Maŵerengedu 9
9
Phaska lichitika
1Ndipo Ambuya angunena ndi Mosese mu bozwa la Sinai, mu mwezi wakudanga wa chirimika cha chiŵi, ŵanguti ŵatuwa mu charu cha Egipiti, anguti, 2“ŴaYisraele ŵachite phaska pa nyengo yake yakutemeka. 3Zuŵa la chumi ndi chinayi la mwezi uno, ndi mazulo mukachitanga pa nyengo yake yakutemeka; kwakuyana ndi marangu ghake ghose, ndiso ndi kachitiru kake kose ndimu mukachitiyanga.” 4Viyo Mosese wangunena ndi ŵaYisraele kuti ŵachite. 5Ndipo ŵanguchita phaska pa zuŵa la chumi ndi chinayi, la mwezi waku danga, ndi mazulo, mu bozwa la Sinai; kwakulingana ndi vyose vyo Ambuya angulanguliya Mosese, ndimo ŵaYisraele ŵanguchitiya. 6Ndipo ŵengapo ŵanthurumi ŵanyake wo ŵangukazuzgika pa kukwaska chiŵanda, ŵengavi kwenere kuchita phaska zuŵa liya; ndipo ŵanguza paurongo paku Mosese ndi Aroni zuŵa leniliya, 7ŵanthu wo ŵanguti, “Takazuzgika pa kukwaska chiŵanda; kumbi takanizgikiyanji kupereka mpasku ku Ambuya pa nyengo yakutemeka mukati mu ŵanyidu ŵaYisraele?” 8Mosese wangunena nawo, “Mani danga, ndivwi cho Ambuya akalangulanga paku imwe.”
9Ambuya angurongoro ndi Mosese, kuti, 10“Uŵanene ŵaYisraele, asani munthu we yose mwaku imwe pamwenga wa mphapu yinu waŵa wakukazuzgika chifukwa cha kukwaska chiŵanda, pamwenga we pa ulendo kutali, wakachitanga mbwenu phaska ku Ambuya. 11Zuŵa la chumi ndi chinayi la mwezi wa chiŵi, ndi mazulo, ŵakachitanga; ŵakarghanga ndi chiŵande chambura mtupu ndi munkhwani wakuŵaŵa. 12Ŵareke kusiyako kuti ŵarghe mawa nanga nkhuswa chiwanga chake; ŵachite kwakulingana ndi marangu ghose gha pa phaska. 13Kweni munthu yo ngwakuphotoka ndipo kuti we pa ulendo cha, asani wareka kuchita phaska, munthu wa viyo wadumulikeko ku ŵanthu ŵake, chifukwa walivi kuchitiya phaska Ambuya pa nyengo yake yakutemeka; munthu yo wakapinganga ulakwi wake. 14Asani mlendo waja mukati mwinu nayo so wachitiyenge Ambuya phaska, kwakulingana ndi dangu lapa phaska, ndi kwakuyana ndi kachitiru kake, dangu ndimoza pa mlendo ndi pa mweni charu.”
Mtambo pachanya pa chihema chakuwunganamo
(Chituwa 40.34-38)
15Ndipo pa zuŵa lo chingumikikiya chihema chakupaturika, mutambo unguvimba chihema cho, hema la chisimikizgu; ndipo ndi mazulo pachanya pa chihema chakupaturika penga kawonekedu nge nkhamoto mpaka ku mlenji. 16Viyo ndimu kwaŵiyanga mazuŵa ghose, mtambo unguchivunikiliya ndi msana, kawonekedu ka moto ndi usiku. 17Ndipo pa nyengo yose yo mtambo ungutuzgikapo pa hema, kukwera kuchanya, po ndipo ŵaYisraele ŵangusoka ulendo, ndipo pa malo po mtambo unguja, po ndipo ŵaYisraele ŵangugoŵa. 18Pakulangulika ndi Ambuya ŵaYisraele ŵangwenda ulendo, ndipo pakulangulika ndi Ambuya ŵaYisraele ŵangumika mahema; nyengo yose yo mtambo unguja pa chihema, ŵanguja mu ugoŵi. 19Ndipo asani mtambo ungujaliliya pa chihema kwa mazuŵa ghanandi ŵaYisraele ŵangusunga langulu la Ambuya ndipo kuti ŵangwenda ulendo cha. 20Ndipo kwaŵanga kuti mtambo uchijapo pa chihema mazuŵa ghamanavi, kwakulingana ndi langulu la Ambuya ŵanguja mu ugoŵi, ndipo kwakulingana ndi langulu la Ambuya ŵangwenda ulendo. 21Kwaŵanga kuti asani mtambo ungujapo kutuwa mazulo mpaka mlenji; ndi kukwezgeka ndi mlenji, po ndipo ŵangusoka ulendo; manyi mtambo ungukwezgeka ndi msana pamwenga usiku, ŵangusoka ulendo nyengo yeniyo. 22Manyi ghenga mazuŵa ghaŵi, pamwenga mwezi, pamwenga kuruska po, gho mtambo ungutandaliya pa chihema, kuja penipo, ŵaYisraele ŵangujaliliya mu ugoŵi kuti ŵangwenda lwendo cha; kweni po ungukwezgeke kuchanya ŵangwenda. 23Pakulangulika ndi Ambuya ŵangupumuwa mu ugoŵi ndipo pakulangulika ndi Ambuya ŵangwenda ulendo ŵangusunga langulu la Ambuya, lakuziya mwaku Mosese.
Currently Selected:
Maŵerengedu 9: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
