Nthanthi 28
28
Mazu ghakurongo mupambano wa vinthu
1Ŵamphulupulu ŵathaŵa penipo palivi mweniyo watuŵadikiska,
kweni ŵarunji mbakukhwima mtima uli ndi nkharamu.
2Asani charu chituswa dangu chendi ŵeruzgi ŵanandi;
kweni ndi ŵanthu ŵakuwamo ndi ŵachinjeru
ukhovu wake ukakiyangakiyanga nyengo yitali.
3Munthu mukavu mweniyo wayuzga ŵakavu ŵanyake,
ndi vuwa ya kupuma yeniyo kuti yisiya kurgha cha.
4Ŵeniwo ŵasiya dangu ŵarumba ŵamphulupulu,
kweni ŵeniwo ŵasunga dangu ŵalimbana nawo.
5Ŵanthu ŵaheni kuti ŵawamo cheruzgu chirunji cha,
kweni ŵeniwo ŵapenja Ambuya ŵawamo kwakufikapo.
6Wamamphaku ndi munthu mukavu mweniyo watenda mu ukongolekwa wake
kwakuruska musambasi yo ngwakulandizga mu nthowa zake.
7Mweniyo wasunga dangu ndi mwana wazeru,
kweni wakukwatikana ndi nkharghi walengeska wiske.
8Mweniyo watandaniska usambasi wake ndi kubwerekeska
kwakuŵikiyapo ndi kwandaniska waunjikiya
mweniyo wendi wezi ku ŵakavu.
9Asani munthu watuzgako gutu lake kukuvwa dangu
chingana ndi rombu lake ndi kazuzi.
10Mweniyo walandizgiya murunji munthowa ya uheni,
wakawanga muzenje la mweneko,
kweni wambura kalema wakaŵanga ndi chihara chamampha.
11Munthu musambasi ngwa zeru mu jiso la mweneko,
kweni munthu mukavu mweniyo wendi kuwamo wakamubowozganga.
12Penipo murunji wapunda,
pe unkhankhu ukuru;
kweni penipo wa mphulupulu wayuka ŵanthu ŵabisama,
13Mweniyo wabisa mautimbanizi ghake kuti wakasakatanga cha,
kweni mweniyo wazomera ndi kughareka wakarondiyanga lisungu.
14Wakutumbikika ndi munthu mweniyo watopa Ambuya nyengo zose,
kweni mweniyo wangangamiska mtima wake watuwa mu suzgu.
15Uli ndi nkharamu yakukoroma,
pamwenga biyere wakurotoka, ndimu walili mweruzgi wa
mphulupulu pa ŵanthu ŵakavu.
16Mweruzgi mweniyo walivi kuwamongwakuyuzga ndi nkhaza;
kweni mweniyo watinkha chanduwu chizira urunji wandaniskenge mazuŵa ghake.
17Asani munthu wanyekezgeka ndi ndopa za munyake waŵe wakuthaŵathaŵa mpaka nyifwa; paulevi wakumovya.
18Mweniyo watenda muukongorekwa wakataskikanga,
kweni mweniyo ngwakulandizga mu nthowa zake wakawanga mu zenje.
19Mweniyo walima charu chake wakaŵanga ndi kurgha kunandi,
kweni mweniyo wandondoloska twaŵakaŵaka wakasaukanga ukongwa.
20Munthu wamagomekezgeka wakazalanga ndi vitumbiku,
kweni mweniyo watunthumiya kusambasa kuti warekenge kulangika cha.
21Kulongo kweruzgiya lwandi kuti nkhwamampha cha,
kweni pa kurgha kumanavi munthu wachimwiyengepo.
22Munthu wakunweka chuma watinthimikiya usambasi;
ndipo kuti waziŵa cha kuti ukavu ukamuziyanga.
23Mweniyo wasuska munthu wakasaniyanga mwaŵi pavuli, kuruska mweniyo wanyengele ndi lilime lake.
24Mweniyo watuba vya awiske pamwenga anyina ndi wakamba kuti, “Uku kuti nkhunanga cha,”
ngwakukwatikana ndi munthu wakubwanganduwa.
25Munthu mususi wayuska ndeu,
kweni mweniyo wagomekezga mu Ambuya wakasambasanga.
26Mweniyo wagomekezga mu maghanoghano gha mweneko ndi mbereŵeza,
kweni mweniyo watenda mu zeru wakataskikanga.
27Mweniyo wapaska mukavu kuti wakavukenge cha,
kweni mweniyo wabisa maso ghake warondenge matembu ghanandi.
28Asani wamphulupulu wayuka,
ŵanthu ŵabisama, kweni asani wamara, murunji watandana.
Bible Society of Malawi