Nthanthi 8
8
Zeru yiruska mukachitidu kake
1Kumbi kuti zeru yidana cha, kumbi kuwamo kuti kukambura mazu ghake cha?
2Pachanya pa mitunthu pafupi ndi nthowa,
mu miseu kutuma mwenimo;
3pachiri pa malikomo ku maso kwa msumba,
pakuserere pa makhomo ghakuru kuliya kwakubangura:
4“Ndidana kwaku imwe
mwaŵanthurumi mwe ndipo kuliya kwangu nkhwaku ŵana ŵanthurumi ŵa ŵanthu.
5Mwaŵampupuka sambirani kuphwere,
mwaŵanthurumi ŵakupusa ŵikanipo mtima.
6Avwani, pakuti ndikakambanga vyakuzirwa,
ndipo ku mlomo kwangu
kukatuwanga cho nchakurunjika;
7pakuti mlomo ukatuzganga uneneska;
mphurupuru mbukazuzi ku milomo yangu.
8Mazu ghose gha mlomo wangu ngarunji;
palivi chakunyongoloska pamwenga chakunyongoloka mwaku gho.
9Ghose ngakunyoroka kwaku
mweniyo wawamo ndipo ngamampha kwaku wo ŵasaniya zeru.
10Toni kusambizga kwangu mu malo gha siliva,
ndi zeru kwakuruska golide lakusankhika;
11pakuti zeru njamampha kwakuruska vyuma,
ndipo chose chenicho
mungakhumba kuti chingayana nayo cha.
12Ine, zeru, ndija mu kuphwere,
ndipo ndisaniya chinjeru ndi kughanaghana.
13Kopa Ambuya nkhutinkha uheni.
Kunyada ndi kujikuzga ndi nthowa
ya uheni ndi kirongoro kwakupuruska nditinkha.
14Ndendi chipangu ndi zeru yakufikapo,
ndendi kuziŵa kwa mukati, ndendi nthazi.
15Ŵakaronga ŵawusiya mwangu,
ndipo ŵeruzgi ŵateruzga kwakurunjika;
16ŵana ŵa mafumu ŵawusiya mwangu,
ndipo ŵanangwa ŵateruzga charu chapasi.
17Nditanja ŵeniwo ŵatindanja,
wo ŵatindipenja kwarwana ŵatindisaniya.
18Vyuma ndi ulemu vyendi ine,
ulemelelo wakukiyakiya ndi kusakata.
19Chipasi changu nchamampha kwakuruska golide,
chingana ndi golide wakwenguwa,
ndi chanduwu changu chiruska siliva wakusankhika.
20Nditenda mu nthowa ya urunji,
mu miseu ya cheruzgu chirunji,
21kupaska ulemelelo kwaku ŵeniwo ŵatindanja,
ndi kuzaza mbiku zawo.
22Ambuya ŵangundilenga pa
mtendeko wa mlimu wawo, mlimu wawo wanchitu zawo za mwaka.
23Mu migonezi ya kale ndingumikika, pakudanga, chenga chindayambe charu chapasi.
24Kuchalivi zindimba ndingusotopoleka,
penipo, kwengavi visima vyakuŵa ndi maji.
25Mapiri ghenga ghandarongosoleke,
paurongo pa mutunthu, ndingusotopoleka;
26ŵenga andalenge charu chapasi ndi lisuwa lake,
pamwenga fuvu lakudanga la charu.
27Penipo angujalika machanya, ine ndenga penipo,
penipo angulemba chakuzunguliya pa chisku chandimba,
28penipo angukhozga mulengalenga kuchanya,
penipo angujalika visima vya ndimba,
29penipo angupereka ku nyanja malili ghake,
alinga kuti maji ghareke kulengeska langulu lawo,
penipo angulemba viŵanja vya charu chapasi,
30penipo ndenga pamoza nawo, uli ndi kapitawo wa nchitu;
ndipo zuŵa ndi zuŵa ndenga likondwa lawo,
wakukondwere paurongo pawo nyengo zose,
31kukondwere mu charu chawo cho chenga
ndi ŵakujamo ndi kukondwere mu ŵana ŵanthurumi ŵa ŵanthu.
32Ndipo sono, mwa ŵana ŵangu,
tegherezgani kwangu: ŵakukondwa mbeniwo ŵasunga nthowa zangu.
33Vwani chisambizgu ndi muŵe ŵa zeru,
ndipo mungachirekanga cha.
34Wakukondwa ndi munthu mweniyo wategherezga kwangu,
wakulindizga zuŵa ndi zuŵa pa malikomo ghangu,
wakulindizga pafupi pa makhomo ghangu.
35Pakuti mweniyo wasaniya ine
wasaniya umoyo ndipo waronde mwaŵi wakutuwa ku Ambuya;
36kweni yo wapambana nane watijipweteka mweneko,
wose ŵeniwo ŵatinkha ine ŵatanja nyifwa.”
Bible Society of Malawi