DOSECHO 9

Saudo quedeiyenteje yä’dö’jödö

1Yaawä Saudo quedeiyente maminchadööcomooje dea cönä’jaacä, tämaane’jödöödä. Töwö cöntämä Wanaadi wwä töwa’deuwaamo edhaajotoncomo döiña. 2Jajeeda imennaajä cöne’catäi chäwwä Damaacu ña töötotoojo quedeiyente ujiiyeiñe, Jeduusadén ña jedeesoje eneejödööcomo wetä yaawä, dhanwaacomo, wodiiñamo mmaja. 3Yaawä ääma tai töötädaawä, Damaacu ña ä’döjai töwä’döa’jäcä, jadheedä tawaanato cönäänejoi dhawoodhecääcä. 4Yaawä Saudo cöne’duccai nono jo; a’deu cönäätaacä chäwwä:

—Saudo, Saudo, ¿ane’cotoojo cuyuunacaanä? quee cönäätaacä.

5Yaawä Saudo cönä’döaacä:

—¿Änääcö amäädä Cajiichaana? quee.

Yää a’deu cönääta’dea yaawä:

—Jesuuquidiito öwö, ñäädä miyuunacaadö dea. Amäädä dea adheecone’ma, jaaca tuju’yu’motoojo töjoosa’dato etaaja’jäcä chäwwä töwoije dea töwäätunui’chä töweiye naichöje mmaja; quee cönä’döaacä.

6Saudo cöntätä’nöngacä yaawä tösaccomje. Töwö cönä’döaacä:

—Cajiichaana, ¿ane’cäämö tödööjo’se manä öwwä? quee.

Yaawä Cajiichaana cönä’döaacä chäwwä:

—Aanöncä; jataaca äjääne. Yäätä töweiye na äwwä ecammanei; quee.

7Ñanno Saudo jadoncomo jooje cönääcatoncaicho. Wa’deunä mmä cönäätaacä chäwwäiñe, soto ääne’da yeichaame. 8Yaawä Saudo cönammöi; töwäänushiicha’jäcä ääne’da cönä’jaacä chämjataawä. Damaacu ña cönaadoicho yaawä töjämjäcäiñe. 9Yäätä Saudo cönä’jaacä aaduwaawä anooto, tänuuque’da. Ääwashinchä’da cönä’jaacä, töwoocödö aneenö’da mmaja.

10Yäätä Damaacu ña cönä’jaacä quedeiyente, Aananía täätö. Ñäädä wwä Cajiichaana cönäänejoi iwäänetöödö ai; cönä’döaacä chäwwä:

—Aananía; quee.

Ñäädä cöneccujä’acä:

—Eetä wa, Cajiichaana; quee.

11Yaawä Cajiichaana cönä’döaacä chäwwä:

—Ääma’täcä; äjääne Juudha mmai chaca, yää Sa’donnato Ääma taawä naichö. Ecamma’jocä Saudo Taadoso ñano jäcä; töwö Wanaadi wwä wa’deunäje na. 12Töwö Saudo töwäänetöödö ai cöneeneaacä dhanwa tödöiña yeejödö, Aananíaje chäätö; cöneenea’dea Aananía wwä tamäädö tödöödö töde’cäcä, töneene töwä’dödö wetä; quee cönä’döaacä Cajiichaana Aananía wwä.

13Yää eta’jäcä Aananía cönä’döaacä:

—Cajiichaana, ñäädä ecaadö töneeta wäänene Jeduusadén ña conemjönö iiñödö adheecanö’nnamo jäcä. 14Eduuwa sadä ye’ajä na jajeeda imennaajä dha’me, Wanaadi wwä töwa’deuwaamo nutuudu chäwwä, tameedä adheecanö’nnamo jedeesoje adooto’como; quee cönä’döaacä Aananía.

15Yaawä Cajiichaana cönä’döaacä:

—Äjääneene; öwö weiñä ñäädä ya’deddu ecammaneije töweiyemööje tameedä soto wwäiñe, cajiichaanacoomo wwä, iisadaaediitacoomo wwä mmaja. 16Chäwwä weneeja’de jääcäinchädä yäntunaanö’tojo; quee cönä’döaacä Cajiichaana Jesuuquidiito Aananía wwä.

17Yääje mma yaawä Aananía cöntämä yaawä Saudo e’saca. Töwoomonga’jäcä tamäädö cönnöi Saudo de’wä; cönä’döaacä chäwwä:

—Weichacoono Saudo, Cajiichaana Jesuuquidiito yaanontäi sadä adöiña, ñäädä ääma tai aweejödaawä äwwä cönäänejoichö. Töwö yaanontäi töneene äwä’dödö wetä, Epíiditu Santo jäduudu ’je äwä’dödö wetä mmaja; quee cönä’döaacä Aananía Saudo wwä.

18Yaawä dea mma na’cwacaano cädääji’jä nönge cöne’duccai Saudo enuudu jäconno; töneene cönä’döi yaawä. Wautisaaje cönä’döjoi yaawä. 19Yää ’jeje töwääwashincha’jäcä cönaadoncai yaawä. Töwö äächädä anooto mma Damaacu ña cönä’jaacä yaawä quedeiyentecoomo jadäiñe.

Damaacu ña Saudo necammajäätö’jödö

20Yaawä we’jummatoojo waadäi Saudo cönaajäntäi Wanaadi nnedööje Jesuuquidiito weichö ecammajäätödö. 21Tameedä etannamo’jödö cöneeta’jöjäätöicho; cönä’döa’to:

—¿Ñäädäjöönö ca määdhä ecaanö’nnamo Quidiito tömmaminchäiñe cönä’ja’dö Jeduusadén ña? ¿Mädääjatooje dea jönca sadä cöneejä Quidiito sotoi jedeesoje adääneichomooje Wanaadi wwä töwa’deuwaamo edhaajotoncomo döiñaiñe? quee cönä’döa’to ñanno soto Saudo jäcä.

22Yääje yeichaame Saudo jooje’cä mma töneecammajä’e cönä’jaacä Jesuuquidiito Äwaanacaaneije yeichö. Töwö judhío Damaacu ñancomo töneeta’jöichajoojä’eiñe cönä’jaacä.

Judhío jonnoiñe Saudo wääneje’jödö

23Yääje mma yaawä jooje anooto yä’döa’jäcä judhío cöna’deuwöicho Saudo emaadö a’de’tädö wetä. 24Yaawä Saudo cöneetaacä täma’se yeichöcoomo. Tönwanno judhíocoomo Saudo cöniiñoshincha’to jata nata’tajo ano, coijai’jödöödä, yeeja’cadö womoocödööje, emaadö wetä yaawä. 25Yaawä quedeiyentecoomo coijai Saudo cöneenö’toicho wöwa aca, jata cudaadai ejoodhacääcä. Mädääje Saudo cönäänejei judhío jonnoiñe.

Jeduusadén ña Saudo wei’jödö

26Yaawä Jeduusadén ña töwä’döa’jäcä Saudo töwoojodö’se cönä’jaacä quedeiyente jadäiñe. Ñanno mmaane tösaade cönä’ja’to; aneecamjö’da cönä’ja’to quedeiyenteje yeichö. 27Yaawä Waanawé cönaadäi anonta’como döiñaiñe. Töwö cöneecammajäätöi chäwwäiñe ääma tai yeejödaawä Jesuuquidiito ene’jödö Saudo wwä, chäwwä Jesuuquidiito wa’deuwö’jödö mmaja. Damaacu ña tösaade’da Saudo necammajäätö’jödö mmaja Waanawé cöneecammajäätöi chea anonta’como wwä. 28Yaawä Saudo cöno’nomjoi Jeduusadén ña; chääjadäiñe töwäämannä’e töweiye cönä’jaacä. 29Töwö jäduuje töneecammajä’e cönä’jaacä Jesuuquidiito jäcä. Töwö töwa’deujä’e cönä’jaacä judhío jadäiñe, ñanno quidiiyeeco a’deucwa’como; töwäätäccujä’e mmaja cönä’ja’dea chääjadäiñe. Saudo ema’se mma ñanno cönä’ja’to yaawä. 30Yaawä Saudo ema’se yeichöcoomo eta’jäcä quedeiyentecoomo cönaadoicho Seesadeea ña; yäätonno Taadoso ña cönenno’jaicho.

31Yaawä tameedä Quidiito sotoi täncanoode’da cönä’ja’to; jäduujeiñe cönä’ja’to dea, ñanno Judheea ñancomo, Caadideea ñancomo mmaja, Samaadiya ñancomo mmaja. Tönwanno tönoiñe Cajiichaana Jesuuquidiito töneene cönä’ja’to. Epíiditu Santo ni’wa’tädö que jooje cöneejanga’to.

Eneea adonca’jödö

32Yaawä Peedhodo cönäämannä’acä quedeiyentecoomo emmencancädäiñe; cönä’döi yaawä Diida ña. 33Yäätä dhanwa cöneedantäi, Eneea täätö. Tä’wötö jo dea mma ñäädä töweiye cönä’jaacä secumje töweijäcä; aaduwaawä amoojato wedu chäädäicha’jödö cönä’jaacä. 34Yaawä Peedhodo cönä’döaacä chäwwä:

—Eneea, Jesuuquidiito adhaadonca. Aanöncä; adhe’wötö imoncä; quee cönä’döaacä.

Yaawä dea mma ñäädä cönammöi. 35Tameedä Diida ñancomo, Sadón ñancomo mmaja cöneenea’to. Tönwanno töwäätunnäichomo cöne’nomjaicho yaawä Cajiichaana Jesuuquidiito ecamjödö wetä.

Töwäämaajo jonno Doodaca waadonca’jödö

36Yaawä Joope ña cönä’jaacä wodi. Quedeiyenteje töwö cönä’jaacä, Tawiitaje chäätö; Doodacaaje mmaja chäätö cönä’ja’dea, quidiiyeeco a’deucwe. Ñäädä Doodaca jooje aashichaato tönnöe cönä’jaacä; weiñäje wentumja’como töni’wa’täiñe töwö cönä’jaacä. 37Yaawä Doodaca cöncädäichai; cönäämai yaawä. Chääquejöödö töjöödö’jo ijimmä’jödö acä’jaajä taca cönnöicho yaawä, taawa de’wä. 38Yää Joope ñano cönä’jaacä amoinche’da Diida ñano jäcä, Peedhodo cönä’ja’dö döiña; yääje yeijäcä Diida ña Peedhodo weichö eta’jäcä ñanno quedeiyentecoomo aacä dhanwaacomo cönaanontoicho Peedhodo döiña. Ñanno cönä’döa’to Peedhodo wwä:

—Ma’da’cä Joope ña ma’chomo; quee.

39Yaawä Peedhodo cöntämä chääjadäiñe. Iiña töwä’döa’jäcä ñanno quedeiyente cönaamonno’joicho chääquejöödö döiña. Yäätä cönä’ja’to wodiiñamo, iiño wä’jajo’jödö. Tönwanno cönaamoa’to; cöneenejoojä’a’to tameedä nudä töweichö Doodaca nishoocajäätö’jödö. 40Yaawä Peedhodo cömja’canö’jojäätöicho jödo’na. Tä’mudhe töwö cönä’döi; Wanaadi wwä cöna’deuwöi. Yaawä yäämaajä ene’mancädä cönä’döaacä:

—Aanöncä, Tawiita; quee.

Ñäädä wodi cönäänushiichai yaawä; Peedhodo eneea’jäcä cönä’jäi yaawä. 41Peedhodo cönaajäi yaawä dhamäädö jäcä. Yaawä Peedhodo quedeiyentecoomo cöna’dejjaicho, iiño wä’jajo’jödö mmaja; nudä cöneenejoi chäwwäiñe. 42Yää cöneecatai yaawä tameedä Joope ñano weichö wa’cä. Jooje soto Cajiichaana cöneecamjöicho yaawä. 43Yäätä Joope ña Peedhodo cönä’jaacä äächädä anooto mma, Simón mmai chaca, ñäädä iji’jä choonecaanei mmai chaca.

Currently Selected:

DOSECHO 9: MCH

Highlight

Copy