Romanos 7
7
Yai Bada bäma ecö
cublou lä nomöjöo wei tä a̦
1Iba wamacö. Bada bä bälöo lä dodijio wei bänö tä a̦ läblamaöje däjä, bäma tä a̦ nosie fuabä tä a̦ läblamaöje. Bämacö demi cuo showao däjä, bada bäma bä nosie fuabä bämacö. Bämacö nomaö däjä bämacö shi̦lo fujeblou. 2Suwä a lä cuinö, bä fe̦yalobö e nofi lä tabou weinaja showawä. “Afä a waiquiwä”, bada bä cuu ja, bä fe̦yalobö e a̦ nia showadi fuaö. Ö̦jö ma cui, bä fe̦yalobö e nomalayou ja, a wa̦ lä fuaö wei etä nia ca̦i mladou showadao. 3Ö̦jö cudeenö, bä fe̦yalobö e demi cuo ma showao däjä ma cui, ai a lija a cua majöblaquei ja, a wa̦fa nia joleblalou taöje. ¿Ö̦jö tawä? Ö̦jö ma cui bä fe̦yalobö e nomaö däjä, ö̦jö a wa̦ lä fuaö wei etä mladaliyo. Ö̦jö däjä, ai a lijamö a cuo ma majöo wei ma cui a wa̦fa nia tamoimi.
4¿Ö̦jö tawä, iba wamacö? Inaja showawä, Moisesi etä a̦ jamö wamacö jaba ma cuono wei ma cui, Cristo a lä nomalayono wei däjä, wamacö nomaö ca̦i yädäoma, cama lijamö wamacö yai cuo majöobä. A demi jocädamaö lä co̦layono wei a lä cui lijamö wamacö cua majöa, wamacö lä bejedimou wei tänö, Yai Bada wama a dodijidawä dablamabä.
5Yanowamö täbä showadi lä cuaaö wei tä ja, bämacö cuo showao däjä, bämacö shijilodou bufio fa mlacunö bämacö doblonomi. Moisesi tä a̦ ma läono wei ma cui, ö̦jö tä a̦ ja bämacö bufi shi̦lo yai balaa dicolayoma. Bämacö lä cuaano wei tänö, bämacö nomabä tä cuoma. 6Ö̦jö ma cui, Moisesi tä a̦ ja bämacö cuo mlaobä, fei däjä Yai Bada tänö bämalecö yai fujeblamalema. Ö̦jö tä a̦ ja, bämacö nia nosiemamou co̦daaimi. Täbä lä nomaoblou wei bä lä cui, täbä nosiemaö malä mlajei. Jaba tä a̦ mlai ja, fei däjä Yai Bada dude bäma tä a̦ nia shi̦lo yai fuaö majöo, Yai Bada tä Bufinö tä lä jimale jamö bämacö yai cuobä.
Tä wa̦lidiwä lä didile tä a̦
7Ja̦o. ¿Wedinaja bämacö cubä, ö̦jö lä? Moisesi etä a̦ lä cui, ¿bäma etä a̦fa nia wa̦lidiwä taö majöo daanö? Ma, bäma tä a̦fa nia wa̦lidiwä taimi. Ö̦jö tä a̦ cuo mlao fa cunoja, ya wa̦lidiwä nö ö̦jöböamobö mlai. ¿Ö̦jö tawä? “Wamacö bufi nia waiyoimi”, tä a̦ cuu mlao fa cunoja, ya bufi lä waiyou wei ya tä nö dabö mlai. 8Ö̦jö ma cui, Moisesi ya etä a̦ daö yalo, ya tä wa̦lidiwä lä didibole tä wawäblaliyo. Ö̦jö däjä abenaja ya bufi cuu majöo. “Shädayai. Bejedi lä ya bufi yai waiyou fe balojoo dicoo”, ya bufi cuu majöo. Moisesi etä a̦ läo mlao fa cunoja ya nö ö̦jöböamobö mlai.
9Moisesi ya etä a̦ daö showao mlao däjä, ya mojodi li cudalou balöoma. Ö̦jö ma cui, ö̦jö tä a̦ ja ya bufi fa jaducäblalunö, wa̦lidiwä tä ja ya bufi mö blucablou dicolayoma. Ya nia nomaö shi lä wa̦lii wei, ya tä daa majölalema. 10Demi bämacö cudiobä tä a̦ ma cuono wei ma cui, ö̦jö tä a̦ showawänö, ya nia nomaö shi lä wa̦lii wei tä yai wawäblaliyoma. 11¿Ö̦jö tawä? Ya tä wa̦lidiwä lä didibole tänö wale mölamalema, Moisesi tä a̦ ja. Ya nia lä bayeliblamou wei ya tä bufima ma cui, ya nia lä nomaö wei bei ya tä daa majöa dicolalema.
12¿Ö̦jö tawä? Moisesi etä a̦ lä cui, tä a̦ li yaia. Yai Bada tänö tä tamaö lä bufii wei tä a̦ bluca yaia. Tä a̦ bejedi. Tä a̦ dodijidawä. 13Ö̦jö ma cui, “Tä a̦ lä dodijidai tä a̦nö wale shälema”, ya cuimi. Ma. Wa̦lidiwä tänö, ö̦jö tä a̦ ja wale fa mölamalönö, wale yai shäa cadidilema. Ö̦jö tä a̦nö, ya doblou lä mlai ya tä nö yai ö̦jöböaö. Yai Bada tänö tä tamaö lä wasöö wei tä ja ya shijilodou lä mlai, ya tä yai wa̦lidiwä dablaö.
14Moisesi etä a̦ lä cui, Yai Bada tä Bufinö tä a̦ jibämoquema. Ö̦jö bäma tä daö. Ö̦jö ma cui, yanowamö bämacö doblou lä mlai, ö̦jö ya. Wa̦lidiwä tä ja ya jibämoquema. Ö̦jö tänö wale lofotobou. 15Ya lä cuaaö wei tä ja, ya bufi yai wedinajamou. Ya tä taö bufi lä doblao wei ya tä taö malä mlai. Ya tä nofi lä wa̦libou wei tä ma cui, ö̦jö ya tä taö fe yadio dicoo. 16¿Ö̦jö tawä? Moisesi etä a̦ dodijidawä. Ya tä a̦ nö bejedi ö̦jöböaö. Ya tä taö bufio lä mlai, ya tä taö si ijejewä malä dicoi.
17¿Ö̦jö tawä? Ya tä taö bufi lä doblao wei tänö, ya tä taö ma mlai ma cui, bei ya bufi jamö tä wa̦lidiwä lä läle tänö, wale bufi taamaö fa dicoonö, ya tä li taö. 18Ei ya tä malä dale. Yanowamö ya lä cui lija, tä lä dodijidai, wiisibö ma cui tä ca̦i didiami. Dodijidawä ya tä taö bufi ma doblao wei ma cui, ya tä nö tabimi waiquiwä. 19Dodijidawä ya tä taö bufi lä doblao wei ya tä taö malä mlai. Wa̦lidiwä ya tä taö lä moji wei, ö̦jö ya tä yai taö dicoo, bei cä ya bufi wa̦lidiwänö. 20Ya tä taö lä moji wei ya tä taö fe yadio dicoo ja, ¿wedi mayo li? Camiyä ya cuaaö bufi lä doblao weinaja, ya cuaaö malä mlai. Ma, bei ya bufi jamö tä wa̦lidiwä lä läle tänö, wale taamaö fa dicoonö, ya tä li taö.
21Showadi ei tä shi̦lo dablamou. Dodijidawä ya tä taö bufi doblao däjä, wa̦lidiwä tä lä cui tä lämou ajedeo. 22Yai Bada tänö tä tamaö lä bufii wei tä a̦ ja, ya bufi malä doblalou wei. 23Ö̦jö ma cui, camiyä lija tä shomi lä didile, showadi ya tä lämou dablaö. Ya cuaaö bufi lä doblao wei tä ja, showadi a li läo. Wa̦lidiwä ya tä lä didibolenö wale lofotobou.
24Ya nö yai beblalodii. ¿Wedinö wale nia yai bayeliblaö, ö̦jö lä, showadi ya lä cuaaö wei tänö ya nomaö mlaobä? 25Wedinö mlai, ¡Yai Badanö! Ö̦jö lija ya bufi a̦fa doblalou wäyämou. Ya nö beblalou mlaobä, Bada tä Jesucristo lija ya bayeliblamou. ¿Ö̦jö tawä? Abenaja camiyä ya cuwä. Yanowamö ya lä cui, wa̦lidiwä tä ja ya wa̦ fuobä ya waiquiwä ma cui, bei ya bufi dude lä cuinö, Yai Bada ya wa̦ fuaö bufi doblao.
Currently Selected:
Romanos 7: GUU
Highlight
Copy
Compare
Share
Want to have your highlights saved across all your devices? Sign up or sign in
©2012, All Rights Reserved