Wihta Nani 2
2
Dawan insalka ba Boquim ra balan
1Dawan insalka ba Guilgal wina Boquim ra wan, bara Israel luhpia nani ra win: “Yang lika Idsip wina man nani mai sakri, bara naha tasbaya kat mai bri balri, man nani damikam nani ra yabaia pramis munri ba. Bara witin nani ra wîri: ‘Man nani wal yang lâika daukri ba, yang kli bîli wala lakamna apia, 2bamna man nani naha uplika nani naha tasbaya ra iwi ba ra witin nani ai lâka ba wal kupia lâka daukma apia, sakuna ai altarka nani ba slingbi tikma.’#Imp St 34.12-13; Kli S 7.2-5. Sakuna man nani bui yang bîli walras, ¡bara nanara kaiks dîa daukram ba! 3Baha mita nanara yang bui man nani ra mai wisni: Baha uplika nani ba man nani mamwan wina kangbi sakamna apia, witin nani aidulka nani ba sin man nani minam prukaika nani kabia.”
4Dawan insalka ba aisi swin ba ra, Israel luhpia nani sut ba ai kârma kalki mahka inan. 5Baha mita baha tasbaya nina ba Boquim mâkan,#Boquim: naha ba Hibru bîla kum sa, tânka ba ini banhwi nani ba. bahara witin nani sakripais dauki, Dawan ra mayunan bamna.
Jasua pruan ba
(Jas 24.29-31)
6Jasua ba Israel luhpia ba lakula dauki swin, bara kumi bani mahka wan baha tasbaya witin ai dukia briaia kan ba ra. 7Witin kau raya kan ba yua nani ra, Israel luhpia nani ba ban Dawan ra mayunra yabi kan; bara baku sin upla almuk nani Jasua kakaira nani kan ba, kau raya kan yua nani ra sin, kan witin nani kaikan nahki Israel luhpia nani dukiara Dawan diara tara nani daukan ba. 8Sakuna Jasua, Nun luhpia ba, pruan mani 110 alkan ba ra. 9Witin nani bui witin ba ai tasbaya tâura Timnat-sérah ra, Gaas yahbrika tani ra, Efraín ilka nani tilara bikan. 10Jasua piua ra Israel luhpia nani kan ba sin sut prui tiwan. Bara baku, baha nani ningkara aisubi takan uplika nani ba sin Dawan tânka briras kan, Israel luhpia nani dukiara dîa daukan ba sin.
Israel luhpia nani ba Dawan mayunras swin
11Sakuna Israel luhpia nani daukanka nani ba, Dawan nakra ra saura pali baman kata, kan witin nani mahka Baal lilka sât sât nani ra mayunan. 12Witin nani Dawan ba swin, ai damika nani Gâdka, Idsip wina witin nani ra saki bri balata ba. Bara upla nani witin nani ai lamara kir iwi kan ba mihta ra kauhan, bara baha nani gâdka nani ra mahka mayunan, bara baku witin nani Dawan kupia sauhkan. 13Witin nani Dawan ba swin, Baal lilka bara Astarté lilka sât sât nani ra ai pura sunaia dukiara, 14bara baha mita Dawan ba Israel luhpia nani mapara ai kupia sauhkan, bara âimplikra nani blikan bal ai dukia nani bri kan ba sut implikan. Ai waihla nani ai tnaya kir ba mapara sip aiklabras kan, bara baha nani bal aiklabi witin nani sut pura luan. 15Aima bani witin nani war aiklabaia taki wan ba ra, Dawan ba witin nani mapara kan, baha mita witin nani ai daukanka ba saura baman taki kan.#Lib 26.14-26; Kli S 28.15-46.
Dawan ba Israel luhpia nani ra karna dihbi kan, ban sakuna, 16baha tilak witin nani ai tâ uplika wihta nani brin dauki kan, âimplikra nani ai dukia ai mihta dakbi ba wina pri sâkbia dukiara. 17Sakuna Israel luhpia nani ba baha wihta nani ba bîla walras kan, witin nani Dawan bîla wali daukras bara gâd wala nani ra witin nani mayunan. Witin nani ai damika nani lika Dawan lâka bîla nani ba wali daukan, sakuna ai luhpia nani lika, witin nani daukanka natka nani nina blikras kan. 18Dawan bui witin nani ai wihtka kum sakuya ba ra, baha wihta ra witin mita tâ baiki kan, bara wihta raya kan ba yua nani sut ra lika Israel luhpia nani ba waihla nani karnika ba wina dakbi pri saki kata, kan witin nani ba taiban lâka ra munan ba mita pât nani wahwi kan, ai mamna lulki ba witin wali kan, bara baha nani dukiara ai kupia swapni taki kan. 19Sakuna wihta ba pruya ba ra, witin nani kli saura taki kan, bara ai damika nani saura dauki kan ba wal kau saura dauki kan, gâd wala nani mayuni dukia dauki kan. Ai natka saura nani dauki ba sip lulki swiras kan, bara ai tânka saura kiama karna lâka ba sin swiras kata. 20Ba mita Dawan ba Israel luhpia nani ba mapara ai kupia sauhki, bara win: “Naha uplika nani na ai damika nani wal yang lâ daukri lâka ba krikisa, witin nani lika yang bîli wali daukras. 21Baku bamna, Jasua kau raya kan ba ra baha uplika nani witin nani ai tasbaya wina kangbi sakras ban swin ba, yang bui baha nani witin nani ai mawanra bâra yaba kli kangbi sakamna apia.” 22Dawan kaikaia brin dauki kan witin baha baku daukan ba wal, naha uplika nani na Dawan yabalka ra tawi wapbia sapa, blasi piua ra ai damika nani wapan ba baku. 23Baha mita Dawan baha nisanka nani ba kangbi sakras, bara ban swin Jasua mihta ra kau mangkras nani kan ba, sakuna ban swin witin nani baha tasbaya ra iwi kaia.
Currently Selected:
Wihta Nani 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua