2 Samuil 24
24
Debit upla nani ba kulki kaikan
(1 Kr 21.1-17)
1Dawan ba Israel luhpia nani mapara kli lawan, bara Debit ra adar yan upla nani ba kulki kaikaia, Israel bara Juda ra sin. 2Bara king ba suldiar nani wihta tara Joab witin wal kan ba, baha ra adar yan:
—Dan wina Beerseba kat, Israel luhpia nani kiamka ba sut pali tilara was, bara upla nani ba sut kulki kaiks, bara yang kaikamna upla an bâra sa sapa.
3Sakuna Joab pana king ra win:
—Dawan, king tara Gâdka ba, upla nani nanara bâra ba wal kau aima 100 kum pura praki kau ailal pali daukbia kaka, king tara ban raya iwi ba kaiki kabia; ¿sakuna baha ba dîa sa, dîa muni king tara ba upla sut ba kulki kaikaia brin daukisa ki?
4Ban sakuna, king adarka ba Joab purara, suldiar nani purara sin pat kahban ba mita, Joab bara suldiar nani ba sin king mawan wina mahka taki wan, upla an Israel ra bâra ba kulki kaikaia. 5Jordan awala lui wan, Aroer wina mahka kulkan il bîla ra bara tawanka nani ba sut, mahka Gad ra bara Jazer ra sin waia yabalka nani ba sut ra kulkan. 6Baha ningkara Galaad ra bara Cadés ra sin wan, hitita nani tawanka ra. Yu wala Dan ra, baha wina ai mawan lakan ba Sidón ra wan. 7Baha wina lika Tiro kan kahbaika pliska bri kan ba ra wan, heveo nani bara Kenan uplika nani tawanka bâk, ban Juda waupasa tanik Beerseba ra wan. 8Kati 9 pura yu 20 ba kat, kuntri aiska ba wapi kulkan, bara witin nani kli Jerusalem ra tawi balan. 9Joab upla nani sut kulkanka ba king ra yan bara naku kata: Israel ra 800,000 upla bâra sa aiklaklabra nani, bara Juda ra lika 500,000.
10Sakuna upla sut kulki kaikan ba ningkara, Debit lika witin pâtkira ai dara walan bara Dawan ra ai dahra sakan:
—Dawan, yang bui man ra puri sunisni. Upla kulki kaikri ba yang saura tara pali daukri, mamkabisni albikam na ban saurka swi tiks, upla sinskas kum baku yang daukri.
11Yapra wala titan, Debit buan ba ra, Dawan bui prapit Gad ra win, witin lika Debit ra dîa taki ba kakaira kata ba: 12“Debit kaikaia was, yang diara yumhpa witin ai mawanra mangkisna wis, ani ba yang bui witin ra dauki yamna brin daukisa kaka, witin ai wibia.” 13Bamna Gad lika Debit kaikaia wan, bara witin ra makabi walan:
—¿Naha diara yumhpa na wina, man ani ba briaia want sma: mani 7 plun wahwan want sma, kati yumhpa waihlam nani bui rau mai sauhki kaka plapi tauki kaia, apia kaka siknis saura kum yu yumhpa upla ra alkaia? Nanara man pain luki kaiks bara ai wis, ai blikan ba uplika ra yang kli waia witin ra dîa wiaia ba wimna.
14Bara Debit bui Gad ra pana win:
—Makabi walankam ba wirha pali ai taibuya. Kanra yamni sa, yang nani Dawan mihta ra kauhamna kaka, ai kupia yamnika ba tara pali sa bamna, sakuna upla mihta ra lika apia.
15Bara Dawan siknis saura kum Israel purara blikan, baha yua titanka ba wina piua kulkanka ba yua aimakan ba kat, bara Dan wina Beerseba kat upla nani 70,000 pruan. 16Insal ba bui Jerusalem ba âpu pali daukaia takan bara Dawan kupia wirha takan, witin insal ra adar yan baku, rausauhkanka tara daukan ba, bamna insal ra win: “¡Aitani, baha kat takasks, tawan ba kau klala yapara!”
Dawan insalka ba, Arauna, Jebús uplika nani wi ba, plawar mâ taya sakaika watla ba kat bâra kan. 17Debit kaikan insal ba upla nani ra siknis yabi kan ba, bara witin Dawan ra winan:
—¡Yang sika saura yâri! ¡Yang sika pâtkira sna! ¿Sakuna pâtkas nani na dîa daukan? ¡Man ra mamkabisna klalkam ba yang purira kauhbia bara taiya nani purara sin!
Debit altar kum paskan
(1 Kr 21.18-27)
18Baha sim yua, Gad ba Debit kaikaia wan, bara witin ra win altar kum paskbia Dawan dukia, Arauna, Jebús uplika ba plawar mâ taya saki ba watla pliska kat. 19Bara Debit lika Dawan adarka ba kat, Gad witin ra win ba baku daukan. 20Arauna ba baha yua witin laihura yabal ra kaiki kan, bara kang kaikan king ba ai dukia dadaukra nani aikuki witin ra aula sa. Arauna witin pas king kainara plapi ai mawan tasba kat bawan. 21Bara Arauna bila win:
—¿Yang kingki tara na, dîa muni ai albika na kaikaia aula?
Debit pana witin ra win:
—Plawar mâ taya sakaia watla mâkram ba atkaia balri, bahara Dawan dukia altar kum paskaia, siknis saura ba tawan wina sakaia dukiara.
22Arauna pana win:
—King tara ba, dîa kau yamni kaiki ba bribia, bara wîna aiska angkan sakripaiska daukbia, bîp wainhka nani nâra sa aiska angkaia, mâ taya sakaia dusa nani sin nâra sa, bîp lal mangkaika nani sin sut nâra sa, baha nani pauta briaia sip sa. 23¡Naha sut sin yang bui king tara ra yabuna!
Baha sut purkara, Arauna ai bîla baikra tara aisin:
—¡Brin ai daukisa king bui Dawan Gâdkam ra yamni kaikbia!
24Sakuna king ba witin ra win:
—Lukankam na yamni kaikisna, ban sakuna diara ai mana bri ba sut, yang bui man wina atkras prisant brih, baha dukia ni sakripais dauki Dawan Gâdki ra prisantka dauki yamna apia.
Baku natka ra Debit baha watla bara bîpka wainhka nani ba sut, silbar mâ 50 mana atkan, 25bara bahara altar kum paskan Dawan dukiara, bahara wîna aiska angkan bara kli wal wan uplika takaia sakripaiska sin daukan. Baha daukan kat Dawan kli baha kuntrika uplika nani makabanka nani ba yamni walan, bara siknis saura nani ba sut Israel luhpia nani tila wina sakan.
Currently Selected:
2 Samuil 24: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua