Judit 2
2
Nabucodonosor bui Holofernes blikisa muna tani kuntrika nani mapara
1Mani 18 ra kati pas yua 22 ra,#2.1 Baha lika mani 18 Nabucodonosor II ba sika Jerusalem dakbi brin manka. Asiria kingka Nabucodonosor watla tara ra aisi kaikanka brin nahki tasba aiska ra pana saura munaia kan ba, king dîa win kata ba kat. 2Ai suldiarka tara nani bara karnika alki uplika nani sut paiwan balan, bara witin nani ra tânka marikan nahki witin sâpkira wilin takan ba baha kuntrika nani ba aiska pali sauhki tikaia. 3Witin nani aitani lukan king winanka ra bîla walras kan nani sut ba blestu âpu dauki swiaia sa.
4King Nabucodonosor bui witin nani ra ai lukanka brin ba aisi tnata mangkan taim, Holofernes ra paiwan balan, witinka ba lika ai war daknika tilara kamandanti bâs kan ba, king ningkara kau karnika bri kan ba, bara witin ra win: 5“Yang, king kau tara sna ba bara tasba aiska dawanka, adar maikisna, yang maiwan wina taki wama taim, karnikam munhtara brima waitna nani rait kupia karnira baman aikuki war daknika kum, ai mina ra wapi suldiarka nani 120,000 bara aras ra uli nani ba lika 12,000, 6bara ningkara mahka taki impakma muna tani kuntrika nani sut mapara, baha nani ba winanki ra bîla walras kan ba mita. 7Witin nani ra adar yas aiklabanka kumi sin daukras karnikam munhtara kauhi banhbia, kan kasak kupi aisawan sa bara witin nani mapara dimi waisna. Yang bui yabrika war daknika nani brisna ba tasba aiska ba kutbi brih ki, dukia nani ba mihta dakbi bribia. 8Upla nani prubia ba uya ailal mita, il bîla nani ba banhki takbia; lî aubra nani bara awala nani ba upla pruan wîna tara nani baman banhki taki, pupuhwi banhbia. 9Upla ailal ra priski muni, tasba unyukwika lâs nani ba kat brih wamna. 10Baku bamna, mahka tâmra impaks, bara yang nini ra baha tasbaya nani sut ba dakbi bris. Mampara buras sa kaka, bahara alki kutbi bri bas yang bui witin nani ra panis munamna ba kat. 11Sakuna karnikam munhtara dimaia apia wibia nani ra lika, umpira kaikpara. Ani anira wama ba ra witin nani ba iki tiks bara dukia nani ba dakbi bris. 12¡Rayaki bara king lâka karnika brisna ba nina mâki swer takisna, dîa aisari ba yang pali alki daukamna! 13¡Dîa dîa adarka maikri na kumi sin daukras lika swipara; adarki nani ba sut kat istikira pali bîli wali dauks!”
14Holofernes ba ai kingka mawan wina taki wan wal baku, Asiria war daknika bâska tara nani, lalka kwarika nani bara lalka sirpi nani ba sut paiwan balan, 15bara king bui adar yaban ba kat suldiarka nani wahbi sakata: ai mina ra wapi waitnika nani 120,000, bara aras ra uli pantamangka lalulkra nani lika 12,000, 16bara baha nani ba war aiklabaia ridi daukata. 17Ningkara kiamil nani, biriku bara muyul nani ailal brin diara nani twilkaia dukiara, baku sin sîp nani, bîp bara guts mairin nani ailal pali brih wan upan baku piaia wisi, 18baku sin plun sâtka ailal pali waitna bani dukiara bara king ritska wina gul bara silbar uya pali. 19Bamna Holofernes mahka taki impakan ai war daknika aiska aikuki, king Nabucodonosor kainara, muna tani tasbaya aiska ba kutbi briaia dukiara kar nani, aras ra uli aiklaklabra nani bara ai mina ra wapi suldiarka nani wahbi sakan ba aikuki. 20Witin nani wal upla ailal pali auya kan, sim tristrisia nani ailalka baku, apia kaka kabu auhika mâ nani baku; upla uba ailal kan ba mita, kulkaia sin sip apia kata.
Holofernes aiklabanka ba
21Ninibi tawanka wina taki, Bectilet twaya bîla tani ra yu yumhpa wapi banhwata. Bectilet wina ai tâura ban impaki muni, Cilicia kla tani ra unta biara kum bâra ba lama kat ai kiampka bapi banhwan. 22Baha wina Holofernes ban ai tâura wan ai war daknika wal, ai mina ra wapi waitnika nani, aras ra uli aiklabi uplika nani bara ai karka nani kira, unta biara tasbaya tani ra. 23Yabal kwâki dimi wan Fud bara Lud tawanka wâl ra sauhki tiki, bamna Rasís uplika nani bara Ismael kiamka nani sut dukia nani dakbi brin, baha nani lika upla iwras tasbaya un ra iwi banhwi kata, Queleón waupasa tani ra. 24Éufrates awalka ba luan, Mesopotamia mâ wala lui wan bara Abroná awalka un wina kabu kat kan kahbanka bri kan tawanka nani sut ba sauhki tikan. 25Cilicia tasbaya ba dakbi brin bara ai mapara buan nani ba sut pura luan. Baha ningkara Jafet tasbaya ra wan, waupasa tani ra, Arabia mawanra. 26Madián uplika nani sut kutbi brin, ai kiampka nani angkan luan bara ai daiwra nani ba dakbi brin. 27Ningkara Damaskus twaya ra iwi wan plawar mâ dâkaia piua ra, bara nasla nani sut angkan luan, sîp nani bara bîp nani sut âpu daukata, tawan nani dukia ba dakbi brin, plun nasla nani ba sauhki tikan bara wahmika nani sut ba ispara malka ra iki banhwata. 28Sibrinka tara bara tah iwanka witin bui dingkan ba kust uplika nani ra diman, baha sika Sidón, Tiro, Sur tawanka, Oquiná bara baku sin Jabnia ra iwi kan nani ba, Asdod bara Ascalón ra.
Currently Selected:
Judit 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua