Tito 1

1Kalata wakutuwa kwaku Paulo mteŵeti waku Chiuta, ndi wakutumika waku Yesu Kristu uli ndi chivwanu cha wakusankhika waku Chiuta, ndi chiziŵisku chauneneska wa mwa uwopa Chiuta, 2mu chigomezgu cha umoyo wamuyaya, weniwo Chiuta mzirautesi wangupangana kali ku nyengo za muyaya, 3kweni pa nyengo zenecho wanguvumbuliya mazu ghake mu uthenga, weniwo ine ndingugomekezgeke nawo kwakuyana ndi langulu laku Chiuta Mtaski widu; 4kwaku Tito, mwana wangu mwenimweni mu chivwanu chamasanga. Wezi ndi chimangu kutuliya kwaku Chiuta Dada ndi Kristu Yesu Mtaski widu.

Nchitu yaku Tito mu Krete

5Chifukwa chenichi ndingureka iwe mu Krete, alinga kuti urulike vyo vyenga vikufiskika, ndipo kuti ujarike ŵara mu msumba wose, uli ndimo ine ndungukulanguliya; 6asani munthu ngwambura masumulika, mrumi wa munthukazi yumoza, wakuŵa ndi ŵana ŵakuvwana, oŵakusumulika utayisi pamwenga uzira uthera cha. 7Chifukwa mlereze watenere kuŵa wambura masumulika, wachiwawa cha, wambembe cha, mwanduzi vyasoni cha; 8kweni mwanja-ŵalendo, mwanja umampha, wa vinjeru, murunji, mkhovu, wakujitintha; 9wakumiziriya ku mazu ghamagomekezgeka gho ngakuyana ndi chisambizgu cho, alinga kuti waŵe wanthazi kuchiska mu sambizgu lizirima, ndi so kuŵapanikizga wo mbakususka.

10Chifukwa ŵalipo ŵanandi ŵambura kuthera, ŵa mazu ghaŵaka ndi ŵakufuvya, viŵiviŵi wo ŵa mchinju wo. 11Watenere kusunamiskika; ŵeniwo ŵabwanganduwa chivwanu cha nyumba zamphumphu, pakusambizga vyambura kwene chifukwa cha chanduka chasoni. 12Yumoza wamwaku wo, mchimi waku ŵija, wanguti, “Nyengo zose ŵaKrete mbatesi, vikoku viheni, nkharghi zikata.” 13Chisimisimi chenichi nchakuneneska. Pa chifukwa chenicho ŵapanikizge kwakuchenya, alinga kuti ŵakhome mu chivwanu. 14Ndi kuphwere cha nthanu za uYuda ndi malangulu gha ŵanthu ŵakupambukako ku uneneska wo. 15Ku ŵakuphotoka vyose viphotoka: kweni ku ŵakukazuzgika ndi ŵambura kuvwana kulive kamoza kakuphotoka; kweni chinjeru chawo nacho ndi njuŵi so vikazuzgika. 16Ŵazomera kuti mbakumziŵa Chiuta; kweni ndi nchitu zawo ŵatumkana, pakuŵa ŵauziya, ndi ŵamtafu, ndi ku nchitu yose yamampha ŵambura kwenere.

Currently Selected:

Tito 1: TongaMw

Highlight

Copy

Compare