Wihta Nani 3
3
Kenan tasbaya ra takaskan uplika nani ba
1Naha tawanka nani sika Dawan mita tasbaya ba ra swin ba, Israel luhpia nani kau aisubi takras kan ba traika kaikaia dukiara, Kenan tasbaya briaia dukiara aiklaban taim. 2Dawan bui witin nani ba ban bâra swin kan, baha nani kau war aiklabaia lan apia kan ba ra baha nani wal war aiklabi lan takaia dukiara. 3Filisteo nani wihtka nani matsip ba takaskan, Kena uplika nani ba sut, Sidón uplika nani bara heveo nani Líbano ilka ra iwi kan ba, Baal-hermón ilka wina Hamat ra dimi waia yabalka ba kat.#Jas 13.2-6. 4Witin nani wal Dawan mita Israel luhpia nani ba traika kaikaia want kan, ai damika nani ra Moses bâk lâ nani yaban kata ba bîla wali daukbia sapa kaikaia. 5Baku sika Israel luhpia nani ba Kenan uplika nani, hitita nani, amorreo nani, ferezeo nani, heveo nani bara Jebús uplika nani tilara iwan ba, 6bara Israel luhpia waitna bara mairin nani ba, baha uplika nani luhpia nani ai maya brin, bara baha nani gâdka nani ra mayunan.
Otoniel bui Israel luhpia nani pri lâka yaban
7Israel luhpia nani daukanka ba Dawan bui saura kaikan, witin nani Dawan ra ai âuya tiki si, Baal bara Astarté ra ai pura suni kan. 8Baha tâwan Dawan ai kupia sauhkan bara witin nani ba Mesopotamia kingka Cusán-risataim mihta ra mangkan. Mani 8 Israel luhpia nani Cusán-risataim warkka dauki kan, 9witin nani Dawan ra ai pura sunan ba kat Dawan, upla kum sakan witin nani ba pri sakaia. Naha nani swaki sasakrika yaban ba nina sika Otoniel,#Wih 1.12-13. Quenaz luhpia, Caleb muihnika sirpika ba. 10Dawan spiritka ba Otoniel ra balan, bara Israel luhpia nani ba asla dauki, war aiklabaia taki wan; war aiklabaia wan ba ra, Dawan bui witin nani ra tâ baikan Cusán-risataim pura luan. 11Baha ningkara witin nani 40 mani ai tasbaya ra kupia kumi lâka ra iwi kan.
Ehud bui Israel luhpia nani ra pri lâka yaban
Otoniel pruan ba ningkara, 12Israel luhpia nani Dawan mawanra kli saura daukan. Baha tâwan, Moab kingka Eglón ra Dawan wina Israel luhpia nani purara karnika alkaia yaban. 13Eglón ba Amón uplika nani bara Amalec uplika aikuki lâ daukan, bara Israel luhpia nani mapara war aiklabi, Jeriko tawanka tara ba witin nani dakbi brin. 14Bara mani 18 Israel luhpia nani Eglón warkka daukaia kan, 15witin nani kli Dawan ra ai pura sunan ba kat, bara Dawan kli upla wala sakaia kan witin nani ba pri sakaia. Bara Dawan Ehud ba sakan baha pri sasakra baku, witin ba diara ai mihta smihka ni dauki kan, witin ba Guerá luhpia, Benjamín kiamka wina kan.
Yu kumi, Israel luhpia nani ba Ehud kingka Eglón ra blikan wan, witin nani ai lal mana aibapaia lalahka ba. 16Sakuna Ehud sord kum bri kan, malika wâl, yarika ba 18 ins, bara baha ai prâka munhtara dingki brin ai aihkika tani ra; 17bara ningkara witin lal mana lalahka ba brin bara taki wan king watla ra, king ba lika batanira pali kan. 18Lal mana lalahka ba Eglón ra yaban ba ningkara, Ehud ai uplika nani balan ba aikuki taki mahka wapan, 19bara aidul nani watla Guilgal lamara ba baha kat witin nani wan ba ra, Ehud witin yakan kli tawi wan Eglón ra bara witin ra win:
—Wan Kingka, man ra sturi wiaia brisni, sakuna man wal baman yang yukuwan ra dimi mai wiaia sna.
Bara king ai suldiarka nani ai lamara bri kan ba ra win witin nani sâpkira bin âpu mahka baha wina tawa taki wabia. 20Bara Ehud ba Eglón wal baman takaskan ba ra, Eglón lika iwi kan pâsa kauhla alki ba rumka ra, bara Ehud ai lamara dimi wih ki naku win:
—Sturi bîla brih aulna ba lika, Dawan wina king ra wiaia ai blikan.
Eglón baha walan ba ra, witin king iwaika ba wina buan, 21sakuna Ehud ai mihta smihka ba ai aihkika tani ra laki si, bara ai sordka ba aubi saki bri Eglón biara kat saban. 22Ai karnika aiska ni saban bamna sordka mina ba sin sut ai biara ra diman, bara biara batanka ba mita ban dimi lap tiwan, aubi daikras ban wîna ra swin. 23Baku iki si bara dur nani ba sut bîla wina praki si, bara witin lika windarku latara taki mahka wan.
24Witin pat taki wan ningkara, king main kaiki suldiar nani kata ba balan, bara dur nani ba bîla wina prakan kan kaiki si, witin nani ban lukan king ba pâsa kauhla briaia iwaika ra bâra sa, ban kra tailit ra sa lukan. 25Sakuna ban wihka pali bîla kaikan bara witin nani mahka trabil taki lukata, king ba bal takras bamna. Bara witin nani wih dur kîka ba bri sal, dur ba saki diman bara kaikan ai dawanka ba pat ikan tasba ra bâra prawi kan.
26Witin nani naku bîla kaiki taim tiki kan ba sanska ra, Ehud plapan, bara Guilgal ra aidul nani watla bâra kan ba sut lui kau kainara, Seirat kat wih yukuwan. 27Witin ba Israel luhpia nani tasbaya ra wih diman ba ra, Efraín ilka nani ra uli wih trumpit puhban Israel luhpia nani ba paiwaia, bara witin nani sut il ba wina bal iwan, Ehud witin nani tâura aimaki. 28Bara Ehud bui witin nani ra win witin ai nina blîkbia, Dawan bui witin nani ra karnika yabia bamna Moab uplika waihla nani ba pura luaia. Bara witin nani Ehud nina blikan, Jordan awala luaia yabalka ba kutbi brin, bara upla kumi sin swin bahak lui waras kan. 29Baha piua ra Moab uplika nani 10,000 ikan, witin nani suldiar karna tahplu nani kan ba. Baha nani wina kumi sin ai rayaka swaki sakras kan. 30Baku sika Israel luhpia nani bui Moab uplika nani ra pura luan ba. Baha ningkara 80 mani witin nani ai tasbaya ra war aiklabras kupia kumi lâka ra iwi kan.
Samgar bui Israel luhpia nani pri sakan ba
31Baha ningkara wihta wala aimakan ba Samgar, Anat luhpia, witin bui filisteo nani 600 ikan ba bîp wainhka kmakmaya kum wal. Samgar sin Israel luhpia nani ba pri sakan.
Currently Selected:
Wihta Nani 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua