Tito 2

Visambizgu veneko

1Kweni kambanga iwe vinthu vyenivyo vitenere sambizgu lizirima lo, 2kuti madoda ghaŵe ghamkana vinyo, ghaziza, gha vinjeru, ghakhome mu chivwanu, mu chanju, mu unkhunthiya: 3makhongwe nagho kwakulingana ghaŵe ghaulemu mu kajaridu, ghakuparamula cha, chingana ngaŵanda ku vinyo linandi cha, ghakusambizga vyamampha: 4alinga kuti ghalangenge ŵanyakatema kuŵa ŵakuŵanja ŵarumi ŵawo, ŵakuŵanja ŵana ŵawo, 5ŵavinjeru, ŵakongorekwa, ŵakutakataka kwawo ku nyumba, ŵamampha, ŵakuthera ku ŵarumi ŵawo kuti mazu ghaku Chiuta ghangatokoskeka cha; 6majaha nagho kwakulingana chiskanga kuŵa ŵavinjeru: 7mwaku vyose ŵakujirongo chandiru cha milimu yeneko; mu sambizgu lo, ŵakurongo uwurachivuzi, uziza, 8kakambidu kazirima, ko nkhambura masuskika; alinga kuti yo ngwakumikana nafwe walengeskeke, pakuuravi kaheni kakwachisumuliya iwe. 9Chiskani ŵaŵanda kujithereska ku ŵambuyawo, ndi mwaku vyose kuŵa ŵakuŵakhorweska; 10kuŵa ŵakuŵiringuwa cha, ŵalitolitoli cha, kweni ŵakurongo ukongorekwa wose wamampha; alinga kuti ŵadyoŵeske chirunguchizgu chaku Chiuta Mtaski widu mu vinthu vyose.

11Chifukwa wezi waku Chiuta wabulika, wakutole ŵanthu wose utaski, 12wakutirunguhizga kuti pakukana uwura uwopa Chiuta ndi malikhumbira gha charu, tijariyenge umoyo kwavinjeru ndi kwaurunji ndi kwauwopa Chiuta mu mgonezi wasono, 13pakulereze chigomekezgu cho chamwaŵindi chiwoneka cha unkhankhu waku Chiuta mkhuru ndi wa Mtaski widu Yesu Kristu; 14mweniyo wangujipaska pa chifwa chaku ifwe, alinga kuti wawombolenge ifwe kwamu uchikana marangu wose, ndi wajitozgiyenge khamu lapa mtima wake, lakupamphukiya nchitu zeneko.

15Vyenivi kambanga ndi chiskanga ndi panikizganga ndi mtufu wose. Wangakuyuyuwa cha chingana njumoza.

Currently Selected:

Tito 2: TongaMw

Highlight

Copy

Compare