Nthanthi 29
29
1Mweniyo wasuskika kaŵikaŵi kweni wangangamika mbwenu khosi lake wakaswekanga kwamabuchibuchi wambura machizgika.
2Penipo ŵarunji ŵemu mtufu, ŵanthu ŵakondwere;
kweni asani ŵamphulupulu ŵateruzga ŵanthu ŵatamantha.
3Mweniyo watanja zeru wakondwereska awiske,
kweni mweniyo wakwatikana ndi ŵareŵi waparghang'a chuma chake.
4Ndi cheruzgu chirunji karonga wapereka ujazi wa chimangu ku charu,
kweni mweniyo ngwalikwanu kwanu la vyaulera watichibwanganduwa.
5Munthu mweniyo wapusika muzengezgani wake
wathyiya marundi ghake chilepa.
6Munthu wamphulupulu ngwakuthyika ndi utimbanizi wake,
kweni munthu murunji watumba ndi wakondwa.
7Munthu murunji waziŵa vyakwenere vya mukavu;
munthu wa mphulupulu kuti wawamo cha chinjeru cha viyo.
8Ŵakunyoza ŵatocha msumba,
kweni ŵanthu ŵazeru ŵatuzgapo chikwiya.
9Asani munthu wazeru wapindana ndi mubereŵeza,
mubereŵeza wakaripa ndi kuwoya, ndipo palivi kuchetama.
10Ŵanthu ŵakunweka ndopa ŵatinkha wambura kalema,
ndipo wamphulupulu wapenja umoyo wake.
11Mubereŵeza waŵikapo mtima wose pa ukari wake,
kweni munthu wazeru mwachisisi wagowoka.
12Asani mweruzgi wategherezga ku utesi
nduna zake zose zikaŵanga za mphulupulu.
13Munthu mukavu ndi wakuyuzga ŵakumana pamoza;
Ambuya ŵapaska ukweru ku maso ghaku wo ŵaŵi.
14Asani karonga wateruzga mukavu ndi urunji,
chitengo chake chikamanga muyaya.
15Ndodo ndi kuchenya vipaska zeru,
kweni mwana wakumulekelezga watole soni anyina.
16Asani wamphulupulu ŵepa mtufu utimbanizi ukuwa,
kweni ŵarunji ŵakalereskanga pa kuwa kwawo.
17Ulangengi mwana wako ndipo wakakupaskanga chipumulu;
wakapaskanga kukondwa ku mtima wako.
18Kweniko kulivi kuchima, ŵanthu ŵataya kujitintha,
kweni wakutumbikika ndi mweniyo wasunga dangu.
19Ndi mazu ghanandi mteŵeti kuti walangika cha,
pakuti chingana wawamo kuti waphwerengeko cha.
20Utumuwona munthu mweniyo ngwafulumila mu mazu ghake?
Ungamugomezga mubereŵeza kwakuruska iyo.
21Mweniyo wahiŵa mteŵeti wake kwamba ku wana,
paumali wawonenge kuti ndiyo muhari.
22Munthu wachikwiya wayuska ndeu,
ndipo munthu wa chikalalizga wachitiska utimbanizi unandi.
23Kujikuzga kwa munthu kukamusiskiyanga pasi,
kweni mweniyo ngwakujiyuyuwa mumzimu wakarondanga thumbiku.
24Yo wakwatikana ndi munkhungu watinkha umoyo wake;
watuvwa kutemba kweni kuti wasumuwa kanthu cha.
25Kopa munthu nkhuthya chiŵana,
kweni mweniyo wagomekezga mu Ambuya we pakukho.
26Ŵanandi ŵapenja kurumbika ndi mweruzgi,
kweni ku Ambuya munthu waronde cheruzgu chirunji.
27Munthu wambura kuchita urunji mbukazuzi ku murunji,
kweni mweniyo nthowa yake njakunyoroka mbukazuzi ku wamphulupulu.
Bible Society of Malawi