Judit 1
1
Nabucodonosor bara Arfaxad wal
1Nabucodonosor ba Asiria uplika nani kuntrika ra ai tawanka lalka Ninibi purara pat mani 12 king aimaki kan taim, Arfaxad lika Media uplika nani kingka kan Ecbatana ra. 2Naha bui sika walpa nani baiki muni Ecbatana tnaya kir kutbanka tara kum paskata. Walpaya bani ba ai yahpika naku bri kan: bîla ba 4 pît hap, bara yarika ba 8 pît hap; kutbanka ba ai purara 103 pît bri kan, bara twaknika ba lika 74 pît. 3Tawan getka nani ra aihwaki kaikaia pliska tara nani paskan bara baha nani yahpika ba lika 148 pît bri kan yarika ba, bara playa ba lika 89 pît. 4Getka nani pali ba sin naku yahpika paskata: yarika ba 103 pît, bara bîla yahpika ba lika 59 pît; bara baku mika war daknika karnikira bri kan ba sip kabia marts munaia ai mina ra wapi daknika wal ai lainka ra.
5Baha sim piua ra, king Nabucodonosor bui king Arfaxad mapara war daukan Ragues tasbaya ra twi langni tara bâra ba kat. 6Nabucodonosor tilara diman unta biara pîska ra iwi uplika nani sut, bara baku sin Tigris, Éufrates bara Hidaspes awalka nani lamara iwi nani ba sut bara Elam kingka Arioc karnika munhtara tasba langni nani bâra kan ba tilara sin. Baku bamna, upla nani ailal pali asla takan Queleúd kiamka nani war daknika tilara dimaia dukiara.
7Asiria kingka Nabucodonosor bui paiwan balan Persia kuntrika uplika nani sut bara muna tani ra iwi nani sut sin: Cicilia ra iwi nani ba, Damaskus, Líbano, Antilíbano, kust tani ra iwi nani ba, 8Carmelo ra, Galaad ra, Galili kla tani ra, Esdrelón twika bîla yahpa ra, 9Sameria bara ai tawanka tara nani uplika sut, Jordan muna tani wina Jerusalem kat, Batané uplika nani, Quelús, Cadés, Idsip tasbaya wal baiki saki tingnika ba wina, Tafnes wina, Ramsés, bara Gosén kuntrika aiska wina 10Tanis bara Menfis wal wina kau laihura, bara Idsip uplika nani sut ra Etiopía wal baiki saki ba kat. 11Sakuna baha tasbaya nani uplika nani bui Asiria kingka Nabucodonosor winanka daukan ba bîla walras bara war ra hilp munaia waras, kan witin ra sîa yabras kata, bara kau ni kulki banhwi kan pâna nani âpu uplika kum baku; bamna ai sturka twatwilkra nani ra bîla saura nani wi muni, mahka blikan wan mihta bîla baman.
12Nabucodonosor ba uya pali ai kupia aisawan naha kuntrika nani sut mapara, bamna ai tronka bara ai kingka lâka nina mâki swer takan pana sin saura munaia Cilicia, Damaskus bara Siria tasbaya aiska ra, bara baha nani ba skiru malka ra iki tikaia, bara sim baku Moab bara Amón uplika nani ra, Judia aiska ra bara Idsip uplika nani alsut ra, kabu wâl tasbaya ba kat sin.
Arfaxad lus tiwanka
13Mani 17 king aimaki kan piua ra, Nabucodonosor ba ai war daknika wal dimi wan king Arfaxad mapara, bara aiklabi muni pura luan. Ai war daknika sut ba munan plapan, ai araska ra uli aiklabi nani ra bara kar nani bri kan ba sut ra sin; 14ai tawanka nani ba mihta dakbi dawanka takan, Ecbatana kat dimi wih ki aihwaki kaikaia pliska tara nani ba dakbi brin, bara upla aipaswaia pliska nani wina impliki sauhki muni, tawanka tara ai prana painkira bri kata ba mâyara kulkanka lâka ra laki swin. 15Baha purkara Nabucodonosor bui Arfaxad ba alki brin Ragues untika biara nani ra bara ai langsika ni sabi muni ban kaia ra danh âpu dauki swin. 16Ningkara kli tawi balan ai war daknika bara upla nani witin ra asla takan ba aikuki, baha lika suldiar nani kwâra tara pali kan. Bara witin mahka ris brih ki, kati walhwal lilia brin ai war daknika wal.
Currently Selected:
Judit 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua