Inanka Nani 3
3
Inanka yumhpika ba
1Yang sika pât saura wahwan waitnika ba,
Dawan kupia baiwanka klalka mununhtara.
2Yang ra ai brih wan
tihmu tara tasbaya ra,
ai munan ingni âpu
yabalka ra watauki kapri;#Job 19.8.
3kasak pali witin ba yang maipara tawan sa,
bara kli kli sin ai mihta ba,
yang maipara lakisa yu aiska ra.#Job 7.16-19; Law 88.7,15-16.
4Witin bui yang wîni
taya srikan,
wîni tara sin almuk sakan,
bara dusi nani sin kriki pîs ra daukan sa;#Job 7.5; 30.30.
5witin mita laima kir ba pât tara
tahpla pali wal ai kutbi lakan sa;#Job 19.12.
6witin mita dista tilara aikan buri,
patitara pali pruan nani ba baku.#Law 88.5-6; 143.3.
7Kaini kir prakan kutbanka#Job 3.23; 19.8.
kum dauki bilara ai mangkan, takaia apia dukiara;
bara silak kiwka wirha tara ni sin ai wilkan sa;
8yang wini hilp makabri, sakuna
ini makabanki nani ba walras,#Job 30.20.
9wapi luaiki ba walpa tara ni kutbi prakan,
¡yabalki nani
ba tnaya walak waia lakan!
10Witin ba yang maipara
layan kum yukuwi ba baku sa,
wingku tara ai alkaia
tauki ba baku sa.#Job 10.16; 16.9.
11Witin mita yabal wina
tnaya ra ai saki, kurbi
ai kalki ai munan,
¡sibrin tara ni banhki ai swin!
12¡Witin ai pantamangkika ba
aubi bulkan, bara
ai trisbaika kakma ba
yang kat kahban sa!
13Dawan trisba lulkan ba,
yang kupi munhta kat diman sa.#Job 16.12-13.
14Yang upliki nani sut mita laiwaska
kikaika takri sa;
yu aiska ra sin, yang daihra baman aisi
swiri daukisa.#Kli S 28.37; Job 30.9; Law 69.10-12; Jir 20.7.
15Dawan mita tahpla lâka ni
ai banhkan sa;
baha laya aikan ba sin tahpla
pali kan.#Job 9.18.
16Yang naipa nani ba tasba wal prukri;
yang ra aikan tasba yamhpuska nani ba samri.
17Yang sulki ba kupia kumi lâka wina
laihura sakan sa,
bara lilia lâka ba dîa sapa
sut âiya tiwan sa.
18Ban sin yang lukri,
Dawan wina karniki briaia,
bîla kaikanka bri kapri ba, sut pruan sa.#Job 17.15-16; 19.9-10; 30.19.
19Kupi krawisa latwanki nani wauhri ba,
bara sairka tara ba sin, misbara lâka,
tahpla pali ba sin;
20piu bani baha dukia nani ra kupi krawisa ba ra,
yang spiritki ba mâya kat kauhisa.
21Ban sakuna, diara kum baman kupi ra bri kaisna,
bara witin ra bîli kaikanka ba mangkamna:
22Dawan latwanka ba ban kaia ra bâra sa,
ai kupia yamnika nani ba sip danh takras.
23Titan bani kli raya takisa;
¡nahki tara sa ai kasakka lukanka ba!#Imp St 34.6-7; Law 136.
24Bara yang wisni:
¡Dawan ba sika, yang ra diara sut ba;
baha mita yang bui witin ra kasak lukisna!#Law 16.5; 119.57.
25Dawan ba yamni sa,
ya witin ra kasak luki nani ra,
bara ya witin ra pliki nani ra sin.#Ais 30.18.
26Kanra yamni sa, sâp taki
Dawan hilp wan munaia ba bîla kaiki kaia.
27Kanra yamni sa, upla kau almuk takras ba
wina bawaia lâka briaia.
28Upla ba sâp taki, yakan iwi kaia sa,
Dawan mita wirhika witin ai purara mangkisa ba ra.
29Witin sin ai bîla ba tasba
puknika kat mangki bûi kaia sa,
ban kra baku bîla kaikanka lâka bâra kabia;
30ai mawan taya ba yabaia sa
witin ra prukbia uplika ra,
bara swira daukanka lâka manis sin briaia sa.#Mt 5.39.
31Kan Dawan mita ban kaia ra
lulki swin kabia apia.
32Âu, witin mita upla ra pât saura blikisa,
sakuna umpira sin kaikisa,
kan witin latwanka lâka ba tara pali bamna.#Law 30.5; Ais 54.7-8; 60.10.
33Kasakka pali ba sika,
witin brin daukras sa
pât saura ra blikaia,
baku sin brin daukras sa upla ra latwan yaia.
34Kuntri ra silak uplika nani ba umpira kaikras
ai mina ni taibi lui kaia,
35Dawan Laih Purara ba mawan ra,
waitna kum ai raitka bri ba
wina tnaya ra lakaia ba,
36lâ kum kasak wapni ba warbi laki saura daukaia ba,
baha sut ba Dawan yamni kaikras sa.
37Ahkia piua ra diara kum aisisa ba ra,
diara kum takisa ba ra,
baha lika Dawan adarka sa.
38Baku sin diara yamni bara diara saura nani ba,
Laih Purara ba wina aula, witin baku takbia win bamna. #Job 2.10; Ais 45.7.
39Upla ba saura dadaukra kum sa,
¿bamna dîa dukiara brukwi aisisa?
40Kaisa wan daukanka nani ba
kli laki kaikaia,
bara Dawan ra kli tawi waia.
41Kaisa yawan bui kasbrika purara ba Gâdka ra
wan lukanka nani bara wan pura sunra nani daukaia.
42Yang nani saura yâri,
mampara sin buri,
bara man bui wan saurka nani swih tikras kapram.#Ais 55.7.
43Man kupiam baiwanka wal wan blakram,
bara yang nani nini blikram,
¡umpira sin wan kaikras wan ikram!
44Man kasbrika tilara aiblakram,
yang nani puri sunra ba walaia apia dukiara.
45Bara yang nani ra dipasta saura baku wan munram,
upla nani sut mawanra.
46Waihli nani sut, ai bîla kwâkisa
yang nani maipara;
47sibrin lâka, mini pruki kauhaia dukia nani, sauhki tikanka bara aisawi luanka,
¡baha sika yang nani maipara balan!
48Naikra laya awala baku plapisa,
tawanki latwankira sauhki tikanka ba dukiara.#Jir 9.1; Ina 2.11.
49Naikra laya takaskras kira plapisa,
baku sin takaskbia apia,
50Dawan mita pura wina tawi wan kaikbia ba kat.
51Naikra nani latwanka ba kupi kat dimisa,
tawanki luhpia tiara nani ra taki ba dukiara.
52Pât kum sin âpu kira
waihli nani ai alkan,
sim piawira lupia baku;
53raya kapri liwanhta kum ra ai bikan
bara walpa tara kum purira yakabi ai bikan.
54Lî mita puri aiska ai bikan ba ra,
yang kupi ra ban lukri:
“Nanara yang lika danh tiwri sa.”#Jon 2.3-6.
55Yang, Dawan, man ninam mâki winisna,
liwanhta kau paknika ba wina:#Law 130.1-2.
56man lika yang bîli baikra ba walisma,
makabanki nani ba sut man daukisma.
57Yang bui man ra winisna yua ra,
man laimara aulma
bara ai wisma: “¡Si bripara!”
58Dawan, man mita trabilki nani tilara tâ baikanka aikisma,
bara rayaki swaki sakisma.
59Dawan, man kaikram,
yang ra nahki saura ai munan kan ba;
¡bamna man mita yang trabilki nani ba lâka dauks!
60Man kaikisma witin bui pana ai munaia ai brinka ba,
bara ai kupia wina kunin paski,
maipara ai munaia bri ba.
61Wals, Dawan, swiri dauki
bara witin nani ai kupia wina kunin paski,
maipara ai munaia luki ba.
62Waihli nani aisanka ba sin
yu aiska, ban yang maipara baman aisisa.
63¡Kaiks nahki witin nani diara dauki ba
sut ra, yang na lawaska kikaia dukia kum sna!
64Witin nani ra dîa aibapaia ba kat yas, Dawan,
witin nani ai mihta ni dîa daukan
ba praiska kat yas.
65Ai kupia nani ba karna sâks
diara tânka briaia ba wina,
bara yas man lahtubankam ba
witin nani purara kabia.
66Dawan, man lawankam ba wal
witin nani nina blîks,
bara yas witin nani naha
tasba mawan wina âpu takbia.
Currently Selected:
Inanka Nani 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua