Aiseya 64
64
1Âu, man kasbrika pura ba param saki bâra bal iwram kata,
bara man mamwanra, il nani ba yabram tatatwisa,#Imp St 19.16-18; Wih 5.4-5; Ab 3.3-15.
2pauta klauhan kiaya ami ba baku,
apia kaka, lî ba yan lukwisa.
Baha ningkara man waihlam nani ba, kakaira takbia,
bara nisan nani sut man mamwanra tatatwi kabia.
3Baha piua ra diara sibrinkira nani man daukram ba,
yang baha kaikaia bîla kaikras kapri ba,
man bal iwram ba ra, il nani ba mamwanra tatatwan ba.
4Witin nani baku pali kau walras bara kaikras kan,
man tnamya ra gâd wala âpu sa
baha dukia sâtka nani daukaia,
witin ra kasak luki uplika nani ba dukiara.#2 Ko 2.9.
5Man brisma yaura yamni ba daukaia,
lilia lâka ni;
bara kupiam krawisa piua ra
man dîa daukaia want sma ba kat daukisma.
Man kupiam baikram kan,
yang nani mampara saura daukri bamna;
baha saurka lâka ra
yang nani piua wihka iwri.
6Yawan sut na upla tâski kum baku sa;
yawan wan warkka pain nani sut ba
kwala tâski kum baku sa;
yawan sut na kauhan dus wahia srawan baku,
bara yang nani upla iki saurki ba mita
pâsa baku ai raskaia ai brih auya.
7Upla kumi sin âpu kan
man ninam ra ai pura suni ba,
rawi buaia bara man ra ai tâ baikaia;
baha ba mita, man bui yang nani ai lulki ai swiram,
bara wan lulki wan swiram,
wan watawika lâka nani karnika ra srawaia.
8Ban sakuna, Dawan,
man sika yawan wan Aisika;
yang nani na slaubla ba
bara man sika wan paski wan daukram ba;#Ais 29.16; 45.9; Jir 18.1-6.
¡baku bamna yang nani sut na,
man mihtam warkka nani sna!
9Dawan, ban pali karna kupiam baiki kapara,
yang nani upla ikri nani ba sin piu bani ra kupiam yarka krawbiara.
¡Kaiks yang nani uplikam sna!
10Man tawankam holikira nani ba,
upla iwras tasbaya daukan sa,
Jerusalem ba sauhkan bîla baman swin sa.
11Yawan wan pura sunaia watla holikira ba,
baha yawan wan prana kata ba,
baha bilara yang nani damiki nani man ra mamyuni kata;
baha sut nanara pauta ra angkan.
¡Baku sin yawan wan dukia manakira kau pali pain kaiki kata!
12Bara baha sut daukan ba kaiki si,
¿Dawan, man ban sâp kama ki?
¿Man sâp kaisma,
bara yang nani na mâya pali kat ai batakaisma ki?
Currently Selected:
Aiseya 64: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
