Obadiya 1
1
Kujikuzga kwaku Edomu ndi kuwa kwake
1Chiwona chaku Obadiya.
Viyo atiti Ambuya Chiuta ndi Edomu:
Tavwa makani gho ghatuliya ku Ambuya,
ndipo thenga latumika mukati mu mitundu:
“Yukani! tiyeni timuyukiye kurwana nayo nkhondo!”
2Ehe, nkhakuŵikanga kuŵa mumana mukati mu mitundu,
ukayuyurikanga ukongwa.
3Kujikuzga kwa mtima wako kwaupusika, iwe uja mu zimphanji za majarawi,
wamweniwe malo ghako ghakujapo ghe pachanya,
iwe mu mtima wako ukamba,
“Njani wandisiskiyenge pasi pa dongo?”
4Chingana utijitukumuwa wija nge ndi nombo,
chingana chivimbo chako che mukati mu nyenyezi,
ndikusiskiyenge pasi, atiti Ambuya.
5Asani ŵankhungu ŵanguza kwako,
ndi asani ŵakuskoŵa ŵanguza ndi usiku
owe! kupasuka viŵi!
kumbi kuti ŵatinge ŵabenge cha vyakuŵakwana?
Asani ŵakupontho mphereska ŵanguza kwako
kuti ŵatinge ŵasiyengeko zakujaliya cha?
6Mo vyaku Esau vyatoleke,
usambasi wake wapenjeka!
7Ŵanthu wose wo ŵenga pa chimangu ndi iwe ŵakupusika,
ŵakudikiskiya ku mphaka;
wose wo ŵenga pa phangano nawe ŵakugoda;
ŵabwezi ŵako ŵamagomekezgeka ŵakuthya msampha kusi kwako
kuti iwe uziŵa ndi ichi cha.
8Kumbi mu zuŵa lo ndirekenge, atiti Ambuya,
kuparghang'a ŵavinjeru ŵaku Edomu,
ndi ŵazeru mu phiri laku Esau?
9Ndi vinkhara vinu vimarenge nthazi, owe Temana,
viyo kuti munthu yose waku phiri laku Esau
wadumulike ndi kubayika.
10Chifukwa cha phuzu lako lo unguchitiya mbali wako Yakobe,
soni zikukonge,
ndipo ubayikeyenge limu.
11Pa zuŵa lo unguma pade,
pa zuŵa lo ŵalendo ŵanguskoŵa vyuma vyake,
ndi ŵakwenda ŵangusere mu malikomo ghake
ndi kuchitiya mphenduzga Yerusalemu,
iwe wengenjumoza waku wo.
12Kweni iwe, mphanyi ungwene ndi
zuŵa la mbali wako, zuŵa la soka lake;
kuti mphanyi wakondwa cha ndi ŵanthu ŵaku Yuda
mu zuŵa la pharghaniko lawo;
kuti mphanyi wajikuzga cha,
mu zuŵa la suzgu.
13Mphanyi ungureka kusere mu malikomo gha ŵanthu ŵangu
mu zuŵa la soka lake,
mphanyi ungureka kukondwa pa suzgu yake mu zuŵa la soka lake;
pamwenga kuskoŵa chuma chake
mu zuŵa la soka lake.
14Ndipo mphanyi kuti unguma mu nthowa cha kubaya ŵake
wo ŵathaŵanga;
pamwenga kuti, mphanyi ungupereka cha wo ŵangujapo
mu zuŵa la suzgu.
15Chifukwa zuŵa la Ambuya laŵandika pa mitundu yose.
Nge ndimo wachitiya, viyo ndimo kuchitikiyenge kwako,
nchitu zako ziwezgeke pa mutu wako.
16Chifukwa nge ndimo mwamwiya pa phiri langu lakupaturika,
viyo ndimo mitundu yose yakuzunguriya yikamwiyanga kwambura kurekezga;
ŵamwenge, ndi kumeza,
ndipo ŵaŵenge nge ŵengako cha.
17Kweni mu phiri Zioni mukaŵanga wo ŵapozomoka,
ndipo liŵenge lakupaturika;
ndipo ŵamu nyumba yaku Yakobe ŵaŵenge navyo vihara
vyawo ndi vyawo.
18Nyumba yaku Yakobe yiŵenge moto,
ndi nyumba yaku Yosefe mlipu;
ndipo yaku Esau yiŵenge viputu;
ŵakaviwochanga ndi kuvimara,
ndipo paulengevi ŵakujapo ŵamu nyumba yaku Esau;
chifukwa Ambuya akamba.
19Ndipo ŵaku Negebe ŵakarondanga phiri laku Esau,
ndi wo ŵaku Shefela charu cha ŵaFilisti,
ŵakarondanga charu chaku Efraimu
ndi charu chaku Samaria,
ndi Benjamini wakarondanga Gileada.
20Ndipo ŵamikoli wo ŵemu Hala ŵamu mzinda wa ŵanthu ŵaku Yisraele,
ŵakarondanga Filistia mpaka ku Zarefata;
ndipo ŵamikoli ŵaku Yerusalemu, wo ŵemu Safarada,
ŵakarondanga misumba yaku Negebe.
21Ŵakutaska ŵakakweriyanga ku phiri Zioni kweruzga phiri laku Esau;
ndipo ufumu uŵenge wa Ambuya.
Currently Selected:
Obadiya 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
