ŴaLevi 22
22
Ŵazukuru ndi vinthu vyakupaturika
1Ndipo Ambuya angutiti kwaku Mosese, 2“Kambiya Aroni ndi ŵana ŵake kuti ŵajituzgeko ku vinthu vyakupaturika vya ŵaYisraele, vyo ŵatuvipaturiya kwaku ine, alinga kuti ŵareke ku kazuzga zina langu lakupaturika. Ndine Ambuya. 3Uŵakambiye, ‘Asani we yose wa mphapu yinu mu migonezi yose waŵandika ku vinthu vyakupaturika, vyo ŵaYisraele ŵapaturiya ka Ambuya, penipo iyo ngwakukazuzgika, munthu yo wakadumulikangako kwaku Ine. Ndine Ambuya. 4Paulevi yomoza wa fuko laku Aroni yo ngwamakhate pamwenga wakutama ndi thenda yaku suruwa warghengepo vinthu vyakupaturika mpaka po watozgeka. We yose yo wakwaska kanthu ka ukazuzi chifukwa cha kukwaska wakufwa pamwenga munthu yo wakoza upafi; 5ndi yose wakukwaska chamoyo chakukwaŵa pasi cho chingamukazuzga pamwenga munthu yo wangamukazuzga ndi ukazuzi we wose, 6munthu waviyo wakaŵanga wakunguzgika mpaka mazulo; ndipo kuti wakarghangapo cha vinthu vyakupaturika kwambura kuti wasamba. 7Pavuli po dazi lasere, wakaŵanga wakutozgeka, sono wangaziŵa kurghapo vinthu vyakupaturika pakuti vyo ndivyo kurgha kwake. 8Cho nchakufwa chija pamwenga chakupalurika ndi vikoko wangarghanga cha, kujikazuzga nacho: Ndine Ambuya.’ 9Chifukwa cho ŵazukuru ŵakavwiyanga kurangula kwangu; vinu ŵangatopo ulakwi ndi ŵangafwa pakukazuzga zina langu: Ndine Ambuya wo atiŵapatuwa.
10“Munthu ŵaka wangarghangapo cha chinthu chakupaturika. Mlendo wakutandara wa mzukuru pamwenga wanchitu wa mphoto wangarghangapo cha chinthu chakupaturika; 11kweni asani mzukuru wagula muŵanda kuŵa wake, ndi ndrama zake, muŵanda yo wangaziŵa kurghapo cho, ndipo wo ŵapapika mu nyumba yake ŵangarghapo kurgha kwake. 12Asani mwana muthukazi wa mzukuru waŵirwa ku munthu wake kuti wakarghangapo cha vya sembe ya vinthu vyakupaturika. 13Kweni asani mwana munthukazi wa mzukuru nchoko pamwenga ngwakupatika ndi munthurumi, ndipo walivi mwana; ndipo wawere ku nyumba ya awiske mo walili weche muŵisi, wangaziŵa kurgha kwa awiske; kweni munthu waka kuti warghengepo cho cha. 14Asani munthu warghapo chinthu chakupaturika kwambura kuziŵa, wakasazgiyangako chigaŵa chimoza cha vinkhonde cha mtengo wake. Ndipo wakaperekanga chinthu chakupaturika cho ku mzukuru. 15Ŵazukuru ŵareke ku kazuzga vinthu vyakupaturika vya ŵaYisraele, vyo wapereka ku Ambuya, 16vinu vingazigha kunyamuwa maulakwi ndi kususkika, pakurgha vinthu vyawo vyakupaturika; pakuti; Ndine Ambuya wo atiŵapatuwa.”
17Ambuya angunena ndi Mosese, 18“Kamba kwaku Aroni ndi ŵana ŵake, ndi ku ŵaYisraele wose, Asani munthu ngwa nyumba yaku Yisraele, pamwenga ya ŵalendo ŵakutandara mwaku Yisraele wapereka sembe yake, manyi njakulipa rapu, pamwenga nja wanangwa yo yiperekeka ku Ambuya sembe yakocha, 19wakaperekanga yinthurumi yambura kalema, yakutuwa ku nkhuzi pamwenga mberere pamwenga mbuzi kuti yilondereke. 20Mungaperekanga cho che ndi kalema, pakuti kuti chikalonderekanga cha kwaku imwe. 21Ndipo penipo munthu wapereka sembe ya chimangu ku Ambuya, kufiska rapu, pamwenga ya wanangwa kutuliya ku mskambu pamwenga ku viŵetu, yitenere kuŵa yimphyemphyemu, muwulevi kalema mwako yo mwakuti yilondereke. 22Nyama zachibulumutiya, zakupunduka, pamwenga zakudumuka chiŵalo, zakusuruwa zakamukono pamwenga zavitipatupa, mungaziperekanga ku Ambuya cha chingana nkhuzipereka nge ndi sembe yakocha pa jochero ku Ambuya. 23Nkhuzi pamwenga mberere yo yendi chiŵalo chakulutiriya utali pamwenga chakulutiya ufupi mungaziŵa kuyipereka kuŵa sembe ya wanangwa kweni pa sembe ya mphenduzga kuti yingalondereka cha. 24Nyama yose yakuŵa ndi thongo lakupwetekeka, lakuphwafuka, lakuparuka, pamwenga lakudumuka, mungaperekanga ku Ambuya cha, pamwenga kujichitiya sembe mukati mu charu chinu cha, 25nyama yose ya mtundu uwu yo mwaronde ku mlendo mungaperekanga kuŵa chakurgha chaku Chiuta winu cha. Pakuti mwe kalema mwaku yo, chifukwa cha kupunduka kwake, kuti yikalonderekanga cha kwaku imwe.”
26Ambuya angunena ndi Mosese, 27“Asani nkhuzi pamwenga mberere, pamwenga mbuzi yapapika, yikajanga mazuŵa ghankhonde ndi ghaŵi pamoza ndi nyina; ndipo kwamba pa zuŵa lachinkhonde ndi chitatu yikalonderekanga kuŵa sembe yakocha ku Ambuya. 28Ndipo manyi nyina wake ndi ng'ombe pamwenga mberere, kuti mukabayanga zose ziŵi nyina ndi mwana mu zuŵa limoza pe cha. 29Ndipo muchipereka sembe yakuwonga ku Ambuya mukaperekanga yeniyo alinga kuti mulondereke. 30Yirghikenge zuŵa lenilo kuti musiyengepo yaku yo mpaka mlenji cha: Ndine Ambuya.
31“Viyo musungenge marangu ghangu ndi kughachita: Ndine Ambuya. 32Mungakazuzganga zine langu lakupaturika cha, kweni ŵaYisraele ŵakandipatuwanga ine; Ine Ndine Ambuya wo atimupatuwani; 33mweniyo wangumutuzgani mu charu cha Egipiti kuti waŵe Chiuta winu. Ndine Ambuya.”
Currently Selected:
ŴaLevi 22: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
