tjamo̧ pio ju̧i̧ ja̧nȩrȩ. 20Jabechji̧ pio judi ba chiara̧ pio ju̧ri̧ra̧ gatërëremȩdidibe. Ja̧di tara yo̧requededibe. China̧chjari̧ tuti oa cjiachi̧vä dibëa̧ icjara oa Ütë tjamo̧ pio judi chjacjiamȩri̧ ni̧bäa̧ oa cjiapea̧ oa. ‘Aja̧, Ütë tjamo̧ pio ju̧i̧ ja̧dida, ado pio ju̧i̧iä jibëa̧ icjara oa chjai̧dëri̧ japapea̧ oa yürüdë madiji̧da, jabo coëma cjiari̧ cjo̧ro̧dida, china̧chjari̧ tutia̧ oa cjiami̧ dari̧ cjo̧ro̧dida’ quëna̧ jo̧rȩtarea̧mi̧ dari̧ cjo̧ro̧chji̧vä, Ütë tjamo̧ judi chjacjiamȩri̧ ni̧bäa̧ oa cjiapea̧ oa.

Currently Selected:

Cori̧tio Ma̧ȩ 1 6: Pume

Highlight

Copy

Compare