2 Samuil 23
23
Pruaia bîla nani Debit aisin ba
1Naha bîla nani ba sika Debit pruaia ra aisin ba:
“Debit, Jesé luhpia waitna ba,
Gâd bui purara bukan waitnika,
Jekob Gâdka bui bâk sakan kingka ba,
Israel lawana bîla damni aiwawanra,
witin param aisin:
2“Dawan Spiritka ba yang bîli bâk aisisa;
ai bîla aisinka ba yang twisi ra sa.
3Israel Gâdka ba witin aisin;
Israel kan kakahbra ba witin bui yang ra ai win;
upla purara kasak lâka ra wihta aimaki ba,
“Dawan ra sin sibrin luki wihta aimaki ba,
4lalma kahbi ingnika baku kabia,
titan kum ra kasbrika âpu
yu ingnika taki ba baku sin,
lî auhi luan ningkara
inta wahia nani pâwi ba baku.”
5Baha mita yang kiamki ba
kitras Gâd wal bâra sa,
witin ba yang wal lâ kum ban kaia lâka ba daukan sa,
lâka aiska daukaia pat ulban sa, sip luras.
Pura luaia lâka aiska ba
witin bui yang ra aikisa bara yang brinki ba sin sut aikisa.
6Sakuna saura dadaukra nani sut ba
lika kiaya baku lulki swin kabia,
upla kumi sin ai mihta ni alkbia apia.
7Baha nani ra kangbaia kaka,
ayan briaia, apia kaka langsa dusa kum,
baha nani ba pauta klauhan ra lulkaia
sut ami âpu takbia dukiara.”
Debit suliarka aiklaklabra tara nani sturka ba
(1 Kr 11.10-47)
8Debit suliarka aiklaklabra kau pain nani nina ba naha nani sa: Is-bóset, Hacmoní wina ba, aiklaklabra yumhpika kau sibrin âpu nani ba wihtka, sanska kum ra upla 800 wal aiklabi, sut ikan langsa ni. 9Wâlka witin nina bliki ba Eleazar, Dodó luhpia ahohíta ba, yumhpa ba tilara kupia karnira kum ba. Witin Debit wal kan Pas-damim ra, filisteo nani bahara asla takan war aiklabaia, bara Israel luhpia nani ba ai ninara tawi wan. 10Witin lika ban aiklabi filisteo nani ra iki kan bara swapan sord alkan baman, sula wakia auban bara ai sordka sip swiras kan. Baha yua Dawan ba pura lui buaia lâka ba alkan. Bara aiklaklabra nani ba Eleazar nina blikan waihla nani wina diara nani dakban ba witin nani briaia.
11Yumhpika Eleazar nina bliki ba Samá, Agué luhpia, ararita ba. Filisteo nani ba Lehi ra asla takan bahara bins sâtka nasla kum bâra kan, bara Israel aiklaklabra nani ba witin nani sîa plapan. 12Sakuna Samá lika insla ba lila kat bûi ai kaina kahban, filisteo nani ba pura luan. Baku Dawan pura lui buaia lâka tara ba alkan.
13Aima kum, mâ nani krikaia piua ra, kupia karna sibrin âpu nani ba wina 30 nani ba tila wina yumhpa ba witin nani Adulam walpaya untika ra wan, Debit wal prawaia. Tnaya wala ra Refaim ilka bîla ra filisteo nani karnika ba ai kiampka dauki bâra kan. 14Debit ba kan kahbaika pliska ba ra kan piua ra, Betlehem ra filisteo nani aiklaklabra daknika karna kum bâra kan. 15Bara Debit ai brinka ba aisin: “¡Ay, ya pan Betlehem getka lamara liwanhta bâra ba wina lî wiria panhki sal aikbia ki!”
16Bara kupia karna sibrin âpu nani yumhpa ba filisteo nani kiampka ra wih diman Betlehem getka lamara, liwanhta ba wina lî sakan bara Debit ra bri si yan. Debit laya ba diras, sakuna tasba ra laiki sakripais baku dauki Dawan ra yabi win, 17bara aisin: “¡Dawan, naha laya yang sip dimna apia! ¡Naha waitna yumhpa na tâlia disna baku sa, ai rayaka ba prura mihta ra mangki ba wina bri balan bamna!” Bara witin diras kan.
Baha daukanka pali ba naha kupia karnika yumhpa ba bui daukan.
18Abisai, Joab muihnika bara Seruiá luhpia ba, baha 30 kupia karna sibrin âpu nani ba wihta tara kan. Piua kum ra witin bui waitna 300 ai langsika ni ikan. Bara baku witin 30 nani ba tilara kulkanka tara brin, 19bara witin kau kulkanka tara brin 30 nani ba purara, baku witin nani wihtka aimakan. Sakuna tâura yumhpa tara kulkan ba aikuki baku lika kulkras.
20Benaías, Joiadá luhpia, Cabseel tawanka wina, witin daukanka tara manis pali daukan, waitna kum kupia karna sibrinkas kan. Ariel Moab wina ba luhpia waitna wâl ba witin bui ikan. Yu kum sin sno manis kauhi kan, bara witin tasba unta kum ra iwi wih layan kum ikan. 21Idsip waitnika kum ra sin ikan, witin waitna tara yari pâwan kan, ai langsika ai mihta ra brih auya kan: Benaías bui dus kum ni pruki bataki, langsika ba mihta dakbi, bara langsika ba ni ikan. 22Joiadá luhpia Benaías daukanka ba, baha nani 30 aiklaklabra kau pain nani ba tilara kulkanka yan; 23bara witin kau kulkanka yamni brin, baha nani ba wal, sakuna tâura yumhpa nani kulkanka ba wal baku lika apia. Bara Debit bui witin ba ai suldiarka nani tilara wihtka mangkan.
24Baha nani 30 nani ba, kupia karna sibrin âpu nani ba tilara bâra kan: Asael, Joab muihnika; Elhanán, Dodó luhpia, Betlehem wina; 25Samá, Harod wina; Elicá, baha sin Harod wina; 26Heles, Paltí uplika ba; Irá, Iqués luhpia, Tecoa wina; 27Abiézer, Anatot wina; Sibecai, Husah wina; 28Salmón, ahohíta ba; Maharai, Netofá wina; 29Héled, Baaná luhpia, baha sin Netofá wina; Itai, Ribai luhpia, Guibeá wina, Benjamín tasbaya ba; 30Benaías, Piratón wina; Hidai, Gaas tingnika ba wina; 31Abí-albón, Arbata wina ba; Azmávet, Bahurim wina; 32Eliahbá, saalbonita ba; Jasén luhpia nani ba; Janatan; 33Samá, ararita ba; Ahiam, Sarar luhpia, naha sin ararita; 34Elifélet, Ahasbai luhpia, Maacá wina ba luhpia; Eliam, Ahitófel luhpia, Guiló wina; 35Hesrai, Carmel wina; Paarai, Arbá wina ba; 36Igal, Natán luhpia, Sobá wina; Baní, Gad wina; 37Sélec, Amón wina; Naharai, Beerot wina, Joab hilpika, Seruiá luhpia; 38Irá, Jatir wina; Gareb, witin sin Jatir wina; 39bara Urías, hitita ba. Bara asla sut ba 37.
Currently Selected:
2 Samuil 23: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua