Aiseya 16
16
Moab uplika nani Juda ra wih yukuwan ba
1Selá upla iwras tasbaya ba wina
Saion luhpia mairin tasbaya ilka kat
dawanka ra prisantka,
sîp nani blikisa.
2Tnawira sirang iwi ai watla wina taki pâli ba baku,
Moab luhpia mairin nani sin
taki plapbia Arnón tingnika luaika ra.
3Saion ra aisi wisa:
“Daukaia lukanka bri nani ba dauks,
kan kahbaia dukiara
yang nani tâiwan aiklabaia ba man bris.
Distikam ba lapta lila kat mangks,
tihmia ra baku;
ai tasbaya wina kangban nani ba yukuks,
ai yabalka tiki tauki nani ba,
waihla mihta ra mangkpara.
4Moab uplika nani ai tasbaya wina kangban ba
swis man nani wal iwi kabia,
witin nani yukuwaika aimaki bas,
sauhki tatikra aula ba mawanra.”
Saura mamunra ba ai warkka sut daukbia,
bara sasauhkra ba yu kum luan kabia ba ra,
upla ra ai mina ra tataibra ba sin
tasbaya na wina mahka waia.
5King iwaika ra
Debit kiamka wina kum iwbia.
Wihta kasak kabia witin bui upla lâka dauki ba ra,
lâ kasak daukbia tânka sin pliki,
bara kasakka lâka ba daukbia
aihni sin lâ nani ba dauki kabia.
6Yawan kakaira sa
Moab prautka lâka ba,
ai prautka lâka ba tara pali sa,
ai wîna tara kulkanka brisa,
ai nakra prautka nani
bara sin bahki sturi aisi ba.
7Baha mita,
Moab ai uplika nani pura mata inbia;
man nani mamna lulkanka tara brima,
kupiam kriwanka nani sin,
Quir-haréset waitnika nani dukiara
kupiam krauki luki kama.
8Hesbón wainka nasla nani,
bara Sebná wainka nani ba sut ba srawi luan;
Nisan nani dawanka ba mita
wain kiwka mâirira nani ba klaki
ai mina ra taiban;
ai tnawa nani ba pâwi ban Jazer kat wata,
baha wina upla iwras tasbaya sut purara lalaman,
ban kabu baila wala kat.
9Baha mita inisna
Sebná wainka nasla nani ra luki,
Jazer ra sin luki,
Hesbón, Elalé dukiara
naikra laya laikisna,
mâ tilwan nani dâkaia bri kata ba purara war aiklaban bamna.
10Bin tara bara lilia lâka nani
insla bilara sâp takan kabia;
kli bin bara lilia lâka âpu kabia,
insla ra lawana aiwanaia ba sin âpu kabia.
Kau sin wain mâ ba taki kabia apia,
wain laya sakaia wisi.
Bin nani ba sin danh takan.
11Baha mita yang kupi ba arp baku tatatwi kabia,
Moab ra luki ini kabia,
yang kupi ba Quir-haréset ra sin luki kabia.
12Nahki kat Moab uplika il ra wabia sin,
bara bahara swer taki makabi swapbia ba kat,
nahki kat tempel ra wih ai pura sunbia ni sin,
hilp kumi sin bribia apia.
13Naha bîla sika Dawan mita aisin Moab mapara baha ba pat piu ailal sa. 14Nanara Dawan aisisa:
“Mani yumhpa bilka ra,
wark tatakra kum ai mana brih
kulki kaiki ba baku,
Moab, kulkanka lâka tara bri ba âpu takbia,
upla ailal pali brisa
sakuna maura lupia takbia
sirpi, karnika âpu.”
Currently Selected:
Aiseya 16: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
