Maŵerengedu 8
8
Kakozgedu ka nyali
1Ndipo Ambuya angurongoro ndi Mosese anguti, 2“Kamba ndi Aroni, umunene kuti, po ukozga nyali, nkhonde ndi ziŵi ziŵaliyenge paurongo pa chikole-nyali.” 3Ndipo Aroni wanguchitadi viyo wangukozga nyali zo kuŵaliya paurongo pa chikole-nyali, nge ndimo Ambuya angulanguliya Mosese. 4Ndipo chikole-nyali chinguchitika ndi golide wakusula; wanguchikhozga pakusula lundi lake ndi maluŵa ghake gha pachanya, kwakuyana ndi chikozgu cho Ambuya angurongo Mosese.
Katozgekedu ka ŵaLevi
5Ndipo Ambuya angurongoro ndi Mosese, anguti, 6“Uŵatuzgemo ŵaLevi mukati mu ŵaYisraele, ndipo uŵatozge. 7Viyo ndimu ukachitiyanga kwaku wo, pakuŵatozga: uŵamijiye maji ghakutozge, ŵamete liŵavu lawo lose, ŵachape vivwaro vya wo ndipo ŵasambe. 8Pavuli ŵato kankhuzi ndi mpasku wake wa ufwa wamampha wakusazgika ndi mafuta, ndipo ukatonga kankhuzi kanyake kaŵe mpasku wapa ulakwi. 9Ukamikanga ŵaLevi paurongo pa hema lakuwunganamo, ndipo ukawungang'anga mpingo wose wa ŵaYisraele. 10Po ukamikanga ŵaLevi paurongo pa Ambuya, ŵaYisraele ŵakaŵikanga manja ghawo pa ŵaLevi, 11ndipo Aroni wakaperekanga ŵaLevi paurongo pa Ambuya nge ndi mpasku wakuzungung'a wakuperekeka ndi ŵaYisraele, alinga kuti kuŵi kwaku iwo kuteŵete Ambuya. 12Ndipo ŵaLevi ŵakaŵikanga manja ghawo pa mutu ya nkhuzi zo, sono ukaperekanga yimoza kuŵa mpasku wapa ulakwi ndi yinyake kuŵa mpasku wakocha ku Ambuya, kupepeske ŵaLevi. 13Ndipo ukalamuliyanga ŵaLevi kuti ŵateŵete Aroni ndi ŵana ŵake, ndipo uŵapereke kuŵa mpasku wakuzungung'a ku Ambuya.
14“Viyo ndimu ukaŵatuzgiyangamo ŵaLevi mukati mu ŵaYisraele, ndipo ŵaLevi ŵakaŵanga ŵangu. 15Ndipo pavuli paku cho ŵaLevi ŵakaserenga kwachiteŵete mu hema lakuwunganamo, pavuli pakutozgeka ndi kuperekeka kwawo ndi iwe nge ndi mpasku wakuzungung'a. 16Chifukwa ŵaperekeka ŵamphumphu kwaku Ine kutuwa mu ŵaYisraele; mu malo ghaku wose ŵa umwali, ŵa umwali ŵa ŵaYisraele wose, ndaŵato kuŵa ŵangu. 17Pakuti ŵa umwali wose mu ŵaYisraele mbangu, wose ŵa ŵanthu ndi ŵa viŵetu; pa zuŵa liya ndingubayiya ŵa umwali wose mu charu cha Egipiti, ndingujipatuliya ŵaYisraele kuŵa ŵangu, 18ndipo ndato ŵaLevi mu malo gha ŵa umwali ŵa ŵaYisraele. 19Ndipo ndapaska ŵina Levi nge nchawanangwa kwaku Aroni ndi ŵana ŵake kuteŵete mu malo gha ŵaYisraele, mu hema lakuwunganamo, ndi kupepeske ŵaYisraele, alinga kuti ŵaYisraele, ŵachiŵandika ku malo ghakupaturika ŵareke kufwa ndi chideru.”
20Viyo Mosese ndi Aroni ndi mpingu wose wa ŵaYisraele ŵanguŵachitiya ŵaLevi nge ndimo Ambuya angulanguliya Mosese gha pa ŵaLevi, ndimu ŵaYisraele ŵanguchitiya. 21Ndipo ŵaLevi ŵangujitozga ku ulakwi, ndi kuchapa vivwaro vyawo; ndipo Aroni wanguŵapereka kuŵa mpasku wakuzungung'a paurongo pa Ambuya, ndipo wanguŵapepeske kuŵatozga. 22Ndipo pavuli paku ichi ŵaLevi ŵangusere kwachichita uteŵete wawo mu hema lakuwunganamo pa urongozgi waku Aroni ndi ŵana ŵake; nge ndimo Ambuya angulanguliya Mosese pa ŵaLevi, viyo ndimo ŵanguchitiya nawo. 23Ambuya angurongoro ndi Mosese, 24“Ichi ndicho cha ŵaLevi: kwamba pa virimika machumi ghaŵi ndi vinkhonde (25) ndi kuruska po ŵakaserenga kwa chiteŵeta mu hema lakuwunganamo; 25ndipo kwamba po umoyo wa virimika machumi ghankhonde (50) ŵakajowonga kuchita uteŵete wo, ndipo kuti ŵakawuteŵetanga so cha, 26kweni ŵawovyenge ŵaka ŵanyawo, kusunga umampha, vinthu vyamu hema lakuwunganamo. Viyo mulamuliye ŵaLevi gha uteŵete wawo.”
Currently Selected:
Maŵerengedu 8: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
