Yoswa 3

ŴaYisraele ŵambuka Yordane

1Ndi mlenjilenji Yoswa wangusoka ku Shitimu, pamoza ndi ŵaYisraele wose ŵangufika ku Yordane, ndipo ŵangugona penipa, ŵenga ŵandambuke. 2Pavuli pa mazuŵa ghatatu ŵaraŵara ŵangukamo mu ugoŵi, 3ndipo ŵanguŵanene ŵanthu kuti, “Asani miwona bokosi la phanganu la Ambuya winu linyamulika ndi ŵazukuru ŵaLevi penipo ndipo mukasokanga mu malo ghinu kulirondo, 4mwakuti muziŵi nthowa yo mwendengemo, pakuti mu charu ichi mulivi kwendamo kali kweni pakaŵanga mukhanju pakati paku imwe ndi yilo, utali wa mukhanju wo ukaŵanga akhumba mikono vikwi viŵi (2,000) munganderenga kufupi kwaku lo cha.” 5Yoswa wangunene ŵanthu kuti, “Mujipatuwe mwaŵeni; chifukwa mawa Ambuya akachitanga vyakuziziswa mukati mwinu.” 6Yoswa wanguti ku ŵazukuru, “Nyamuwani bokosi la phanganu ndipo jumphani paurongo pa ŵanthu.” Ŵangunyamuwa bokosi la phanganu lo.

7Ndipo Ambuya angunena ndi Yoswa, “Zuŵa lino ndambenge kukukuzga mu maso gha ŵaYisraele wose, mwakuti ŵapanikizge kuti mo ndinguŵiya ndi Mosese ndimo ndikaŵiyanga ndi iwe. 8Ndipo ukaŵalanguliyanga ŵakunyamuwa bokosi la phanganu, ‘Muchifika mu mphepete mwa msinji wa Yordane, mukamanga chiliri mu maji gha Yordane.’ ” 9Ndipo Yoswa wangunena ndi ŵaYisraele, “Zani kunu muvwi mazu gha Ambuya Chiuta winu.” 10Yoswa wanguti, “Paku ichi mukaziŵanga kuti Chiuta wamoyo we mukati mwinu ndikuti kwambura kutondeka wakadikiskanga paurongo pinu ŵaKanani, ŵaHiti, ŵaHivi, ŵaPerezi, ŵaGirgashi, Amori, ndi ŵaYebusi. 11Ehe, bokosi la phanganu la Ambuya ŵa charu chose chapasi likadanjiyanga paurongo pinu kuya ku Yordane. 12Viyo sono tonimo ŵanthurumi chumi ndi ŵaŵi mu mafuku gha ŵaYisraele, mu fuku limoza munthu yumoza. 13Ndipo kuŵenge kuti po marundi gha ŵazukuru ŵakunyamuwa bokosi la Ambuya (Ambuya ŵa charu chose chapasi), ghakapumuwanga mu maji ghamu Yordane, maji gho ghakarekanga kwenda, ndipo maji ghakusika kutuwa kenena ghakamanga ndundu pamoza.”

14Viyo po ŵanthu ŵanguti ŵasoka mu mahema ghawo kwachambuka Yordane pamoza ndi ŵazukuru ŵakupinga bokosi la phanganu paurongo pawo, 15(Yordane yo wasapatiya mu malikumba ghake ghose pa nyengo yose ya chivuna) po ŵakupinga bokosi ŵanguti ŵafika ku Yordane ndi kubizga marundi ghawo mu maji, 16maji ghakusika kutuwa kunena ghanguma, ndipo ghanguŵa ndundu kutali, ku Adama, musumba wa pafupi ndi Zaretana, ndipo maji ghakulazga ku nyanja ya mu Araba, Nyanja ya Mche, ghose ghangudumulika, ŵanthu ŵangwambuka pa kulereskana ndi Yeriko. 17Ndipo penipo ŵaYisraele wose wambukanga pa mtunda uyumu, ŵazukuru wo ŵangupinga bokosi la phangano la Ambuya ŵanguma pa mtunda uyumu mukati mu Yordane mpaka mtundu wose ungumara kwambukiya ku sirgha kwa Yordane.

Currently Selected:

Yoswa 3: TongaMw

Highlight

Copy

Compare