Lawana Nani 38
38
LAWANA 38 (37)
Gâd hilpka makabi pura sunra
Debit ulban, kli kupia kraukaia lawana.
1Dawan, man kupiam baiwanka ra kiaima kraukpara,
baku sin man lawankam tara ra ai wipara.#Law 6.1; Jir 10.24.
2Man trisbaikam nani ai diman sa;
¡man mihtam sin latwan ai taibisa!#Job 6.4; 16.12-13.
3Man bui yang ra lawisma saurki nani ba tâwan
bara wîni tara aiska ba siknis sa,
¡dusi nani ba sin sut siknis sa!
4Watawika lâka nani ba mita puri luisa
karban wirha tara baku,
yang twilkaia sip apia sna.
5Taniski lâka nani ba mita
wîni insauhkan ba,
sukwi kîa saura baiwisa.
6Yu aiska sari baman,
laila makupi wataukisna
wirhika ai taiban ba mita.
7Nini dusa aiska ba rihka ai angkisa;
¡wîni tara aiska, siknis ai daukisa!
8Wîni aiska swapan pali sa
bara karniki sin âpu;
¡yang karna inisni,
kupi alki takaskaia sip apia!
9Dawan, yang kupi lukra ra dîa brin ai dauki
ba tânka man sut kaikisma;
¡baihkia puhbisna ba man ra yukuwras sa!
10Yang kupi lakwisa,
karniki sut âpu takisa;
¡naikra ba sin sut pukni takisa!
11Upliki aihwa nani kan ba,
yang taiya nani sin,
wîni sukwanka ba sîa
yang wina laihura buisa.#Job 19.13.
12Ai ikaia luki nani ba,
yabalki ra mini alkaika nani mangkisa;
baha nani sin saura ai munan dauki ba,
diara saura nani maipara aisisa,
yu aiska aikuki iwi aisi kaikisa,
yang ra pât ai dingkaia ba nahki daukaia sapa.
13Sakuna yang kiaima prawan,
diara walras baku sna;
bîlas baku diara aisaras sna.#Ais 53.7.
14Baku yang na diara walras uplika kum sna ai mapara;
aisi uplika nani ba mapara,
pana dîa aisaia tânka briras uplika kum baku sna.
15Dawan, yang Gâdki,
man wina diara walaia bîla kaikisna;
man bui witin nani ra diara pana aisama ba.
16Naha baman lika mamkabisni,
yang kauhamna kaka,
witin nani mita puri luan wisi lawana aiwanbiara.
17Kasak pali, yang mahka kauhaia lama sna,
sairka tara nani ba maiwan kat ban sa.
18¡Saurki nani ba daihra sakisna;
baha dukiara lukan man,
kupi sarka man tnata âpu!
19Sakuna yang waihli nani kau ailal takisa;
ailal ai tânka briras ban misbara ai kaikisa.
20Yamni daukri mana,
pana saura ni aibapuya;
yamni daukaia plikisna ba ra,
witin nani ba yang maipara buisa.
21¡Dawan, yakan ai swipara!
¡Dawanki, laima wina taki wapara!
22¡Dawanki, sasakriki,
pat pali bal hilp ai muns!
Currently Selected:
Lawana Nani 38: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
