Cori̧tio Ma̧ȩ 1 16
16
Pablo judi chi̧dëearëremȩdejȩrȩ Cori̧tioräpȩ quëna̧ji̧ri̧ pio ji̧ri̧, judiro̧ jibëa̧ chërera̧ chjö̧na̧i̧ti̧ oa cjäri̧ ja̧boji̧ri̧ pio ji̧ri̧ chjadëri̧ a̧dopea̧ oa.
1Ado yaba̧, mȩnȩro̧ go̧ȩpe chjadüa̧ pio ju̧i̧ chjiari ma̧ȩ oa bapë ano̧ mire go̧ȩpe chjadütämi̧ cjiarequededibe ca̧ oti̧, mȩnȩro̧ iëno̧ë ta̧rëa̧ pio ju̧i̧ chjiari. Tjamo̧ davä. Mȩnȩro̧ cjäri̧ ja̧boji̧ri̧ pio ji̧ri̧ chjadëri̧ a̧dopea̧ oa, pio dibë nö̧ta quëna̧ji̧ri̧ pio ji̧ri̧ chjadëri̧ a̧dopea̧ oa, go̧ȩpe chjadürequededibe, mȩnȩro̧ Jerucharȩräpȩ ju̧ri̧ quëna̧ji̧ri̧ pio ji̧ri̧ chjadëri̧ a̧dopea̧ oa dibëa̧ chërera̧ pio ju̧ri̧ra̧. Jabechji̧ pio ju̧ri̧pȩ cjo̧ro̧ji̧ri̧ pio ji̧ri̧ a̧dopea̧ pio ju̧i̧ chjiari iëno̧ë ta̧rëa̧ oaiä, jabechji̧ go̧ȩpe chjadürequededibe ca̧ oti̧. Danȩrȩ, mȩnȩro̧ pio jiro pumȩ ji̧ri̧ tjamo̧ri̧ a̧dotämi̧ cjiarä judi, jabechji̧ japatäreji̧ri̧nȩrȩ cüdë Garachiaräpȩ a̧dopaji̧ri̧ pio ji̧ri̧ no̧mȩ tjamo̧ri ja̧ yo̧rërea̧mi̧. 2Jabechji̧ chemana̧ nö̧ta domi̧go domȩ ju̧i̧iä mȩnȩro̧ a̧doparä, jabechji̧ mȩnȩro̧ ütëborë jo̧rȩta̧mi̧ china̧chjari̧ tutitäreji̧ri̧nȩrȩ dibëa̧ chëre oa pio jiro pumȩ pio ji̧ri̧iäpȩmo̧ yürüpea̧ oa. Aja̧, mȩnȩro̧ boa̧ chëre o oa china̧chjari̧ tutitäreji̧ri̧nȩrȩ a̧de boeapea̧ oa, ji̧ra̧ tjamo̧pe bagari̧. Aja̧ ca̧ oti̧, jabërä chemana̧ nö̧ta, cüdë pio dibëiäpȩ jabë go̧düdärädëa̧rä chjadëri̧ jëdano̧a̧ oa boeatäreji̧ri̧nȩrȩ chëre oa ütara̧mi̧ yürüpea̧ oa, cüdë ji̧dë duri oa pio ju̧ri̧pȩ go̧düdäräa̧rä dibë tänȩchea oa. 3Ado ja̧dëa ji̧ cüdë pio dibëiäpȩ go̧düdäräa̧rä, jabechji̧ mȩnȩro̧ mitëa̧ oari pio ji̧ri̧ chjadüparequedejȩrȩ Jerucharȩräpȩ ju̧ri̧, mȩnȩro̧ yürüpea̧ chëre pio ju̧i̧ chjadëri̧ a̧depea̧ oa. Ado Jerucharȩräpȩ a̧dopaji̧ri̧ pio judiro̧ pio jiro pumȩ pio ji̧ri̧ chjiari dabadëchea oa, jabechji̧ chëre oa a̧de jäpaji̧ri̧ pio ji̧ri̧ chjiari chjadëri̧ go̧ȩpe chjadüparequedejȩrȩ. 4Ado pio cüdëborë jäpea̧ üdë pumȩ pio ji̧ri̧iä jabechji̧rä judi, jabechji̧ pio cüdëborë jäpai̧ da jirorequede pio ji̧ri̧ nö̧ta.
Pablo judi Cori̧tioräpȩ quëna̧ji̧ri̧ pio ji̧ri̧ goëde järea̧ jo̧rȩtade.
5Danȩrȩ, goëde jäparequededibe Cori̧tioräpȩ ju̧ri̧, jabo yabochja jäparequede Machedoniaräpȩ ju̧ri̧. Jabechji̧ pio ju̧ri̧pȩ tjamo̧ri̧ jäpea̧ chiarequede a̧doparea̧ pio ji̧ri̧ dariä jäpea̧ oa. Ado pio ju̧ri̧pȩ jäa̧ duri oa, jabechji̧ pio dibëiäpȩ baäparequede. 6Ado cüdë pio dibëiäpȩ go̧düdäräa̧rä, jabechji̧ ui nö̧ta cjiadiäpai̧ da jirorequede. Ado ja̧dëa ji̧ mȩnȩro̧ pio coa chjadëri̧ järea̧ yürürä, jabechji̧ chjadëri̧ a̧dopai̧ da jirorenȩro̧coe cüdë chjadëri̧ go̧düpea̧ oa, cüdë chjadëri̧ jädärärea̧ dapea̧ oa cüdë ji̧dë u̧i̧ jachi oa ano̧ mire järä. 7Jabechji̧ jëreeamȩmi̧ darë dariä jädëri̧ cjiarequededibe, jabo japamitë ana̧ri̧ cjiadiätämi̧ cjiarequede pio dibë nö̧ta ibëa̧ Ano̧mȩ judi ja̧di dari̧ japarea̧ yürürä judi. 8Jabo jabërequede ca̧ oti̧. Jabë go̧düdëa̧requede jabo pio yi cjiadiäparequede Epjechoräpȩ pȩtecote quȩmȩ do chjätärea̧ üdë chjätäa̧rä yuro. 9Jabechji̧ pio yi cjo̧ro̧ji̧ri̧ pio judiro̧ no̧i̧dërë ta̧rë ja̧botämi̧ cjiadiro̧jo̧ȩ Ütë tjamo̧ ja̧ ma̧ȩ oa. Pio ju̧i̧iä jabë baärea̧mi̧dëde. Pio coa dëbëpe chjaoji̧ri̧ pio judiro̧ ji̧ra̧räbo, jabechji̧ pio yi Epjechoräpȩ cjiadiäparequede cüdë ja̧beparea̧ ji̧ra̧ oa goa tara.
Ütë tjamo̧ ja̧ oa ja̧bepaji̧ri̧ pio ji̧ri̧ ba chia datä eamȩrȩ go̧ȩpe chjadürëremȩdejȩrȩ Pablo judi.
10Danȩrȩ, Timoteo pio judi pio dibëiäpȩ go̧düdäräa̧rä, jabechji̧ cjäri̧ri̧ cjia dachji̧jo̧ȩ judi uapachea oa. Idëri̧ cjia tänȩdëchji̧jo̧ȩ. Jabechji̧ pio cüdëmi̧ dari̧ ja̧bepade ibëa̧ Ano̧mȩ pio ju̧i̧ ja̧ oa. 11Pio ju̧i̧iä chjadëri̧ jidachji̧jo̧ȩ eami̧ pumȩ üdë pio ju̧i̧iäpȩmo̧ badë dachea oa. Ado ja̧dëa ji̧ judi dibëa̧ bëri pio judiri go̧düa̧rä, jabechji̧ ma̧ chiadëri̧ cjiamȩ oa chjadëri̧ chjadüchji̧jo̧ȩ pio coaiäpȩ chjadëri̧ ma̧na̧na̧ra̧pea̧ ji̧. Jabechji̧ jidatareconȩ, pio ju̧i̧ ja̧ jadü pio ji̧ri̧bo.
12Danȩrȩ, ibëa̧ omȩ Aporo quȩmȩ pio ju̧i̧, ibëa̧ oti̧ pio ji̧ri̧ nö̧ta pio dibëiäpȩ tjamo̧ri̧ ëba jätä eamȩrȩ chjadütea̧reconȩ. Jabo cjäri̧ made. Järea̧ dadëde yaba̧, jabo ji̧dë duri oa jënȩ järea̧ darä, dëdë, goëde jäpai̧ dadidibe.
13Na̧e chiachji̧vä ca̧ oti̧. Chjuari̧ quëna̧chji̧vä Ütë tjamo̧ ja̧ ma̧ȩ oa. Oarimi̧ dari̧ cjiachji̧vä uaparea̧ decjiari̧. To̧bari̧ cjiami̧ dari̧ cjiachji̧vä, ju chiaji̧ri̧rȩ. 14Ado danȩrȩ, mȩnȩro̧ eami̧ oa japarä, jabechji̧ dibëa̧ oti̧ pio ji̧ri̧ tjamo̧ri̧ eaji̧ri̧rȩ japachji̧vä, eadëpe järea̧ decjiari̧.
15Danȩrȩ ca̧ oti̧, Etepana quȩmȩ pio ju̧i̧ dabarenȩro̧jo̧ȩ, jibëa̧ pumȩ pio ji̧ri̧bo. Jabechji̧ pio judiro̧dirȩ Acaya quȩmȩräpȩ pearä quëna̧rëreji̧ri̧ judiro̧. O judiro̧ ma̧ȩ chjadëi̧ pio ju̧i̧ quëna̧dërërea̧ ji̧, pio judiro̧ yabochjarë quëna̧ji̧ri̧pea̧diro̧jo̧ȩ. Ado quëna̧ji̧ri̧pea̧ji̧ri̧rȩ china̧chjari̧ tutia̧ oa cjiami̧ dari̧ cjiaji̧ri̧rȩ ana̧ri̧ a̧doji̧ri̧pea̧diro̧jȩrȩ Ütë tjamo̧ ja̧ pumȩ pio ji̧ri̧. Jabechji̧ ji̧dë ma a̧do chjaoji̧ri̧pea̧diro̧jȩrȩ. 16Ja̧di tara chi̧dëearequededibe ca̧ oti̧, mȩnȩro̧ pio ji̧ri̧ ja̧ chja̧oerä cjo̧ro̧tä. Jabechji̧ chjadëri̧ ta̧rëdiächji̧jȩrȩ. Aja̧, pio ji̧ri̧ chjadëri̧ ta̧rëdiätäreji̧ri̧renȩro̧jȩrȩ. Ado pio ji̧ri̧mo̧i̧dë jabo pio judiro̧mi̧ dari̧ ja̧bepaji̧ri̧ pio ji̧ri̧bo chjadëri̧ ta̧rëdiätäreji̧ri̧renȩro̧jȩrȩ. 17Jabechji̧ ma̧ chiadëri̧ cjiari̧ jo̧rȩtamȩpea̧requede judiro̧ pio coaiäpȩ chjadëri̧ jana̧na̧ra̧rea̧ daea̧ oaiä. Tjamo̧ davä. Etepana judi, Potunato judi, ado Acaico pio judi jana̧ oaiä ma̧ chiadëri̧ cjiari̧ jo̧rȩta tjamo̧pea̧requede. Jabechji̧ pio mȩnȩro̧ coa chjadëri̧ a̧dotärea̧ ji̧, pio judiro̧ ano̧ mire a̧dodiro̧coe yaba̧ chjadëri̧. 18Jabechji̧ ma̧ chjupi̧ bagami̧ tarari̧ a̧doa̧diro̧coe ca̧ chji̧ oa, cüdë ma̧ chiadëri̧ cjiape järea̧mi̧ dari̧. Tjamo̧ davä. Pio dibë chjadëri̧ a̧doa̧mi̧ a̧doa̧diro̧coe peaja̧di. Ado pio ju̧i̧iä jabechji̧, pio jiro pumȩmi̧ dari̧ a̧doji̧ri̧ pio ji̧ri̧iäpȩmo̧bo ji̧dë ma ba chia datäreji̧ri̧renȩro̧jȩrȩ.
Achiaräpȩ quëna̧ji̧ri̧ pio judiro̧ jearea̧ chjadürëreji̧ri̧diro̧jȩrȩ Cori̧tioräpȩ quëna̧ji̧ri̧ pio ji̧ri̧.
19Danȩrȩ, jearea̧ chjadüdiro̧dibe Achia quȩmȩ chiriräpȩ a̧dopaji̧ri̧ pio judiro̧. Tjamo̧ davä. A̧doparea̧ bë nö̧tai̧ oa a̧dopaji̧ri̧ pio judiro̧ jearea̧ chjadüdiro̧dibe. Jabechji̧ dibë cjäri̧ri̧ cjia jo̧rȩtaji̧ri̧rȩ jearea̧ chjadüdiro̧dibe. Ado Aquira pio judi, ado jibëa̧ iei̧ Pirica pio jini̧borë jearea̧ chjadüdiro̧dibe peaja̧di, jibëa̧ bëräpȩ ëba a̧dopaji̧ri̧ pio ji̧ri̧ nö̧ta. Aja̧ ca̧ oti̧, pio dibëiäpȩmo̧ ma̧ chiadëri̧ cjiari̧ jo̧rȩta tjamo̧ji̧ri̧rȩ jearea̧ chjadüdiro̧dibe Ano̧mȩ pio ju̧i̧ ja̧ maea oa, pio jibë nö̧ta quëna̧ji̧ri̧ pio ji̧ri̧. 20Jabechji̧ ibëa̧ oti̧ chjö̧na̧i̧rȩ dibë cjäri̧ri̧ cjiari̧ jo̧rȩtaji̧ri̧rȩ jearea̧ chjadü maeadiro̧dibe. Ado peaja̧di dari̧ japaji̧ri̧rȩ cjo̧ro̧ matäreji̧ri̧nȩrȩ. Jabechji̧ dibëa̧ dëbëti̧ra̧ chia cjäri̧ri̧ cjia jo̧rȩtaji̧ri̧rȩ jeatäreji̧ri̧nȩrȩ peaja̧di.
Cjiadiärea̧ Ma̧ȩ
21Danȩrȩ, Pablo pio judirequede. Ado pio dibë cjäri̧ri̧ cjia jo̧rȩtamȩrȩ go̧ȩparequede pio yoa ma̧ȩ oa ca̧ ichira̧ pio ju̧ri̧ra̧.
22Ado eami̧ pumȩ üdë, ibëa̧ Ano̧mȩ Jechu Quiricho pio ju̧i̧ tjamo̧ri̧ eadëmȩ pio judi, jabechji̧ Ütë tjamo̧ ja̧ ërecjia̧ üdë pio ju̧i̧iäpȩmo̧ acji cjatäpadejȩ judi chjai̧dëri̧ japea̧ oaiä. Ado jo̧ȩra̧pe ma̧na̧tädiibe ibëa̧ Ano̧mȩ judi.
23Ano̧mȩ Jechu pio judi dibë cjäri̧ri̧ cjiamȩrȩ chjadëri̧ a̧dotädidibe.
24Ado danȩrȩ, Jechu Quiricho pio judiri ja̧ mapea̧ji̧ri̧ oa ea tjamo̧requededibe. Ja̧ditäde.
Dibëa̧ omȩ, Pablo.
Currently Selected:
Cori̧tio Ma̧ȩ 1 16: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
