Ŵeruzgi 13

Phanganu la paku Manowa

1ŴaYisraele ŵanguwerezgapo kuchita uheni mu maso gha Ambuya; ndipo Ambuya anguŵapereka mu janja la ŵaFilisti kwa virimika machumi ghanayi (40).

2Ndipo wengapo munthu waku Zora wa mtundu waku Dani, mweniyo zina lake lenga, Manowa; muwoli wake wenga chumba. 3Ndipo mungelo wa Ambuya wanguwoneka ku munthukazi wanguti kwaku yo, “Ehe, we chumba ndipo ulivi ŵana, kweni ukaŵanga ndi nthumbo, ukapapanga mwana munthurumi. 4Chifukwa cho cheŵa, ungamwanga vinyo cha pamwenga chakumwa chakuloŵereska, ndipo ungarghanga ke kose ko nkhamunguzgu cha, 5pakuti nadi, ukaŵanga ndi nthumbo ndi upapenge mwana munthurumi. Pakaŵangavi lwembe lo likazanga pa mutu wake, chifukwa munyamata yo wakaŵanga muNaziri#13.5 muNaziri: yo ngwakupatuliskikiya kwaku Chiuta. kwaku Chiuta kwamba pa kawi; ndipo wambenge kuwombo Yisraele ku janja la ŵaFilisti.” 6Sono munthukazi wanguzachinene mrumi wake, “Munthu waku Chiuta wanguza kwangu, ndipo kawonekeru kake kenga kawonekeru ka mungelo waku Chiuta, wakofya ukongwa, ndengavi kumufumba ko wangutuliya, ndipo wengavi kundinene zina lake; 7kweni wangunena nane, kuti, ‘Ehe, ukaŵanga ndi nthumbo ndi upapenge mwana munthurumi, chifukwa cho ungamwanga vinyo pamwenga chakumwa chakuloŵereska cha, ndipo ungarghanga ke kose ka munguzgu cha, pakuti munyamata yo wakaŵanga muNaziri kwaku Chiuta kwamba pa kawi mpaka ku nyifwa yake.’ ”

8Sono Manowa wanguŵeyere ku Ambuya, wanguti, “Ambuya, mwe, nditukurombani, zomerezgani munthu waku Chiuta yo mungutuma wazi so kwaku ifwe, wazitisambizge mo tazamuchitiya ndi mwana yo wakapapikanga.” 9Chiuta wangutegherezga ku mazu ghaku Manowa, ndipo mungelo waku Chiuta wanguza so ku munthukazi yo penipo wanguja pasi mu munda; kweni Manowa mrumi wake kuti wenga nayo pamoza cha. 10Munthukazi wanguchimbiya kwakutinthimika kwachinene mrumi wake, “Ehe, munthu yuwa wanguza kwangu zuŵa lo wawonekaso.” 11Manowa wangusoka wangurondo muwoli wake, wanguza ku munthu yuwa wanguti kwaku iyo, “Kumbi ndiwe ungurongoro ndi uyu munthukazi?” Iyo wanguti, “Ndine.” 12Manowa wanguti, “Sono asani mazu ghako ghaneneska, na kajalidu ka umoyo wa mwana kakaŵanga kakutinji, ndipo nanga wakachitanganji?” 13Ndipo mungelo wa Ambuya wanguti kwaku Manowa, “Mwaku vyose vyo ndingukamba ku munthukazi watenere kucheŵa. 14Wangarghanga che chose chakutuliya ku mphereska chingana nkhumwa vinyo cha, pamwenga kumwa chakuloŵereska, nanga nkhurgha che chose cha munguzgu cha; vyose vyo ndingumuchenjezga watenere kuvwiya.”

15Manowa wangunena ndi mungelo wa Ambuya, “Ndipempha, tizomerezge kukuswereska, tikurongosole kamsese ka mbuzi.” 16Ndipo mungelo wa Ambuya wanguti kwaku Manowa, “Asani mwandimika, kuti ndikarghanga kurgha kwinu cha, kweni asani murongosonge mpasku wakocha, iku muwupaske ku Ambuya.” (Pakuti Manowa wengavi kuziŵa kuti wenga mungelo wa Ambuya.) 17Manowa wanguti ku mungelo wa Ambuya, “Zina lako ndiwe yani, alinga kuti penipo mazu ghako gharongonge uneneska, tizichikutumbika?” 18Mungelo wanguti kwaku iyo, “Chifukwa chine ufumba zina langu, pakuwona kuti nchakuziziswa?” 19Viyo Manowa wanguto kamsese ndi mpasku wa ufwa, wanguvipaska mpasku pa jarawe ku Ambuya wo ŵachita vyakuziziswa. 20Ndipo po mlipu ungukwera kurata kuchanya kutuwa pa jochero, mungelo wa Ambuya wangukwera mu mlipu wa jochero Manowa ndi muwoli wake ŵachilereska; ndipo ŵanguwa pasi kavunama.

21Mungelo wa Ambuya kuti wangumuwoneke so Manowa ndi muwoli wake cha. Sono Manowa wanguziŵa kuti wenga mungelo wa Ambuya. 22Ndipo Manowa wangunena ndi muwoli wake, “Kwakuneneska tikafwanga pakuti tawona Chiuta.” 23Kweni muwoli wake wanguti kwaku iyo, “Asani Ambuya ang'anamuwanga kutibaya, mphanyi kuti anguronde chisopochakocha ndi mpasku wa ufwa wa manja ghidu cha, chingana nkhutirongo vinthu ivi vyose, pamwenga kutitauliya vinthu vya viyo nge ndi ivi.” 24Ndipo munthukazi wangupapa mwana munthurumi, wangumudana zina lake Samsoni; mhurwa yo wangukuwa, ndipo Ambuya angumutumbika. 25Ndipo mzimu wa Ambuya ungwamba kumuchenjereska mu Mahane-dani, pakati pa Zora ndi Eshetalo.

Currently Selected:

Ŵeruzgi 13: TongaMw

Highlight

Copy

Compare