ŴaLevi 21
21
Marangu gha ŵazukuru
1Ndipo Ambuya anguti kwaku Mosese, “Kamba ku ŵazukuru ŵana ŵaku Aroni, unene kwaku wo kuti paulevi yumoza waku wo watenere kujikazuzga chifukwa cha wakufwa mukate mu ŵanthu ŵake. 2Kweni pa mbali wake wapafupi, awiske, anyina, mwana wake munthurumi, mwana wake munthukazi, mwana munyake, 3pamwenga mzichi wake mwali (yo ngwapafupi nayo chifukwa walivi kuŵirwa; pa chifukwa chaku iwo wangaziŵa kujikazuzga). 4Wareke kujikazuzga pakuŵa murumi mukati mu ŵanthu ŵake, kujikazuzga mwa viyo. 5Wareke kumeta chimbembezuli pa mutu yawo, chingana nkhumetere kurwandi myembe yawo, chingana nkhutema simbo ya maliŵavu ghawo. 6Ŵakaŵanga ŵakupaturika kwaku Chiuta wawo, kweni kukazuzga zina laku Chiuta wawo cha; pakuti iwo ŵapereka sembe zapa moto ku Ambuya, chiŵande chaku Chiuta wawo; chifukwa cho ŵakaŵanga ŵakupaturika. 7Kuti watonge munthukazi mureŵi cha, pamwenga munthukazi yo wakukazuzgika cha; chingana nkhuti munthukazi yo wakupatika ndi murumi wake nako cha; pakuti mzukuru ngwakupaturika kwaku Chiuta wake. 8Mukamupatuwanga pakuti iyo wapereka chiŵande chaku Chiuta winu; kwaku imwe wakaŵanga wakupaturika, pakuti Ine mbuyamwe yo wapatuwa ndi kutoweska imwe, nde wakupaturika. 9Ndipo mwana munthukazi wa mzukuru we yose, asani wakajikazuzganga pakuchita ureŵi wakazuzga awiske; yo wakawochekanga ndi moto.
10“Mzukuru yo ndi mura pa ŵabali ŵake, yo pa mutu pake pakudirika mafuta ghakupaka kumupatuwa, yo wakupaturikiya kuvwara vivwaro, wakafwatuwanga sisi laku mutu wake cha, pamwenga kuparuwa vivwaro vyake; 11wangaserenga cha ko kwe chiŵanda, manyi ncha awiske pamwenga cha anyina; wangajikazuzga; 12wareke kutuwamo mu malo ghakupaturika, pamwenga kukazuzga malo ghakupaturika ghaku Chiuta wake; pakuti kupaturika kwa mafuta ghakupaka ghaku Chiuta wake ghe pa mutu wake: Ndine Ambuya. 13Wato munthukazi mwali wambura kuŵirwapo. 14Choko, pamwenga wakupatikapo, pamwenga munthukazi mureŵi, yaŵa wangatonga cha; kweni watonge mwali wamu ŵanthu ŵake; 15mwakuti wareke kukazuzga ŵana ŵake mu ŵanthu ŵake; pakuti ndine Ambuya ndingumupatuwa.”
16Ambuya angunena ndi Mosese, 17“Kamba kwaku Aroni, paulevi nanga njumoza wakupapika mwaku iwe mu migoneze yose, yo wendi kalema wakazanga kupereka chiŵande chaku Chiuta wake. 18Pakuti palivi yumoza yo wendi kalema wakanderenga pafupi; munthu wachiburumutiya, pamwenga wakupunduka, pamwenga yo wendi bala pa maso, pamwenga chiŵalu chitali kuruskako ku chinyake. 19Pamwenga yo we ndi rundi lakupwetekeka pamwenga janja lakupwetekeka. 20Pamwenga gonyu pa msana, pamwenga mufupi ukongwa, pamwenga munthu wambura kuwona umampha, pamwenga nthenda yakunyenye, pamwenga vitupatupa, pamwenga muthenu; 21paulevi munthu yumoza wakupapika mwaku Aroni mzukuru wakuŵa ndi kalema yo wakazanga kufupi kuzachipereka sembe za Ambuya zapa moto, pakuti wendi kalema, kuti wazenge kufupi cha kuzachipereka chiŵande chaku Chiuta wake. 22Wangaziŵa kurgha chiŵande chaku Chiuta, nanga nchakupaturika ukongwa ndi cha vinthu vyakupaturika; 23kweni kuti wakazanga kufupi ndi chivwinkhu cha, pamwenga kuza ku jochero, chifukwa wendi kalema; vinu wangakazuzga malo ghangu ghakupaturika, pakuti ine ndine Ambuya yo watighapatuwa.” 24Viyo Mosese wangukamba kwaku Aroni, ku ŵana ŵake, ndi ku ŵaYisraele wose.
Currently Selected:
ŴaLevi 21: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
