Cori̧tio Ma̧ȩ 2 1
1
Pablo judi jearëremȩdejȩrȩ Cori̧tioräpȩ quëna̧ji̧ri̧ pio ji̧ri̧
1Danȩrȩ ca̧ oti̧, pio dibë jo̧rȩtamȩrȩ go̧ȩpe chjadürequededibe. ¿Jabënȩrȩ? ¿Jabë cjo̧ro̧ baänȩrȩ? ‘Jabë cjo̧ro̧ baä jirodiro̧da’ quëna̧ jo̧rȩtamȩrȩ go̧ȩpe chjadürequededibe. Danȩrȩ, Pablo pio judirequede. Ado Ütë tjamo̧ pio judi ütarë jo̧rȩtarërea̧mi̧ Jechu Quirichorë chjadüa̧requede. Ado pio yoa ma̧ȩ oa go̧ȩpe chjadürequededibe yaba̧. Tjamo̧ davä. Cüdë, ado ibëa̧ omȩ Timoteo pio judiborë go̧ȩpe chjadürea̧ro̧dibe pio yoa ma̧ȩ oa. Aja̧, Cori̧tio quȩmȩ bë ma̧ri̧räpȩ a̧dopaji̧ri̧ oa go̧ȩpe chjadürea̧ro̧dibe Ütë tjamo̧ ja̧ a̧doparea̧ pio ji̧ri̧. Ado Acaya quȩmȩ chiriräpȩ quëna̧ji̧ri̧ pio ji̧ri̧bo jo̧rȩtaji̧ri̧rȩ go̧ȩpe chjadürea̧ro̧jȩrȩ pio yoa ma̧ȩ oa, tutia̧ oa cjiaji̧ri̧ pumȩ pio ji̧ri̧iäpȩmo̧.
2Ado yaba̧ ji̧dë u̧i̧ go̧ȩpabea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe ca̧ oti̧. Jabechji̧ ibëa̧ Ama̧i̧ Ütë pio judi, ado ibëa̧ Ano̧mȩ Jechu Quiricho pio judiborë cjäri̧ri̧ cjia da̧ pio ju̧i̧ chjadëri̧ yürütädiro̧dibe, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧.
Ma̧i̧ da chjai̧dë oa chjätäa̧ pio ju̧i̧iä dabaparëremȩde Pablo judi Ütë tjamo̧ pio ju̧i̧iämo̧i̧ ja̧ȩ cjiami̧ dari̧ cjo̧ro̧pea̧ ji̧
3Chacjiamȩri̧ jo̧rȩtatäreji̧ri̧rea̧ro̧jo̧ȩ Ütë tjamo̧ ju̧i̧. Tjamo̧ davä. Ibëa̧ Ano̧mȩ Jechu Quiricho pio ju̧i̧ ja̧ Ama̧i̧ Ütë pio ju̧i̧iäpȩmo̧ ji̧dë ma chjacjiamȩri̧ jo̧rȩtatäreji̧ri̧rea̧ro̧jo̧ȩ. Jabechji̧ a̧ro̧rȩ chjai̧dëri̧ japea̧ ba oa ba eadë madiibe, jabo ji̧dë ma cjäri̧ri̧ cjiamȩrȩ a̧dodiibe. Pio judi tjamo̧de ibë chjichjipami̧ dari̧ japamȩ judi a̧ro̧rȩ cjatäcjie jo̧rȩtarea̧mi̧ dari̧. Tjamo̧ davä. Pio judiri ma̧na̧diibe a̧dorea̧ üdë. 4Jabechji̧ a̧ro̧rȩ eami̧ti̧ chjai̧dë oa chjätärä, cjatäcjie jo̧rȩtarea̧mi̧ dari̧ a̧dodiibe chjichjipami̧ dari̧. Aja̧, ja̧di dari̧ a̧dodiibe a̧ro̧rȩ o ji̧ri̧iäpȩmo̧ peaja̧di chjadëri̧ a̧dopea̧ oa. Jabechji̧ o judiro̧ chjai̧dë oa chjätärä, jabechji̧ Ütë tjamo̧ pio judi ibë a̧dorërea̧ra̧ pio ju̧ri̧ra̧ chjadëri̧ a̧dopai̧ darea̧ro̧jȩrȩ o ji̧ri̧ peaja̧di, pio judiro̧borë cjatäcjie jo̧rȩtarea̧ dapea̧ oa. Tjamo̧ davä. A̧dopai̧ darea̧ro̧jȩrȩ Ütë tjamo̧ judi pio ibë a̧dorërea̧ra̧ pio ju̧ri̧ra̧. 5Jabechji̧ Quiricho pio ju̧i̧iäpȩmo̧ quëna̧ji̧ri̧pea̧rea̧rȩ. Ado pio ju̧i̧iä, dëdë, chjai̧dë oa chjätärea̧rȩ. Jabo a̧ro̧rȩ a̧dë chjäte ji̧ra̧ri̧ chjai̧dë oa chjätäa̧ oaiä, jabechji̧ a̧dë chjäte ana̧ri̧ a̧dodiibe Ütë tjamo̧ judi Quiricho pio ju̧i̧iä. 6Ado danȩrȩ, a̧ro̧rȩ chjai̧dë oa chjätärä, jabechji̧ pio mȩnȩro̧ chjadëri̧ a̧doa̧ oa cjiapea̧ oa chjätärea̧rȩ. Jabechji̧ a̧ro̧rȩ chjai̧dë oa chjätäa̧ duri oa cjatäcjie jo̧rȩtarea̧ darä, jabechji̧ cjatäcjie jo̧rȩtarea̧mi̧ dari̧ a̧dopai̧ darea̧ro̧dibe peaja̧di. Aja̧, mȩnȩro̧borë chjai̧dë oa chjätärä, pio mȩnȩro̧ chjichjipë mo̧a̧ tänȩmi̧ dari̧ cjiapea̧ oa, pio mȩnȩro̧ cjatäcjie jo̧rȩtarea̧ dapea̧ oa a̧dopai̧ darea̧ro̧dibe. Ado danȩrȩ ca̧ oti̧, a̧ro̧rȩ pio dibë chjadëri̧ a̧doa̧ oaiä, peaja̧di pio mȩnȩro̧borë ma̧ chjua jo̧rȩtaji̧ri̧rȩ cjo̧ro̧rea̧ dapanȩrȩ chjai̧dë oa chjätäräbo, a̧ro̧rȩ chjai̧dë oa chjätärërea̧ duri pio ju̧i̧ ano̧ mire chjätäräbo.
7Ado mȩnȩro̧ pio ibë nö̧ta chjai̧dë oa chjätäji̧ri̧rȩ cjo̧ro̧a̧ oaiä, mȩnȩro̧ pio ibë nö̧ta ëba tarami̧ dari̧ cjo̧ro̧a̧ oaiä, jabechji̧ Ütë tjamo̧ judi pio ibëiäpȩmo̧ cjatäcjie jo̧rȩtarea̧ yürüa̧ra̧ pio ju̧ri̧ra̧ peaja̧di chjadëri̧ ano̧ mire a̧doparea̧ro̧dibe pio dibë, pio mȩnȩro̧borë cjatäcjie jo̧rȩtarea̧ dapea̧ oa. Pio ju̧i̧ tjamo̧ri̧ dabarea̧rȩ pio dibë chjiari, chjara chia jo̧rȩtarea̧ decjiari̧.
8A̧ro̧rȩ Achia quȩmȩ chiriräpȩ chjai̧dë oa chjätärërea̧ pio ju̧i̧ chjiari dabadëchea oa, jabechji̧ ni̧bä chjaotämi̧ cjiarequededibe ca̧ oti̧ pio ju̧i̧ chjiari. Jabechji̧ uapai̧ da tjamo̧ri̧ chjätärëreji̧ri̧rea̧rȩ a̧dë chjäte chjai̧dë pio ju̧i̧. Ado ma̧i̧ da tjamo̧ oa chjätäa̧ oaiä, ‘cjäri̧ maa̧ro̧da, chjätärea̧ dadëpaa̧ro̧da, nö̧tadëa̧ro̧da, jabo tjamo̧ri̧ ja̧bopai̧ daa̧ro̧da’ quëna̧ jo̧rȩtarëreji̧ri̧rea̧rȩ. 9Tjamo̧ davä ca̧ oti̧. ‘Jabechji̧ tjamo̧ri̧ ja̧bopaa̧ro̧da’ quëna̧ jo̧rȩtarëreji̧ri̧rea̧rȩ. Ado a̧dë chjäte boami̧ dari̧ japamȩ chji̧ra̧ pio ju̧ri̧ra̧ jo̧rȩtaji̧ri̧rȩ chjadëri̧ dabapea̧rea̧rȩ Ütë tjamo̧ pio ju̧i̧iämo̧i̧ ja̧ȩ cjiami̧ dari̧ cjo̧ro̧pea̧ ji̧. Tjamo̧ davä. A̧ro̧rȩ pio ibëiä ja̧ȩ cjiami̧ dari̧ cjo̧ro̧rërea̧ ji̧, ano̧ mire ja̧ȩ cjiami̧ dari̧ cjo̧ro̧ji̧ri̧pea̧rea̧rȩ, Ütë tjamo̧ pio ju̧i̧iämo̧i̧ ja̧ȩ cjiami̧ dari̧ cjo̧ro̧tämi̧ cjiaji̧ri̧rȩ. Tjamo̧ davä.
A̧ro̧rȩ ma̧i̧ da chjai̧dë oa chjätäji̧ri̧rȩ cjo̧ro̧räbo, jabechji̧ ja̧boa̧ji̧ri̧ pio ji̧ri̧ bëdü tänȩmȩ pio ju̧i̧iämo̧i̧ ja̧ȩ cjiami̧ dari̧ cjo̧ro̧pea̧ ji̧ dabapea̧rea̧rȩ ca̧ oti̧, Ütë tjamo̧ pio ju̧i̧iämo̧i̧. Jabechji̧ ja̧boa̧ji̧ri̧ pio ji̧ri̧ bëdü tänȩpai̧ darä judi, peaja̧di chjadëri̧ a̧dopai̧ dadiibëda’ quëna̧ jo̧rȩtaji̧ri̧rȩ pio ju̧i̧iämo̧i̧ ja̧ȩ cjiami̧ dari̧ cjo̧ro̧rea̧rȩ yaba̧. 10Ado a̧ro̧rȩ ja̧boa̧mi̧ ja̧botärea̧ ji̧, chjadëri̧ go̧dü tänȩrëremȩdiibe Ütë tjamo̧ judi. Ado pio ju̧i̧iä, ‘Aja̧, ado ji̧dë ma go̧dü tänȩpadiibëda, pio ibë chjiari ji̧dë ma tuti japapadida’ quëna̧ jo̧rȩtarea̧ro̧jo̧ȩ yaba̧, pio ju̧i̧mo̧i̧ jidataji̧ri̧rȩ. 11Ado pio ju̧i̧iä yo̧requededibe ca̧ oti̧. Jabechji̧ ji̧dë ma goë cjo̧dëji̧ri̧rȩ cjo̧ro̧pea̧ chianȩrȩ pio ibë chjiari, Ütë tjamo̧ judi pio ibë chjiari ji̧dë ma tuti japatä. Ado ja̧dëa ji̧ judi pio ibë chjiari ana̧ri̧ tuti japea̧ oaiä, jabechji̧ pumȩ no̧i̧dërë ma̧ chiadëri̧ cjiari̧ jo̧rȩtaji̧ri̧rȩ ni̧bäpadiro̧jo̧ȩ Ütë tjamo̧ pio ju̧i̧iäpȩmo̧. ‘Aja̧, Ütë tjamo̧ judi chjadëri̧ go̧dü tänȩa̧diji̧ri̧da, chjadëri̧ jidadiji̧ri̧da, pumȩ no̧i̧dërë goë cjo̧dëa̧ pio ju̧i̧ ta̧rë ja̧bomȩ tjamo̧dida’ quëna̧ jo̧rȩtaji̧ri̧rȩ ni̧bäpadiro̧jo̧ȩ, ma̧ chiadëri̧ cjiaji̧ri̧rȩ, pio ibë chjiari goë ta̧rëa̧ oaiä.
Pablo judi ano̧ mire jo̧rȩtarëremȩde Cori̧tioräpȩ jäpea̧ pio ju̧i̧ chjiari
12Danȩrȩ ca̧ pumȩ, ma̧ chiadëri̧ cjiaji̧ri̧rȩ jo̧rȩtarea̧rȩ chji̧ goaera̧, ibë aechide yo̧mi̧ dari̧ japadëmȩ chji̧ra̧. Jabechji̧ a̧ro̧rȩ pio yoa chiri oa oëra̧ti̧ oa cjo̧ro̧rërea̧ ji̧, a̧ro̧rȩ eami̧ pumȩ ja̧ chjarerä cjo̧ro̧rërea̧ ji̧, jabechi̧ a̧ro̧rȩ yo̧a̧ri̧ ya chiaji̧ri̧mi̧ dari̧ cjo̧ro̧dë marëreji̧ri̧rea̧rȩ, jabo coëma cjiari̧ cjo̧ro̧rëreji̧ri̧rea̧rȩ, ma̧ȩ chjádë yürüdëji̧ri̧rȩ. Ado pumȩ ji̧ri̧ ana̧ri̧ na̧rȩriä cjo̧ro̧rërea̧ ji̧, jabechji̧ ji̧dë u̧i̧ ana̧ri̧ na̧rȩriä cjo̧ro̧rëreji̧ri̧rea̧rȩ ca̧ oti̧, dibëa̧ chjarerä cjo̧ro̧rërea̧ ji̧. Jabechji̧ a̧ro̧rȩ dai chirirä ja̧ jo̧rȩtarea̧ pio ju̧i̧iä ja̧ȩ cjiami̧ dari̧ cjo̧ro̧dëa̧ oaiä, jabo Ütë tjamo̧ judi ibë cjäri̧ri̧ cjia yürüa̧ pio ju̧i̧iämo̧i̧ ja̧ȩ cjiami̧ dari̧ cjo̧ro̧a̧ oaiä, jabechji̧ tjaoëpai̧ dari̧ cjo̧ro̧rea̧ darëreji̧ri̧rea̧rȩ. 13Ado peaja̧di dari̧ cjo̧ro̧ji̧ri̧rȩ go̧ȩpe chjadürea̧ro̧dibe ca̧ oti̧. Jabechji̧ a̧ro̧rȩ go̧ȩpea̧mi̧ nö̧ta, mȩnȩro̧ bapë ta̧rërea̧mi̧dëri̧ go̧ȩpe chjadüdë marea̧ro̧dibe, jabo chjaodëri̧ bapë ta̧rërea̧mi̧ dari̧ go̧ȩpe chjadürea̧ro̧dibe dibë u̧i̧padëpea̧ oa, jabo mȩnȩro̧ bücjüchjami̧ dari̧ go̧ȩ ni̧bäpea̧ oa. Jabechji̧ pio ibë chjiari chjadëri̧ dabatä ea tjamo̧rea̧ro̧dibe ca̧ oti̧, ‘chjadëri̧ japadë jirodiro̧ibëda’ quëna̧rea̧ decjiari̧. 14Jabo mȩnȩro̧ orë, jabë tjamo̧ri̧ dabadënȩrȩ pio ibë chjiari. Jabë na̧e chiaji̧ri̧rȩ jo̧rȩtarenȩro̧ibe, ‘tjamo̧ri̧ eadë jirodiro̧ibëda’ quëna̧ jo̧rȩtaji̧ri̧rȩ. ‘Aja̧ Pablo judi, jibëa̧ jadüborë, tjamo̧ri̧ ni̧bädëdiro̧ibëda, jabo u̧i̧padiro̧ibëda, ibë tjamo̧ri̧ eadëji̧ri̧rȩ baë mitëmi̧ dari̧ japadiro̧ibëda’ quëna̧ jo̧rȩtanȩro̧ibe jabë. Jabo japamitë boi̧chji̧ chjätä ëte, mȩnȩro̧ ütëbodärärë tjamo̧ri̧ dabapanȩrȩ pio ibë chjiari, baebaeami̧ dari̧ jo̧rȩtarea̧ decjiari̧. Ado ja̧dëa ji̧ ibëa̧ Ano̧mȩ Jechu pio judi jana̧rä, jabechji̧ ma̧ chiadëri̧ cjia tjamo̧ji̧ri̧rȩ daparenȩro̧coe. Tjamo̧ davä. Pio cüdë dibë ma̧ chiadëri̧ cjia daea̧mi̧ ma̧ chiadëri̧ cjiaji̧ri̧rȩ daparenȩro̧coe peaja̧di.
15Danȩrȩ ca̧ oti̧, ‘Cori̧tioräpȩ quëna̧ji̧ri̧ pio judiro̧ pio coa tjamo̧ri̧ eadiro̧coada’ quëna̧ tjamo̧ri̧ daba̧ oaiä, 'pio coa tjamo̧ri̧ datämi̧ cjiadiro̧coada’ quëna̧ tjamo̧ri̧ daba̧ oaiä, jabechji̧ 'yo̧a̧ri̧ co goëde jätäremȩquiji̧ri̧da, quëna̧ji̧ri̧ pio ji̧ri̧ chjadëri̧ a̧dopea̧ oa yo̧a̧ri̧ co goëde jätäremȩquiji̧ri̧da’ quëna̧ jo̧rȩtaremȩrequededibe ca̧ oti̧. 16Jabechji̧ Machedonia quȩmȩräpȩ jäa̧rä, pio dibë dariä jätämi̧ cjiatea̧requededibe. Ado ja̧dëa ji̧ pio judiri ado chjereno̧ ma̧na̧rä, ado chjereno̧ dariä ma̧na̧tämi̧ cjiatea̧requededibe peaja̧di, mȩnȩro̧ pio coa a̧dopea̧ oa, mȩnȩro̧ coa Judea quȩmȩräpȩmo̧ chjadëri̧ chjadüpea̧ oa. 17Jabo danȩrȩ ca̧ oti̧, cüdë ja̧di ta̧rëri̧ yo̧a̧ oaiä, ‘jabo cjäri madiibëda, ma̧ȩ chjádë yürü jirodiibëda’ quëna̧dëchji̧coe. Jabechji̧ järea̧ dadëa̧requede. Tjamo̧ri̧ yo̧requededibe. Järea̧ dadëa̧requede. ¿Jabo tjana̧ ju̧i̧iä järea̧ dadëa̧requede? Cüdë ji̧dë ma ano̧ mire jo̧rȩte chjaoa̧ pio ju̧i̧iä ¿jädëa̧requede? Cüdë jabomo̧ ya maeara̧ yo̧a̧ oaiä, cüdë dai chirirä cjo̧ro̧ji̧ri̧ pio judiro̧mi̧ dari̧ ma̧ȩ chjádë yürüa̧ oaiä, ¿jädëa̧requede cüdë? 18Cjäri̧ marequede ca̧ oti̧, pio ju̧i̧iädë. Danȩrȩ, Ütë tjamo̧ pio ju̧i̧ chjiari chjadëri̧ dabanȩrȩ. Jabechji̧ coëma cjiari̧ ni̧bämȩde, ma̧ȩ chjádë yürüdëmȩrȩ. Ado Ütë tjamo̧ pio judi coëma cjiari̧ ni̧bämi̧ dari̧ ni̧bärequededibe peaja̧di. Jabechji̧ u̧i̧parea̧ ma̧ȩra̧ pio ju̧ri̧ra̧ mirea̧ oa cjiamȩmi̧ dara̧ ni̧bädëa̧requededibe, jabo coëma cjiari̧ baämȩ ma̧ȩ maeara̧ ni̧bärëremȩrequededibe. Aja̧ ca̧ oti̧, cüdë dibë pearä yo̧a̧ ji̧, “Aja̧, goëde jäparequededibe” yo̧a̧ ji̧, ‘jabechji̧ tjamo̧ri̧ jädëpaquëda’ quëna̧dëa̧requede, jabo ‘tjamo̧ri̧ jäpaquëda’ quëna̧tea̧requede. Tjamo̧ davä. Tjamo̧i̧ cjiari̧ ni̧bärëremȩrequededibe, ma̧ȩ chjádë yürüdëmȩrȩ. 19Ado peaja̧di dari̧ ni̧bämȩde Jechu Quiricho judi, Ütë tjamo̧ ja̧ Joja pio judi. Jabechji̧ ano̧ mire quëna̧dëmȩde. Ano̧ mire jo̧rȩtadëmȩde. Ado cüdë dibë Jechu pio ju̧i̧ chiari a̧ra̧ano̧rërea̧ ji̧, Timoteo pio ju̧i̧ nö̧ta, Chivano quȩmȩ pio ju̧i̧ nö̧ta a̧ra̧ano̧rërea̧ ji̧, jabechji̧ ji̧dë ma ano̧ mire jo̧rȩtamȩ pio ju̧i̧ chjiari, tjaoëpe bagami̧ dari̧ jo̧rȩtamȩ pio ju̧i̧ chjiari a̧ra̧ano̧dërëremȩrequededibe, jabo cja̧rȩmȩ coëma maea oa jo̧rȩtamȩ pio ju̧i̧ chjiari a̧ra̧ano̧rëremȩrequededibe. Jabechji̧ a̧ro̧rȩ araano̧rërea̧ pio judi, jabechji̧ Jechu judi jo̧rȩta̧mi̧ yo̧mȩde. Ado judi yo̧a̧mi̧ japamȩde peaja̧di u̧i̧parea̧ decjiari̧, ji̧dëdiä ni̧bärea̧ decjiari̧. 20Jabechji̧ Jechu pio ju̧i̧iä tjamo̧i̧ cjiari̧ cjiadiä marëremȩde Ütërë yo̧ë cji̧därërea̧ ma̧ȩ chjö̧na̧i̧rȩ. Tjamo̧ davä. Quiricho pio judi tuti japarërea̧ oaiä, ba chia mape bagarëremȩde Ütërë yo̧ë cji̧därërea̧ ma̧ȩ pio judi. Quiricho pio judi japarërea̧ oaiä, tjamo̧i̧padäräa̧ oa cjia marëremȩde. Ado pio ju̧i̧iä a̧ro̧rȩ, jabechji̧ “ja̧ditäde” yo̧rea̧rȩ Jechu judi tuti japarërea̧ pio ju̧i̧ chjiari. Jabechji̧ a̧ro̧rȩ ja̧di ta̧rëri̧ yo̧a̧ oaiä, chjacjiamȩri̧ ni̧bäa̧ oa cjiade Ütë tjamo̧ judi.
21Danȩrȩ ca̧ oti̧, Ütë tjamo̧ pio judi tänȩa̧ oaiä, pio dibë nö̧ta chjuari̧ tutia̧ oa cjiami̧ dari̧ cjiaji̧ri̧pea̧rea̧rȩ Quiricho pio ju̧i̧iä, pio judiri ja̧pe bagaji̧ri̧rȩ. Jabechji̧ Ütë tjamo̧ pio judi yürürërea̧ oaiä, ju chiarea̧ darea̧rȩ pio ju̧i̧ ja̧ oa chjadëri̧ ja̧bepë yürüpea̧ oa 22Ado ‘ca̧ea̧diro̧ca̧da’ quëna̧ jo̧rȩtamȩrȩ yürürëremȩdiibe Tjo tjamo̧ pio ju̧i̧ ibëa̧ icjararä bëpapea̧ oa, pio ibë go̧ȩ cäa̧mi̧ dari̧ japapea̧ oa. Jabechji̧ cjiadiäa̧mȩ chjö̧na̧i̧ oa ji̧dë duri oa a̧de yürüpea̧ oa, ba ano̧ë cji̧dämi̧ dari̧ yürürëremȩdiibe Tjo tjamo̧ pio ju̧i̧. Ado pio ju̧i̧iä tjamo̧ri̧ dabarea̧rȩ ca̧ oti̧. Jabechji̧ Ütë tjamo̧ judi yo̧a̧mi̧ chjadëri̧ japapadiibëda, judi yo̧a̧mi̧ chjadëri̧ yürüpadiibëda’ quëna̧ tjamo̧ri̧ dabarea̧rȩ. 23Ado pio jiro Ütë pio ju̧i̧ ja̧ dachoro cjiamȩrȩ coëma cjiari̧ ni̧bätämi̧ cjiarequede yaba̧ pio ibë chjiari, ana̧ri̧ yürürëremȩ Ütë pio ju̧i̧ ja̧ dachoro cjiamȩrȩ. Aja̧, tjamo̧ri̧ yo̧requededibe yaba̧ ca̧ oti̧, cüdë pio dibëiäpȩ jädëa̧ pio ju̧i̧ chjiari. Jabechji̧ pio dibëiäpȩ jäparemȩrȩ jädëa̧requede pio dibë chjiari goë ta̧rëa̧ oaiä. Jabechji̧ goë ta̧rërëremȩrequede ca̧ oti̧, mȩnȩro̧ chjai̧dëri̧ japea̧ pio ju̧i̧ chjiari. Ado pio ju̧i̧iä cjiadiäa̧requede cüdë jätärea̧ ji̧. Jabechji̧ pio dibë to̧bari̧ chi̧dëeachea oa, cüdë dibë ya̧mi̧ ta̧rëri̧ chi̧dëeachea oa, jabechji̧ jädëa̧requededibe ca̧ oti̧, mȩnȩro̧ ana̧ri̧ jo̧rȩtachea oa, mȩnȩro̧ gitori̧ jo̧rȩtachea oa. Jabechji̧ tjamo̧ri̧ yo̧requededibe, Ütë tjamo̧ ja̧ dachoro ni̧bämȩrȩ. Jabechji̧ dabadique cüdë dibë yo̧a̧ pio ju̧i̧ chjiari. 24Jabo oëra̧ jo̧rȩtadëchji̧vä pio coa chjiari. Dëdë, cüdë jäa̧rä judi, to̧bari̧ chi̧dëea̧täremȩrequededibe, jabo oëra̧ jo̧rȩtadëchji̧vä jabo. Jabechji̧ dibëa̧ ano̧mȩmi̧ darë chi̧dëeadërequededibe, jabo dibëa̧ jadü maearë chi̧dëearequededibe. Jabechji̧ ‘pio cüdë yo̧a̧rämo̧ cjo̧ro̧pea̧ chiadiro̧da’ quëna̧ jo̧rȩtadërequededibe. Jabechji̧ ca̧ jadünȩrȩ ca̧ oti̧. Ado ca̧ jadü tara, jabechji̧ jadü maearë ji̧mo̧ ja̧beparea̧rȩ. Jabechji̧ pio dibë nö̧ta ëba ja̧bepamȩrequede pio mȩnȩro̧ ji̧dë ma chjuari̧ cjiami̧ dari̧ cjiapea̧ oa, coëma cjiari̧ cjo̧ro̧pea̧ oa, ma̧ chiadëri̧ cjiaji̧ri̧rȩ cjo̧ro̧pea̧ oa.
Currently Selected:
Cori̧tio Ma̧ȩ 2 1: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
