DOSECHO 8

Saudo wwä Quidiito sotoi mamincha’jocoomo

1Saudo wacö’je Eteewa cöneemaicho. Yää anooto awä soto cönaajäntoicho tumjunne’da Quidiito sotoi Jeduusadén ñancomo maminchadööcomo. Yaawä tameedä ñanno Quidiito sotoi cönäämecantoicho Judheea ña, Samaadiya ña mmaja; anonta’como mma yäätä Jeduusadén ña cönä’ja’to. 2Anejjacoomo soto aashicha’como Eteewa cöneewaacaicho; jooje cönaamoa’to ijunnei. 3Ñäädä Saudo Quidiito sotoi maminchadööcomooje cönä’jaacä yaawä. Ä’sa waadäi töwoomonge cönä’jaacä; tö’ji’che tömja’ca cönä’jaacä dhanwaacomo, wodiiñamo mmaja, jedeesoje adoojodööcomo wetä yaawä.

Samaadiya ña aashichaato wätunnä ecammajäätö’jödö

4Ñanno Quidiito sotoi, Jeduusadén ñanno cönäämecantoichodö aashichaato wätunnä cöneecammajä’a’to tameedä anejja jataacä töwä’dödööcomo waadäi. 5Yaawä Jediipe, ñanno yäämecanta’como jimmotoncomo, cöntämä Samaadiya ñano jataaca. Iiña soto wwäiñe Jesuuquidiito jäcä cöneecammajä’acä. 6Tameedä soto töwe’jumma cönä’ja’to Jediipe necammajäätödö eta; töneene mmaja cönä’ja’to dea aashichaato iiñödö. 7Jooje odo’sha ’ja’como cönaadoncaicho; töcä’tömjä’ancädäiñe soto acanno odo’sha töweeja’ca cönä’ja’to. Cönaadoncaicho dea jooje änönnä’ja’como, secumja’como mmaja. 8Yääje yeijäcä ta’cwaiñe cönä’ja’to tameedä yää jataawoncomo.

9Yäätä dhanwa cönä’jaacä Simón täätö. Töwö tö’waichö que Samaadiya ñancomo tönencu’täiñe töweiye cönä’jaacä; täneejuque töwäätä’tä cönä’ja’dea. 10Tameedä soto dha’deddu töneeta cönä’ja’to, täneejuca’como mmaja, ema’jocoomo mmaja. Tönwanno töwä’döe cönä’ja’to:

—Määdhä ñäädä Wanaadi jäduudu ’jano; quee.

11Tönwanno dha’deddu töneeta cönä’ja’to numa tö’waichö que täncu’to’jocoomo weijäcä. 12Yaawä Wanaadi töcaajichaanaije tödöödö jäcä Jediipe necammajäätödö eta’jäcä töwwäiñe, Jesuuquidiito ecammajäätödö eta’jäcä mmaja, ñanno soto cöneecamjöicho; wautisaaje cönä’döjoicho yaawä, dhanwaacomo, wodiiñamo mmaja. 13Simón mmaja cöneecamjöi chea. Yaawä wautisaaje töwä’döja’jäcä Jediipe jadä töwäämannä’e cönä’jaacä. Tönoiñe töneene cönä’jaacä aashichaato tödöödö chäwwä, ene’ju’tojo tödöödö mmaja.

14Yaawä anonta’como Jeduusadén ñancomo cöneeta’to aashicha Wanaadi a’deddu ecammajäätödö eta’jödö Samaadiya ñancomo wwä; yääje yeijäcä iiña cönaanontoicho Peedhodo, Juan mmaja. 15Peedhodo wä’döa’comjäcä tönwanno Wanaadi wwä cöna’deuwöicho Samaadiya ñancomo quedeiyentecoomo jäcäiñe, Epíiditu Santo ’je yä’dödööcomo wetä, 16Epíiditu Santo ’je’da dea yeichomjäcä, chääjäcäiñe ä’tä’da dea yeijäcä; wautisaaje mma cönä’ja’to Jesuuquidiito eetö joi. 17Yaawä Peedhodo, Juan tamäädöcoomo cönnöicho ye’cäcäiñe; Epíiditu Santo ’je ñanno cönä’döicho yaawä.

18Simón cöneeneaacä Epíiditu Santo ’je soto wä’dödööcomo anonta’como wwä tamäädöcoomo ye’wäiñe tödöödö que. Yaawä töwö jödaata cöneecammaacä anonta’como wwäiñe; 19cönä’döaacä chäwwäiñe:

—Öwwä änne’täcääde mädä tödöötojo, öwö yaamädö tödööa’jäcä Epíiditu Santo ’je soto ä’döiyetoode; quee cönä’döaacä.

20Yaawä Peedhodo cönä’döaacä chäwwä:

—Ajöödatai nännanö’a’de ajaadä dea. Amäädä ätö’tajä’a täjeemaamö atäi mädä Wanaadi nutuudu. 21Odhoowanoojönö mädä, äwwonoojönö mmaja. Ätö’tajäätödö chäänönge’da na Wanaadi owaadäädä. 22Ätö’tajäätödö sha’duminchacä mädä ocoone’nadiiyö jonno; Wanaadi wwä adha’deucwä, töwö encwanno’joiye mädä ätö’tajä’aadö. 23Yoowanääcä na jooje tö’neiñe aweichö, ocoone’nadiiyö awä töwaatashiichuudä aweichö mmaja; quee cönä’döaacä Peedhodo Simón wwä.

24Yaawä Simón cönä’döaacä:

—Wanaadi wwä adha’deutäcä jääcä, yää mecammaatoodö mma ejucca’no jääcä; quee cönä’döaacä.

25Yääje mma yaawä töwa’deuwödööcomo’jo, Wanaadi a’deddu ecammajäätödö’jo mmaja, ñanno anonta’como cönennacaicho yaawä Jeduusadén ña, aashichaato wätunnä ecammajä’ancädä Samaadiya ñancomo jata cäcäiñe.

Jediipe acä Eetiyoopía ñano yei’jocoomo

26Yääje mma yaawä Cajiichaana amoodedö cöna’deuwöi Jediipe wwä; cönä’döaacä:

—Ääma’täcä; äjääne shii weja’catoojo suda’wawä, Jeduusadén ñanno Caasa ñano wötäädö tai; quee cönä’döaacä amoode chäwwä.

Yää äämä jata ’jemjönö chäcoono wötäädö. 27Jediipe cönääma’tai yaawä; ääma tai töötädaawä Eetiyoopía ñano acä cönoojodöi. Candaase sotoi cönä’jaacä ñäädä, emuucaajä. Täneejucaato töwö cönä’jaacä, Candaase jödaatai edhaajä. Ñäädä Candaase cönä’jaacä wodi, Eetiyoopía ñano cajiichaanai’chädö. Jeduusadén ñano’jödö yennacaadö ñäädä Eetiyoopía ñano cönä’jaacä, Wanaadi wwä a’deunei’jödö. 28Töjaatacäi yennacaadö cönä’jaacä yaawä Jediipe acä cönoojodöichodaawä. Tadaada de’wä cöntaacä, Isaía nimennä’jödö a’de’tancädä. 29Yaawä Epíiditu Santo cönä’döaacä Jediipe wwä:

—Amoinche’da äjääne tadaada jäcä; quee.

30Yaawä amoinche’da Jediipe wöta’jäcä töwö cöneetaacä Isaía nimennä’jödö a’de’tädö ñäädä wwä. Yaawä töwö cöneecamma’joi:

—¿Odhoowanääcä nai mädä ma’de’taadö? quee cönä’döaacä.

31Ñäädä Eetiyoopía ñano cönä’döaacä yaawä:

—Aaquene mmaja yoowanääcä eichö deeade’, yoowanoomanei töweiye yeichöjöönö; quee cönä’döaacä.

Yaawä ñäädä Eetiyoopía ñano Jediipe cönaajimaajoi tönnäcä tadaada de’wä.

32Edä Wanaadi a’deddu imennaajä töwö cöna’de’taacä:

Töwö cönaatadoojoi emaadö wetä oweeja adäädö töweiye naichöje;

äucwätä’da töwö cönä’jaacä, tö’jotö töcaadawä oweeja ecaadaucwa’da töweiye naichöje mmaja.

33Ema’jödööje cönä’döjoi chäwwäiñe; tönwanno chäänönge ännö’da cöneiya’to.

¿Änääcö dhatö’jödö ämme’cu’tädö deeade’ ?

tämaane emaatö’da chäwwäiñe; queeto

cöna’de’taacä ñäädä Eetiyoopía ñano.

34Yaawä ñäädä Eetiyoopía ñano Jediipe cöneecamma’joi:

—¿Änääcö ecammancädä yääje cömmennäi ñäädä Wanaadi wa’deuwödö ecammanei? ¿Tojääcä ’ja, anejja jäcääne? Ecammajä’cä öwwä; quee cönä’döaacä Jediipe wwä.

35Yaawä Wanaadi a’deddu imennaajä ñäädä na’de’tä’jödö jäcä Jediipe cönaajäntäi chäwwä ecammajäätödö Jesuuquidiito jäcä. 36Yaawä töwwäiñe tuna ija’dätäädawä ñäädä Eetiyoopía ñano cönä’döaacä Jediipe wwä:

—Edä na tuna; ¿aaquene eduuwa wautisaaje wä’döja’jäcä? quee cönä’döaacä.

37Jediipe cönä’döaacä chäwwä:

—Ätö’tajäätödö jadäädä ecaanö’a’jäcä, wautisaaje ä’döjoojai ma; quee.

Ñäädä cönä’döaacä yaawä:

—Wecaanö’a Jesuuquidiito Wanaadi nnedööje yeichö; quee.

38Yaawä tadaada cöneedennanö’joi; a’nädäncädä cönä’toicho na’cwaca, Jediipe, Eetiyoopía ñano mmaja. Jediipe wautisaaje cönnöi yaawä. 39Yaawä na’cwacanno töwäncudaawäiñe Epíiditu Santo Jediipe cönaadäi jadheedä; Eetiyoopía ñano aneene’da cöneiyacä yaawä. Ta’cwaiñe cöntämä yaawä. 40Jediipe mmaane Asooto ña cönäädantäi yaawä. Aashichaato wätunnä cöneecammajäätöi tameedä jata waadäi, Seesadeea ña töwä’dödö jonaane.

Currently Selected:

DOSECHO 8: MCH

Highlight

Copy