Aiseya 13
13
Babilon mapara dahra aisin ba
1Babilon,#Ais 47.1-15; Jir 50.1—51.64. dukiara, mapara dahra aisinka bîla nani, Aiseya, Emus luhpia ra param marikan ba:
2“¡Man nani diara purara pâwras ilka kum purara
aiklabaia plakinka purara buks!
¡Suldiar nani ra aiklabaia sainka mariks!
Mihtam nani purara buks,
baku witin nani lamamra itwi wabia
upla tara nani getka bâk dimi.
3Upliki karnakira nani ra adar yâri,
baku sin tahpluki nani ra adar yabri,
yang pura luisna ba,
witin nani lilia bri nani ra,
yang klala blikisna ba alki brih daukbia.”
4Kwâra tara winanka walisa,
il nani tilara;
upla ailal bâra baku sa.
Nisan nani kârma binka ba walisa
upla ailal aidrubi asla takan nani ba wina,
karnika sut bri Dawanka kli laki kaikisa
ai dakni ba aiklabaia ridi takan ba.
5Kuntri kum laih pali ra bâra ba wina aula,
baila wala tani ba wina sin.
Dawan ai kupia baiwanka aiklabaika dukia nani ba wal,
tasba aiska ba sauhki tikaia aula.
6Yul swi baku ins,
kan Dawan yua ba pat baila sa.
Karnika sut bri ba aula,
sauhki tikaia karnika ba wal.#Isi 30.2-3; Jl 1.15; Sof 1.14-18; Mal 3.2; Par M 6.17.
7Baha ra upla sut klahkla karnika âpu takbia,
upla kupia bani ba sin dring swapbia.
8Upla sut sibrin pali dauki kabia.
Kupia wirhika sarka tara pali,
witin nani ra taibia,
mairin luhpa baikaia latwanka alkan ba wina
sip swak takras ba baku.
Pana pana sirang iwi tawi kaiki kabia,
ai swira ba ai mawanra ingwi kabia.
9Kaiks Dawan yua ba pat aula,
saura pali, lawanka tara,
kupia baiwanka tara wal,
saura dadaukra nani ba
tasba wina kusbi sakaia,
bara tasba na bîla man swiaia.
10Baha ba mita slilma nani
bara slilma sirpi nani daknika kasbrika purara bâra ba
ai ingnika ba sin ingbia apia;
lapta ba uli balbia wal baku,
tihmu tara iwbia,
bara kati ai ingnika ba sin yabia apia.#Isi 32.7; Mt 24.29; Mk 13.24-25; Lk 21.25; Par M 6.12-13; 8.12.
11Dawan aisisa:
“Tasba ai watawika lâka ba tâwan klala yabamna,
saurakira nani, witin nani bui upla iki ba tâwan;
prautkira nani kalwi ba takaskamna,
karnakira nani upla wala ra kulkras ba,
yârika mâyara bawbia.
12Waitna nani ba maura luhpia baman takaia daukamna,
Ofir ra gul pranakira âpu takan ba wal kau wiria.
13Baha ba mita yang kasbrika pura nani ba yabamna,
bara tasba ai pliska ba wina kitban kabia,
baha yua ra kupia baiwanka brimna ba ra,
kupi baiwanka laptikira ba tâwan.
14“Upla nani ba snapuka lupia nina bliki ba
baku sa apia kaka bara upla kumi sin âpu sa wal asla daukaia,
daiwan daknika kum turwi takan
kangbi asla daukaia upla kum âpu ba baku.
Kumi bani ba ai kuntrika ra wabia,
ai tawanka ra plapi wabia.#Jir 50.16.
15Upla sut swirka prawbia kaka,
skiru ni saban kabia,
upla sut swirka alkbia kaka,
ikan kabia.
16Ai luhpia sirpi nani ba,
witin nani ai mawan kat lulki saban kabia;
ai watla nani ba bîla man swibia,
bara witin nani ai maya ra saura munan kabia.
17Kaiks yang Media uplika nani ba tatukbamna
witin nani mapara waia,
witin nani silbar nani ba wina yus munbia apia;
gul ra sin tawi kaikbia apia wahma bara tiara.
18Wahma, tiara nani ra pantamangka ni sabia,
tuktan sirpi nani ra umpira kaikras,
baku sin tuktan tara nani ra.
19Bara Babilon,
king tasbaya nani pranakira ba,
Caldea uplika nani tasbaya tara skahkanka pranakira ba,
Sodoma bara Gomora baku takma yang mita sauhki tikatna piua ra.#Bla St 19.24.
20Baha tasbaya ra upla kli iwaia pliska âpu kabia,#Jir 50.39-40.
upla kiamka kum wina wala kat sin
bahara iwi takaskan kabia apia;
Arabia uplika nani sin,
kli bahara utla papakni mâkan kabia apia,
Sepad nani sin ai sîpka nani ba ra wabia apia.
21Bara bahara daiwan wail nani baman
bal takaski kabia,
watla nani ba iskri nani baman dimi kabia;
tnawira pâlras tara nani il biara ra ba,
bal dimi kabia
guts wail nani sin bâra pâli puli kabia.#Par M 18.2.
22King watla nani ra,
daiwan pruan papira daiwra nani dimi yul swi kabia,
ai lilia briaika watla nani ra
yul talika daiwra nani man kabia;
ai piua nani alkaia pat baila takisa,
ai yua nani ba kau yari daukan kabia apia.”
Currently Selected:
Aiseya 13: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
