Yona 1
1
Yona wavwiya Ambuya cha
1Sono mazu gha Ambuya ghanguza kwaku Yona mwana waku Ambitayi, ghakuti, 2“Soka, ruta ku Nineve, msumba ukuru, ndi ukadanirizge ku ususka, pakuti uheni wawo wakwere paurongo pangu.” 3Kweni Yona wangusoka kuthaŵiya ku Tarshishi, kutuwapo paurongo pa Ambuya wangusikiya ku Yopa, ndi wangusaniya ngarawa yakulazgiya ku Tarshishi. Viyo wanguripa maripiro pakiyo, ndi wangusere mwaku yo, kuruta nawo ku Tarshishi, kuthaŵa paurongo pa Ambuya. 4Kweni Ambuya angutuma mphepo yikuru pa nyanja, ndipo kwenga lirondo lanthazi pa nyanja, viyo ngaraŵa yenga pafupi kusweka. 5Viyo ŵakwendeska ŵangopa, ndipo munthu yose wangudanirizga kwaku chiuta wake; ndi ŵangupong'a katundu yose yo wenga mu ngaraŵa kuyipepuska. Kweni Yona wangusikiya pasi mukati mwa ngarawa, ndipo wangura, ndikugona weniukongwa. 6Viyo nduna ya ngarawa yinguza kwake ndi yinguti kwaku iyo, “Ung'anamuwanji iwe pakugona? Yuka, dana kwaku Chiuta wako! Vinu Chiuta wako wangatikumbuka kuti tireke kuyowa.” 7Ndipo wanguti yose ku munyake, “Zaninge, ndi tichite mphenduzga, mwakuti tiziŵe chifukwa nchakuyani uheni uwu watiwiya.” Viyo ŵanguchita mayera, ndipo mayera ghanguwa paku Yona. 8Viyo ŵanguti kwaku iyo, “Tinene chifukwa nchakuyani uheni uwu watiwiya ifwe? Kumbi mlimu wako ngune? Ndipo waturiya nunkhu? Charu chako ndi ninchi? Ndipo ndiwe waku ŵanthu naŵa?” 9Ndipo wanguti kwaku iwo, “Ndine mu Hebere ndipo nditopa Ambuya, Chiuta wa kuchanya, yo wakwata nyanja ndi mtunda.” 10Viyo ŵanthu yaŵa ŵangopa weniukongwa ndipo ŵanguti kwaku iyo, “Nchine cho wachita?” Chifukwa ŵanthu ŵanguziŵa kuti wathaŵa paurongo pa Ambuya, chifukwa wanguŵanene. 11Ndipo ŵanguti kwaku iyo, “Kumbi tingachitanji kwaku iwe, kuti nyanja yitiŵiye bata?” Chifukwa Nyanja yinguyuka ukongwa ndi mphepo ya lirondo. 12Ndipo wanguti kwaku iwo, “Ndinyamuweni, ndipo ndipong'eni mu nyanja; viyo nyanja yimuŵiyeninge bata; chifukwa ndiziŵa kuti nchifukwa changu leka lirondo ili lamuwiyani.” 13Ndipuuli ŵanthu yaŵa ŵangwesa kuvuŵa kwakulimba kuwezge ngaraŵa ku mtunda, kweni ŵangutondeka, chifukwa nyanja yinguyuka ukongwa ndi kuŵapome. 14Chifukwa ichi, ŵanguliriya ku Ambuya, ndi ŵanguti, “Timuŵeyereni, Ambuya, tingafwa cha chifukwa cha umoyo wa munthu uyu ndipo mungaŵikanga paku ifwe cha ndopa zambura kalema; chifukwa ndimwe, Ambuya, mwachita cho nchakumukondweskani imwe.” 15Viyo ŵangumunyamuwa Yona, ndi ŵangumupong'a mu nyanja; ndipo nyanja yingureka kupoma. 16Ndipo ŵanthurumi ŵangopa Ambuya weniukongwa, ndipo ŵangupereka sembe ku Ambuya, ndi ŵangurapa marapo. 17Ndipo Ambuya angutuma chisomba chikuru kumeza Yona; ndipo Yona wenga mu nthombo ya chisomba mazuŵa ghatatu ndi mausiku ghatatu.
Currently Selected:
Yona 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
