Nthanthi 7
7
Wachenje nayo munthukazi muheni
1Wa mwana wangu, sunganga mazu ghangu,
ndi uŵike mbiku marangu ghangu mwako;
2sunganga marangu ndi ujenge wamoyo,
sunganga kurunguchizga kwangu uli ndi mboni ya jisu lako;
3Uvimangiriyi pa minwi yako,
uvilembe pa gome la mtima wako.
4Kamba ku zeru, “We muzichi wangu,”
ndipo dana maghanaghano bwezi lako lakuziŵikwa,
5kukusunga iwe ku munthukazi muyaghayagha,
ku munthukazi wakunyenga ndi mazu ghake gha uteremusi.
6Pakuti pawindo la nyumba yangu ndalereska kubwalo pakati pa tumiti,
7ndipo ndawona mukati mu ŵampupuka,
munyamata wambura chinjeru,
8wadumuwa mu museu pafupi ndi chisongo chake,
wachito museu waku nyumba yake
9maso fyepere ndi mazuluvi,
pa nyengo ya usiku ndi mdima.
10Ndipo ehe, munthukazi wakumana nayo,
wakuvwala uli ndi mureŵi wakuchenje mu mtima.
11Wabangula ndi wanyenga, marundi ghake kuti ghaja pasi pa nyumba cha;
12sono we mu museu, sono we pa musika,
ndipo pa chisongo che chose waŵeramiya.
13Watimuvumbitiya ndi kumufyofyontha,
ndipo ndi chisku chakujirumba watiti kwaku iyo:
14“Ndaperekanga mipasku,
ndipo msana wale ndalipa marapu ghangu;
15Viyo sono ndaziya kukumana nawe,
kukupenja kwarwana, ndipo ndakusaniya.
16Ndayala chakujapo changu ndi
vyakuvwinkhapo saru za maluŵa za thonje laku Egipiti:
17ndadapo vyakununkhira pa bedi langu vya muro, aloe ndi sinamoni.
18Zanga, tikakondwe mu chanju chidu mpaka mlenji;
tiye tikondwereskeke taŵeni ndi chanju.
19Pakuti murumu wangu kuti wemu nyumba cha;
waruta pa ulendo utali;
20waruta ndi thumba la ndrama,
wakawerenga ku nyumba uchikhoma mwezi.”
21Ndi kakambidu ka kuru kakuwoja watimuchichizga;
ndi mazu ghake ghakufyafyaliska watimukakamizga.
22Mbwenu ruŵi-ruŵi watimurondo,
uli ndi ng'ombe yitiya kukubayika,
pamwenga uli ndi nyama yakoleka kwakufyeka
23mpaka penipo muvwi uporota mu matumbu ghake;
uli nkhayuni kakuchimbiriya mu chiŵana;
iyo kuti waziŵa cha kuti chibayenge umoyo wake.
24Ndipo sono, mwaŵana ŵangu mwe, tegherezgani kwangu,
ndipo pulikizgani ku mazu gha mlomo wangu.
25Mtima ureke kupatukiya ku nthowa
za munthukazi yo, mungalandiyanga mu miseu yake cha,
26pakuti ŵanandi ŵakuthereskeka waŵabwanthuliya pasi;
inya, ŵakubayika ŵake wose ndi mpingu wanthazi.
27Nyumba yake ndi nthowa yakuya ku muunda,
yakusere pasi ku vipinda vya nyifwa.
Bible Society of Malawi