Romanos 6
6
Jesucristonö bämalecö
demi lä tamabou wei tä a̦
1Ja̦o. ¿Wedinaja bämacö cubä, ö̦jö lä? Yai Bada tänö no mlai ja bämalecö nofi nia ojodabou fe yadio cudeenö, ¿wa̦lidiwä tä ja bämacö nia cudio bädao daanö? 2¡Ma! Wa̦lidiwä tä ja bämacö nia cudiomi. Wa̦lidiwä tä ja bämacö luluamou co̦dao mlaobä, Jesucristo lija bämacö nomaa malä yädälayono wei. 3Jesucristo lija bämacö lä yädäle bämacö lä cui, a lä nomalayono wei tä ma cui ja bämacö yädäa. Wama tä malä dale. 4¿Ö̦jö tawä? Bämalecö fa yädämacönö, Cristo a nomabä jamö bämacö nomaa yädälayoma. A nomawä lä didiqueno wejei jamö ma cui, bämacö ca̦i didio yädäoma, a demi lä jocädono wei tä jamö bämacö ca̦i yädäblou mö feduo showaobä.
¿Ö̦jö tawä? Bä Fö̦ö e lä doblale etä lofotenö a demi jocädamaö lä culayono weinaja, inaja showawä camiyä dude bämalecö ca̦i tablamaö mö fedulayoma, bämacö showadi lä cuaano wei bäma tä bufiblaö co̦o mlaobä. 5A lä nomalayono wei tä jamö, cama lija bämacö yädäa waiquia ja lä, a demi lä jocädaliyono wei tä ma cui ja, bämacö nia yädäblou mö malä feduo wei.
6Ei bäma tä malä dale. Fii balitama tefi ja Jesucristo a lä shäleno wejei däjä, wa̦lidiwä bämacö bufi lä cui, ö̦jamö lä bämacö bufi ca̦i shämoa yädälayoma. Wa̦lidiwä tä jamö bämacö showadi yädäo bufi lä doblao wei, bämacö bufi waiquidou showadaobä. ¿Ö̦jö tawä? Wa̦lidiwä tä ja bämacö luluamou co̦daaö mlaobä. 7Täbä lä nomaö wei bä lä cui, wa̦lidiwä tä ja bä luluamobä bä malä mlai. Bä fa nomalönö, bä nia lä cuaaö wei etä mladou showadao. Wa̦lidiwä tä ja bä li fujeblamolayou.
8¿Ö̦jö tawä? Inaja showawä, Cristonö bämalecö ca̦i nomaa waiquilayoma ja lä, demi bämalecö ca̦i nia cuo mö feduo. Inaja lä bämacö bufi cuu. 9Cristo a demi jocädou fa co̦lonö, a nomaö co̦daaö mlaicätä. A nomabä ami. 10A nomaö däjä, wa̦lidiwä tänö bämalecö lofotobou mlaobä a li nomalayoma. A nia nomaö co̦daaimi. Fei däjä a demi lä cule Yai Bada tä bufi doblamabobä a li demi. 11Cafä wamacö ma cui, inaja showawä wamacö nofi tamobou mö feduobä. Nomawä anö, wa̦lidiwä tä nofi nö jaducäbobö lä mlainaja wamacö cuobä. Jesucristo lija wamacö cua yalo, cafä wamacö ma cuinö, Yai Bada wama a bufi ca̦i doblamabou mö feduobä.
12¿Ö̦jö tawä? Ö̦jö cudeenö wa̦lidiwä tä ja bä noshi da umlao, wamacö bufi lä waiyou wei tänö wamacö icuamaö dicoo mlaobä. 13Bei wamacö mamocu ma cui, wamacö caficö ma cui, wamacö yömöcacö ma cui, wamacö lä bayucui bä noshi jödödöwä da umlao. Wa̦lidiwä wama tä tabä wamacömi. Yai Bada lija wamacö noshi yai ö̦jödaobä. Wamacö nomabä wamacö ma cuono wei ma cui, ba̦limi wamacö cuobä wamacö tablamalema. Ö̦jö cudeenö wamacö yai bejedimobä, Yai Bada lija bä jödödöwä da jibäamo. 14Wa̦lidiwä tä lä cuinö wamacö luluaö fe yadiobä wamacömi. Moisesi tä a̦ ja wamacö nosiemamobä wamacö malä mlai. Fei däjä Yai Bada tänö no mlai ja wamacö nofi lä ojodabou wei wama tä a̦ nofi shi̦lo yai mölabou malä majöle.
Yai Bada lija bämacö
lä nosiemamou wei tä a̦
15¿Wedinaja tawä? Moisesi tä a̦ ja bämacö nosiemamobä bämacömi cudeenö, fei däjä ¿wa̦lidiwä bäma tä nia shi̦lo taö daanö? Yai Bada tänö no mlai ja bämalecö nofi ojodabou waiquiwä yalo, ¿“Cuaaö buo”, bämacö nia cuu daanö? Ma. Einaja bämacö nia cuimi. 16¿Wama tä daimi daanö? Wamacö nosiemamobä, ai täbä lija wamacö noshi ö̦jödao ja, wama bä nosie lä fuaö wei ö̦jö wama ecö waiquiwä. Wamacö tabouje. ¿Ö̦jö tawä? Wa̦lidiwa tä ja wamacö noshi ö̦jödao dicoo ja, inaja showawä, wa̦lidiwä tänö wamacö tabou waiquiwä. Ö̦jö wama ecö yalo wamacö nomaö shi nia wa̦lijio. Yai Bada wama a wa̦ yai fuabä wamacö noshi ö̦jödao ja, wamacö nia shi̦lo yai bejedimou.
17Ö̦jö ma cui, Yai Bada lija yamacö bufi a̦fa doblalou wäyämou. Wa̦lidiwä tä ja wamacö jaba nosiemamoma ma cui, fei däjä inaja wamacö cuaaimi. Yama tä a̦ lä wäyäö wei tä a̦ ja, wamacö damamou bufi fa doblaonö, ö̦jö wama tä a̦ yai fuaö majöobä wamacö cublaliyoma. 18Wa̦lidiwä tä ja wamacö fa fujeblamolunö, tä a̦ lä dodijidai tä a̦ ja wamacö nosiemamou majöobä wamacö cublaliyoma, wamacö bejedimobä.
19Wamacö bufi showadi lä cuaaö wei tä läa yalo, ya wa̦ nia faö yaclämou, wamacö bufi jaducäblou fe yadiobä. ¿Ö̦jö tawä? Bei wamacö mamocu ma cui, wamacö caficö ma cui, wamacö yömöcacö ma cui, shami tä ja, wamacö bluca lä bayucui wamacö noshi jaba ö̦jödao balöoma. Wamacö wa̦lidiaö nö quiliama. Inaja wamacö jaba lä cuaano weinaja mlai, fei däjä wamacö lä bayucui Yai Bada tä lija bä noshi shi̦lo yai ö̦jödao da majöo, wamacö bejedimobä. Yai Bada wama ecö dodijidawä yaiobä.
20Wa̦lidiwä tänö wamacö tabou däjä, ö̦jö tä ja wamacö nosiemamoma. Wamacö bejedimobä wamacö cuonomi. 21Ö̦jö ma cui, ö̦jö wama tä wa̦lidiwä lä tano wei tä ja wamacö bayeliblamonomi. Wamacö lä cuaano wei tä ja, fei däjä wamacö bufi yai quilijou majöo. Inaja bä lä cuaaö wei bä nomaö shi wa̦lii.
22Ö̦jö ma cui wa̦lidiwä tä ja, fei däjä wamacö fujeblaliyoma. Yai Bada wama a nosie yai fuaö majöobä wama ecö cublou fa nomöjölonö, wamacö yai bayeliblamou. Yai Badanö dodijidawä wamacö fa yaimacönö, ba̦limi wamacö cuobä. 23Wa̦lidiwä tä lä taö wejei tä nowa ja täbä malä nomaö wei. Ö̦jö ma cui Bada tä Jesucristo lija bämacö bufi cua yalo, Yai Bada tänö no mlai ja bämalecö bayeliblaö, ba̦limi bämacö cuobä.
©2012, All Rights Reserved