Cori̧tio Ma̧ȩ 1 13
13
Earea̧ üdë a̧dë chjäte ba chiade
1Aja̧ ca̧ oti̧, ado cja̧rȩmo̧ no̧mi̧ darä cjo̧ro̧pea̧ pio ju̧i̧ chjiari go̧ȩpatämi̧ cjiarequededibe. Danȩrȩ, cüdë pumȩ pio ji̧ri̧iäpȩmo̧ eadëmȩrȩ ni̧bärä judi, jabechji̧ goaedëtäremȩdejȩrȩ. Tjamo̧ davä. Cüdë ni̧bärea̧ ma̧ȩ chjö̧na̧i̧ oa ni̧bärea̧ chiamȩborë, chiri oëra̧ti̧ oa cjo̧ro̧ji̧ri̧ pio ji̧ri̧ ja̧ ni̧bärea̧ ma̧ȩ chjö̧na̧i̧ oa ni̧bärea̧ chiamȩborë, a̧dëräpȩ cjiaji̧ri̧ mu̧i̧tjoi̧ pio ji̧ri̧ ja̧ ni̧bärea̧ ma̧ȩbo ni̧bärea̧ chiamȩborë, jabechji̧ tjamo̧ri̧ a̧dorea̧ dadë matäremȩrequedejȩrȩ pumȩ ji̧ri̧ cüdë pio ji̧ri̧ ea tjamo̧dëmȩrȩ ni̧bärä judi. Tjamo̧ davä. Pio ji̧ri̧ eadëmȩrȩ ni̧bärä judi, jabechji̧ badëri̧ cjiadiätäremȩrequedejȩrȩ. Jabomo̧ gädä gädä eami̧ ta̧rëri̧ cjiadiätäremȩde ca̧ ma̧ȩ üdë, cüdë pio ji̧ri̧iäpȩmo̧ tjamo̧ri̧ eadëmȩrȩ ni̧bärä judi. 2Ado danȩrȩ, cüdë Ütërë ea jana̧ chjadüa̧ oa ni̧bärea̧ chiamȩborë, pio jiro ma̧ȩ chjö̧na̧i̧ oa areiarea̧mi̧ dari̧ ni̧bä chjaorea̧ chiamȩborë, jabo ca̧ pumȩ pio ji̧ri̧ tjamo̧ri̧ eadëmȩrȩ ni̧bärä judi, jabechji̧ badë matäremȩde. Tjamo̧ davä. Cüdë goadia̧ oa cjiarërea̧ ma̧ȩ chjö̧na̧i̧ oa dabamȩborë, cüdë urëdi tjamo̧ oa jo̧rȩtarea̧ chjö̧na̧i̧ oa chiamȩborë, jabechji̧ badëri̧ ja̧bepatäremȩrequede cüdë ca̧ pumȩ pio ji̧ri̧ tjamo̧ri̧ eadëmȩrȩ ni̧bärä judi. Tjamo̧ davä ca̧ oti̧. Cüdë ca̧ pumȩ pio ji̧ri̧ tjamo̧ri̧ eadëmȩrȩ ja̧beparä judi, jabechji̧ badëri̧ cjiadiätäremȩrequede. Ado ta̧rëchji̧vä. Danȩrȩ, cüdë Ütë tjamo̧ pio ju̧i̧ a̧dë chjäte chjuari̧ quëna̧rea̧ chiamȩborë, Ütërë ana̧ri̧ tuti japarea̧mi̧ dari̧ quëna̧mȩrȩ goë cjo̧dërea̧ chiamȩborë, Ütë judi ga̧o̧ȩ oa ano̧ mire china̧ tänȩrea̧mi̧ dari̧ quëna̧mȩrȩ goë cjo̧dërea̧ chiamȩborë, jabechji̧ badëri̧ ja̧bepatäremȩrequede cüdë ca̧ pumȩ pio ji̧ri̧ tjamo̧ri̧ eadëmȩrȩ cjo̧ro̧rä judi. Tjamo̧ davä ca̧ oti̧. Cüdë ca̧ pumȩ pio ji̧ri̧ tjamo̧ri̧ eadëmȩrȩ ja̧beparä judi, jabechji̧ badëri̧ ja̧beparequede. Ado badëri̧ cjiadiäparequede peaja̧di. 3Ado pio ju̧i̧iä pio yoa ma̧ȩbo a̧de yo̧requededibe. Danȩrȩ, ca̧ea̧ chjö̧na̧i̧ oa cjäri̧ ja̧bomȩ pio ju̧i̧ yürümȩborë, jabechji̧ badëri̧ cjiadiätäremȩrequede ca̧ oti̧, cüdë pumȩ pio ju̧i̧ eadëmȩrȩ yürürä judi. Tjamo̧ davä. Ca̧ea̧ pio ju̧i̧ chjö̧na̧i̧ oa yürümȩborë, cüdë cjiadiädëri̧ yürümȩborë, jabechji̧ badëri̧ cjiadiätäremȩrequede pumȩ pio ju̧i̧ tjamo̧ri̧ eadëmȩrȩ yürürä judi. Ado danȩrȩ, cüdë yürüa̧ pio ju̧i̧ uëri yürürä judi, ca̧ icjara oa cjo̧dëra̧ cäapea̧ oa yürürä judi, cüdë quëna̧ oaiä cäatämi̧ cjiaji̧ri̧ pio ji̧ri̧iäpȩmo̧ yürürä judi, jabechji̧ cüdë ja̧di dari̧ japamȩborë badëri̧ cjiadiätäremȩrequede cüdë ca̧ pumȩ pio ji̧ri̧ tjamo̧ri̧ eadëmȩrȩ yürürä judi. Tjamo̧ davä. Cüdë eami̧ti̧ oa japea̧räbo, jabechji̧ badëri̧ cjiadiätäremȩrequede cüdë pumȩ pio ji̧ri̧ tjamo̧ri̧ eadëmȩrȩ japarä judi.
4Jabechji̧ o ji̧ri̧iäpȩmo̧ tjamo̧ri̧ eamȩ judi cjäri̧ri̧ cjiamȩrȩ dadejȩrȩ. Ma̧ chjua dadejȩrȩ. Chjaodëri̧ goëdëri̧ cjiape bagadëdejȩrȩ, jabo chjamȩrȩ dadejȩrȩ. Ado o judiro̧ goa oaiä, jabechji̧ goadi ërecjiadëdejȩrȩ jabo ‘chja ja̧di goadiro̧da’ quëna̧ jo̧rȩtamȩrȩ dadejȩrȩ. Ado danȩrȩ, o ji̧ri̧iäpȩmo̧ tjamo̧ri̧ eamȩ judi, jabechji̧ pio jȩa chjiari chjacjiamȩri̧ ni̧bädëmȩde.
5Aja̧ ca̧ oti̧, o ji̧ri̧iäpȩmo̧ tjamo̧ri̧ eamȩ judi jibëa̧ chji̧rämo̧ jo̧rȩtadëmȩde, jabo o ji̧ri̧iäpȩmo̧ daea̧ ji̧, ‘jabechji̧ pio coa u̧i̧ ba chiadiro̧da’ quëna̧ jo̧rȩtamȩrȩ dadejȩrȩ. Ado oëadëmȩmi̧ darë jibëa̧ maea oa jo̧rȩtadëde, jabo o ji̧ri̧iäpȩmo̧ chjadëri̧ japa madejȩrȩ, pio ji̧ri̧ idëri̧ cjia tänȩdëri̧ cjiamȩrȩ. Ado pumȩ pio ji̧ri̧iäpȩmo̧ chjaodëri̧ ërecjiape bagadëdejȩrȩ, jabo jabechji̧ ma̧ chjua dadejȩrȩ. O judiro̧ pio jȩaiäpȩmo̧ chjai̧dëri̧ japaräbo ana̧ri̧ jo̧rȩtadëde, jabo jabechji̧ chjadëri̧ jo̧rȩtade, ma̧ chjupi̧ cjiari̧ jo̧rȩtamȩrȩ. Aja̧, goadi ërecjiadëmȩde jabo chji̧ goaera̧ jo̧rȩtamȩde.
6Tjamo̧ davä. O ji̧ri̧iäpȩmo̧ tjamo̧ri̧ eamȩ pio judi chjai̧dë pio ju̧i̧ darä ma̧ chiadëri̧ cjiamȩrȩ dadëdejȩ, jabo gitori̧ jo̧rȩtamȩrȩ dadejȩ. Jabechji̧ Ütë tjamo̧ pio ju̧i̧iä goae tjamo̧dë pio ju̧i̧ darä, peaja̧di goaedëri̧ dadejȩ. Jabo Ütë tjamo̧ pio ju̧i̧iä goae tjamo̧mȩ pio ju̧i̧ darä, jabechji̧ goae tjamo̧dejȩ pio ju̧i̧iä. Ado pio ju̧i̧iä jabechji̧, ma̧ chiadëri̧ cjiari̧ jo̧rȩtade jibëa̧ pumȩ judiro̧ coëma cjiari̧ cjo̧ro̧a̧ oaiä. Aja̧, ja̧di dari̧ jo̧rȩtade, jabo jibëa̧ pumȩ judiro̧ jiada̧ oaiä gitori̧ jo̧rȩtade.
7Aja̧, o ji̧ri̧iäpȩmo̧ tjamo̧ri̧ eamȩ judi, jabechji̧ pio jȩaiäpȩmo̧ chjadëri̧ japadëräbo ma̧ chjua jo̧rȩtamȩrȩ dadejȩrȩ, ji̧dë ma cjäri̧ri̧ cjia damȩrȩ. Tjamo̧ davä. Pio ji̧ri̧ darä, ‘Jabo cjäri̧ madiro̧da, ba chiadëdiro̧da, jabechji̧ pio ji̧ri̧iäpȩmo̧ aeno̧paquiji̧ri̧da’ quëna̧ jo̧rȩtadëmȩde, jabo jabechji̧ ji̧dë ma järide davä pio ji̧ri̧ chjiari, ‘Aja̧, pio jiro pumȩ judiro̧ ba chiadiro̧da, ji̧dë u̧i̧ chjadëri̧ cjo̧ro̧rea̧ dapadiro̧da, ji̧dë u̧i̧ ütëchjai̧pe bagarea̧ dapadiro̧da’ quëna̧ jo̧rȩtamȩrȩ dapadejȩrȩ. Jabechji̧ ji̧dë ma chjuari̧ quëna̧dejȩ Ütë tjamo̧ ju̧i̧ jibëa̧ pumȩ pio ji̧ri̧ chjadëri̧ jëdano̧pea̧ pio ju̧i̧ chjiari. Ado danȩrȩ, pumȩ judiro̧ pio jȩaiäpȩmo̧ ma̧diä ma̧diä cjia tänȩräbo, jabechji̧ ma̧ chjua jo̧rȩtamȩrȩ dadejȩrȩ, ‘ütëchji̧pe järea̧ dadëpadiro̧da, ji̧dë ma ade cjiami̧ dari̧ cjiapadiro̧da’ quëna̧ jo̧rȩtadëmȩrȩ.
8Danȩrȩ ca̧ oti̧, earea̧ üdë a̧dë chjäte ba chiade. Tjamo̧ davä. O ji̧ri̧iäpȩmo̧ earea̧ üdë a̧dë chjäte ba chia tjamo̧de. Ado pio ju̧i̧iä yuropadëpade. Jabo ja̧beparea̧ üdë orë yuropapade. Tjamo̧ davä. Tjo tjamo̧ judi yürürërea̧ ja̧beparea̧ üdë, quëna̧ji̧ri̧ pio ji̧ri̧iäpȩmo̧ jauëchja cjiari̧ yürürërea̧ üdë orë, jabechji̧ goarijäpade. Danȩrȩ, Ütërë ea jana̧ chjadüa̧ oa ni̧bärea̧ üdë yuropapade. Ado tjaoë ma̧ȩ oa ni̧bärea̧ üdë, pumȩ judiro̧ dabapadëa̧ ma̧ȩ oa ni̧bärea̧ üdë peaja̧di goarijäpade. Ado dabarea̧ üdë, Tjo tjamo̧ judi quëna̧ji̧ri̧ pio ji̧ri̧iäpȩmo̧ jauëchja cjiari̧ yürürërea̧ dabarea̧ üdë, peaja̧di yuropapade. Tjamo̧ davä, yuropapade, jabo earea̧ üdë, cjäri̧ made, yuropadëpade. Bucho ana̧mȩde. 9Jabechji̧ ca̧ oti̧, a̧ro̧rȩ chjö̧na̧i̧ oa chjadëri̧ dabatärea̧ ji̧, a̧ro̧rȩ pio yaba̧mȩ yoaiä chjö̧na̧i̧ oa chjadëri̧ dabatärea̧ ji̧, jabë dabapadärärea̧ dadërea̧rȩ. Jabë chjö̧na̧i̧ oa dabarea̧ yürüdëa̧diibe Ütë tjamo̧ judi. Jabechji̧ Ütërë ea jana̧ chjadüa̧ oa ni̧bäji̧ri̧ pio judiro̧ ni̧bä chjaoa̧ üdë tjamo̧ri̧ nö̧tadëde. Jabë pjärämȩde. Ado pio ju̧i̧iä o oamo̧i̧ oa dabarea̧rȩ. Orë pjärämȩ cjiadiäde. 10Jabo nö̧tadäräri̧ dabarea̧ üdë ma̧na̧rä, jabechji̧ nö̧tadäräri̧ cjiadëmȩ pio judi yuropapade. 11Danȩrȩ ca̧ oti̧, pio yaba̧mȩ yoaiä jabë bori̧mi̧ dari̧ cjiarea̧rȩ a̧ro̧rȩ chjadëri̧ dabadë tara. Jabechji̧ no̧mȩ tjamo̧ri ja̧ a̧ro̧rȩ bori̧rërea̧rä, ibëa̧ icjara üdë jabë bori̧rërea̧rä, jabechji̧ bori̧ pio judiro̧mi̧ dari̧ ni̧bärëreji̧ri̧rea̧rȩ. Bori̧ pio judiro̧ jo̧rȩta̧mi̧ dari̧ jo̧rȩtarëreji̧ri̧rea̧rȩ. Jabo a̧ro̧rȩ üi̧padäräa̧rä, jabechji̧ a̧dë tjaoëpea̧rea̧rȩ. Tjamo̧ davä. Bori̧ pio judiro̧ jo̧rȩtami̧ dari̧ jo̧rȩtarërea̧ ji̧, bori̧ pio judiro̧ japami̧ dari̧ japarërea̧ ji̧, jabechji̧ pio jiro jo̧rȩtarërea̧ pio ju̧i̧ a̧dë jo̧rȩtaji̧ri̧pea̧rea̧ro̧jo̧ȩ tjaoëpai̧ dari̧ jo̧rȩtapea̧ oa, üi̧padäräa̧mȩ pio judimi̧ dari̧ ano̧ mire cjo̧ro̧pea̧ oa. 12Danȩrȩ ca̧ oti̧, a̧ro̧rȩ pio yaba̧mȩbo jabë bori̧mi̧ dari̧ cjo̧ro̧rea̧rȩ a̧ro̧rȩ Ütë tjamo̧ pio ju̧i̧ chjiari jabë nö̧tadäräri̧ dabadë tara. Jabechji̧ dabu chiamȩ dacho darea̧rä dami̧ dari̧ dabarea̧rȩ. Gämi̧ chami̧ dari̧ dabarea̧rȩ, burëmi̧ chami̧ dari̧. Bagönȩrä dami̧ dari̧ dabarea̧rȩ. Jabo ütara̧ doro, a̧ro̧rȩ chjadë maearä dami̧ dari̧ dabaparea̧rȩ ado cja̧rȩmo̧ pumȩ oa irä dëbë daji̧ri̧mi̧ dari̧. Jabechji̧ a̧ro̧rȩ gämi̧ chami̧ darä dabarërea̧ ji̧, a̧ro̧rȩ dabu chiamȩ dacho darea̧rä dami̧ dari̧ dabarërea̧ ji̧, jabechji̧ nö̧tadäräri̧ dabarea̧ daparea̧rȩ. Jabechji̧ pio jiro doro Ütë tjamo̧ judi nö̧tadäräri̧ dabarea̧ yürüpadiibe pio jȩa chjiari. Danȩrȩ, Ütë tjamo̧ judi pio ibë chjiari chjö̧na̧i̧därä oa dabade peadëri ja̧. Ado pio jȩa chjiari peaja̧dimi̧ dari̧ dabapea̧ oa dabarea̧ yürüpadiibe, a̧ro̧rȩ peaja̧di nö̧tadäräri̧ dabarea̧ chiapea̧ oa, a̧ro̧rȩ irä dëbë daji̧ri̧mi̧ dari̧ dabarea̧ chiapea̧ oa. 13Ja̧di tara yo̧requededibe ca̧ oti̧. Tjarari̧de bucho ana̧ cjiadiäpamȩ üdë. Tjarari̧de yuropadëpamȩ üdë. Jabechji̧ Ütë tjamo̧ pio ju̧i̧iäpȩmo̧ quëna̧rea̧ üdë cja̧rȩmȩde. Ado Ütë tjamo̧ pio ju̧i̧ chjuari̧ quëna̧mȩrȩ jidatarea̧ üdë, judi pio ibë chjiari japapea̧ pio ju̧i̧ jidatarea̧ üdë peaja̧di cja̧rȩmȩde. Ado ibëa̧ dëbëti̧ra̧ chia earea̧ üdë peaja̧di cja̧rȩmȩde. Jabo danȩrȩ, ji̧dë u̧i̧ ba chiamȩ üdë, jabechji̧ earea̧ pio judide. Tjamo̧ davä. Ji̧dë u̧i̧ ba chiade earea̧ üdë. A̧dë chjäte ba chiamȩ pio judide. Ado pio ju̧i̧iä pio jiro no̧mi̧ darä cjo̧ro̧tä earequededibe ca̧ oti̧, mȩnȩro̧ dibëa̧ pumȩ chjadëri̧ a̧dopea̧ oa, Tjo tjamo̧ judi dibë yürüa̧ra̧ pio ju̧ri̧ra̧ chjadëri̧ ja̧bepapea̧ oa. Aja̧, dibëa̧ pumȩ pio ji̧ri̧ tjamo̧ri̧ earea̧mi̧ da no̧rä cjo̧ro̧tä eamȩrȩ go̧ȩparequededibe.
Currently Selected:
Cori̧tio Ma̧ȩ 1 13: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
