Lawana Nani 86
86
LAWANA 86 (85)
Man baman Dawan sma
Debit pura sunra.
1Dawan, man kiamam pri tniki ai wals yang ra,
kan yang sari pali bara umpira sni;
2tâi baiks, kan yang lika man wal kasak sni.
Man, yang Gâdki sma;
¡naha man nampakan ra swaki sâks,
kan man ra kasak lukisa bamna!
3Dawan, kupiam swapnika ba aik,
man ra awar bani winisni.
4Dawan, naha nampakan lukanka ba lilia dauks,
kan man ra puri sunisni bamna.
5Dawan, man yamni sma,
wan pâtka nani swih tikisma;
man ra ai pura suni nani ba sut ra,
latwan kaikisma.
6Dawan, yang puri sunra ba wals,
¡yang makabanki ba wals!
7Trabilki yua ra yang bui man ra winisni,
kan man bui yang ra pana ansa ai munisma.
8¡Dawan, man wal mai praki kaikaia,
dawan wala âpu sa!
¡Man warkkam ba baku, wala warkka âpu sa!
9Man Dawan,
man bui sika nisan nani sut asla paskram ba,
bara witin nani ba balbia,
man ninam mayunaia.#Par M 15.4.
10Man baman sika Gâd;
man baman tara sma
bara diara tara nani daukisma.
11Man Dawan, yabalkam ba ai mariks,
bara yang baha yabalka ra kasak wapaia
kupi ra mai kulkaia lâka ba sin brimni.
12Yang Dawanki bara Gâdki,
kupi aiska ni ninam mayunamni
bara man ninam ba mayuni ban kamni.
13¡Lamtwanka lâka yang ra brisma ba tara pali sa!
¡Raiti bilara kaia kapri ba wina pri ai sakram!
14Man Gâd,
trabil babukra bara saura dadaukra
dakni kum man mai briras nani ba,
maipara bûi, ai ikaia plikisa.#Law 54.3.
15Sakuna, man Dawan,
latwankam swapni brisma ba
wihka bîla kaikisma,
lamtwanka lâka bara kasakkam lâka ba wal.
16¡Yang ra tawi ai kaiks,
kupiam swapnika ni!
¡Naha nampakan na swaki sâks;
man karnikam ba yas!
17Lukankam pain ba mairiks yang kaikamni,
bara baha nani misbara ai kaiki,
ba kaiki ai swira takbia.
¡Kan man, Dawan, hilp ai muni
bara maisi nihkra aikisma ba!
Currently Selected:
Lawana Nani 86: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
