Ŵeruzgi 12
12
Jefta ndi Efraimu
1Ŵanthurumi ŵaku Efraimu ŵangudanika kuskoma vidya vya nkhondo, ndipo ŵangwambukiya ku Zafoni, ŵanguti kwaku Jefta, “Chifukwa nchine cho ungwambukiya kusirgha kwachirwana ndi Amoni ndipo wengavi kutidana kuti tirute nawe? Tikawochanga nyumba yako ndi moto, iwe, nawe we mwenimo.” 2Ndipo Jefta wanguti, “Ine ndi ŵanthu ŵangu tenga pa mphindanu ndi Amoni, ndipo po ndingumudanani, kuti mungundipozomoska cha ku janja lawo. 3Po ndinguwona kuti mungukana kundipozomoska, ndingujitole umoyo wangu mu janja langu ndingwambukiya kusirgha kwachimikana ndi Amoni; ndipo Ambuya anguwapereka mu janja langu, na cho mwaziya kwaku ine msana wale nchine kuzachirwana nane?” 4Sono Jefta wanguungang'a ŵanthu wose ŵamu Gileada, ŵangurwana ndi Efraimu; ndipo ŵanthu ŵamu Gileada ŵangukoso Efraimu, chifukwa watinge, “Imwe mwa ŵaGileada mukuthaŵa kwaku Efraimu, mukati mwaku Efraimu ndi Manase.” 5Ndipo ŵaGileada ŵangupoka vipali vya Yordane ku ŵaEfraimu. Ndipo asani yose yo wanguthaŵa kwaku Efraimu wanguti, “Rekani ndambukiye kusirgha”, ŵanthu ŵamu Gileada ŵanguti kwaku yo, “Kumbi we mwina Efraimu?” Iyo wachiti, “Awa”, 6ŵanguti kwaku iyo, “Sono kamba kuti Shibolete”, iyo wanguti, “Sibolete”, pakuti watondekanga kulizumbuwa kwakurunjika mbweno ŵamukonga ndi kumbaya pa vipali vya Yordane. Ndipo penipa ŵangufwiyapo nyengo yiya ŵaEfraimu vikwi machumi ghanayi ndi viŵi (42,000).
7Jefta wangweruzga Yisraele virimika vinkhonde ndi chimoza. Pavuli wangufwa, ndi wanguŵikika mu Gileada.
Ibzani, Eloni ndi Abadoni
8Pavuli pake Ibzani waku Betelehemu wangweruzga Yisraele. 9Wenga ndi ŵana ŵanthurumi machumi ghatatu (30); ndi ŵana ŵanthukazi machumi ghatatu wanguŵaŵirwiska kubwalo ku khamu lake, ndipo ŵana ŵanthukazi machumi ghatatu wanguŵaserezga kutuliya kubwalo kutorana ndi ŵana ŵake ŵanthurumi, ndipo wangweruzga Yisraele virimika vinkhonde ndi viŵi. 10Pavuli wangufwa Ibzani, wanguŵikika mu Betelehemu.
11Pavuli paku iyo Eloni mu Zebuluni wangweruzga Yisraele. Wangweruzga Yisraele virimika chumi. 12Pavuli Eloni mu Zebuluni wangufwa, wanguŵikika mu Ajaloni mu charu chaku Zebuluni.
13Pavuli pake Abadoni mwana waku Hilele mu Piratoni wangweruzga Yisraele. 14Wenga ndi ŵana ŵanthurumi machumi ghanayi ndi ŵazuku ŵanthurumi machumi ghatatu, wo ŵakweranga pa zimbunda machumi ghankhonde ndi ghaŵi (70); ndipo wangweruzga Yisraele virimika vinkhonde ndi vitatu. 15Pavuli Abadoni mwana waku Hilele, wangufwa, ndipo wanguŵikika mu Piratoni mu charu chaku Efraimu, mu charu cha mitunthu cha Amaleke.
Currently Selected:
Ŵeruzgi 12: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
