Judit TÂ BÎLA NANI
TÂ BÎLA NANI
Naha wauhkataya ulbanka ra, Israel luhpia nani ra Asiria uplika nani war daknika ba mita pura luaia baila pali kan, Holofernes wihta tara ba witin tâ aimaki kan ba piua ra (1.1—7.32), baha taimka ra Judit, piarka mairin kumi, kasak pali mairin painkira kan ba, witin ai rayaka ba Israel luhpia nani swaki sakaia dukiara pât mihta ra mangki bara baha tâka mita swaki sakisa (8.1—14.10). Holofernes pruanka ba dukiara sirang iwan tara pali bri banhwan kan, bara Asiria uplika nani ba plapi banhwan bara witin nani ai uplika nani sin uya pali prui tiwan kan, Ju nani wal aiklaban ra lus tiwi banhwan kan piua ra (14.11—15.7). Judit tingki wiaia pura sunra kum dukiara witin lawana kumi aiwanan, baha piua ra Ju nani pura lui banhwan liliaka tara ba daukan (15.8—16.20), bara witin ban tauki si kulkanka tara wal Judit pruisa (16.21—25).
Upla tara nani bâk saki kulkanka nani bri ba mariki kan, baku sin ani pliska ra dîa pali daukan tânka ba sin, bara naha daukanka yamni bri ba tânka brih ningkara kulkanka tara bri uplika ba kaiki lilia pali taki banhwi kan; bamna naha daukanka bâk naha bukka âiulbra ba, witin lika upla nani kupia lilia dauki kan tawan bilara trabil bâra sa taimka ra. Baku sin upla nani ra tâ baiki kan Gâd ra kasak lukanka ba bri kaia dukiara, kan baha mita lika waihla nani pura luaia karnika ba briaia sip kabia, bara swapnikira uplika nani sin ai karnika tikan ba kli briaia sip kabia. Baha kasakka daukanka ba dakni nani tilara ban bri kaia sa kaka, trabil kumi âpu sa Spirit Holikira yamnika ba briaia sa kaka, alki daukaia sip sa Judit daukan ba baku natka ra, nahki sip kan Holofernes karnika tara bri kan ba diara âpu dauki sut tikan kaia.
Currently Selected:
Judit TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua