Lawana Nani 18
18
LAWANA 18 (17)
Pura luan lawana
Aiwani nani tâ bri ba wina, Dawan napakanka Debit daukan, witinka naha lawana bîla nani Dawan ra aisin baha yua ra, Dawan bui witin ba ai waihla nani sut mihta wina dakbi sakan ba, Saúl mita sin. Bara witin win:
(2 Sa 22.1-51)
1Man, Dawan, yang karniki sma;
¡latwan mai kaikisni!
2Dawan, man sika kaini kahbisma,
yang yukuwaiki pliska,
yang swaki ai sasakra;
yang Gâdki,
walpa tara, yang ra ai yukukisma ba,
yang kaini kahbaika,
ai swaki saki karnika ba,
yukuwaiki kau tara ba.
3Man, Dawan, mamyunaia ba aitani sa,
yang mai wisna ba ra, waihli nani
wina swaki ai sakisma.
4Prura ai kiwka nani ra kir ai kutban,
bara lî aubra sasauhkra nani ba mapara, sirang iwri.
5Pruan ba ai kiwka ni kir ai blakan;
¡ai ikaia kiwka nani ra ai mangkan sa!
6Trabil saura ra kapri yang Dawan ra winri,
yang Gâdki hilpka briaia makabri
bara witin ai tempelka wina bîli baikra walan;
¡yang inanki nani ba ai kiama ra diman!#Law 120.1; Jon 2.2.
7Bara tasba nikbanka tara kum takan,
il nani playka ba sin nikban kata,
Dawan kupia baiwanka ba mita nikban kata.#Wih 5.4-5; Job 36.30; Law 29.3-9; 77.16-19; 144.5-8; Ab 3.3-13.
8Ai kakma nani wina sin kiasma takan,
ai bîla wina sin sauhki tikaia, pauta klauhan takan;
¡masku aswi nani ai bîla wina yakabi kan!
9Kasbrika pura kaina prakanka nani ba,
mâyara bal iwan;
¡tihmia tara nani ai mina nani mununhtara kan!
10Bara witin kirubin kum ra ulan bara pâlan;
pâsa tnawa nani bâk, witin impaki kata.#Law 68.33; 104.3.
11Witin tihmu tara ba ai yukuwaika daukan,
ai watla baku, witin ai kan kir daukan,
kasbrika siksa nani lî banhki bri ba ni.
12Imyula lakni kum baku,
witin mawan ba wina taki bal luan;
bara kasbrika nani wina ais bara
masku aswan sin auhan.
13Dawan Laih Purara iwi ba
witin sin yan kasbrika purara alwani ringban;
ais bara masku aswan ba sin auhan.
14Witin imyula nani ba
ai trisbaya nani baku lulkan;
yang waihli nani ba munan turwi plapan.
15Kabu tihuka ra diara nani bâra ba, param takan;
tasba bapan playka nani param sakan kan,
Dawan bui lawi dauki aisin bîla ba mita,#Imp St 15.8; 19.19.
ai wingka puhbra karna puhban ba mita.
16Witin pura wina ai mihta sakbi ai alkan,
kabu tara pali ba wina ai aubi ai sakan.
17Witin bui yang waihli karnakira pali nani ba wina ai dakbi ai sakan,
misbara ai kaiki banhwi kan ba ra
witin nani kau karna pali kan.
18Yang umpira pât ra kapri bal maipara aiklaban,
sakuna Dawan bui yang ra tâi baikan:
19pri lâka ra ai sakan;
¡witin pri ai sakan,
witin bui yang ra latwan ai kaikan bamna!
20Dawan bui yang maina ba aikan
lukan tâski âpu sna ba lâka kat,
21yang bui Dawan yabalka nani blikri,
yang Gâdki ba swih, kulkaia apia wiras kapri,
22witin lâ nani aisi daukan ba sut,
yang maiwanra bri kapri,
yang yu kumi sin witin ai lâka nani ba
kulkras apia kapri.
23Yang lika witin mawanra
pâtkas aihwa pali tauki kapri;
watawanki lamara sin waras katna.
24Bara Dawan maina ba kat kli aikan,
witin ai mawanra lukan tâski âpu sna bamna.
25Dawan, man, kasak sma kasakkira nani ba wal,
lawi daukaia apia ba ra, man lawi daukras.
26Kunin âpu uplika ba wal kunin kaia,
âuyama uplika ba wal âuyama kaia.
27Upla bawikira nani ba
man swaki sakisma,
sakuna pura lui ai mayunra nani ba,
man mâyara batakisma.
28Dawan, man, ingni aikisma;
Gâdki, man, tihmia tara ba,
man bui ingni daukisma.
29Man hilpkam ra,
yang waihli nani mapara aiklabamna
yang Gâdki hilpka ra,
kral kutbanka paskan ba purak pâli luamna.
30Wan Gâdka yabalka ba lika
wapni pali sa;
Dawan bîla aisinka ba,
kasak lukaia ba aitani pali sa;
¡witin lika baha nani witin ra luki yukuwi ba
kan kahbaika sa!#S L 30.5.
31¿Gâd ba dîa sa,
Dawan wina tnaya ra tawbia bara
Gâd wala bâra sa ni,
wan kan kahbaia sip ba?#Ais 44.8.
32Gâd sika karnika nani aiki ba,
yang sunu tauki kaia ai dauki ba,
33witin bui yang mini nani,
snapuka mina nani baku ai dauki ba,#Ab 3.19.
witin mita sika,
pura tasbaya nani ra bapi bûi kaia ba ai dauki ba,
34witin mita sika war aiklabaia ai smalki ba,
witin karnika aikisa bras pantamangkika nani bulki daukaia.
35Man sika kaini kahbi swaki ai sakisma ba,
man mihtam aihkika ni ai alki tâi baikisma,
man kupiam yamni lâka ba mita
diara yamni manis yang ra takan.
36Man mita yabalki ra isi wamna daukram,
mini nani sin swakswaka mangkras.
37Yang waihli nani nina bliki alkri,
witin nani ba sut âpu daukri ba kat tawi balri.
38Witin nani ba yuya lupia ra daukri.
Witin nani sip kli buras sa.
¡Witin nani ba mini mununhtara kauhan!
39Man karnikam ni tâi baikram war aiklabaia dukiara;
maipara bûi banhwi nani ba, man yaram yang maiwanra bal bawan.
40Man daukram waihli nani ba tâiura plapaia.
Baha mita sip katna, misbara ai kaiki banhwi ba âpu daukaia.
41Witin nani hilp makaban,
sakuna upla kumi sin witin nani ra tâ baikras kan;
Dawan ra winan, sakuna witin nani ra pana aisaras.
42¡Yang bui witin nani ba,
pruki akbi tasba yuya pâsa ra pâli ba baku daukri!
¡Yabal nani ra drapapa wan mina ra taibi ba baku taibri!
43Upla nani mapara bûi, unsabaia lihki nani ba wina dakbi ai sakram,
nisan nani wihtka ai mangkram,
upla nani yang kakaira apia kapri ba
witin nani ba yang warkki daukisa.
44Witin nani naha walbia ba ra,
yang bîli wali daukbia;
tringsar nani ba maiwanra mâyara bawbia,
45tringsar nani ba srawi lubia,
bara ai watla kutban nani wina,
tatatwi kira bal takbia.
46¡Dawan raya sa!
¡Yamni pali wiaia sa,
yang kaini kakahbra tara ba!
¡Gâdki swaki ai saki ba,
laih purara tara kulkan kabia!
47Yang ra saura ai munan mana, witin sika pana muni ba Gâdka,
nisan nani ba sin mini mununhtara mangkan taibaia.
48Waihli nani kupia baiwanka wina,
ai dakbi ai sakisa;
mapara babura nani ba,
maipara bûi nani ba wina,
Dawan, man bui
waitna saura dadaukra nani ba wina
swaki ai sakisma.
49Baha mita,
yang nisan nani tilara mamyunisna,
ninam ra lawana nani sin aiwanisna.#Ro 15.9.
50Man bui bâk saki mangkram kingka ba ra,
pura lalura tara kaia daukisma;
piua bani Debit ra latwan lâka ni marikisma,
baku sin ai kiamka nani sut ra.
Currently Selected:
Lawana Nani 18: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
