Inanka Nani 2
2
Inanka wâlka ba
1¡Nahki Dawan ai lawanka tara ba wal,
Saion painkira ba tihmu daukan kasbrika distika ni!
Kasbrika pura ba wina tasba kat bataki ba baku,
Israel prana ba batakan sa;
witin ai lawanka ba yua ra,
ai mina taibaika ba#Ai mina taibaika ba: Naha aisinka na Jerusalem tempelka dukiara aisisa. dukiara kat sin
ai kupia krawras kan.
2Dawan mita Jekob watla nani sut
sauhki tikan sa, umpira kaikras kira;
ai lawanka nani wal
Juda pranakira kan kahbaika pliska nani sut sauhki tikan sa;
ai wihtka tara nani bara kingka nani sin
tasba kat batakan sa, swira lâka ra.
3Witin ai kupia baiwanka ra,
Israel karnika aiska ba klaki dakban.
Yawan wina laihura sakan ai hilpka karnika ba,
wan waihla mapara buan piua ra;
¡Jekob ra pauta laknika kum yan klauhan,
sauhki tiki kan dîa wal prawi bani ba!
4Dawan ai pantamangkika ba aubi bulkan sa,
waihla kum baku,
mapara aiklaklabra kum baku,
wan nakra ni kaiki yamni ba sauhki tikan sa;
witin ai lawanka ba pauta klauhan baku yan,
Saion pranakira ba purara kauhan kata.
5Dawan ba waihla kum baku takan sa:
witin bui Israel aiska ba sauhki tikan;
ai wihtka tara watla nani sut sauhki âpu tikan,
ai kan kahbaika pliska nani sut batakan,
bara sarka lâka, inaia lâka ba kau ailal daukan sa
Juda luhpia mairin tilara.
6Witin âimplikra baku,
Dawan wal prawaia watla ra diman,
bara asla takaia pliska kata ba
sut sauhki tikan sa;
lilia dauki yua tara nani,
bara ris yua nani#Ris yua: baha sika ris yua ba. sin sut#Ais 1.13.
Dawan mita yaban âuya tiwan,
bara ai kupia baiwanka laptika ba mita
prîs ba bara king ba wal ra lulki swin.
7Dawan mita ai altarka ba bahki kulkan
bara Dawan wal prawaia watla ba sut tikan;#Isi 24.21.
bara kutbanka tara kata ba sut,
witin bui waihla nani mihta ra mangkan.
¡Ini yahwi binka tara kum sin takisa Dawan tempelka ra,
liliaka yua tara kum ra baku!
8Dawan ai kupia wal daukan
Saion kutbanka painkira ba sauhki tikaia.
Nahki sauhkaia ba laki kaikan ningkara,
baha ba daukan tnata alkan ba kat.
Tawan tnaya nani bara kutbanka nani ba,
witin mita sari lâka tara ra lakan,
baha nani sut ba asla kumi baku batakan.
9Tawan getka nani sut tasba ra baman kauhan sa,
¡waihla nani alki takaskaia kutbanka kan ba sin sut kriki tiwan sa!
Ai wihta tara nani bara ai kingka nani sin
idan nani tilara sa;
Dawan lâka bîla nani sin âpu sa.
¡Witin nani tilara,
prapit nani sin
kli diara aihka nani kaikras sa Dawan wina!#Law 74.3-9; Isi 7.26.
10Saion pranakira almukka nani ba
sâp taki tasba kat iwisa,
krukus kwalka dimi tasba puknika ai lal ra yakabisa.
Jerusalem tiarika nani lika, ai lal ba tasba kat makupisa.
11Inan mita naikra nani ba swapni takisa,
bara laima dusa bîla sut baiwaisa;
kupi ba sari mita pura lui laiwisa,
yang upliki nani tawanka tara sauhki tikan ba kaikisna ba ra,
tuktan nani sirpi tiala di nani sin,
tawan yabalka nani ra plun bla kauhi pruisa.
12Tukta nani ini ai yaptika ra makabisa:
“¡Yawan plun âpu sa piaia,
bara wain diaia sin âpu!”
Bara tawan bîla yabalka nani kat ban kauhi kata,
waitna latwan brin pruaia baman ba baku,
bara ai yaptika lama bîla kat,
ai wingka puhbra tnata ba yan taki wisa.
13Jerusalem pranakira,
¿dîa pali wal mai wimna,
dîa pali wal sip mai prakamna ki?
¿Dîa pali wal praki mai aisi maisam nihkamna ki,
Saion pranakira?
Mai sauhki tikanka yahpika kabu baku ba;
¿ya sip kabia baha wina mai bukaia?
14Dahra aisasarikam nani diara kaikan,
dahra kunin man ra aisi mai win ba,
kau diara wala apia kata,
kunin baman saki mai win sa.
Witin nani saurkam ba param ra saki mai wiras kan,
man lukkam ba lakaia dukiara;
ban sakuna, diara kunin baman kaikan dahra aisi,
bara baha ra kasak lukaia mai daukan.#Jir 5.31; 23.25-27; Isi 13.10.
15Baha nani yabal ra lui nani ba,
ai mihta pruki kira ni puram winisa;
Jerusalem pranakira ba dukiara,
wasbi, ai lal wauhi pura wini aisisa:
“¿Naha tawanka apia ki, tasba aiska ra
kanra pranakira sa wi kata ba?”
16Waihlam nani sut ba,
ai bîla kwâkan sa man mampara.
Warbanka tilara bara saura munaia luki daukanka ra wisa:
“¡Yawan bui witin ba aiska sauhki tikan sa!
Naha yua sika, yawan aihwa bîla kaiki kata ba;
¡lâs kat nanara yawan kaikisa!”
17Dawan lika witin dîa daukaia lukan ba sut daukan,
ai bîla aisan ba kat daukan sa.
Umpira kaikras kira sauhki tikan sa,#1 Ki 9.6-9.
kaina piua wina sauhki tikaia luki kan ba,
witin bui yan, waihla nani ba mita lamwaska kikisa,
bara waihlam nani karnika ba sin purara bukan.
18¡Dawan ra hilpka makas,
Saion tawan tara painkira!
¡Yas namkra laya ba lî aubra tara baku plapi kabia,
kakna ra bara tihmia ra!
¡Inankam ba takaskpara,
namkra nani inisma ba wina takaskpara!
19Bus, bara kisbi ins kakna ra bara tihmia ra,
awar nani sut ra sin kisbi ini bas;
kupiam wina diara sut sâks Dawan ba mawanra,
yas lî baku plapi kabia;
mihtam nani makabi ba natka ra, witin ra sâks,
bara luhpiam nani rayaka dukiara makas,
naha nani yabal un nani ra plun bla prui banhwi ba.
20Dawan, man kaiks,
kainara naha sut dukia upla kumi ra sin daukras kapram ba.#Kli S 28.53; 2 Ki 6.28-29; Jir 19.9.
¿Yapti kum ba ai luhpia swap lupia tiala ra bri ba piaia sip sa ki?
¿Prîs nani bara prapit nani ra sin,
Dawan watla bîla ba kat ikaia sa ki?
21Wahma nani bara almuk nani sin,
tawan bîla yabalka nani ra pruan prawi nani ba kaikisa;
wahmiki nani bara tiariki nani sut,
aiklabaia sordka malika wal ikan sa.
Man mita witin nani ba ikram
kupiam baiwanka yua ra,
¡ikram, umpira kaikras kira!
22Tnaya bani wina pât nani yaram balan,#Law 31.13; Jir 20.3,10; 46.5; 49.29.
lilia daukaia kum ra auya kan baku;
Dawan, man lawankam yua ra,
upla kumi sin âpu kan baha wina swak takaia.
Baha nani yang bui pakri bara
sins lâka sin smalkri
kata ba, sut waihla nani bui iki tikan sa.
Currently Selected:
Inanka Nani 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua